CIIYO 6
Ino Mbulangizi Nzi Buliko Kujatikizya Bafwide?
1. Ino makani nzi mabotu aaliko kujatikizya bafwide?
Ciindi Jesu naakasika ku Betaniya afwaafwi a Jerusalemu, kwakaindide mazuba one kuzwa ciindi mweenzinyina Lazaro naakafwa. Jesu wakaunka kucuumbwe antoomwe a Marta alimwi a Mariya, ibacizyi bamwaalumi wakafwide. Mukaindi kasyoonto buyo, bantu banji bakabungana. Sena inga mweezyeezya mbobakakkomana ba Marta a Mariya ciindi Jesu naakabusya Lazaro?—Amubale Johane 11:21-24, 38-44.
Marta wakalaazyi kale makani mabotu aajatikizya bafwide. Wakalizyi kuti Jehova uyoobabusya bafwide kuti bakapone alimwi anyika.—Amubale Jobu 14:14, 15.
2. Ino bafwide bali muciimo nzi?
Leza wakaambila Adamu kuti: “Uli bulongo buyo, akooko kubulongo nkoelede kupiluka.”—MATALIKILO 3:19.
Bantu bakalengwa kuzwa kubulongo. (Matalikilo 2:7;3:19) Tatuli myuuya iijisi mibili yanyama. Tuli zilenge zyanyama, aboobo taakwe cintu cimwi cizumanana kupona twafwa. Twafwa, bongo bwesu bulaleka kubeleka alimwi nzyotuyeeya zyoonse zilamana. Aboobo, kunyina ncaakaamba Lazaro kujatikizya zyakamucitikila naakafwide nkaambo bafwide kunyina ncobazyi.—Amubale Intembauzyo 146:4; Mukambausi 9:5, 6, 10.
Sena Leza ulabapenzya bantu mumulilo kuti bafwa? Mbwaanga Bbaibbele litondezya kuti bafwide kunyina ncobazyi, cilasalala kuti njiisyo yamulilo wahelo njakubeja alimwi ipa kuti bantu kabamutongooka Leza kuzintu nzyataciti. Muzeezo ooyu wakupenzya bantu mumulilo ulamusesemya Leza.—Amubale Jeremiya 7:31.
Amweebelele Kavidiyo Ino Bafwide Bali Muciimo Nzi?
3. Sena bafwide balakonzya kwaambaula andiswe?
Bafwide tabakonzyi kwaambaula nikuba kumvwa. (Intembauzyo 115:17) Pele bangelo bamwi mbabi, alimwi balakonzya kwaambaula abantu akulicengeezya kuba bantu bafwide. (2 Petro 2:4) Jehova ulatukasya kusola kubandika abafwide.—Amubale Deuteronomo 18:10, 11.
4. Ino mbaani bayoobusyigwa?
Mamiliyoni aabantu ibali muzyuumbwe bayoobusyigwa kutegwa bakapone anyika. Nibaba baabo ibatakamuzyiba Leza alimwi abaabo ibakali kucita zintu zibi bayoobusyigwa.—Amubale Luka 23:43; Milimo 24:15.
Bantu ibayoobusyigwa bayooiya kasimpe kujatikizya Leza akutondezya lusyomo muli Jesu kwiinda mukumumvwida. (Ciyubunuzyo 20:11-13) Aabo ibayoobusyigwa akucita zintu zibotu bayookkomana abuumi butamani anyika.—Amubale Johane 5:28, 29.
5. Ino bubuke butuyiisya nzi kujatikizya Jehova?
Leza wakapa kuti kube bulangizi kujatikizya bafwide kwiinda mukutuma Mwanaakwe kuti atufwide. Aboobo, bubuke butuyiisya luyando lwa Jehova alimwi aluzyalo lwakwe. Ciindi bafwide baakubusyigwa, ino mbaani mbomuyandisya kuyoobona?—Amubale Johane 3:16; Baroma 6:23.