CIBALO 25

Mbuti Mbondikonzya Kuleka Cilengwa Cakulisobanya Kubusankwa Naa Kubukaintu?

“Ndakatalika kulisobanya kubusankwa nondakajisi myaka iili 8. Mukuya kwaciindi, ndakazyiba mbwacibona Leza cilengwa eeci. Ndakali kulimvwa bubi kapati kufwumbwa ciindi nondakali kuzundwa asunko eeli. Ndakali kulibuzya kuti, ‘Ino Leza inga wamuyanda buti muntu uuli mbuli ndime?’​—Luiz.

CIINDI muntu akubuka, luunyaunya lwakuyanda koonana lulakomena kapati. Akaambo kaceeci, ulakonzya kutalika cilengwa cakulisobanya kubusankwa naa kubukaintu.a Banji balakonzya kwaamba kuti cili buyo kabotu. Kayi “Kunyina muntu uumbi uujatikizyide.” Nokuba boobo, kuli kaambo kabotu ncotweelede kucitantamuka cilengwa eeci. Mwaapostolo Paulo wakalemba kuti: “Aboobo, amujaye zizo zyamubili wanu . . . kujatikizya zisusi mbuli . . . luunyaunya.” (Bakolose 3:⁠5) Kulisobanya kubusankwa naa kubukaintu takujayi luunyaunya pele lukwiindizya buya. Kuyungizya waawo, amubone twaambo ootu tutobela:

● Kulisobanya kubusankwa naa kubukaintu kupa kuba acilengwa cakulibikkila buyo maano. Mucikozyanyo, ciindi muntu nalisobanya kubusankwa naa kubukaintu, inga ubikkilide buyo maano kukuumvwisya kabotu mubili wakwe.

● Kulisobanya kubusankwa naa kubukaintu kupa muntu kubona baabo mbobaindene limwi zizo, mbuli kuti nzibelesyo buyo zyakulimvwisya kabotu.

● Kuyeeya ooku kwakuliyanda kwalo ikuboola akaambo kacilengwa cakulisobanya kubusankwa naa kubukaintu, kulakonzya kupa kuti kube buyumuyumu mumakani aakoonana mucikwati.

Muciindi cakuba acilengwa cakulisobanya kubusankwa naa kubukaintu kutegwa mumane luunyaunya lwakoonana, amusolekesye kuba abube bwakulilesya. (1 Batesalonika 4:​4, 5) Kutegwa mucikonzye kucita boobu, Bbaibbele likulwaizya kutantamuka bukkale bukonzya kumupa kuti mutalike kumvwa luunyaunya. (Tusimpi 5:​8, 9) Pele ino mbuti kuti mwakaba kale acilengwa eeci cakulisobanya kubusankwa naa kubukaintu? Ambweni mwasola kuti mucileke pele mwaalilwa. Ncuuba-uba kuyeeya kuti tamukonzyi kucinca, akuti inga tiimwacikonzya kupona kweelana azyeelelo zya Leza. Oobu mbwaakali kulimvwa musankwa uutegwa Pedro. Wakaamba kuti: “Ciindi nondakali kwiinduluka kucita cilengwa eeci, ndakali kulimvwa bubi kapati. Ndakali kuyeeya kuti tiindakali kukonzya kulekelelwa akaambo kancondakacita. Cakali kundiyumina kupaila.”

Ikuti naa oobo mbomulimvwa, mutapengi pe. Bulangizi nkobuli. Bakubusi banji alimwi abapati bacikonzya kuleka cilengwa eeci cakulisobanya kubusankwa naa kubukaintu. Andinywe mulakonzya kucileka!

Kulwana Penzi Lyakulipa Mulandu

Kweelana ambotwabona kale, aabo bakajatikizyigwa acilengwa cakulisobanya kubusankwa naa kubukaintu, kanji-kanji balapenga akaambo kakulipa mulandu. Tacidoonekwi kuti ‘kuusa kweendelana akuyanda kwa Leza’ kulakonzya kumukulwaizya kuleka cilengwa eeci. (2 Bakorinto 7:​11) Pele alimwi kuciindizya kulipa mulandu kulakonzya kumupa kwaalilwa kucizunda. Kulakonzya kumupa kutyompwa kapati cakuti inga mwayanda buyo kucilekela limwi kusola kucizunda.​—Tusimpi 24:10.

Aboobo, amusolekesye kuzilanga munzila yeelede zintu. Kulisobanya kubusankwa naa kubukaintu ninzila imwi yabusofwaazi. Kulakonzya kumupa kuba “bazike bazisusi ziindene-indene akulikondelezya,” alimwi kupa kuba abube butali kabotu. (Tito 3:3) Nokuba boobo, kulisobanya kubusankwa naa kubukaintu takuli kucita bwaamu. (Juda 7) Ikuti naa mujisi cilengwa cakulisobanya kubusankwa naa kubukaintu, tamweelede kuyeeya kuti mwakacita cibi citakonzyi kulekelelwa. Cintu ciyandika kapati nkulijata alimwi akuzumanana kusoleka kucileka.

Ncuuba-uba kutyompwa ikuti naa twaciinduluka kucicita alimwi. Kwiinduluka kulubizya tacaambi kuti muli muntu mubyaabi kapati. Aboobo mutatyompwi pe. Muciindi caboobo, amulange-lange icakapa kuti muciinduluke cibi eeco alimwi akusolekesya kutantamuka zintu izyakasololela kuti muciinduluke.

