Kukomenena Mu Nazareta

Jesu uyaabukomena mu Nazareta, imunzi musyoonto uutakwe mpuwo. Munzi ooyu uli kulubazu lwakunyika, mubusena bwamalundu ibwiitwa kuti Galilaya, kumbo aazyiba liitwa kuti Lwizi lwa Galilaya.

Ambweni Jesu kajisi myaka yobilo yakuzyalwa, Josefa a Mariya bamuleta kubusena oobu kuzwa ku Egepita. Kulibonya kuti aciindi eeci ngomwana alikke ngobajisi. Pele mukuya kwaciindi, kwazyalwa banabokwabo abambi, nkokuti Jakobo, Josefa, Simoni alimwi a Juda. Alimwi Josefa a Mariya bazyala bana basimbi ibacizyi ba Jesu. Inzya, Jesu waba aabanabokwabo basankwa alimwi abasimbi ibataleli kucisambomwe.

Jesu ulijisi basazinyina abambi. Tulimuzyi kale Elizabeta alimwi amwanaakwe, Johane. Johane ukkala kumusanza ku Judaya ikulampa makkilomita manji. Uukkala afwaafwi ku Galilaya ngu Salome, walo uulangilwa kuti mwanookwabo a Mariya, icaamba kuti mbaanyina Jesu bambi. Mulumi wa Salome ngu Zebedayo. Aboobo bana babo basankwa bobilo ba Jakobo a Johane mbanabokwabo a Jesu. Tatuzyi naa nobayaabukomena Jesu abana basankwa aaba basobana limwi bunji bwaziindi, pele kumbele aamazuba baba balongwe bakwe beni-beni, alimwi aaba bobilo baba akati kabaapostolo bakwe.

Josefa uyandika kubeleka canguzu kutegwa ajanine mukwasyi wakwe uuyabukomena zintu ziyandika. Josefa ngusikubeza mapulanga. Josefa wakomezya Jesu kali mbuli mwanaakwe wakulizyalila, aboobo Jesu wiitwa kuti “mwana wamubezi.” (Matayo 13:55) Josefa wamuyiisya Jesu kuba sikubeza mapulanga awalo, alimwi wauzyiba kapati mulimo ooyu. Mubwini, kumbele ibantu baamba Jesu kuti: “Sena ooyu tali sikubeza mapulanga?”​—Marko 6:3.

Bamumukwasyi wa Josefa balakubikkila maano kapati kukomba Jehova. Ikutegwa batobele Mulawo wa Leza, Josefa a Mariya bayiisya bana babo zintu zyakumuuya, ‘ciindi nobakkede muŋanda, ciindi nobeenda munzila, ciindi cakoona alimwi aciindi cakubuka.’ (Deuteronomo 6:6-9) Kuli cikombelo mu Nazareta. Aboobo tulakonzya kusyoma kuti Josefa ulautolelezya mukwasyi wakwe ciindi coonse naunka kucikombelo kukukomba. Kumbele kwaambwa kuti “kweelana acilengwa cakwe mubuzuba bwa Sabata,” Jesu wakaunka kucikombelo. (Luka 4:16) Alimwi mukwasyi ulakkomana kapati kuunka kutempele lya Jehova ku Jerusalemu ciindi aciindi.