CIIYO 4
Ino Jesu Kristo Nguni?
1. Ino buumi bwa Jesu bwakatalika buti?
Mbube nzi bwakali kupa kuti Jesu kasikilika?—MATAYO 11:29; MARKO 10:13-16.
Mukwiimpana abantu boonse, Jesu wakapona kujulu kali muntu wamuuya katanazyalwa anyika. (Johane 8:23) Ngowakali cilenge ca Leza cakusaanguna alimwi wakagwasya mukulenga zintu zimbi zyoonse. Jesu alikke ngowakalengwa cakaanzambwene a Jehova, aboobo uleelela kwiitwa kuti Mwana wa Leza, “simuzyalwaalikke.” (Johane 1:14) Jesu wakabeleka kali mwaambilizi wa Leza, aboobo wiitwa kuti “Ijwi.”—Amubale Tusimpi 8:22, 23, 30; Bakolose 1:15, 16.
2. Ncinzi Jesu ncaakaboolela anyika?
Leza wakatuma Mwanaakwe anyika kwiinda mukulonzya buumi bwakwe kuzwa kujulu kuya mwida lyanakalindu mu Juda wazina lyakuti Mariya. Aboobo, Jesu tanaakajisi usyi muntunsi. (Luka 1:30-35) Jesu wakaboola anyika (1) kuzooyiisya kasimpe kujatikizya Leza, (2) kuzoopa citondezyo mukucita kuyanda kwa Leza neliba leelyo notuli mumapenzi, alimwi (3) kuti aabe buumi bwakwe cibe “cinunuzyo.”—Amubale Matayo 20:28.
3. Nkaambo nzi ncotuyandika cinunuzyo?
Cinunuzyo muulo uubbadelwa kunununa muntu kutegwa atajaigwi. (Kulonga 21:29, 30) Tanaakali makanze aa Leza kuzwa kumatalikilo kuti bantu kabacembaala akufwa. Ino tuzyi buti? Leza wakaambila Adamu, muntu wakusaanguna kuti naa wacita cintu Bbaibbele ncoliita kuti “cibi,” wakali kuyoofwa. Aboobo, Adamu naatakabisya, naatakafwa pe. (Matalikilo 2:16, 17; 5:5) Kweelana ancolyaamba Bbaibbele, lufwu ‘lwakanjila’ munyika kwiinda muli Adamu. Aboobo, Adamu wakatambukizya lunyungu lwakwe loonse cibi alufwu. Tuyandika cinunuzyo kutegwa citufwutule kulufwu ndotwakakona kuli Adamu.—Amubale Baroma 5:12; 6:23.
Nguni wakali kukonzya kubbadela cinunuzyo kutegwa atununune kulufwu? Ciindi notwafwa, tubbadelela buyo zibi zyesu tobeni. Kunyina muntu uutalondokede uukonzya kubbadelela zibi zyabamwi.—Amubale Intembauzyo 49:7-9.
4. Ino Jesu wakafwida nzi?
Mukwiindana andiswe, walo Jesu wakalilondokede. Mbwaanga kunyina naakabisya, tanaakafwa akaambo kazibi zyakwe. Muciindi caboobo, Jesu wakafwida zibi zyabantu. Leza wakatondezya luyando lugambya kubantu kwiinda mukutuma Mwanaakwe kuzootufwida. Awalo Jesu wakatondezya kuti ulatuyanda kwiinda mukubamvwida Bausyi alimwi akwaaba buumi bwakwe akaambo kazibi zyesu.—Amubale Johane 3:16; Baroma 5:18, 19.
Amweebelele Kavidiyo Ino Jesu Wakafwida Nzi?
5. Ncinzi Jesu ncacita lino?
Naakali anyika, Jesu wakaponya baciswa, wakabusya bafwide, alimwi wakagwasya bantu bakali muntenda. Kwiinda mukucita boobo, wakatondezya nzyayoobacitila kumbele bantu bamvwida. (Matayo 15:30, 31; Johane 5:28) Jesu naakafwa, Leza wakamubusya kali muntu wamuuya. (1 Petro 3:18) Kumane Jesu wakalindila kujanza lyalulyo lya Leza kusikila Jehova naakamupa nguzu zyakweendelezya nyika yoonse kali Mwami. (Bahebrayo 10:12, 13) Lino Jesu ulalela kali Mwami kujulu, alimwi basikumutobela bali mukwaambilizya makani mabotu nyika yoonse mboizulwa.—Amubale Daniele 7:13, 14; Matayo 24:14.
Lino-lino, Jesu uyoobelesya nguzu zyakwe kali Mwami kutegwa amane mapenzi oonse akunyonyoona baabo baleta mapenzi. Boonse bajisi lusyomo muli Jesu kwiinda mukumumvwida, bayookkomana kupona muparadaiso anyika.—Amubale Intembauzyo 37:9-11.