Ncolyaamba Bbaibbele Kujatikizya Kwaandaana Alimwi Akulekana

Jehova uyanda kuti banabukwetene kabasyomeka kucikonke cabo calukwatano. Naakakwasya ba Adamu a Eva, Jehova wakaamba kuti: ‘Mwaalumi uyakukakatila kumukaintu wakwe, alimwi bayooba mubili omwe.’ Kumbele Jesu wakakaamba alimwi kaambo aaka akuyungizya kuti: “Aboobo aabo Leza mbaaswaanganya kutabi muntu uubaandaanya.” (Matalikilo 2:24; Matayo 19:3-6) Aboobo, Jehova a Jesu cikwati bacibona kuti taceelede kumana ccita buyo kuti omwe akati kabanabukwetene wafwa. (1 Bakorinto 7:39) Mbokunga cikwati cilisetekene, ikulekana makani mapati. Mubwini, Jehova ulikusulide kulekana kutazumizyidwe mu Magwalo.—Malaki 2:15, 16.

Ntwaambo nzi twamu Magwalo tuzumizya kulekana? Jehova ulibusulide bwaamu abumambe. (Matalikilo 39:9; 2 Samuele 11:26, 27; Intembauzyo 51:4) Masimpe, bwaamu ncibi cipati kuli Leza cakuti ulabazumizya bantu kulekana akaambo kacibi eeci. (Kuti kamuyanda kuzyiba cijatikizyidwe mubwaamu, amubone Cibalo 9, muncali 7, nkobupanduludwe bwaamu.) Jehova ulimupede mukaintu naa musankwa wabisyilwa inguzu zyakusala kuzumanana kukkala naa kulekana angobakwetene limwi iwakacita bwaamu. (Matayo 19:9) Aboobo, ikuti naa ooyo wakabisyilwa wasala kuti balekane, takonzyi kumunyemya Jehova akaambo kantaamu eeyo njaabweza. Nokuba boobo, imbungano ya Bunakristo tiikulwaizyi muntu uuli woonse kuti balekane. Mubwini, zimwi ziindi musankwa naa mukaintu wakabisyilwa ulakonzya kusala kuti bazumanane kukkala amweenzinyina iwakabisya, ikapati kuti naa weempwa ncobeni. Nokuba boobo, aabo bajisi twaambo twamu Magwalo itubazumizya kulekana beelede kulisalila akulinyamuda mukuli caboola kuzintu zili zyoonse zikonzya kucitika ikuti naa balekana.—Bagalatiya 6:5.

Mubukkale bumwi bukatazya kapati, Banakristo bamwi basala kwaandaana naa kulekana angobakwetene limwi nokuba kuti tanaakacita bwaamu. Mubukkale oobo, Bbaibbele lyaamba kuti ooyo wasiya mweenzinyina ‘atakwatwi naa kukwata pe,’ biyo-biyo ajokele “akuyanzana” amukaakwe naa mulumaakwe. (1 Bakorinto 7:11) Munakristo ooyo taangulukide pe kujana musankwa naa mukaintu umbi. (Matayo 5:32) Amulange-lange bukkale bumwi bukatazya kapati bupa kuti banabukwetene basale kwaandaana angobakwetene limwi.

Kutapa naa kutajanina mukwasyi ziyandika acaali. Mukwasyi ulakonzya kucetaala kapati cakuti tabajisi zintu ziyandika mubuumi akaambo buyo kakuti mulumi tayandi kubapa naa kubajanina zintu eezyi nokuba kuti ulakonzya kucita oobo. Bbaibbele lyaamba kuti: “Ikuti muntu katababambi kabotu . . . bamuŋanda yakwe, nkokuti walukaka lusyomo alimwi mubi kapati kwiinda muntu uunyina lusyomo.” (1 Timoteyo 5:8) Ikuti mulumi uuli boobo wakaka kucinca, mukaintu ulakonzya kusala kuti baandaane amulumaakwe kutegwa alivwune kupenzi eeli akugwasya bana bakwe. Pele, baalu beelede kubikkila maano kapati nobalanga-langa kaambo kajatikizya Munakristo waambwa kuti tayandi kubamba mukwasyi wakwe. Muntu ulakonzya kugusyigwa mumbungano akaambo kakukaka kubamba mukwasyi wakwe.

Kuumwa naa kutundululwa. Umwi wabanabukwetene uuyandisya kulwana inga katundulula mweenzinyina cakuti ulakonzya kumucisa kapati alimwi buumi bwakwe bulakonzya kuba muntenda. Ikuti ooyo uutundulula mweenzinyina kali Munakristo, baalu bambungano beelede kukavwuntauzya kaambo aako kutegwa bazyibe naa mbwacita ncobeni oobo. Bukali acilengwa cakulwana ntwaambo tukonzya kupa kuti muntu agusyigwe mumbungano.—Bagalatiya 5:19-21.

Kukasyigwa kukomba. Umwi wabanabukwetene ulakonzya kuzumanana kukasya mweenzinyina kutola lubazu mubukombi bwakasimpe naa ulakonzya kumusinikizya kucita cintu cinga capa kuti atyole mulawo wa Leza. Mubukkale buli boobo, ooyo uukasyigwa weelede kulisalila naa beelede kwaandaana angobakwetene limwi kutegwa atobele majwi aakuti tweelede “kumvwida Leza mbwali mweendelezi kutali bantu.”—Milimo 5:29.

Mubukkale boonse bukatazya kapati kubikkilizya aboobu ibwazwa akwaambwa aawa, kunyina weelede kusinikizya umwi wabanabukwetene iwabisyilwa kuti baandaane naa azumanane kukkala angobakwetene limwi. Nokuba kuti Banakristo basimide alimwi abaalu balakonzya kupa lugwasyo alulayo lwamu Bbaibbele, tabakonzyi kuzyizyiba zyoonse zicitika akati kabanabukwetene. Jehova alikke nguukonzya kuzibona. Mubwini, inga kwaba kutalemeka Leza naa bubambe bwalukwatano ikuti umwi wabanabukwetene waamba twaambo tutako naa wabeja kuti wapenga kapati ikutegwa ajane buyo nzila yakwaandaana amweenzinyina. Jehova ulaazyi makanze aabumpelenge aamuntu uuyanda kuti baandaane angobakwetene limwi nokuba kuti wasoleka buti kwaasisa. Masimpe, “zintu zyoonse zili atuba alimwi zilivwumbwidwe kumeso aayooyo ngotweelede kulyaambilila.” (Bahebrayo 4:13) Pele, ikuti zintu zyakatazya cakunga kunyina bumbi mbwakonzya kucita, kunyina weelede kumupa mulandu Munakristo iwasala kuti baandaane buyo angobakwetene limwi. Cili boobo nkaambo kayi “toonse tuyoobetekwa kumbele lyacuuno calubeta ca Leza.”—Baroma 14:10-12.