Kunyina Iwakali Kukonzya Kubalesya

Mwaalumi umwi iwatakali kweenda wakalikkede amulyango wa tempele alimwi wakali kulombelela abuzuba. Buzuba bumwi masyikati, wakabona Petro alimwi a Johane kabanjila mutempele. Wakati kulimbabo: ‘Ndalomba mundipe kufwumbwa ncomujisi.’ Petro wakati: ‘Ndijisi cintu cimwi cibotu kwiinda mali ncondiyanda kukupa. Muzina lya Jesu, nyamuka weende!’ Kumane Petro wakamujatilila kujanza, mpoonya mwaalumi ooyu wakatalika kweenda! Makamu aabantu akakkomana kapati akaambo kamaleele aaya cakuti bantu banji bakaba basyomi.

Pele bapaizi aba Saduki bakanyema. Bakajata baapostolo akubatola kunkuta mpoonya bakababuzya kuti: ‘Nguni wakamupa nguzu zyakuponya mwaalumi ooyu?’ Petro wakati: ‘Twakatambula nguzu kuzwa kuli Jesu Kristo, ooyo ngomwakajaya.’ Cabukali basololi bazikombelo bakati: ‘Amuleke kwaambaula kujatikizya Jesu!’ Pele baapostolo bakati: ‘Tuleelede kwaambaula kujatikizya nguwe. Tatukooleka pe.’

Petro alimwi a Johane mbobakalekezyegwa buyo, bakaunka kuli basikwiiya bambi akubaambila icakacitika. Bakapaila antoomwe akulomba Jehova kuti: ‘Kotugwasya kuba basicamba kutegwa tuzumanane kucita mulimo wako.’ Jehova wakabapa muuya wakwe uusalala, aboobo bakazumanana kukambauka akuponya. Bantu banji kapati bakaba basyomi. Ba Saduki bakaba amunyono kapati cakuti bakabaanga baapostolo akubabikka muntolongo. Pele masiku, Jehova wakatuma mungelo walo iwakajalula milyango yantolongo akwaambila baapostolo kuti: ‘Kamupiluka kutempele, kutegwa mukakambauke.’

Buzuba bwakatobela mafwumofwumo, Nkuta Mpati Yaba Juda, nkokuti yabasololi bazikombelo yakaambilwa kuti: ‘Ntolongo ilikkiidwe, pele baalumi mbomwakaanga tabako! Bali kutempele, bayiisya bantu!’ Baapostolo bakaangwa akuletwa ku Nkuta Mpati Yaba Juda. Mupaizi mupati wakaamba kuti: ‘Twakamulailila kuti mutanikwaambauli kujatikizya Jesu!’ Pele Petro wakaingula kuti: “Tweelede kumvwida Leza mbwali mweendelezi kutali bantu.”

Basololi bazikombelo bakanyema kapati cakuti bakali kuyanda kubajaya baapostolo. Pele mu Farisi wazina lyakuti Gamaliyeli wakanyamuka akwaamba kuti: ‘Amucenjele ancomuyanda kucita! Ambweni Leza uli ambabo baalumi aaba. Sena muli masimpe kuti muyanda kulwana a Leza?’ Bakamvwa ncaakaamba. Nobakamana kubauma baapostolo amisako, bakabalailila alimwi kuti baleke kukambauka, mpoonya bakabaleka kuti baunke. Pele eeco tiicakabalesya kuzumanana kukambauka makani mabotu cabusicamba, mutempele alimwi akuŋanda aŋanda.