Mbomunga Mwayungizya Mulimo Wanu

CIINDI nocakasika cakuti Jesu atume basikwiiya bakwe kuyookambauka Bwami, wakabaambila kuti: “Mulimo wakutebula mupati, pele babelesi mbasyoonto.” Mulimo iwakeelede kucitwa wakali mupati, aboobo Jesu wakayungizya kuti: “Amulombe Simalelo wabutebuzi kuti atume babelesi mumulimo wakwe wakutebula.” (Mt. 9:37, 38) Jesu wakaambila basikwiiya bakwe mbobakeelede kuucita mulimo. Majwi ngaakaamba atondezya kuti mulimo ooyu wakalibindide, wakati: “Tamukamanizyi kuzinguluka minzi ya Israyeli katanasika Mwanaamuntu.”—Mt. 10:23.

² Aalo mazuba aano, kuli zinji izyeelede kucitwa mumulimo wamumuunda. Aaya makani mabotu aa Bwami ayelede kukambaukwa mamanino kaatanasika, alimwi ciindi cimana buya! (Mk. 13:10) Mbwaanga muunda ninyika, tuli mubukkale ibukozyenye abwakuciindi ca Jesu abasikwiiya bakwe, nkuti buyo swebo tuyandika kusikila bantu banji kapati. Swebo tuli basyoonto kapati kweelana amabbiliyoni aabantu ibali munyika, pele tulakonzya kusyoma kuti Jehova unootugwasya. Makani mabotu aa Bwami ayookambaukwa munyika yoonse mboizulwa, alimwi mamanino ayoosika aaciindi ncabikkide Jehova. Sena tunoobikka Bwami bwa Leza kumbele mubuumi bwesu kutegwa tuuzuzikizye cakumaninina mulimo wesu? Ino nimbaakani nzi zyakumuuya nzyotukonzya kulibikkila kutegwa tucite boobo?

³ Kaamba ncayanda Jehova kubabelesi bakwe ibalyaabide, Jesu wakati: “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.” (Mk. 12:30) Tuyandika kubelekela Leza camoyo woonse. Eeci caamba kuti tuyandika kutondezya kuti tulamuyanda kapati alimwi tulilyaabide ncobeni kuli Jehova kwiinda mukuubeleka kusikila mpotugolela mulimo wakwe. (2Tim. 2:15) Kuli zyoolwe zinji umwi aumwi wesu nzyakonzya kubelesya, kweelana abukkale bwakwe alimwi azintu nzyakonzya kucita. Amulange-lange zyoolwe zimwi iziliko, akulibikkila mbaakani zyakumuuya nzyomukonzya kuzuzikizya nomucita mulimo wanu.

KUBA SIKUMWAYA MUMBUNGANO

⁴ Boonse aabo ibazumina kasimpe balijisi coolwe cakukambauka makani mabotu. Ooyu ngomulimo mupati Jesu ngwaakapa basikwiiya bakwe. (Mt. 24:14; 28:19, 20) Bunji bwaziindi, sikwiiya wa Jesu Kristo ulatalika kwaambila bamwi makani mabotu mbwaamvwida buyo. Oobu mbwaakacita Andreya, Filipo, Korneliyo alimwi abambi. (Joh. 1:40, 41, 43-45; Mil. 10:1, 2, 24; 16:14, 15, 25-34) Sena eeci caamba kuti muntu inga waambila bamwi makani mabotu nokuba kuti tanabbapatizyigwa? Inzya! Muntu aayelela buyo kuba sikumwaya uutabbapatizyidwe mumbungano, ulijisi coolwe cakukambauka kuŋanda aŋanda. Kunze lyaboobo, kweelana abukkale bwakwe alimwi anzyakonzya kucita, ulakonzya kutola lubazu mumbazu zimbi zyamulimo wamumuunda.

