Johane Uyanda Kumumvwa Jesu Lwakwe

Kwamazuba aatandila kumwaka lino, Johane Mubbapatizi uli muntolongo. Pele waamvwa makani aajatikizya milimo iigambya njacita Jesu. Amuyeeye buyo mbwaalimvwa Johane ciindi basikwiiya bakwe nobamwaambila kuti Jesu wakabusya mwana wamukamufwu ku Naini. Nokuba boobo, Johane uyanda kumvwa cacigaminina kuli Jesu ncozyaamba zintu eezyi zyoonse. Aboobo Johane waita basikwiiya bobilo akati kabasikwiiya bakwe. Ino wabaitila nzi? Uyanda kubatuma kuti baunke kuli Jesu kuyoomubuzya kuti: “Sena ndonduwe ooyo uuboola naa tweelede kulangila uumbi?”—Luka 7:19.

Sena mubuzyo ooyu ulagambya? Johane mwaalumi uulyaabide kuli Leza, alimwi ciindi naakabbapatizya Jesu mazuba aatandila kumyaka yobilo yainda, wakabona muuya wa Leza nowakamuselukila Jesu alimwi wakamvwa jwi lya Leza kalyaamba kuti ulamukkomanina. Tatweelede kuyeeya kuti lusyomo lwa Johane lwaceya. Buyo-buyo, Jesu naatamulumbaizya boobu Johane aciindi eeci. Pele ikuti naa Johane tadooneki buya, ino ncinzi ncabuzyila mubuzyo ooyu kujatikizya Jesu?

Ambweni Johane uyanda buyo kuti Jesu amusalazyile kuti walo ngo Mesiya, kunyina umbi. Eeci cilakonzya kumuyumya Johane napenga muntolongo. Alimwi kuboneka kuti kuli kaambo akambi kaliko mumubuzyo wa Johane. Ulibuzyi businsimi bwamu Bbaibbele ibutondezya kuti Munanike wa Leza uyakuba mwami alimwi amufwutuli. Pele Johane ucili muntolongo nokuba kuti kwainda myezi minji kuzwa ciindi Jesu naakabbapatizyigwa. Aboobo Johane ubuzya kuti naa kuli umbi uuboola, uuyakunjila mubusena bwa Jesu, akuzizuzikizya cakumaninina zintu zyoonse izyakasinsimwa kuti nzyayakucita Mesiya.

Muciindi cakwaambila basikwiiya ba Johane kuti, ‘Aino ndime yooyo uuboola,’ Jesu wapa bumboni bwakuti Leza ulaanguwe kwiinda mukuponya bantu banji baciswa malwazi aamisyobo yoonse alimwi azicisa zyamisyobo yoonse. Mpoonya waambila basikwiiya aabo kuti: “Kamuya mukamulwiide Johane nzyomumvwide anzyomubwene, mukaambe kuti: Boofwu lino balabona alimwi, balema baleenda, basicinsenda balasalazyigwa, basinkematwi balamvwa, bafwide balabusyigwa, abalo bacete baambilwa makani mabotu.”—Matayo 11:4, 5.

Kuboneka kuti mubuzyo wa Johane utondezya bulangizi mbwajisi bwakuti Jesu uyoocita zintu ziinda aali zyeezyo nzyacita lino alimwi akuti uyoomugusya muntolongo Johane. Nokuba boobo, Jesu waambila Johane kuti teelede kulangila zimbi kunze lyamaleele ngacita Jesu.

Nobaunka basikwiiya ba Johane, Jesu waambila nkamu yabantu kuti Johane tali musinsimi-sinsimi buyo pe. Ngo “mutumwa” wa Jehova iwakasinsimwa kuli Malaki 3:1. Alimwi ngomusinsimi Elija iwakasinsimwa kuli Malaki 4:5, 6. Jesu wapandulula kuti: “Ncobeni ndimwaambila kuti, akati kabaabo ibakazyalwa kubakaintu, takunabwenwe mupati kwiinda Johane Mubbapatizi, pele muntu muniini mu Bwami bwakujulu mupati kwiinda nguwe.”—Matayo 11:11.

Kwiinda mukwaamba kuti imuntu muniini mu Bwami bwakujulu mupati kwiinda Johane, Jesu utondezya kuti Johane takabi akati kabaabo ibayakulela mu Bwami bwakujulu. Johane wakabambila Jesu nzila pele wafwa Kristo katanajalula nzila yakuya kujulu. (Bahebrayo 10:19, 20) Nokuba boobo Johane musinsimi uusyomeka wa Leza alimwi uyakuba mulelwa mu Bwami bwa Leza aano anyika.