Sena Jesu Wakazyalwa mu December?

KUNYINA Bbaibbele nolitwaambila buzuba Jesu naakazyalwa. Nokuba boobo, litupa twaambo tugwasya kuzyiba kuti tanaakazyalwa mu December pe.

Amulange-lange mbozyibede zintu kujatikizya mbobuca aciindi camwaka eeco ku Betelehemu nkwaakazyalilwa Jesu. Imwezi waba Juda wa Chislev (iweendelana a November/December) wakali mwezi nokutontola alimwi nokwakali kuwa mvwula. Imwezi wakali kutobela yooyu wakali wa Tebeth (December/January). Mumwezi ooyu nokwakali kutontola kapati mumwaka, mumasena aali mumalundu mwakali kuba acaanda zimwi ziindi. Atulange-lange ncolitwaambila Bbaibbele kujatikizya bweende bwaziindi zyamwaka kubusena oobo.

Imulembi wa Bbaibbele Ezara utondezya kuti mwezi wa Chislev mmasimpe wakali mwezi wakazyibidwe kapati kuti wakali kutontola cini-cini alimwi kwakali kuwa amvwula. Naazwa akwaamba kuti nkamu yabantu yakabungana mu Jerusalemu “mubuzuba bwamakumi obile bwamwezi wamusanu aine” nkokuti wa Chislev, Ezara uluula kuti bantu bakalikkede “balakankama . . . akaambo kamvula.” Akaambo kambobuca aciindi camwaka eeci, ibantu bakabungene beni bakati: “Nciindi camvula. Tatukonzyi kwiima anze.” (Ezara 10:9, 13; Jeremiya 36:22) Aboobo tacigambyi pe kuti beembeli bakali kukkala mubusena ooko nkwaakazyalilwa Jesu bakabona kuti balo antoomwe amatanga aabo tiibakacili kucezezya anze imasiku mumwezi wa December!

Pele Bbaibbele lyaamba kuti beembeli bakali musyokwe kabeembela matanga aabo imasiku buzuba naakazyalwa Jesu. Mubwini, sikulemba Bbaibbele Luka utondezya kuti aciindi eeco, beembeli “bakali musokwe, beembela butanga bwabo masiku” munsi lya Betelehemu. (Luka 2:8-12) Amubone kuti beembeli mubwini bakali kukkala musyokwe kulutanga, tiibakali kweendeenda buyo anze masikati pe. Imatanga aabo akali musyokwe kulutanga imasiku. Sena bupanduluzi oobo bwakukkala anze buleendelana akutontola alimwi amvwula iiliko ku Betelehemu mu December? Takweendelani pe. Aboobo izyakacitika aciindi cakuzyalwa kwa Jesu zitondezya kuti tanaakazyalwa mu December pe.a

Ijwi lya Leza lilatwaambila buzuba bwini Jesu naakafwa, pele kunyina makani manji alimwi aagaminide ngolijisi kujatikizya buzuba mbwaakazyalwa. Eeci cituyeezya majwi aa Mwami Solomoni aakuti: “Izina ibotu ndibotu kwiinda muunde, abuzuba bwakufwa mbubotu kwiinda buzuba bwakuzyalwa.” (Mukambausi 7:1) Aboobo tacigambyi pe kuti Bbaibbele lipa makani manji aagaminide kujatikizya mulimo alufwu lwa Jesu, pele lipa buyo masyoonto kujatikizya buzuba mbwaakazyalwa.