Sena Ncobeni Bafwide Balakonzya Kupona Alimwi?

NCOLYAAMBA BBAIBBELE

“Kuyooba bubuke.”​—Milimo 24:15, Busanduluzi bwa Nyika Mpya.

MBOMUKONZYA KUGWASYIGWA

Mulakonzya kuumbulizyigwa ciindi nomwafwidwa bayandwa banu.​—2 Bakorinto 1:3, 4.

Inga camupa kutaciindizya kuyoowa lufwu.—Bahebrayo 2:15.

Mulakonzya kuba abulangizi bwini-bwini bwakuyootambula bayandwa banu ibayoobusyigwa kuzwa kulufwu.​—Johane 5:28, 29.

SENA NCOBENI TULAKONZYA KUSYOMA NCOLYAAMBA BBAIBBELE?

Inzya, akaambo katwaambo ootu totatwe:

• Leza nkasensa kabuumi. Bbaibbele lyaamba kuti Jehova Leza ‘nkasensa kabuumi.’ (Intembauzyo 36:9; Milimo 17:24, 25) Ooyo iwakalenga zintu zyoonse zipona, ncobeni ulijisi nguzu zyakubusya muntu wakafwa.

• Kaindi Leza wakabusya bantu kuzwa kulufwu. Ibbaibbele lilaamba ziindi zili lusele kujatikizya bantu ibakabusyigwa anyika. Akati kabantu aaba, bamwi bakali bana, bapati, baalumi, alimwi abamakaintu. Bamwi bakafwide buyo kwaciindi cisyoonto, pele umwi wakali mucuumbwe mazuba one!—Johane 11:39-44.

• Leza uliyandide kuyoobusya bafwide. Jehova taluyandi lufwu; ulubona kuti ngusinkondo. (1 Bakorinto 15:26) ‘Uliyandide’ kumuzunda sinkondo ooyu, nkokuti kulumana lufwu kwiinda mububuke. Uliyandide kuyoobusya bantu mbayeeya kutegwa bakapone alimwi anyika.—Jobu 14:14, 15.