Daniele Uli Mumulindi Wabasyuumbwa

Mwami aumwi wa Babuloni wakali Dariyo mu Medi. Dariyo wakabona kuti Daniele wakali muntu iwakali kuyandika kapati. Wakapa Daniele mulimo wakulanganya baaluumi ibakali kulemekwa kapati mucisi. Baalumi aaba bakali kumumvwida munyono Daniele, aboobo bakali kuyanda kuti ajaigwe. Bakalizyi kuti Daniele wakali kupaila kuli Jehova ziindi zyotatwe abuzuba, aboobo bakaambila Dariyo kuti: ‘O mwami, kweelede kuba mulawo wakuti muntu uuli woonse weelede kuti kapaila buyo kulinduwe olikke. Kufwumbwa muntu uutautobeli mulawo ooyu weelede kusowelwa mumulindi wabasyuumbwa.’ Dariyo wakauzumina muzeezo ooyu, aboobo wakaulemba mulawo ooyu.

Mbwaakaumvwida buyo mulawo ooyu mupya, Daniele wakaunka kuŋanda yakwe. Kalangide kuwindo ilyakajukide, wakafwugama akupaila kuli Jehova. Baalumi aaba basimunyono bakanjila muŋanda yakwe akumujanikizya kapaila. Bakazuzila kuli Dariyo akumwaambila kuti: ‘Daniele takumvwidi pe. Ulapaila kuli Leza wakwe ziindi zyotatwe abuzuba.’ Dariyo wakali kumuyanda kapati Daniele alimwi tanaakali kuyanda kuti ajaigwe. Lyoonse wakali kuyeeya kujatikizya mbwaakali kukonzya kumukwabilila Daniele. Pele nokuba kuti wakali mwami, tanaakali kukonzya kuucinca mulawo ngwaakalembede kale. Walo ngowakeelede kulailila babelesi bakwe kuti bawaale Daniele mumulindi wabasyuumbwa bakali kapati.

Busiku oobo, Dariyo wakalilibilikide kapati kujatikizya Daniele cakuti wakaba acilabila. Nobwakaca kuseeni, wakazuzila kumulindi akwiita Daniele kuti: ‘Sena Leza wako wakuvwuna?’

Dariyo wakamvwa jwi. Ijwi eelyo lyakali lya Daniele! Mpoonya Daniele wakaingula Dariyo kuti: ‘Mungelo wa Jehova waijala milomo yabasyuumbwa. Tiibandiluma pe.’ Dariyo wakakkomana kapati! Wakalailila kuti Daniele agwisyigwe mumulindi. Daniele kunyina mpaakakwambwa naaceya. Mpoonya mwami wakalailila kuti: ‘Amubasowele mumulindi baalumi aabo ibakamuyandawida kaambo Daniele.’ Ciindi baalumi aabo nobakasowelwa mumulindi, bakalumwa abasyuumbwa.

Kumane Dariyo wakatuma mulumbe kubantu bakwe wakuti: ‘Muntu uuli woonse weelede kumuyoowa Leza wa Daniele, nkaambo wamuvwuna Daniele kuli basyuumbwa.’

Sena ulapaila kuli Jehova lyoonse mbubwenya mbuli Daniele?