⁵ Cakutadooneka, sikumwaya abbapatizyigwa inga uliyandide kucita kufwumbwa ncakonzya kutegwa agwasye bamwi kwiiya makani mabotu. Bamaalumi abamakaintu boonse balijisi coolwe cakutola lubazu mumulimo wakukambauka. Ncoolwe cipati ikutola lubazu nokuceya mukusumpula mulimo wa Bwami bwa Leza. Kufwumbwa ooyo uuyungizya mulimo wakwe kuti abikkilizye mbazu zimbi zyamulimo uyookkomana kapati.

KUBELEKELA KUBUSENA BUBULIDE

⁶ Ambweni cilawo cambungano yanu cilabelekwa lyoonse alimwi mbanji ibakambaukilwa. Ikuti kacili boobo, mulakonzya kulimvwa kuti inga mwayungizya mulimo wanu kwiinda mukuunka kubusena bubulide bakambausi mumuunda. (Mil. 16:9) Ikuti kamuli mwaalu naa mukutausi, ambweni kuli mbungano imbi iinga yayanda lugwasyo lwanu. Mulangizi wanu wabbazu ulakonzya kumupa mizeezo kujatikizya mbomukonzya kugwasya mbungano imbi mubbazu lyanu. Ikuti kamuyanda kuyakubelekela kubusena bumbi mucisi canu, ofesi yamutabi ilakonzya kumupa makani aagwasya kujatikizya busena oobo.

⁷ Sena inga mwayanda kuyakubelekela kucisi cimbi? Ikuti naa cili boobo, mweelede kwaakkalila ansi makani aaya kamutanalonga. Amwaabandike makani aaya abaalu bamumbungano yanu. Kulongela kucisi cimbi kuyakumujatikizya nywebo alimwi abaabo mbomuyakuunka limwi. (Lk. 14:28) Pele, ikuti naa tamuyeeyi kuyookkala kwaciindi cilamfwu, inga cainda kubota kuunka kuyoobelekela kubusena bumbi ibuli mucisi canu.

⁸ Muzisi zimwi, bakwesu ibabelesyegwa kulanganya mikuli yabulangizi mbapya mukasimpe. Bakwesu ibalicesya ibali kubusena bubulide balilisungude kulekela baalu basimide ibalongela mumbungano yabo kuti basololele. Ikuti kamuli mwaalu alimwi muyeeya kuunka kucisi cili boobo, amuzyibe kuti makanze aanu taali aakunjila mubusena bwabakwesu bakooko pe. Pele amubeleke ambabo. Amubakulwaizye kusika azyeelelo akuzumina mikuli yamumbungano. (1Tim. 3:1) Amukkazike moyo ikuti naa mwabona kuti zintu zimwi tazicitwi mbuli mbozikonzya kucitwa mucisi canu. Amubelesye luzyibo ndomujisi mbomuli mwaalu kuti mubagwasye ncobeni bakwesu. Aboobo, ikuti naa mukazwe kubusena oobo akupilukila kucisi canu, baalu mbomuyakusiya kubusena oobo bayookonzya kulanganya mbungano.

⁹ Ofesi yamutabi kaitanamupa mazina aambungano iziyandika lugwasyo lwanu, Kkomiti Yamulimo Yambungano yanu yeelede kulemba lugwalo lwakumulumbaizya. Lugwalo oolu lulayandika kunyina makani naa muli mwaalu, mukutausi, mupainiya naa sikumwaya. Kkomiti yamulimo iyakutuma lugwalo lwakumulumbaizya antoomwe alugwalo lwanu kuofesi yamutabi yacisi nkomuyanda kuyakubelekela.

KUKAMBAUKA MUMWAAMBO UMBI

¹⁰ Ikutegwa muyungizye mulimo wanu, inga mwasola kwiiya mwaambo umbi, kubikkilizya amwaambo wakutambaika. Ikuti kamujisi mbaakani yakukambauka mumwaambo umbi, amwaambaule abaalu naa amulangizi wanu wabbazu. Balakonzya kumupa mizeezo alimwi akumukulwaizya. Kwiinda mukusololelwa aofesi yamutabi, mabbazu amwi abikkide zikolo zyakwiiya mwaambo iziyiisya basikumwaya alimwi abapainiya ibeelela kuti bakonzye kukambauka mumwaambo umbi.

