Ncinzi Cizumizyidwe Kucita Mu Sabata?

Mubuzuba bumbi bwa Sabata, Jesu waunka kucikombelo, ambweni mu Galilaya. Ooko waakujana mwaalumi umwi uupuutide janza lyalulyo. (Luka 6:6) Balembi aba Farisi balimulangisyide Jesu. Nkaambo nzi? Bacitondezya cili mumyoyo yabo nobabuzya kuti: “Sena cilizumizyidwe kuponya mu Sabata?”—Matayo 12:10.

Basololi babukombi bwaba Juda basyoma kuti kuponya mu Sabata kulizumizyidwe lilikke buyo ciindi buumi nobuli muntenda. Mucikozyanyo, mu Sabata basyoma kuti nkutyola mulawo kugwasya muntu watyoka nokuba kumwaanga bbandeji ooyo wafwuyuka, izicisa zitalangilwi kujaya muntu. Cakutadooneka, takuli kuti mwaalumi ooyu uupengede balimubikkilide maano ncobeni balembi aba Farisi ncobamubuzyila Jesu. Bayanda buyo kumujanina kaambo Jesu kakumupeda mulandu.

Nokuba boobo, Jesu uliizyi mizeezo yabo yabumpelenge. Ulizyi kuti bajisi muzeezo uutaluzi, uutali wamu Magwalo kujatikizya ncocaamba kutyola mulawo ooyo uukasya kubeleka mu Sabata. (Kulonga 20:8-10) Tacili ceenzu kulinguwe kuti bamujanina mulandu akaambo kakucita milimo mibotu. Aboobo Jesu wajana coolwe cakubasinsa kwiinda mukwaambila mwaalumi ooyo uupuutide janza kuti: “Nyamuka, uboole akati.”—Marko 3:3.

Mpoonya kaambila balembi aba Farisi, Jesu wati: “Ikuti kamujisi mbelele yomwe mpoonya mbelele eeyo yawida mumulindi mu Sabata, sena kuli muntu akati kanu uutakonzyi kwiijata akwiigusya?” (Matayo 12:11) Mbelele ndubono ilukonzya kubaletela mali, aboobo tabakonzyi kwiileka mumulindi kusikila buzuba butobela; ilakonzya kufwa kuti tiiyagusyigwa, eelyo inga basweekelwa. Kunze lyaboobo, Magwalo aamba kuti: “Mululami ulabalanganya kabotu banyama mbavwuba.”—Tusimpi 12:10.

Kakozyanisya twaambo ootu tumvwika, Jesu wazumanana ategwa: “Muntu ulayandika kapati kwiinda mbelele! Nkokuti cilizumizyidwe kucita cintu cibotu mu Sabata.” (Matayo 12:12) Aboobo, takuli kutyola mulawo wa Sabata ikuti Jesu waponya mwaalumi ooyu. Basololi babukombi baalilwa kuukazya muzeezo ooyu uululeme alimwi uutondezya luzyalo. Baide kuumuna wi.

Kakalede kapati alimwi kauside akaambo kamizeezo yabo yabufwubafwuba, Jesu wabalanga. Mpoonya waambila mwaalumi ooyo kuti: “Kovwungulula janza lyako.” (Matayo 12:13) Ciindi naalivwungulula, janza lyakwe eelyo lipuutide lyaba kabotu. Eeci camupa kukkomana mwaalumi ooyo, pele ino cabapa kulimvwa buti aabo bayanda kumuteya Jesu?

Muciindi cakukkomana kuti janza lyamwaalumi ooyo lyaba kabotu, ba Farisi bazwa anze, mpoonya cakutasowa ciindi balibunga “abacipani cabasikutobela Heroda akutalika kupangana kuti bamujaye” Jesu. (Marko 3:6) Kuboneka kuti cipani eeci cilabikkilizya abakakamu kabakombi bategwa ba Saduki. Kuzwa kaindi, ba Saduki aba Farisi tabalyatani, pele lino bakamantana camaanza obilo kukazya Jesu.