Jehova Waambaula a Samuele

Mupaizi Mupati Eli wakajisi bana basankwa bobilo ibakali kubelekela kutente lyakukombela kabali bapaizi. Mazina aabo bakali ba Hofeni a Finehasi. Tiibakali kwiitobela milawo ya Jehova alimwi tiibakali kubeendelezya kabotu bantu. Ciindi bana Israyeli nobakali kuleta zipaizyo kuli Jehova, ba Hofeni a Finehasi bakali kubweza nyama mbotu kapati. Eli wakamvwa ncobakali kucita bana bakwe pele tanaakabweza ntaamu iiyandika. Sena Jehova wakacilekela eeci kuti cizumanane kucitika?

Nokuba kuti Samuele wakali muniini kuli Hofeni a Finehasi, kunyina naakatobela nzyobakali kucita. Jehova wakamukkomanina Samuele. Busiku bumwi naakali koona, Samuele wakamvwa muntu uumwiita. Wakabuka akuunka kuli Eli akumwaambila kuti: ‘Ndime aano!’ Pele Eli wakati: ‘Tiindakwiita pe. Koya ukoone.’ Samuele wakapiluka kukoona. Eeci cakacitika alimwi. Samuele naakamvwa muntu uumwiita ciindi catatu, Eli wakazyiba kuti ngu Jehova iwakali kwiita Samuele. Wakaambila Samuele kuti, ikuti amvwe muntu uumwiita alimwi, weelede kwaamba kuti: ‘Kondaambila, Jehova. Ndemubelesi wako ndiliswiilide.’

Samuele wakapiluka nkwaakali koona. Mpoonya wakamvwa kuti: ‘Samuele! Samuele!’ wakaingula kuti: ‘Kondaambila, ndemubelesi wako ndiliswiilide.’ Jehova wakamwaambila kuti: ‘Umwaambile Eli kuti ndilamusubula walo amukwasyi wakwe. Ulizyi kuti bana bakwe basankwa bacita zintu zibi mutente lyangu, pele tabwezi ntaamu iili yoonse.’ Mafwumofwumo buzuba bwakatobela, Samuele wakajalula milyango yatente mbubwenya mbwaakali kucita lyoonse. Pele wakayoowa kwaambila mupaizi mupati makani ngaakamwaambila Jehova. Nokuba boobo, Eli wakamwiita akumubuzya kuti: ‘Mwanaangu, ncinzi ncaakwaambila Jehova? Kondaambila zyoonse.’ Aboobo Samuele wakamwaambila Eli zyoonse.

Samuele naakali kuyaabukomena, Jehova wakazumanana kuba anguwe. Cisi coonse mobakali kukkala bana Israyeli, bakazyiba kuti Jehova wakasala Samuele kuti abe musinsimi amubetesi.