Nzyobayanda Bana Kubazyali
IMUNTU woonse uuba muzyali ulabeleka mulimo uutakonzyi kuteelelwa kabotu abantunsi. Muzyali umwi aumwi kuli cintu ncaaba. Aboobo eeco citalika kukomena mwida lyamutumbu, mmuntu wini-wini uupona alimwi uukkwene. Aboobo tacigambyi pe kuti eelyo mwana nazyalwa, ibantu bacaamba kuti “mmaleele aakuzyala.”
Ee, ikuzyala bana mmatalikilo buyo aamukuli wabazyali. Kumatalikilo, ibana bavwanda bayandika kubacitila zintu zyoonse, pele mbobayaabukomena, inga balayandika azimbi kunze buyo lyakukwabililwa akulanganizyigwa munzila yakumubili. Bayandika kugwasyigwa kukomena mumizeezo, mumoyo, mukulilemeka alimwi akumuuya.
Ikutegwa bakomene kabotu, ibazyali beelede kubayanda kapati bana babo. Nokuba kuti ikwiile kubaambila kuti balayandwa kulagwasya, kuyandika kucita cimwi cintu kutegwa musinizye zyaambwa buyo. Inzya, ibana beelede kubona kuti bazyali babo ncikozyanyo cibotu. Bayandika kusololelwa mubukkale bweelede anjiisyo nzyobeelede kutobela mubuumi bwabo. Eezyi zilayandika kucitwa kuzwa ciindi nobacili basyoonto kuya kumbele. Izintu zyuusisya kapati zilakonzya kucitika alimwi zilacitika eelyo bana nobatagwasyigwi cakufwambaana.
Injiisyo ziinda zyoonse kubota nzyeezyo zijanika mu Bbaibbele. Imalailile aayeeme a Bbaibbele alagwasya munzila zinji zilibedelede. Kwiinda mumalailile aali boobo, ibana batalika kuzyiba kuti nzyobaambilwa tazili zyeezyo zizwa kumuntu uuli woonse, pele izyaambwaa Mulengi, Wisi wabo wakujulu. Eeci cipa kuti lulayo lulemekwe munzila iitakonzyi kweezyanisyigwa.
Ibbaibbele likulwaizya bazyali kuti babeleke canguzu ikusindamizya njiisyo ziluzi mumizeezo yabana babo kutegwa kabaziyeeya lyoonse akuzitobela. Pele bana mbobakomena, bunji bwaziindi ibazyali cilabayumina kubandika ambabo makani aajatikizya zintu ziyandika kapati mubuumi. Ibbuku eeli lyakuti, Amwiiye ku Mwiiyi Mupati, lyabambilwa kuti limugwasye ikutajanika mubukkale buli boobo. Liyoogwasya bazyali abana babo ikujana makani aakumuuya ngobakonzya kubala antoomwe. Kuyungizya waawo, lyeelede kukulwaizya kubaa mibandi akati kabana alimwi abaabo ibababalila bbuku eeli.
Mulabona kuti ibbuku eli lilijisi zibeela oomo bana mobayandika kwiingula. Kuli mibuzyo yeelela minji iibikkilizyidwe mumakani aasimbidwe. Nomwasika amibuzyo eeyi, mulabona keengo aaka (—). Eeci cimuyeezya kuti mweelede kwiima aniini akukulwaizya mwana kwiingula nzyazi. Ibana balayanda kutola lubazu lyoonse. Ikuti mwana katazumizyigwi kwaamba nzyazi, ulakonzya kufwambaana kucileka kubikkila maanu.
Pele iciyandika kapati ncakuti, imibuzyo eeyi iyoomugwasya kuzyiba kuyeeya kwamwana ooyo. Ee, imwana ulakonzya kupa bwiinguzi butaluzi. Pele imakani aalembedwe aatobela mubuzyo umwi aumwi agwasya mwana kuyeeya munzila mbotu.
Icibeela ciyandika cabbuku eeli nzifwanikiso nzyolijisi iziinda ku 230. Ibunji bwazeezyi zilijisi makani aasindikizya cifwanikiso aakulwaizya mwana kwiingula mbwayeeya kweelanaa nzyaabona alimwi anzyaabala. Aboobo amuzilange-lange zifwanikiso amwana. Zilakonzya kuba cibelesyo cibotu cigwasya kuyiisya akukankaizya zintu ziyandika izyayiigwa.
Eelyo mwana naacizyiba kubala, amumukulwaizye kuti kamubalila zili mubbuku cakupozya alimwi akunoolibalila lwakwe mwini. Ikuti kalibala bbuku eli lyoonse, ilulayo lwalyo lubotu unooluyeeya lyoonse alimwi uyoolubikka mumoyo. Pele ikutegwa bulongwe alimwi abulemu akati kanu amwanaanu kazili ziyumu, amubone kuti mwalibala antoomwe bbuku eli alimwi kamucita obo lyoonse.
Munzila yatakali kuyeeyelwa imyaka misyoonto buyo musyule, ibana lino balalibonena zintu zijatikizya koonana kutali kwamumulawo, ikusyoma mizimo alimwi amicito iimbi iisesemya. Aboobo bayandika kukwabililwa, eeco ibbuku eeli ncoligwasya munzila yabulemu pele iigaminide. Nokuba boobo, ibana balayandika kugwasyigwa kubikkila maanu kuli yooyo Nkobuzwa busongo boonse, Taateesu wakujulu, Jehova Leza. Eeci ncaakali kucita lyoonse Jesu, Imwiiyi Mupati. Tusyoma kuti ibbuku eeli liyoomugwasya nywebo alimwi amukwasyi wanu ikupona munzila iyoomukkomanisya Jehova, eelyo ikucita boobo kuyoomupa kulongezyegwa mane kukabe kutamani.