Kukambauka Mu Galilaya Akuyiisya Baapostolo Mulimo

Jesu wali kukambauka cabusungu kwamyaka yobilo. Sena lino Jesu ulajoka munsi akulyookezya? Peepe, muciindi caboobo, Jesu wayungizya buya mulimo wakwe wakukambauka kwiinda mukutalika lweendo lumbi “kuyaabweenda muminzi yoonse amutunzi [mu Galilaya], kayaabuyiisya muzikombelo zyabo akukambauka makani mabotu aa Bwami, akuponya malwazi aamisyobo yoonse.” (Matayo 9:35) Ncaabona camupa kusinizya kuti uyandika kuukomezya mulimo wakukambauka. Pele ino ulaukomezya buti?

Nayaabweenda, Jesu wabona bantu ibayandika kuponesyegwa munzila yakumuuya akuumbulizyigwa. Bali mbuli mbelele zitakwe mweembezi, balipengede alimwi balimwaikide. Wabeetezyegwa mpoonya waambila basikwiiya bakwe kuti: “Masimpe, mulimo wakutebula mupati, pele babelesi mbasyoonto. Aboobo, amulombe Simalelo wabutebuzi kuti atume babelesi mumulimo wakwe wakutebula.”—Matayo 9:37, 38.

Jesu ulicizyi cikonzya kubagwasya. Waita baapostolo bali 12 akubabikka bobilo-bobilo, aboobo wapanga tukamu tuli cisambomwe twabasikukambauka. Mpoonya wabapa malailile aasalede aakuti: “Mutaunki kubantu bamasi, alimwi mutanjili mumunzi uuli woonse wabana Samariya; pele kamuya buyo kumbelele zisweekede zyaŋanda ya Israyeli. Nomuunka, kamuyaabukambauka kuti: ‘Bwami bwakujulu bwaswena afwaafwi.’”—Matayo 10:5-7.

Bwami oobo mbobeelede kukambauka mbuboobo Jesu mbwaakaamba mumupailo wacikozyanyo. ‘Bwami bwaswena afwaafwi’ mukuti Mwami ngwasalide Leza, Jesu Kristo, mpali akati kabo. Pele ino ncinzi ciyakutondezya kuti basikwiiya bakwe ncobeni baiminina Bwami naa mfwulumende eeyi? Jesu wabapa nguzu zyakuponya balwazi alimwi akubusya bafwide kakunyina kubbadelesya. Mbwaanga cili boobo, ino mbuti baapostolo mbobayakujana zintu nzyobayandika, mbuli zyakulya buzuba abuzuba?

Jesu waambila basikwiiya bakwe kuti batalibambili zintu zyakumubili nzyobanga babelesya mulweendo oolu lwakukambauka. Tabayandiki kubweza ngolida, nsiliva, naa mukuba muzikwama zyabo. Alimwi tabayandiki kubweza nkomo yazilyo zyamulweendo naa zisani zyobilo noziba mpato. Nkaambo nzi? Jesu wabasyomezya kuti: “Similimo uleelede kupegwa zilyo.” (Matayo 10:10) Bantu mbobayakujana ibauyanda mulumbe ngobajisi bayakupa basikwiiya zintu nzyobayandika. Jesu waamba kuti: “Kufwumbwa nkomunjila muŋanda, amukkale oomo kusikila mukazwe kubusena oobo.”—Marko 6:10.

Jesu alimwi wapa malailile kujatikizya mbobeelede kusikilwa bantu mumaanda amulumbe wa Bwami, wati: “Nomunjila muŋanda, amubaanzye bali mumo. Ikuti ŋanda eeyo kayeelela, luumuno lwanu alube alinjiyo; pele ikuti kaiteeleli, luumuno lwanu alupilukile kulindinywe. Kufwumbwa ooko nkobatakamutambuli naa kuswiilila majwi aanu, mwaakuzwa muŋanda eeyo naa mumunzi ooyo, amukakunkumune lusuko kumaulu aanu.”—Matayo 10:12-14.

Zimwi ziindi bantu bamumunzi woonse naa kanzi balakonzya kuukaka mulumbe wabo. Ino ncinzi ciyoocitikila busena oobo? Jesu waamba kuti buyoosikilwa cisubulo cipati. Wapandulula kuti: “Ncobeni ndimwaambila kuti, mu Buzuba bwa Lubeta, cisubulo camunzi ooyo cinooli cipati kwiinda ca Sodoma a Gomora.”—Matayo 10:15.