Mwami Wakusaanguna Wabana Israyeli

Jehova wakapede bana Israyeli ibabetesi kutegwa kababasololela, pele balo bakali kuyanda mwami. Bakaambila Samuele kuti: ‘Zisi zyoonse izituzingulukide zilijisi bami. Andiswe tuyanda mwami.’ Samuele wakalimvwa kuti eeci tiicakali kabotu, aboobo wakapaila kuli Jehova kujatikizya makani aaya. Jehova wakamwaambila kuti: ‘Bantu aaba tabakaki nduwe pe. Bakakaka ndime. Kobaambila kuti balaba amwami, pele mwami ooyo uyoolangila zinji kulimbabo.’ Nokuba boobo, bantu bakaamba kuti: ‘Tacikwe makani. Swebo ncotuyanda buyo, mwami!’

Jehova wakaambila Samuele kuti, mwaalumi wazina lya Saulo ulaba mwami wakusaanguna. Ciindi Saulo naakaunka kuyooswaya Samuele ku Rama, Samuele wakananika Saulo kuba mwami kwiinda mukutila mafwuta amutwe wakwe.

Nokwakainda ciindi, Samuele wakaita bana Israyeli kuti abatondezye mwami wabo mupya. Pele Saulo tanaakali kulibonya nkwaakabede. Sena ulizyi kaambo ncaatakali kulibonya? Nkaambo wakaliyubide. Nobakamujana Saulo, bakamuleta akumwiimika kumbele lyabantu. Saulo wakali mulamfwu kwiinda bantu boonse, alimwi wakali mubotu kapati. Samuele wakaamba kuti: ‘Amubone, ooyu ngomuntu ngwaasala Jehova.’ Bantu bakoongolola kuti: ‘Aapone mwami lyoonse!’

Kumatalikilo, Mwami Saulo wakali kumuswiilila Samuele alimwi wakali kumumvwida Jehova. Pele mukuya kwaciindi wakacinca. Mucikozyanyo, mwami tanaakeelede kutuula zipaizyo. Aciindi cimwi, Samuele wakaambila Saulo kuti amulindile, pele Samuele wakamuka kusika. Aboobo Saulo wakayeeya buyo kuti atuule zipaizyo lwakwe kumugama. Ino Samuele wakalimvwa buti? Wakamwaambila kuti: ‘Tiiwamumvwida Jehova pe.’ Sena Saulo kuli ncaakaiya kukulubizya kwakwe?

Ciindi Saulo naakaunka kuyoolwana bana Amaleki, Samuele wakamwaambila kuti atakasiyi muntu naba omwe. Pele Saulo wakasala kuti atamujayi Mwami Agagi. Jehova wakaambila Samuele kuti: ‘Saulo wandizangila alimwi tayandi kundiswiilila pe.’ Samuele wakausa kapati, kumane wakaambila Saulo kuti: ‘Akaambo kakuti waleka kumumvwida Jehova, ulasala mwami umbi.’ Ciindi Samuele naakali kuyanda kupiluka, Saulo wakaduda jansi lya Samuele, mpoonya lyakazapuka. Kumane Samuele wakaambila Saulo kuti: ‘Jehova wakunyanga bwami.’ Jehova wakali kuyanda kupa bwami kumuntu iwakalibambilide kumumvwida alimwi akumuyanda.