Kuzyala Micelo Mbuli Mitabi Alimwi Akuba Beenzinyina Jesu

Jesu wali kukulwaizya baapostolo bakwe basyomeka kwiinda mukubandika ambabo cabulongwe. Lino masiku, ambweni ciindi cainda akati kamasiku. Mpoonya Jesu waamba cikozyanyo cikulwaizya, ulaamba:

“Mebo ndili musaansa wini-wini, alimwi Taata ngomulimi.” (Johane 15:1) Cikozyanyo cakwe cilikozyene acikozyanyo icakaambidwe kaindi kwaamba cisi ca Israyeli, eeco icakali kwiitwa kuti musaansa wa Jehova. (Jeremiya 2:21; Hosea 10:1, 2) Pele lino Jehova ucikaka buya cisi eeci. (Matayo 23:37, 38) Aboobo, Jesu waleta kaambo kapya. Walo ngomusaansa ooyo Bausyi ngobali kukomezya kuzwa ciindi Jesu naakananikwa amuuya uusalala mu 29 C.E. Nokuba boobo, Jesu watondezya kuti musaansa ooyu tawiiminini buyo nguwe alikke, wati:

“Imutabi wangu uuli woonse uutazyali micelo [Taata] ulaugonka, alimwi uuli woonse uuzyala micelo ulaukwezyaula ikutegwa usalale akuzyalisya micelo. . . . Mbubonya mutabi mbuutakonzyi kuzyala micelo ulikke ccita kuti kuuli kucinyina, mbubonya buyo anywebo tamukonzyi kuzyala micelo, ccita kuti mwazumanana kukamantana andime. Mebo ndili cinyina; nywebo muli mitabi.”—Johane 15:2-5.

Jesu wasyomezya basikwiiya bakwe basyomeka kuti aakuunka uyoobatumina mugwasyi, nkokuti muuya uusalala. Nokwainda mazuba aali 51, ciindi baapostolo alimwi abamwi nobatambula muuya ooyo, baba mitabi yamusaansa ooyu. Lino “mitabi” yoonse yeelede kuzumanana kukamantana a Jesu. Kutegwa icikonzye kutyani?

Wapandulula kuti: “Kufwumbwa ooyo uuzumanana kukamantana andime eelyo andime ngondikamantene anguwe, ooyu nguuzyala micelo minji; nkaambo tamukonzyi kucita cintu cili coonse kanditako mebo.” “Mitabi” eeyi—basikumutobela basyomeka—bayookonzya kuzyala micelo minji, nkokuti kutobela cikozyanyo ca Jesu, kwaambila bamwi Bwami bwa Leza cabusungu alimwi akuyiisya bantu bambi banji kuba basikwiiya. Ino mbuti kuti umwi tanaazumanana kukamantana a Jesu alimwi akuzyala micelo? Jesu wapandulula kuti: “Ikuti muntu katazumanani kukamantana andime, ulakwezyulwa.” Kulubazu lumbi, Jesu waamba kuti: “Ikuti mwazumanana kukamantana andime akubamba majwi aangu, mwaakulomba cintu cili coonse ncomuyanda muyoocitilwa.”—Johane 15:5-7.

Lino Jesu wajokelela kwaamba kaambo nkaambide ziindi zyobilo, nkokuti ikajatikizya kutobela milawo yakwe. (Johane 14:15, 21) Wapandulula nzila mpati basikwiiya mbobakonzya kutondezya kuti bacita boobo, ulaamba: “Ikuti mwaitobela milawo yangu, mulazumanana muluyando lwangu, mbubonya andime mbondaitobela milawo ya Taata akuzumanana muluyando lwakwe.” Nokuba boobo, nzinji zijatikizyidwe kunze buyo lyakuyanda Jehova Leza alimwi a Mwanaakwe. Jesu waamba kuti: “Ndamupa mulawo ooyu, wakuti muyandane mbubonya mbondali kumuyanda nywebo. Kunyina uujisi luyando lwiinda loolu, lwakuti muntu umwi atuulile beenzinyina buumi bwakwe. Munooli beenzuma ikuti kamucita nzyondimulailila.”—Johane 15:10-14.

Mumawoola buyo masyoonto, Jesu ulatondezya luyando ndwajisi kwiinda mukwaaba buumi bwakwe kutegwa agwasye baabo boonse ibamusyoma. Cikozyanyo cakwe ceelede kubakulwaizya basikumutobela kuba aluyando lwakulyaaba luli boobu kuli umwi amweenzinyina. Luyando oolu luyakubazyibya kuti mbaasikwiiya bakwe, mbubonya Jesu mbwaambide musyule oomu kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Johane 13:35.

Baapostolo beelede kukabikkila maano kaambo kakuti Jesu wabaamba kuti “beenzuma.” Waamba kaambo ncobali boobu ategwa: “Ndimwaamba kuti muli beenzuma, nkaambo ndamuzyibya zintu zyoonse nzindakamvwa kuli Taata.” Eelo kaka taciliboteli coolwe cakuba acilongwe eeci—ikuba beenzinyina beni-beni ba Jesu alimwi akuzyiba ncobakamwaambila Bausyi! Pele kutegwa bazumanane kuba acilongwe eeci, beelede ‘kuzumanana kuzyala micelo.’ Ikuti bacita boobo, Jesu waamba kuti: “Kufwumbwa ncomumulomba Taata kwiinda muzina lyangu, [uyoomupa] ncico.”—Johane 15:15, 16.

Luyando luliko akati ‘kamitabi’ eeyi, nkokuti akati kabasikwiiya bakwe, luyakubagwasya kuliyumya mumapenzi aaboola kumbele. Wabacenjezya kuti nyika iyakubasulaika, pele wabakulwaizya amajwi aakuti: “Ikuti nyika yamusulaika, mulizyi kuti yakandisulaika mebo kaitanasulaika ndinywe. Ikuti nimwali banyika, inyika niyali kumukkomanina nkaambo muli banjiyo. Lino akaambo kakuti tamuli banyika, . . . nkakaambo kaako nyika ilimusulide.”—Johane 15:18, 19.

Mukuzumanana kupandulula kaambo nyika ncoiyakubasulaikila, Jesu waamba kuti: “Bayoocita zintu zyoonse eezyi zyakumukazya akaambo kazina lyangu, nkaambo tabamuzyi ooyo wakandituma.” Jesu waamba kuti milimo njaakacita munzila yamaleele, mubwini ibapa mulandu aabo bamusulaika, wati: “Ikuti nendatakabacitila milimo yatakacitwa amuntu uuli woonse, nobatalijisi cibi; pele lino babona alimwi bandisula mebo a Taata.” Mubwini, lusulo lwabo luzuzikizya businsimi.—Johane 15:21, 24, 25; Intembauzyo 35:19; 69:4.

Alimwi Jesu wasyomezya kutuma mugwasyi, nkokuti muuya uusalala. Basikumutobela boonse balakonzya kuzitambula nguzu eezyi zigambya alimwi zilakonzya kubagwasya kuzyala micelo, inzya ‘kucitila bumboni.’—Johane 15:27.