MULIMO WABUPAINIYA

¹¹ Basikumwaya boonse beelede kuzizyiba zyeelelo iziyandika kuti babe bapainiya bakugwasyilizya, bapainiya baciindi coonse, bapainiya baalubazu, kubikkilizya ambazu zimbi zyamulimo waciindi coonse. Mupainiya weelede kuti kali Munakristo uubbapatizyidwe uujisi cikozyanyo cibotu alimwi uujisi bukkale bumuzumizya kubeleka mawoola aagaminide mukukambauka makani mabotu. Kkomiti Yamulimo Yambungano njiisaina mafoomu aabaabo balembela mulimo wabupainiya bwakugwasyilizya alimwi abwaciindi coonse, pele bapainiya baalubazu balo basalwa aofesi yamutabi.

¹² Aabo bazuminwa kuba bapainiya bakugwasyilizya balakonzya kubeleka kwamwezi omwe, kwamyezi iili mbwiibede iitobelene, naa kuzumanana kubeleka kwaciindi cilamfwu kusikila naa ndilili eelyo, kweelana abukkale bwabo. Basikumwaya ba Bwami banji balacikkomanina coolwe cakubeleka kabali bapainiya bakugwasyilizya muziindi zyaalubazu, mbuli ciindi ca Ciibalusyo naa mumwezi ngwaswaya mulangizi wabbazu. Bamwi bacita boobo mumyezi yakulyookezya kuncito. Basikumwaya babbapatizyidwe ibacuunka kucikolo balakonzya kucita bupainiya bwakugwasyilizya ciindi nobajala zikolo. Basikumwaya balakonzya kusala kucita bupainiya bwamawoola aacesyedwe mumwezi wa March a April alimwi amumwezi ngwaswaya mulangizi wabbazu. Kunyina makani abukkale bwanu, ikuti kamulilemeka alimwi mujisi zilengwa zibotu, kamukonzya kubeleka mweelwe wamawoola aayandika, alimwi mulaalusyomo lwakuti inga mwacikonzya kubeleka kwamwezi omwe naa minji kamuli mupainiya wakugwasyilizya, baalu bayakubotelwa kutambula foomu yanu akumuzumizya kucita mulimo ooyu.

¹³ Kutegwa mweelele kuba mupainiya waciindi coonse, mweelede kuti lino kamukonzya kusika aamawoola aayandika amwaka. Mbomuli mupainiya waciindi coonse, muyandika kubelekela antoomwe ambungano momubede. Bapainiya basungu ncileleko kumbungano, nkaambo bapa kuti abamwi kabauyandisya mulimo wamumuunda alimwi inga bakulwaizya bamwi kucita bupainiya bwaciindi coonse. Pele kamutanalembela kuba mupainiya waciindi coonse, mweelede kuti kamuli sikumwaya uupa cikozyanyo cibotu alimwi uubbapatizyidwe kwamyezi iitaleli ku 6.

¹⁴ Bunji bwaziindi bapainiya baalubazu inga basalwa akati kabapainiya baciindi coonse aabo ibatondezya kuti babeleka kabotu mumulimo. Beelede kuti kabakonzya kubeleka kufwumbwa kubusena nkoyabatuma ofesi yamutabi. Bunji bwaziindi inga batumwa kumasena aakulamfwu ikutasikwi-sikwi ooko nkobakonzya kujana bantu ibajisi luyandisisyo akutalisya mbungano zipya. Zimwi ziindi, bapainiya baalubazu batumwa kumbungano iziyandika kugwasyigwa kubeleka zilawo zyanzizyo zyoonse. Bapainiya bamwi baalubazu ibaalu balatumwa kuyoogwasyilizya mbungano zisyoonto, nokuba kuti tazibulide babelesi mumuunda. Bapainiya baalubazu balapegwa mali aansaizi aakuligwasya. Ibamwi balasalwa kuba bapainiya baalubazu kwaciindi cisyoonto buyo.

