Ba Adamu a Eva Bakamuzangila Leza

Buzuba bumwi Eva naakali alikke, inzoka yakaambaula anguwe. Yakati: ‘Sena masimpe kuti Leza wakamukasya kulya kuzisamu zyoonse zyamumuunda?’ Eva wakati: ‘Tulakonzya kulya micelo yazisamu zyoonse izili mumuunda ccita buyo comwe. Ikuti twalya mucelo wacisamu eeco, inga twafwa.’ Mpoonya nzoka yakati: ‘Tamukonzyi kufwa pe. Masimpe ngakuti, ikuti mwalya mulaba mbuli Leza.’ Sena aayo akali masimpe? Peepe, ooko kwakali kubeja. Pele Eva wakasyoma. Ciindi Eva naakazumanana kuulanga mucelo ooyo, wakaunyomenena mpoonya wakaulya akupa Adamu. Adamu wakalizyi kuti bakali kuyoofwa ikuti bamuzangila Leza. Pele wakaulya mucelo.

Buzuba mbubwenya oobo, Jehova wakaambaula aba Adamu a Eva. Wakababuzya ikaambo ncobakamuzangila. Eva wakapa nzoka mulandu, mpoonya Adamu walo wakapa Eva mulandu. Akaambo kakuti ba Adamu a Eva bakamuzangila, Jehova wakabagwisya mumuunda wa Edeni. Kutegwa batajokeli, wakabikka bangelo alimwi apanga liyaka mulilo amulyango wamuunda.

Jehova wakaamba kuti ooyo iwakacenga Eva awalo wakeelede kusubulwa. Tiiyakali nzoka iini yakaambaula a Eva. Jehova kunyina naakalenga nzoka kuti kazyaambaula. Mungelo mubi ngowakapa kuti nzoka yaambaule. Wakacita oobo kutegwa acenge Eva. Mungelo ooyo wiitwa kuti Saatani Diabolosi. Kumbele, Jehova uyoomunyonyoona Saatani kutegwa atakazumanani kucenga bantu kuti kabacita zibi.