Leza Wakalenga Julu a Nyika

Jehova Leza ngomulengi wesu. Ngowakalenga zintu zyoonse nzyotukonzya kubona anzyotutakonzyi kubona. Katanalenga zintu nzyotukonzya kubona, wakalenga bangelo banji kapati. Ino bangelo mbaani? Bangelo mbantu Jehova mbaakalenga, ibali mbuli nguwe. Tatukonzyi kubabona, mbubwenya mbotutakonzyi kumubona Leza. Mungelo wakusaanguna ngwaakalenga Jehova wakaba mugwasyi wakwe. Mungelo ooyu wakagwasya Jehova kulenga nyenyeezi, mapulaneti, alimwi azintu zimwi buyo. Pulaneti imwi akati kamapulaneti aayo, ninyika, munzi wesu mubotu.

Mpoonya Jehova wakabamba nyika kuti banyama abantu bakkale mumo. Wakapanga mumuni wazuba kutegwa umunike anyika. Wakapanga malundu, lwizi, alimwi amilonga.

Ncinzi cakatobela? Jehova wakaamba kuti: ‘Akumene bwizu, zisyango azisamu.’ Zisyango zinji izizyala micelo, zisyu mani, alimwi amaluba zyakatalika kumena. Mpoonya Jehova wakalenga banyama boonse​—ibanyama bauluka, bamumaanzi, alimwi abakalaba. Wakalenga banyama basyoonto-syoonto, mbuli tusulwe, alimwi abapati mbuli bazovwu. Ino ncinyama nzi cikukkomanisya kapati?

Kumane Jehova wakaambila mungelo mutaanzi kuti: “Atulenge muntu mucinkozya cesu.” Bantu bakali kuyakwiindana abanyama. Bakali kunoocikonzya kupanga zintu, kwaambaula, kuseka, akukomba. Alimwi bakali kuyakweendelezya nyika abanyama. Sena ulimuzyi muntu wakusaanguna? Atubone.