BAMISYINALI BAMUMUUNDA

¹⁵ Kkomiti Yamulimo ya Kabunga Keendelezya ilasala bamisyinali bamumuunda, mpoonya balatumwa a Kkomiti Yamutabi yacisi mobabede kuti bakabelekele mumasena imuli bantu banji kapati. Balacita mulimo mupati mukusitikizya akuzwidilizya mulimo wakukambauka alimwi amilimo yamumbungano. Bunji bwaziindi, bamisyinali bamumuunda balayiisyigwa ku Cikolo Cabakambausi ba Bwami. Balapegwa kwakukkala alimwi amali aansaizi aakuligwasya.

MULIMO WAMUBBAZU

¹⁶ Aabo ibasalwa a Kabunga Keendelezya kuba balangizi babbazu balayiisyigwa alimwi akugwasyigwa kuba aluzyibo mumulimo ooyu kwiinda mukusaanguna kubeleka kabali balangizi babbazu bajatilila. Baalumi aaba balauyanda mulimo wakukambauka alimwi balabayanda abakwesu. Mbapainiya bankutwe, mbasungu kubala Bbaibbele alimwi balicibwene kupa makani alimwi akuyiisya. Bali kumbele kutondezya mucelo wamuuya, alimwi mbaalumi bazilanga kabotu zintu, balanyoneka alimwi mbapampu. Ikuti mukwesu kakwete, mukaintu wakwe imupainiya weelede kuti kapa cikozyanyo cibotu mumakani aakulilemeka ambwabacitila zintu bamwi. Mukaintu weelede kuti kali mukambausi uucibwene. Alimwi weelede kuti kazyi lubazu ndwajisi mbwali mukaintu Munakristo uulibombya; teelede kuliinganya kwaamba nzyobeelede kwaamba balumi bakwe naa iwaambaula maningi. Balangizi bamabbazu abamakaintu babo bajisi zinji zyakucita, aboobo aabo ibayanda kucita mulimo ooyu beelede kuti kabali bantu bayumu ibataciswi-ciswi. Bapainiya tabalembeli buya mulimo wamubbazu. Pele baambila mulangizi wabo wabbazu makanze ngobajisi aakuba mumulimo wamubbazu, kumane walo uyoobaambila zyakucita kutegwa beelele.

ZIKOLO ZYEENDELEZYEGWA A LEZA

¹⁷ Cikolo Cabakambausi ba Bwami: Kuciyandika bakambausi ba Bwami banji kutegwa bagwasyilizye kubeleka muzilawo izitabelekwi-belekwi alimwi akuyumya mbungano kumuuya. Aboobo, bakwesu batakwete, bacizyi batakwetwe alimwi abanabukwetene balakonzya kulembela kutegwa bakapegwe lwiiyo lwaalubazu ku Cikolo Cabakambausi ba Bwami. Bamana kuyiisyigwa kucikolo eeci, balatumwa kuyakubeleka kabali bapainiya baciindi coonse kumasena aabulide mucisi cabo. Nokuba boobo, aabo ibalyaabide kubelesyegwa balakonzya kupegwa mikuli iimbi mucisi cabo naa kucisi cimbi. Bamwi balakonzya kutumwa kabali bapainiya baalubazu balyoonse naa baciindi cisyoonto buyo. Bapainiya ibayanda kunjila cikolo eeci balakonzya kuzyiba zyeelelo ziyandika kumuswaangano uujatikizya cikolo eeci uucitwa kumuswaangano wacooko.

¹⁸ Cikolo ca Gileadi: Bakwesu batakwete, bacizyi batakwetwe alimwi abanabukwetene ibasalwa kunjila cikolo eeci balicizyi kwaambaula Chingisi alimwi balabeleka kabali babelesi baciindi coonse baalubazu. Mbaabo ibabonwa kuti balakonzya kuyumya alimwi akusitikizya bantu mumuunda naa bweendelezi bwamutabi. Bakatondezya kale kuti balakukkomanina kubelekela ibanyina alimwi balakonzya kugwasya bamwi cabusongo ikwiiya alimwi akutobela busolozi bwamu Magwalo alimwi abweendelezi bwa Leza. Kkomiti Yamutabi yamucisi mobabede njiisala baabo ibeelela kulembela. Bamanizya cikolo eeci balatumwa mumuunda naa kuofesi yamutabi kucisi cimbi naa kucisi cokwabo.

