Amwiiye Mbwaakacita Jesu Naakasunkwa

Jesu mbwaamanina buyo kubbapatizyigwa a Johane, wasololelwa amuuya wa Leza kuya munkanda ya Judaya. Ujisi zinji zyakuyeeya. Ciindi Jesu naakabbapatizyigwa, “julu lyakajaluka.” (Matayo 3:16) Aboobo lino ulakonzya kwiibaluka zintu nzyaakaiya akucita kujulu. Masimpe, nzinji nzyayelede kuzinzibala kuyeeya!

Jesu wakkala munkanda kwamazuba amasiku aali 40. Ciindi coonse eeci kunyina cakulya ncalya. Mpoonya ciindi Jesu noyamujaya nzala, Saatani Diabolosi wamusikila kuti amusunke, ulaamba: “Ikuti naa uli mwana wa Leza, ambila mabwe aaya kuti abe zinkwa.” (Matayo 4:3) Pele mbwaanga ulizyi kuti taciluzi kubelesya nguzu nzyajisi zyakucita maleele kuti alikkomanisye mwini, Jesu wakaka koongelezyegwa.

Diabolosi tanaalekela waawo pe. Wasola nzila imbi. Waambila Jesu kuti aliwaale kuzwa atala aabwaanda bwaatala lyatempele. Pele Jesu tanaasola kucita cintu cigambya icili boobu. Kazubulula Magwalo, Jesu watondezya kuti taciluzi pe kusunka Leza munzila iili boobu.

Mpoonya, mumusunko watatu, munzila imwi yamaleele Diabolosi watondezya Jesu “mami oonse aamunyika abulemu bwangawo” akwaamba kuti: “Zyoonse eezyi ndilakupa ikuti naa ufwugame akundikomba ciindi comwe buyo.” Alimwi Jesu wakaka cakusinizya, ulaamba: “Kozwa aawa Saatani!” (Matayo 4:8-10) Tanaaongelezyegwa asunko eeli, nkaambo ulizyi kuti Jehova alikke nguweelede kubelekelwa mulimo uusetekene. Inzya, wasala kuzumanana kusyomeka kuli Leza.

Tulakonzya kwiiya kumasunko aaya alimwi ambwaakacita Jesu naakasunkwa. Masunko aaya akacitika ncobeni, calo icitondezya kuti Diabolosi tabuli bube buyo bubi mbuli mbobayeeya bantu bamwi. Pele nkwali ncobeni, nokuba kuti talibonyi. Cibalo eeci alimwi citondezya kuti mfwulumende zyamunyika zyoonse nzizya Diabolosi; zili mumaanza aakwe, nguuzyeendelezya. Nkaambo ino nolyakaba buti sunko lyancobeni kuli Kristo ikuti nozyatakali zyakwe Saatani ciindi naakamwaambila kuti ulamupa nzizyo?

Kuyungizya waawo, Diabolosi wakaamba kuti wakalilibambilide kulumbula Jesu ikuti wafwugama akumukomba ciindi comwe buyo, nokuba kumupa mami oonse aamunyika. Diabolosi ulakonzya kutusunka munzila njiyonya eeyi ambweni kwiinda mukutujaluda nzila zilibonya mbuli kuti nzibotu zyambotukonzya kujana lubono, nguzu naa cuuno caatala. Eelo kaka tutondezya kuti tuli basongo ciindi notutobela cikozyanyo ca Jesu kwiinda mukuzumanana kusyomeka kuli Leza kufwumbwa naa twasikilwa sunko lili buti! Pele amuyeeye kuti Diabolosi tanaakamulekela limwi Jesu, wakamusiya “kusikila aciindi cimbi ceelede.” (Luka 4:13) Eeci cilakonzya kutucitikila andiswe, aboobo tweelede kupakamana lyoonse.