Bakamusyomezya Jehova

Nokwakainda myezi yobilo kuzwa ciindi bana Israyeli nobakazwa mucisi ca Egepita, bakasika a Cilundu ca Sinai akuyaka nkambi. Jehova wakaambila Musa kuti aunke kucilundu, mpoonya ookuya Leza wakamwaambila kuti: ‘Ndakabavwuna bana Israyeli. Ikuti bandimvwide akutobela milawo yangu, bayooba bantu bangu bayandika kapati.’ Musa wakapiluka kubana Israyeli akubaambila majwi ngaakaamba Jehova. Ino bakaatambula buti majwi aayo? Bakaingula kuti: ‘Tunoocita zyoonse nzyatwaambila Jehova.’

Musa wakaunka alimwi kucilundu. Kali kokuya Jehova wakati: ‘Mumazuba otatwe, ndiyakwaambaula anduwe. Pele ukabacenjezye bantu kuti batakasoli kuboola ku Cilundu ca Sinai.’ Musa wakaunka akuyoobaambila bana Israyeli kuti balibambile kuswiilila kuli Jehova.

Nokwakainda mazuba otatwe, bana Israyeli bakabona ndabo alimwi akkumbi lisiya mbi acilundu. Alimwi bakamvwa kuzuma alimwi akulila kwamweembo. Mpoonya Jehova wakaseluka acilundu mumulilo. Bana Israyeli bakayoowa kapati cakuti bakatalika kubimba. Cilundu coonse cakazungaana kapati alimwi cakavwumbwa abusi. Mweembo wakali kuyaabulilisya. Kumane Jehova wakaamba kuti: ‘Ndime Jehova. Tamweelede kukomba baleza bambi pe.’

Musa wakapiluka alimwi kucilundu, mpoonya Jehova wakamupa milawo kuti ape bantu kutegwa babone mbobeelede kumukomba Leza alimwi ambobeelede kupona. Musa wakailemba milawo akubabalila bana Israyeli. Kumane bakasyomezya kuti: ‘Tunoocita zyoonse nzyatwaambila Jehova.’ Inzya, bakamusyomezya Leza. Pele sena bakacibamba cisyomezyo cabo?