MUBUZYO 7

Ino Inga Ndacita Buti Kuti Kandisungilizyigwa Koonana?

MUBUZYO OOYU NCOUYANDIKA

Nzyosala lino mumakani aakoonana ziyoobujatikizya buumi bwako bwakumbele.

**INO INGA WACITA BUTI?**

Koezyeezya bukkale oobu: Heather a Mike balisyabene lino kwamyezi yobilo buyo, pele Heather ulimvwa mbuli kuti bakazyibana kaindi a Mike. Balatuminana tugwalo twaafooni ciindi coonse, alimwi balabandika kwamawoola manji kapati afooni, alimwi buya balakonzya kuzyiba mweenzinyina ncasola kwaamba nokuba leelyo nataningamanizya kwaambaula! Pele lino Mike uyanda kuti cilongwe cabo citanoogoleli buyo mukwaambaula, kuli cintu cimwi ncayanda.

Mumyezi yobilo iyainda, kunyina cimwi Mike a Heather ncobali kucita kunze buyo lyakujatana kumaanza alimwi akumyoontana kwaciindi cisyoonto buyo. Heather tayandi kuti bacite cintu cimwi ciinda aali zyeezyi. Pele alimwi tayandi kuti zimane a Mike. Kunyina muntu uumukkomanisya mbuli bucita Mike. Ulalyaambauzya ategwa, ‘Alimwi buya mebo a Mike tulayandana kapati . . . ’

Ikuti kosikide aciimo cakusyabwa alimwi koli mubukkale bwa Heather, ino inga wacita buti?

KOIMA UYEEYE!

Cakusama cibelesyegwa mbuli cisani cakupukutisya — Koonana ncipego Leza ncapede buyo bantu bakwetene balikke. Koonana kwabantu batakwetene nkubelesya cipego eeci munzila iiteelede. Cili mbuli kubweza cisani cibotu kapati ncaakupa muntu umwi akutalika kucipukutisya

Ikuti watyola milawo iyeendelezya zilengwaleza, mbuli mulawo wanguzu zikwelelela ansi, ulakonzya kulicisa. Mbocibede akuti watyola milawo yambotweelede kulilemeka mbuli mulawo ooyu iwakuti: ‘Amulilesye kubwaamu.’—1 Batesalonika 4:3.

Ino nzibi nzi zikonzya kucitika ikuti watyola mulawo ooyu? Bbaibbele lyaamba kuti: “Kufwumbwa ooyo uucita bwaamu ubisizya mubili wakwe mwini.” (1 Bakorinto 6:18) Ino ncinzi citondezya kuti kaambo aaka nkamasimpe?

Basikuvwuntauzya bakajana kuti bakubusi banji ibakoonana kabatanakwatana balacitikilwa zintu zimwi akati kazyeezi zitobela.

KUUSA KAPATI. Bakubusi banji ibakazumina koonana nokuba kuti tabakwetwe naa kukwata, baamba kuti bakausa nobakamana koonana.
KUTASYOMANA. Nobamana koonana, umwi aumwi wabo ulatalika kulibuzya kuti, ‘ino nguni umbi ngwaakoonana limwi muntu ooyu kunze lyandime?’
KUTYOMPWA. Kuzwa aansi amoyo, basimbi banji balombozya kuba amuntu uunga wabakwabilila kutali kubabonenena. Abalo basankwa banji tabayandi kuba amusimbi uuzumina ciindi nobamoongelezya koonana.
Masimpe ngakuti: Ikuti wazumina koonana amuntu ngomutakwetene limwi, nkuliletela masampu kwiinda mukulinyanzya cintu ciyandika kapati. (Baroma 1:24) Mubili wako ncintu ciyandika kapati ncoteelede kunyonyoona!

Kotondezya kuti uuli muntu uulanguzu zyakulyeendelezya kwiinda ‘mukulilesya kubwaamu.’ (1 Batesalonika 4:3) Mpoonya caakusika ciindi eeco ncoyakukwata naa kukwatwa, uyakuba acoolwe cakoonana. Alimwi uyakukukkomanina koonana, takukabi cikupa kulibilika, kuusa, alimwi akulisenda ooko nkobamvwa nobamana koonana bantu ibatakwetene.—Tusimpi 7:22, 23; 1 Bakorinto 7:3.

INO UYEEYA BUTI?

Sena muntu uukuyanda ncobeni inga wabikka buumi bwako muntenda, alimwi akupa kuti unyongane mumizeezo?
Sena muntu uukuyanda ncobeni inga wakusunka kuti unyonganye cilongwe cako a Leza?—Bahebrayo 13:4.