Kugwasyigwa Kwiinda Mukulibombya Kubweendelezi bwa Leza

KULIBOMBYA kuli Leza, Mwami wakujulu aanyika, kulayandika kutegwa katukamantene mukucita kuyanda kwa Jehova. Tulizyi kuti Mwanaakwe ngomutwe wambungano ya Bunakristo alimwi tulaitobela njiisyo yabusilutwe mumbazu zimbi zyabuumi. Kulibombya munzila eeyi kubweendelezi bwa Leza kulabagwasya boonse ibajatikizyidwe.

² Muzeezo wakulibombya kubweendelezi bubikkidwe wakapegwa kubantu mumuunda wa Edeni. Muzeezo ooyu ulalibonya mumilawo ya Leza iili ku Matalikilo 1:28 alimwi a 2:16, 17. Zilenge zisyoonto zyakeelede kulibombya kubantu, mpoonya ba Adamu a Eva bakeelede kulibombya kubweendelezi bwa Leza alimwi akucita kuyanda kwakwe. Kumvwida bweendelezi oobu bwa Leza kwakali kuyoopa kuti kube luumuno akuti zintu kazyeenda kabotu. Njiisyo yabusilutwe ilalibonya alimwi kulugwalo lwa 1 Bakorinto 11:3. Mwaapostolo Paulo wakalemba kuti: “Ndiyanda kuti muzyibe kuti mutwe wamwaalumi uuli woonse ngu Kristo awalo mutwe wamukaintu mwaalumi; mpoonya mutwe wa Kristo ngu Leza.” Eeci citondezya kuti mububambe oobu, zilenge zyoonse kunze buyo lya Jehova zyeelede kulibombya kumutwe wanzizyo.

³ Mazuba aano bantu banji tabaizyi naa tabaitobeli njiisyo yabusilutwe. Nkaambo nzi? Penzi lyakatalikila mumuunda wa Edeni ciindi bazyali besu acaali nobakasala kuzangila bweendelezi bwa Leza Singuzuzyoonse. (Matl. 3:4, 5) Nokuba boobo, tiibakajana lwaanguluko lwiinda loolo ndobakajisi. Muciindi caboobo, bakaba bazike bacilenge camuuya cibi, nkokuti Saatani Diabolosi. Buzangi oobo bwakusaanguna bwakatantamuna bantu kuli Leza. (Kol. 1:21) Akaambo kaceeci, bantu banji mazuba aano bali mumaanza aamubi.—1Joh. 5:19.

⁴ Kwiinda mukwiiya kasimpe ka Jwi lya Leza alimwi akutobela nzyotwiiya, swebo tatuceendelezyegwi a Saatani pe. Mbotuli Bakamboni balyaabide alimwi babbapatizyidwe, tulazumina kuti Jehova ngo Mwami weendelezya buumi bwesu. Tulimvwa mbuli mbwaakalimvwa Mwami Davida, ooyo iwakaamba Jehova kuti ‘ngusilutwe wazyoonse.’ (1Mak. 29:11) Inzya, cakulicesya tulazuminizya kuti: “Amuzyibe kuti Jehova ngo Leza. Ngonguwe wakatulenga, alimwi tuli bakwe. Tuli bantu bakwe alimwi tuli mbelele zyamumacelelo aakwe.” (Int. 100:3) Tulizyi kuti Jehova mupati akuti tweelede kulibombya cakumaninina kulinguwe, akaambo kakuti nguwakalenga zintu zyoonse. (Ciy. 4:11) Mbotuli babelesi ba Leza mwini-mwini, tutobela cikozyanyo ca Jesu Kristo, ooyo iwakatusiila cikozyanyo cilondokede cakulibombya kuli Leza.

⁵ Ncinzi ncaakaiya Jesu kuzintu nzyaakapenga ciindi naakali anyika? Lugwalo lwa Bahebrayo 5:8 lwiingula kuti: “Nokuba kuti wakali mwana, wakaiya kumvwida kuzwa kuzintu nzyaakapenga.” Inzya, Jesu wakazumanana kulibombya kuli Bausyi bakujulu, noliba leelyo naakali kupenga. Kunze lyaboobo, Jesu kunyina naakacita cintu cili coonse ncaatakaambilwa. Kunyina naakaamba zintu zyakulipangila mwini; alimwi kunyina naakaliyandauda bulemu bwakwe mwini. (Joh. 5:19, 30; 6:38; 7:16-18) Ciindi naakali kucita mulimo wakwe aanyika, wakajana lukkomano mukucita kuyanda kwa Bausyi, nokuba kuti kucita boobo kwakamupa kukazyigwa akupenzyegwa. (Joh. 15:20) Nokuba boobo, Jesu wakali kulibombya kuli Leza. Jesu “wakalicesya” mane kusikila ‘kulufwu aacisamu cakupenzyezya.’ Icakacitika akaambo kakulibombya cakumaninina kuli Jehova cakagwasya munzila zinji, cakapa kuti bantu bajane lufwutuko lutamani, kuti walo asumpulwe, alimwi akuti Bausyi balemekwe.—Flp. 2:5-11; Heb. 5:9.

