Nkaambo Nzi Leza Ncalekelede Bubi Akupenga?

1. Ino bubi bwakatalika buti?

Bubi bwakatalika anyika ciindi Saatani naakabeja ciindi cakusaanguna. Kumatalikilo, Saatani wakali mungelo uulondokede, pele “kunyina naakakakatila mukasimpe.” (Johane 8:44) Wakali kuyanda kukombwa kakuli Leza alikke nguweelede kukombwa. Saatani wakamucenga mukaintu wakusaanguna Eva, akumoongelezya kuti amvwide nguwe kutali Leza. Adamu wakamusangana Eva mukutamvwida Leza. Kusala kwa Adamu kwakasololela kukupenga alufwu.​—Amubale Matalikilo 3:1-6, 19.

Buzangi kubweendelezi bwa Leza bwakatalisyigwa a Saatani ciindi naakoongelezya Eva kutamvwida Leza. Bantu banji bamusangana Saatani mukukaka Leza kuba Mweendelezi wabo. Aboobo, Saatani waba “mweendelezi wanyika.”​—Amubale Johane 14:30; 1 Johane 5:19.

2. Sena kuli cakalubide azilenge zya Leza?

Milimo ya Leza yoonse ililondokede. Bantu alimwi abangelo mbaakalenga Leza bakali kukonzya kumumvwida Leza cakumaninina. (Deuteronomo 32:4, 5) Leza wakatulenga alwaanguluko lwakulisalila kucita cibotu naa cibi. Lwaanguluko oolu lutupa coolwe cakutondezya luyando lwesu kuli Leza.​—Amubale Jakobo 1:13-15; 1 Johane 5:3.

3. Nkaambo nzi Leza ncalekelede kupenga kusikila lino?

Kuzwa ciindi cabuzangi mu Edeni, Jehova walekela bantu kuzangila bweendelezi bwakwe. Ino nkaambo nzi? Kutegwa atondezye kuti kulyeendelezya kakunyina kugwasyigwa anguwe takukonzyi kubagwasya bantu pe. (Mukambausi 7:29; 8:9) Eeci calibonya kabotu-kabotu mumyaka iili 6,000 yainda. Beendelezi baalilwa kumana nkondo, bugwebenga, kutalulama, naa malwazi.​—Amubale Jeremiya 10:23; Baroma 9:17.

Amweebelele Kavidiyo Nkaambo Nzi Leza Ncalekelede Kupenga?

Kwiindana abweendelezi bwabantu, bweendelezi bwa Leza bugwasya baabo babuzumina. (Isaya 48:17,18) Ino-ino, Jehova uyoogusya bweendelezi boonse bwabantu. Balikke bantu aabo ibasala kweendelezyegwa a Leza mbabayookkala anyika.—Isaya 11:9.​—Amubale Daniele 2:44.

4. Ncoolwe nzi ncotujisi akaambo kakukkazika moyo kwa Leza?

Saatani wakaamba kuti bantu babelekela Jehova akaambo kazintu nzyobayanda kulinguwe. Sena inga mwatondezya kuti kaambo aaka nkakubeja? Inzya! Kukkazika moyo kwa Leza kutupa coolwe cakutondezya naa tuyanda bweendelezi bwa Leza naa bwabantu. Tulatondezya kusala kwesu kwiinda mubukkale bwesu.​—Amubale Jobu 1:8-12; Tusimpi 27:11.

5. Mbuti mbotukonzya kusala Leza kuba Mweendelezi wesu?

Tulakonzya kusala Leza kuba Mweendelezi wesu kwiinda mukulangaula akutola lubazu mubukombi bwakasimpe kweelana ambolyaamba Jwi lya Leza, Bbaibbele. (Johane 4:23) Tulakonzya kumukaka Saatani kuba mweendelezi wesu kwiinda mukutantamuka mapolitikisi ankondo mbubwenya mbwaakacita Jesu.​—Amubale Johane 17:14.

Saatani ubelesya nguzu zyakwe kusumpula micito mibi akutalilemeka. Ikuti twaikaka micito iili boobu, balongwe alimwi abanamukwasyi bamwi inga batusampaula naa kutukazya. (1 Petro 4:3, 4) Aboobo, tweelede kusala. Sena tuyooyanzana abantu bamuyanda Leza? Sena tuyakwiitobela milawo yakwe iigwasya alimwi yaluyando? Ikuti twacita oobo, tutondezya kuti Saatani wakabeja ciindi naakaamba kuti, ikuti muntu wasikilwa mapenzi takonzyi kucita ncaamba Leza.​—Amubale 1 Bakorinto 6:9, 10; 15:33.

Luyando ndwajisi Leza kubantu ncisinizyo cakuti bubi akupenga ziyoomana. Aabo ibatondezya kuti balaasyoma majwi aaya, bayookkomana kupona anyika kukabe kutamani.​—Amubale Johane 3:16.