Sena Cili Kabotu Kucita Milimo Mibotu Mu Sabata?

Jesu wacita zintu zinji mumulimo mupati ngwaabeleka mu Galilaya. Pele, mukwaamba kuti, “akwalo kuminzi iimbi ndileelede kwaambilizya makani mabotu aa Bwami bwa Leza,” Jesu ujisi makanze aakubelekela kumasena aambi ikutali buyo mu Galilaya. Aboobo, waunka “kayaabukambauka muzikombelo zyamu Judaya.” (Luka 4:43, 44) Cililuzi kucita boobu, nkaambo lino ncilimo alimwi pobwe lyamu Jerusalemu lilaafwaafwi.

Ikuti tweelanya nzyotubala mu Makani Mabotu kujatikizya mulimo ngwaakacita Jesu mu Galilaya, tujana kuti kuli buyo makani masyoonto aalembedwe kujatikizya nzyaakacita mu Judaya. Nokuba kuti bantu banji mu Judaya tiibaubikkila maano mulumbe wakwe, eeci tiicamulesya Jesu kukambauka cabusungu akucita milimo mibotu kufwumbwa nkwabede.

Kano kaindi Jesu uli mulweendo kuya ku Jerusalemu, imunzi mupati wamu Judaya, ku Pobwe Lyakwiindilila lyamu 31 C.E. Kumbali aa Mulyango wa Mbelele, kuli zyiba lijisi makkoce iliitwa kuti Betezata. Bantu banji baciswa, boofwu, alimwi abalema balaboola kuzyiba eeli. Nkaambo nzi? Nkaambo banji basyoma kuti bantu balakonzya kuponesyegwa kwiinda mukunjila mumeenda aamuzyiba eeli ciindi naavwundauka.

Lino mbuzuba bwa Sabata, alimwi Jesu wabona mwaalumi umwi iwali kuciswa kwamyaka iili 38 kali kuzyiba eeli. Jesu wamubuzya kuti: “Sena ulayanda kupona?” Mwaalumi ooyu wavwiila kuti: “O Mwami, tandijisi muntu wakundibikka muzyiba eelyo maanzi naavwundauka, pele inga ndayanda kunjila ndijana kuti umwi wandiindila kale.”—Johane 5:6, 7.

Jesu wamwaambila kucita cintu cimwi iceelede kuti camugambya mwaalumi ooyu alimwi abaabo boonse bamumvwa, wati: “Nyamuka! Bweza macila aako weende.” (Johane 5:8) Alimwi mbubonya buya oobo mbwaacita. Ndilyona eelyo, mwaalumi ooyu iwaponesyegwa, wabweza macila aakwe akutalika kweenda!

Muciindi cakukkomana akaambo kacintu eeci cibotu icacitika, ba Juda nobamubona muntu ooyu batongooka kuti: “Sunu mbuzuba bwa Sabata, aboobo toyelede kunyamuna macila pe.” Walo wabaingula kuti: “Ooyo wandiponya nguwandaambila kuti, ‘Bweza macila aako weende.’” (Johane 5:10, 11) Ba Juda aaba bamujanina kaambo kufwumbwa muntu uuponya mu Sabata.

Bamubuzya kuti: “Nguni muntu ooyo wakwaambila kuti, ‘Bweza macila aako weende’?” Ino ncinzi ncobamubuzyila boobu mwaalumi ooyu? Nkaambo Jesu ‘wanjila munkamu yabantu’ alimwi mwaalumi ooyu iwaponesyegwa tamuzyi zina Jesu. (Johane 5:12, 13) Nokuba boobo, mwaalumi ooyu ulaswaangana aakale a Jesu. Naaswaangana alimwi a Jesu mutempele, mwaalumi ooyu wamuzyiba muntu ooyo iwamuponya kali kuzyiba.

Mwaalumi ooyu iwaponesyegwa waunka kuba Juda ibamubuzyide kujatikizya mbwaaponesyegwa. Wabaambila kuti Jesu nguwamuponya. Bacimvwa buyo boobu, ba Juda baunka kuli Jesu. Sena baunka kuli Jesu kuyoozyiba nguzu nzyabelesya kucita zintu zili boobu zibotu? Peepe. Baunka kuyakumujanina mulandu Jesu akaambo kakucita zintu zibotu mu Sabata. Eelyo batalika akumupenzya!