MBAZU MOTUYANDIKA KULIBOMBYA KUBWEENDELEZI BWA LEZA

⁶ Ciindi notulibombya kuli Leza kwiinda mukucita kuyanda kwakwe, talazitantamuka zintu zinji izipa kulibilika alimwi zityompya eezyo izibasikila aabo ibatalibombyi kubweendelezi bwa Jehova. Sinkondoma, Diabolosi, ciindi coonse uyanda kutumena buumbulu. Tuyakufwutulwa kumubi ooyu ikuti naa twamukazya alimwi akulicesya kuli Jehova kwiinda mukulibombya kubweendelezi bwakwe cakulisungula.—Mt. 6:10, 13; 1Pet. 5:6-9.

⁷ Mumbungano ya Bunakristo, tulabulemeka busilutwe bwa Kristo alimwi abweendelezi mbwapede “muzike uusyomeka alimwi uucenjede.” Eeci cilatujatikizya swebo caboola kumakani aambotubalanga bamwi alimwi ambotubacitila. Kulemeka bweendelezi bwa Leza mumbungano kuyootukulwaizya kumvwida Jwi lya Leza mumbazu zyoonse zyabukombi bwesu. Kumvwida ooku kubikkilizya mulimo wesu, kujanika kumiswaangano akutola lubazu mulinjiyo, mbotubalanga baalu, alimwi ambotutobela bubambe boonse bwambunga.—Mt. 24:45-47; 28:19, 20; Heb. 10:24, 25; 13:7, 17.

⁸ Kulibombya kwesu kuli Leza kupa kuti kube luumuno, kuliiba, akuti zintu kazyeenda kabotu mumbungano ya Bunakristo. Bube bwa Jehova bulalibonya mubantu ibalibombya kubweendelezi bwakwe. (1Kor. 14:33, 40) Izyatucitikila mumbunga ya Jehova zitupa kwaamba mbubonya mbwaakaamba Mwami Davida. Naakabona kwiindana kuliko akati kababelesi ba Jehova alimwi abantu babi, calukkomano Davida wakaamba kuti: “Balikkomene bantu aabo bajisi Jehova kali Leza wabo!”—Int. 144:15.

⁹ Mucikwati amububambe bwamukwasyi, “mutwe wamukaintu mwaalumi.” Kumane abalo baalumi beelede kulibombya kuli Kristo, mpoonya mutwe wa Kristo ngu Leza. (1Kor. 11:3) Bamakaintu beelede kulibombya kubalumi babo, abalo bana beelede kulibombya kubazyali. (Ef. 5:22-24; 6:1) Kulaba Iuumuno ikuti naa umwi aumwi mumukwasyi watobela njiisyo yabusilutwe.

¹⁰ Mulumi weelede kubelesya busilutwe bwakwe munzila yaluyando, ikwiiya Kristo. (Ef. 5:25-29) Eelyo mulumi nabubelesya kabotu busilutwe naa nazuzikizya lubazu lwakwe kali silutwe, cilabaubila bakaintu bakwe alimwi abana kulibombya kulinguwe. Mukaintu mugwasyi wamwaalumi, naa mweenzinyina uumweelede. (Matl. 2:18) Kwiinda mukugwasyilizya mulumaakwe cakukkazika moyo alimwi akumulemeka, mukaintu ulakonzya kuyandwa kapati amulumaakwe alimwi akutembaula Leza. (1Pet. 3:1-4) Eelyo balumi abamakaintu nobatobela malailile aamu Bbaibbele aajatikizya busilutwe, bapa bana babo cikozyanyo cibotu cakulibombya kuli Leza.

¹¹ Alimwi kulibombya kuli Leza kutupa kumvwida “beendelezi,” aabo ‘ibali muzyuuno zyaandeene-andeene kwiinda mukuzumizyigwa a Leza.’ (Rom. 13:1-7) Mbobali balelwa ibatobela milawo yacisi, Banakristo balatela mitelo, nkokuti bapa “Kaisara zintu zya Kaisara, pele zintu zya Leza kuli Leza.” (Mt. 22:21) Kuyungizya waawo, bubambe bwakubelekela mucilawo coonse bweelede kuti kabweendelana amilawo iiliko yalo iikwabilila makani aajatikizya basicisi. Akaambo kakuti tulalibombya alimwi tulabamvwida beendelezi ibabikkidwe mumulawo muzintu zyoonse izitakazyanyi amilawo ya Jehova iiluleme, tulakonzya kuubikkila maano mulimo wakukambauka alimwi akubelesya nguzu zyesu mulinguwo.—Mk. 13:10; Mil. 5:29.

¹² Kulibombya kubweendelezi bwa Leza kulazijatikizya mbazu zyoonse zyabuumi bwesu. Katujisi lusyomo, tulangila buzuba eelyo bantu boonse nobayoolibombya kuli Jehova Leza. (1Kor. 15:27, 28) Eelo kaka balilelekedwe alimwi balaacoolwe aabo ibabuzumina bweendelezi bwa Jehova alimwi akuzumanana kulibombya kulinguwe lyoonse mane kukabe kutamani!