Kujaya Muntu Ciindi Capobwe Lyakusekelela Buzuba Bwakuzyalwa

Eelyo baapostolo ba Jesu nobacita mulimo wabo mu Galilaya, ooyo iwakazyibya Jesu kubantu walo taangulukide kucita oobo pe. Lino iyanda kukkwana myaka yobilo Johane Mubbapatizi kali muntolongo.

Johane wakaamba caantangalala kuti tiicakaluzi pe kuti Mwami Heroda Antipa akwate Herodiya mukamunyina uutegwa Filipo. Heroda wakaleka mukaintu wakwe wakusaanguna kutegwa akwate Herodiya. Kweelana a Mulawo wa Musa ooyo Heroda ngwalitaminina kutobela, eeci tacili cikwati pe, mbumambe, aboobo tacili mumulawo pe. Mbwaanga tanaakakkomana akaambo kakusinswa a Johane, Heroda wakabikka Johane muntolongo ambweni kwiinda mukutyungililwa a Herodiya.

Heroda tazyi cakumucita Johane, kayi bantu ‘bamubona kuti musinsimi.’ (Matayo 14:5) Pele walo Herodiya ulizyi cakumucita. ‘Ulimubikkilide,’ alimwi mubwini, uluujisi kuyandaula nzila yakuti ajaigwe. (Marko 6:19) Mpoonya ciindi ncaali kulangila calibonya.

Kakuceede buyo mazuba masyoonto kuti busike buzuba bwa Pobwe Lyakwiindilila lyamu 32 C.E., Heroda wabamba pobwe lipati lyakusekelela buzuba bwakwe bwakuzyalwa. Balupati-pati boonse ba Heroda abeendelezi babasikalumamba, kubikkilizya ankumekume zyamu Galilaya babungana kupobwe eeli. Nobali mukulikkomanisya, Salome imwana musimbi wa Herodiya ngwaakazyala kuli Filipo iwakali mulumaakwe, watumwa kuti abazyanine beenzu. Aaba baalumi banonezyegwa kubona mbwazyana.

Akaambo kakubotelwa kapati naabona mbwazyana mwanaakwe musimbi, Heroda wamwaambila kuti: “Kondaambila kufwumbwa ncoyanda, ndilakupa.” Alimwi mane wakonka kuti: “Kufwumbwa ncotiindilombe, ndilakupa, kusikila kucisela cabwami bwangu.” Salome katanavwiila, wazwa akuyoobuzya banyina kuti: “Ncinzi nconditiilombe?”—Marko 6:22-24.

Eeci nceciindi ncaali kulangila Herodiya! Herodiya wavwiila cakutasowa ciindi kuti: “Mutwe wa Johane Mubbapatizi.” Ndilyonya Salome wapiluka kuli Heroda akumulomba kuti: “Ndiyanda kuti mundipe lino aawa mutwe wa Johane Mubbapatizi mumutiba.”—Marko 6:24, 25.

Eeci camupa kuusa kapati Heroda, pele beenzu bamumvwa kakonka kuli Salome. Wafwa nsoni kukaka, nokuba kuti eeci caamba kujaya muntu uutakwe mulandu. Aboobo Heroda watuma mulindizi umwi kuntolongo naamana kumupa malailile mabi kapati. Mukaindi kaniini buyo mulindizi wajokela amutwe wa Johane mumutiba. Mpoonya wamupa Salome, eelyo walo wautola kuli banyina.

Basikwiiya ba Johane nobamvwa cacitika, baboola kuzyoobweza mubili wakwe akuuzikka. Mpoonya baunka kuyakwaambila Jesu makani aaya.

Kumane Heroda naamvwa makani aakuti Jesu uponya bantu akutanda madaimona, wakopana. Tazyi kabotu kuti naa muntu ooyo uucita zintu eezyi, nkokuti Jesu mubwini ngu Johane Mubbapatizi ‘iwabusyigwa kubafwu.’ (Luka 9:7) Aboobo Heroda Antipa uliyandide kapati kumubona Jesu. Pele takuli kuti uyanda kumvwa nzyakambauka Jesu. Heroda uyanda buyo kubona Jesu kutegwa asinizye naa ncayoowa ncencico ncobeni cacitika naa pe.