MULIMO WAKU BBETELI

¹⁹ Kubelekela ku Bbeteli ncoolwe cipati. Zina lyakuti Bbeteli lyaamba kuti “Ŋanda ya Leza,” alimwi zina eeli masimpe lileelela kwaamba masena aaya aacitilwa milimo ya Leza. Bakwesu abacizyi ibali mumulimo waku Bbeteli bacita mulimo uuyandika kapati wakupanga, kusandulula alimwi akumwaya mabbuku aamba zyamu Bbaibbele. Mulimo ngobacita ulayandika kapati ku Kabunga Keendelezya, aako ikalanganya alimwi akupa busolozi kumbungano izili munyika yoonse mboizulwa. Basanduluzi banji bamukwasyi wa Bbeteli balakkala akubelekela mumasena aacilawo camutabi oomo mowaambaulwa mwaambo ngobasandulula. Eeci cibapa coolwe cakumvwa mbowaambaulwa buzuba abuzuba mwaambo ngobasandulula. Alimwi balakonzya kulimvwida akulibonena naa bantu balaumvwa mwaambo uubelesyegwa mumabbuku aasandululwa.

²⁰ Bunji bwamulimo uucitwa ku Bbeteli uyandika nguzu. Akaambo kaceeci, bunji bwaziindi aabo ibaitwa ku Bbeteli mbakwesu ibalyaabide alimwi babbapatizyidwe bacili bakubusi, ibalaanguzu alimwi ibataciswi-ciswi. Ikuti kakuyandika babelesi kumutabi uulanganya mulimo mucisi canu alimwi ikuti nywebo kamuyandide kubelekela ku Bbeteli, mulakonzya kuzyiba zyeelelo azimbi kuzwa kubaalu bamumbungano yanu.

MULIMO WAKUYAKA

²¹ Mulimo wakuyaka mayake aabelesyegwa mumulimo weendelezyegwa a Leza ncibeela camulimo uusetekene, uukozyenye amulimo wakuyaka tempele lya Solomoni. (1Bam. 8:13-18) Bakwesu abacizyi banji balatondezya busungu kapati kwiinda mukwaaba ciindi cabo alubono mukucita mulimo ooyu.

²² Sena mulakonzya kugwasyilizya mumulimo ooyu? Ikuti kamuli sikumwaya uubbapatizyidwe uuyanda kutola lubazu mumulimo ooyu, bakwesu ibalanganya mulimo wakuyaka kubusena nkomukkala inga balumba kuti mwalyaaba kugwasya alimwi balilisungude kumuyiisya mulimo wakuyaka nokuba kuti inga kamutauzyi kabotu. Amubazyibye baalu mumbungano yanu kuti mulayanda kugwasya. Basikumwaya babbapatizyidwe bamwi ibeelela balyaaba kugwasyilizya mumulimo wakuyaka mayake aabelesyegwa mumulimo wa Leza mumasi aambi.