Amujane ciindi cakuzinzibala kuyeeya luyando alimwi aluse ndwajisi Leza. Sintembauzyo Davida, walo aciindi cimwi iwakalubizya akaambo kakulezya kwakwe, wakaamba kuti: “Mbubonya usyi mbwabafwida luse bana bakwe, awalo Jehova mbwabafwida luse aabo bamuyoowa. Nkaambo ulizyi kabotu mbotupangidwe, ulaibaluka kuti tuli bulongo buyo.” (Intembauzyo 103:13, 14) Masimpe, Jehova ulizyi kuti tatulondokede alimwi “ulilibambilide kulekelela zibi.” (Intembauzyo 86:5) Kulubazu lumbi, uyanda kuti andiswe tusolekesye canguzu kucinca. Aboobo ino nintaamu nzi zigwasya nzyomukonzya kubweza kutegwa mucileke cilengwa eeci?

Amuzilange-lange zyakulikondelezya zyanu. Sena muleebelela mafilimu naa mapulogilamu aa TV naa kuswaya ma Webbusaiti aakulwaizya kuyanda koonana? Cabusongo, sintembauzyo wakapaila boobu kuli Leza: “Kogwisya meso aangu kukulangilila cintu cabuyo.”b​—Intembauzyo 119:⁠37.

Amusolekesye kuyeeya zintu zimbi buyo. Munakristo umwi uutegwa William wakakulwaizya kuti: “Kamutanaunka kukoona, amubale cintu cimwi cijatikizya zintu zyakumuuya. Cilayandika kapati kuti cintu ncomuyeeya kumamanino aabuzuba kacili cintu cijatikizya zintu zyakumuuya.”​—Bafilipi 4:⁠8.

Amwaambile muntu umwi kujatikizya penzi lyanu. Kufwa nsoni kulakonzya kupa kuti cimukatazye kwaambila muntu ngomusyoma makani aaya. Pele kucita boobo kulakonzya kumugwasya kuzunda cilengwa canu. Eeci ncecakamugwasya Munakristo umwi uutegwa David. Wakaamba kuti: “Ndakabandika abataata katuli buyo tobilo. Alimwi tandikacilubi ncobakaamba. Kabamweta-mweta abusyu, bakaamba kuti, ‘Ulandikkomanisya kapati.’ Bakalizyi kuti tiicakali cuuba-uba kusika antaamu yakucikonzya kubaambila makani aaya. Ooku nkokukulwaizya nkondakali kuyandika alimwi kwakandigwasya kuba amakanze aakucinca.

“Mpoonya bataata bakanditondezya magwalo amwi masyoonto ikundigwasya kubona kuti tiindakali ‘muntu mubyaabi kapati,’ alimwi amagwalo aambi aakandigwasya kubona cilengwa eeci mbocili cibyaabi. Bakandaambila kuti ndisolekesye kucileka cilengwa eeci, mpoonya akuti inga twaakubandika alimwi. Alimwi bakandikulwaizya kuti tandeelede kutyompwa pe ikuti naa ndaciinduluka, pele ndeelede buyo kuzumanana kusolekesya kutaciinduluka alimwi.” Ncinzi ncaakaamba David kumamanino? Wakaamba kuti: “Kuba amuntu uumbi iwakalizyi penzi lyangu alimwi akundigwasya, cakandikulwaizya kapati kuleka cilengwa eeci.”c

[Bupanduluzi Buyungizidwe]

LUGWALO LUYANDIKA

“Kozitija zisusi zyabukubusi, pele kosungwaala kutobela bululami, lusyomo, luyando, aluumuno antoomwe abaabo ibaita Mwami amoyo uusalala.”​—2 Timoteyo 2:​22.

NZILA IIGWASYA

Amupaile ciindi kulombozya kutali kabotu nokutanakatazya kapati. Amumulombe Jehova Leza kuti amupe “nguzu zigambya iziinda zyabantu” kutegwa mucikonzye kulwana sunko.—2 Bakorinto 4:7.

SENA MULIZYI . . . ?

Kufwumbwa muntu uutakonzyi kulijata ulakonzya kuyungwa akucita bwaamu. Pele kuyandika kuba sicamba kutegwa muntu acikonzye kulilesya noliba leelyo nali alikke.

NZYONDIYANDA KUCITA

Ndilakonzya kuleka kuyeeya zintu zitali kabotu ikuti ․․․․․

Muciindi cakucita cintu citali kabotu, ndila ․․․․․

Nzyondiyanda kubuzya bazyali bangu kujatikizya makani aaya nzeezyi ․․․․․

INO MUYEEYA BUTI?

● Nkaambo nzi ncociyandika kapati kuyeeya kuti Jehova “ulilibambilide kulekelela zibi”?—Intembauzyo 86:5.

● Mbwaanga Leza walo iwakatulenga kuti katumvwa luunyaunya lwakuyanda koonana alimwi utwaambila kuti katulilesya, ino ndusyomo nzi ndwajisi mulindinywe?

[Majwi aakwelelezya sikubala]

“Kuzwa ciindi nondakalizunda penzi eeli, ndijisi manjezeezya aasalala kuli Jehova alimwi eeci ncecintu ncondiyanda kuba ancico lyoonse!”​—Sarah

[Cifwanikiso]

Ikuti wawa ciindi noyaabuzuza tacaambi kuti weelede kutalikila kumatalikilo buya alimwi, ncimwi buyo akwiinduluka cilengwa cakulisobanya kubusankwa naa kubukaintu tacaambi kuti tamukonzyi kucileka cilengwa eeci