Mwana Musimbi Wabuka!

Jairo wabona kuti mukaintu iwali kuciswa kalobola waponesyegwa a Jesu. Masimpe, Jesu ulakonzya kumugwasya awalo mwana musimbi wa Jairo, nokuba kuti aciindi eeci Jairo uyeeya kuti ‘mwanaakwe musimbi weelede kuti lino wafwa kale.’ (Matayo 9:18) Sena mubwini cicikonzyeka kumugwasya mwana musimbi ooyu?

Jesu kacaambaula amukaintu ngwaaponya, kwasika baalumi bamwi kuzwa kuŋanda ya Jairo ibamwaambila kuti: “Mwanaako musimbi wafwa kale!” Bayungizya kuti: “Nkaambo nzi ncocimukatazya Mwiiyi?”—Marko 5:35.

Eelo alausisya kaka makani aaya! Ooyu muntu uulemekwa kapati mumunzi oomu lino lyamuleka. Mwanaakwe musimbi alikke buyo ngwajisi wafwa. Pele Jesu waumvwa mubandi, eelyo walanga Jairo akumwaambila cakukulwaizya kuti: “Utayoowi pe, kosyoma buyo.”—Marko 5:36.

Mpoonya Jesu waunka limwi a Jairo najokela kuŋanda yakwe. Nobasika kuŋanda, bajana kuli manyongwe ncobeni. Ibantu babungene ooko balalila, baloomoka akulyuuma acamba akaambo kabuumba. Mpoonya Jesu wanjila muŋanda akwaambila bantu kaambo ikabagambya kakuti: “Ooyu mwana tafwide pe, pele uloona.” (Marko 5:39) Nobamvwa boobo, bantu batalika kumuseka Jesu. Balizyi kuti mwana musimbi ufwide ncobeni. Nokuba boobo, kwiinda mukubelesya nguzu nzyamupede Leza, Jesu ulatondezya kuti bantu bafwide balakonzya kubusyigwa kuzwa kubafwu mbubonya buyo mbobakonzya kubusyigwa nobali muŋonzi ncobeni.

Lino Jesu bantu boonse wabatandila aanze akusyaala buyo a Petro, Jakobo, Johane alimwi abazyali bamwana musimbi uufwide. Mpoonya Jesu wanjila ooko kulede mwana musimbi kali antoomwe abaaba bosanwe. Kumwi kamujisi kujanza, Jesu wamwaambila kuti: “‘Talitha kumi,’ calo icaamba kuti: ‘Musimbi, ndikwaambila kuti, “Buka!”’” (Marko 5:41) Mpoonya aawo musimbi ooyu wabuka akutalika kweenda. Amweezyeezye buyo Jairo alimwi amukaintu wakwe mbobakkomana citaambiki nobabona ceeci cacitika! Ikutondezya kuti mwana musimbi ooyu wabuka ncobeni alimwi ulapona, Jesu wabalailila kuti bamupe cakulya.

Ziindi zimwi musyule, Jesu wakali kulailila baabo mbaakaponya kuti bataambilizyi ceeco ncaabacitila, aboobo eeco ncaacita alimwi kubazyali bamwana aaba. Nokuba boobo, bazyali aaba ibakkomene kapati alimwi abantu bambi baamwaya makani aaya “mucooko coonse eeco.” (Matayo 9:26) Sena nywebo inga tiimwaambila bantu bambi calukkomano ikuti muyandwa wanu umwi wabusyigwa kuzwa kubafwu? Eeci nciindi cabili mumagwalo Jesu naakabusya muntu kuzwa kubafwu.