Jerusalemu Wanyonyoonwa

Cakwiinduluka-induluka, ba Juda bakamuzangila Jehova akutalika kukomba ba Leza bakubeja. Kwamyaka minji Jehova wakazumanana kusoleka kubagwasya. Wakatuma basinsimi banji kuti babacenjezye, pele tiibakaswiilila. Muciindi caboobo, bakabafwubaazya basinsimi aabo. Mbuti Jehova mbwaakacimanizya cilengwa cakukomba baleza bakubeja?

Mwami wa Babuloni Nebukadinezara, wakali kuyaabuzunda cisi cimwi acimwi. Ciindi cakusaanguna naakazunda Jerusalemu, wakajata Mwami Jehoyakini, basilutwe, basikalumamba alimwi abasikupanga zyakupanga-panga, akubatola boonse ku Babuloni. Alimwi wakabweza lubono loonse ilwakali mutempele lya Jehova. Mpoonya Nebukadinezara wakabikka Zedekiya kuba mwami wa Juda.

Kumatalikilo, Zedekiya wakali kumumvwida Nebukadinezara. Pele zisi izyakali afwaafwi alimwi abasinsimi bakubeja bakaambila Zedekiya kuti azangile cisi ca Babuloni. Jeremiya wakamucenjezya kuti: ‘Kuti uzange, bantu bayoojaigwa, kuyooba nzala alimwi amalwazi mu Juda.’

Naakalela kwamyaka iili 8, Zedekiya wakazangila cisi ca Babuloni. Wakalomba basikalumamba bana Egepita kuti bamugwasye. Mpoonya Nebukadinezara wakatuma basikalumamba kuti balwane Jerusalemu, kumane bakauzinguluka munzi. Jeremiya wakaambila Zedekiya kuti: ‘Jehova waamba kuti, ikuti ulibombye kubana Babuloni, nkokuti yebo alimwi amunzi tamukanyonyoonwi. Pele kuti utalibombyi, bana Babuloni bayakuwuumpa munzi wa Jerusalemu alimwi bayookutola mubuzike.’ Zedekiya wakati: ‘Tandikalibombyi pe!’

Nokwakainda mwaka omwe amyezi iili 6, basikalumamba bana Babuloni bakapwaya bwaanda bwa Jerusalemu akuumpa munzi. Bakalyuumpa tempele, bakajaya bantu banji, alimwi bakatola bantu banji kapati mubuzike.

Zedekiya wakatija kuzwa ku Jerusalemu, pele bana Babuloni bakamutandaanya. Bakaakumujatila afwaafwi amunzi wa Jeriko akumuleta kuli Nebukadinezara. Mwami wa Babuloni wakaleta Zedekiya kuti alangilile bana bakwe ciindi nobakali kujaigwa. Mpoonya Nebukadinezara wakoofwaazya Zedekiya akumubikka muntolongo, ooko mukuya kwaciindi nkwaakakufwida. Pele Jehova wakasyomezya ba Juda kuti: ‘Yaakwiinda myaka iili 70, ndiyoomupilusya kumunzi wanu ku Jerusalemu.’

Ncinzi icakali kuyoocitika kubakubusi ibakatolwa mubuzike ku Babuloni? Sena bakali kuyoozumanana kusyomeka kuli Jehova?