Cilengaano Cakusanduka—ikubona Kristo Mubulemu Bwakwe

Ciindi Jesu nali mukuyiisya bantu mucooko camunzi wa Kaisareya Filipi, imunzi weendwa makkilomita aasika ku 25 kuzwa ku Cilundu ca Herimoni, waambilizya makani aagambya kubaapostolo bakwe, wati: “Ncobeni ndimwaambila kuti nkobali bamwi ibaimvwi aano ibatakafwi kusikila bakasaangune kumubona Mwanaamuntu kaboola mu Bwami bwakwe.”—Matayo 16:28.

Basikwiiya beelede kuti bakopana kujatikizya ncapandulula Jesu. Nokwainda mazuba aatandila kumvwiki yomwe, Jesu wabweza baapostolo botatwe akati kabaapostolo bakwe, nkokuti Petro, Jakobo alimwi a Johane, akutanta ambabo acilundu cilamfwu. Kuboneka kuti masiku, nkaambo baalumi aaba botatwe zilibajisi ŋonzi. Ciindi Jesu napaila, wasanduka kabalangilila. Baapostolo babona kuti busyu bwakwe bwabala mbuli zuba azisani zyakwe zyatuba buu mbuli mumuni akumweka-mweka.

Mpoonya bantu bobilo, nkokuti “Musa a Elija” balibonya. Batalika kwaambaula a Jesu kujatikizya ‘kuzwa kwakwe anyika ooko kuyoocitikila mu Jerusalemu.’ (Luka 9:30, 31) Kuboneka kuti ikuzwa kwakwe anyika caamba kufwa akubusyigwa kwa Jesu, ooko nkwaakaamba mazuba masyoonto aainda. (Matayo 16:21) Mukwiimpana aceeco Petro ncaali kumukulwaizya kucita, mubandi ooyu watondezya kuti lufwu lwa Jesu lwamasampu ncintu cimwi citakonzyi kutijigwa.

Lino kazimanide ŋonzi, baapostolo aaba botatwe balangilila akuswiilila kabagambidwe. Nokuba kuti eeci ncilengaano, ciboneka mbuli kuti zintu zili mukucitika ncobeni cakuti Petro watalika kujatikizyigwa mulinzizyo, ulaamba: “Rabbi, ncibotu kuti tukkale aano. Aboobo atubikke matente otatwe, lyako, lya Musa alya Elija.” (Marko 9:5) Sena Petro uyanda kubikka matente kutegwa cilengaano cizumanane kwaciindi cili mbocibede?

Kacaambaula Petro, kkumbi limweka lyabavwumba, kumane kwalimvwisya jwi mukkumbi ilyaamba kuti: “Ooyu Mwanaangu ngweyandisya, ooyo ngwekkomanina. Amumuswiilile.” Nobamvwa jwi lya Leza, baapostolo ibayoowede bavwundama ansi, pele Jesu wabaambila kuti: “Amunyamuke. Mutayoowi pe.” (Matayo 17:5-7) Nobacita boobo, baapostolo aaba botatwe babona buyo Jesu alikke. Cilengaano eeci camana. Nobwaca alimwi nobaseluka acilundu, Jesu wabalailila kuti: “Mutaambili muntu naba omwe cilengaano eeci kusikila Mwanaamuntu akabusyigwe kubafwu.”—Matayo 17:9.

Ikulibonya kwa Elija mucilengaano kwabusya mubuzyo mumizeezo yabaapostolo. Babuzya kuti: “Ino nkaambo nzi balembi ncobaamba kuti Elija uleelede kusaanguna kuboola?” Jesu wavwiila kuti: “Elija wakaboola kale, alimwi tiibakamuzyiba.” (Matayo 17:10-12) Jesu waamba Johane Mubbapatizi, ooyo iwakacita mulimo uukozyenye ayooyo ngwaakacita Elija. Elija wakabambila Elisha nzila, kumane Johane wakabambila Kristo.

Eelo kaka camuyumya-yumya cilengaano eeci Jesu alimwi abaapostolo bakwe! Cilengaano eeci citondezya bulemu mbwanoojisi Kristo mu Bwami. Aboobo basikwiiya bamubona “Mwanaamuntu kaboola mu Bwami bwakwe,” mbubonya Jesu mbwaakasyomezyede. (Matayo 16:28) Nobali acilundu, ‘balibonena ameso aabo bupati bwakwe.’ Nokuba kuti ba Farisi bakali kuyanda kuti Jesu abape citondezyo cakusinizya kuti ngonguwe Mwami uusalidwe a Leza, kunyina citondezyo nociba comwe ncaakabapa. Pele basikwiiya ba Jesu mbayandisya bazumizyigwa kubona cilengaano cakusanduka kwa Jesu, icizuzikizya businsimi bwa Bwami. Aboobo Petro kumbele wakali kukonzya kulemba kuti: “Jwi lyabusinsimi lyasinizyigwa ncobeni kulindiswe.”—2 Petro 1:16-19.