²³ Kuli zyoolwe zinji zyakutola lubazu mumulimo wakuyaka. Basikumwaya babbapatizyidwe ibajisi cikozyanyo cibotu aluzyibo lumwi mumulimo ooyu alimwi ibakonzya kugwasyilizya mumilimo eeyi yakuyaka iicitwa munsi-munsi ankobakkala balakonzya kubeleka kabali Basikulisungula Kupanga Mapulani Akuyaka Mayake Mucisi. Bamwi balakonzya kugwasyilizya mumilimo yakuyaka iicitwa mumasena aakulamfwu ankobakkala kwaciindi cisyoonto alimwi balasalwa aofesi yamutabi kuti babeleke kabali basikulisungula bamayake kwamvwiki zyobilo kusikila kumyezi yotatwe. Aabo ibasalwa kubeleka kwaciindi cilamfwu baitwa kuti babelesi bamayake. Mubelesi wamayake uupegwa mulimo ooyu mucisi cimbi wiitwa kuti mubelesi wamayake uuzwa kucisi cimbi. Kabunga Kabasikuyaka ikajisi babelesi bamayake alimwi abasikulisungula bamayake nkakasololela mumayake aali oonse alimwi kalagwasyigwa a Basikulisungula Kupanga Mapulani Akuyaka Mayake Mucisi ikubikkilizya abasikugwasyilizya ibazwa mumbungano izijatikizyidwe mumayake aayo. Tubunga Twabasikuyaka twamana kuyaka mayake mubusena bumwi tulaunka kuyakuyaka kubusena bumbi bwamucilawo cilanganizyigwa amutabi ooyo.

INO MUJISI MBAAKANI NZI ZYAKUMUUYA?

²⁴ Ikuti mwakalyaaba kuli Jehova, makanze aanu ngakubelekela Jehova mane kukabe kutamani. Pele ino mujisi mbaakani nzi zyakumuuya eelyo nomusola kuzuzikizya makanze aanu aayo? Ikuba ambaakani zyakumuuya kuyoomugwasya kuzibelesya kabotu nguzu zyanu alimwi azintu zimbi nzyomujisi. (1Kor. 9:26) Kulibikkila mbaakani izili boobu kulakonzya kumupa kuti mukomene kumuuya alimwi akumugwasya kubikkila maano kuzintu ziyandika kapati eelyo nomusoleka kusika azyeelelo zyakupegwa mikuli yaalubazu.—Flp. 1:10; 1Tim. 4:15, 16.

²⁵ Mwaapostolo Paulo wakatusiila cikozyanyo cibotu ncotweelede kutobela notubelekela Leza. (1Kor. 11:1) Paulo wakalitakata kubeleka mulimo wa Jehova. Wakabona kuti Jehova wakalimupede zyoolwe zinji. Paulo wakalembela bakwesu baku Korinto kuti: “Ndajaludwa mulyango mupati uutola kumulimo.” Sena oobu tabusyi mbocibede akulindiswe? Inzya, tulijisi zyoolwe zinji zyakubelekela Jehova antoomwe ambungano, ikapati mumulimo wakukambauka makani mabotu aa Bwami. Pele mbubonya mbocakabede kuli Paulo, kutegwa tunjile ‘mumulyango ooyo mupati,’ tuyandika kulwana “basikukazya banji.” (1Kor. 16:9) Paulo wakalilisungude kuliimya. Wakaamba kuti: “Ndilaudinkaula mubili wangu akuweendelezya mbuli muzike.” (1Kor. 9:24-27) Sena andiswe mbotuzibona zintu oobo?

²⁶ Umwi aumwi wesu ukulwaizyigwa kulibikkila mbaakani zyakumuuya kweelana abukkale mbwajisi. Banji mazuba aano bali mumulimo waciindi coonse akaambo kakuti bakalibikkila mbaakani zyakumuuya kabacili baniini. Noliba leelyo nobakacili bana baniini, bazyali babo alimwi abamwi bakali kubakulwaizya kucita boobo. Aboobo balikkomene kapati mumulimo ngobakasala wakubelekela Jehova alimwi tabauside pe. (Tus. 10:22) Mbaakani zimbi nzyomukonzya kulibikkila nkutola lubazu mumulimo wamumuunda mvwiki amvwiki, kutalisya akweendelezya ziiyo zya Bbaibbele zyaaŋanda, naa kuyungizya ciindi ncomutola kulibambila miswaangano. Cipati ncakuti tweelede kukakatila kukasimpe alimwi akuucita cakumaninina mulimo ngotupedwe. Ikuti twacita oobo, tunoomulemeka Jehova alimwi tuyoosika ambaakani yesu mpati, nkokuti yakumubelekela mane kukabe kutamani.—Lk. 13:24; 1Tim. 4:7b, 8.