Jesu Wamusala Saulo

Saulo wakali sicisi muna Roma walo iwakazyalilwa mu Tarso. Wakali mu Farisi iwakali syaazibwene mu Mulawo waba Juda, alimwi tanaakali kubayanda Banakristo. Wakali kubakwela nobatayandi ibaalumi abamakaintu Banakristo kuzwa mumaanda aabo akubafwusila muntolongo. Mane buya wakaliimvwi ambali akweebelela ciindi nkamu yabantu ibakanyemede noyakali kupwaya sikwiiya Sitefano amabwe mane kulufwu.

Pele Saulo tanaakakkutila ikubaanga buyo Banakristo mu Jerusalemu. Wakalomba mupaizi mupati kuti amutume kumunzi wa Damasiko kutegwa akayandaule Banakristo okuya. Saulo naakasika afwaafwi amunzi, cakutayeeyela mumuni wakamumwekela, mpoonya wakawida ansi. Wakamvwa ijwi kaliti: ‘Saulo, ino undipenzyela nzi?’ Saulo wakabuzya kuti: ‘Ino nduwe ni?’ Wakaingulwa kuti: ‘Ndime Jesu. Koya ku Damasiko, mpoonya okuya uyakwaambilwa ncoyelede kucita.’ Mukaindi kasyoonto buyo, Saulo wakaba moofwu, mpoonya wakajatililwa buya kujanza kuya mumunzi.

Ku Damasiko, kwakali Munakristo uusyomeka wazina lyakuti Hananiya. Mucilengaano Jesu wakamwaambila kuti: ‘Koya kuŋanda ya Judasi kunzila iitegwa Iimvwi Nci, ukayandaule Saulo.’ Hananiya wakati: ‘O Mwami, ndilizizyi zyoonse kujatikizya mwaalumi uulya! Basikwiiya bako ubafwusila muntolongo!’ Pele Jesu wakati: ‘Koya kulinguwe. Ndamusala Saulo kuti akambauke makani mabotu kumasi manji.’

Aboobo Hananiya wakamujana Saulo akumwaambila kuti: ‘Saulo, mukwesu, Jesu wandituma kutegwa ndijalule meso aako.’ Mpoonya-mpoonya, Saulo wakatalika kubona. Wakaiya kujatikizya Jesu mpoonya wakaba sikumutobela. Lino kabbapatizyidwe kali Munakristo, Saulo wakatalika kukambauka muzikombelo, antoomwe a Banakristonyina. Sena ulakonzya kweezeezya ba Juda mbobakagambwa kubona Saulo kayiisya bantu kujatikizya Jesu? Bakati: ‘Sena ooyu tali ngomwaalumi uulya iwakali kuyandaula basikwiiya ba Jesu?’

Kwamyaka yotatwe, Saulo wakali kukambauka kubantu ibakali kukkala mu Damasiko. Ba Juda bakaleka kumuyanda akupangana kuti bamujaye. Pele bakwesu bakamvwa kujatikizya makanze aayo aboobo bakamugwasya kutegwa atije. Bakamubikka mubbasiketi akumwiinzya acipulo cabwaanda bwamunzi.

Ciindi Saulo naakaunka ku Jerusalemu, wakasola kulisanganya kubakwesu ookuya. Pele bakamuyoowa. Mpoonya sikwiiya Barnaba wakamuleta Saulo kubaapostolo akusinizya kulimbabo kuti Saulo wakalicincide ncobeni. Saulo wakatalika kukambauka makani mabotu cabusungu antoomwe ambungano mu Jerusalemu. Mukuya kwaciindi wakazooyitwa kuti Paulo.