Luyando Lwa leza Talumani

1, 2. Nkaambo nzi ncomumuyanda Jehova Leza?

SENA mulamuyanda Leza? Ambweni mulamuyanda kapati cakuti mwakalyaaba kulinguwe. Mulakonzya kulimvwa kuti ngo Mulongwe wanu wiinda boonse. Pele noliba leelyo kamutanatalika kumuyanda Jehova, walo wakali kumuyanda. Mu Bbaibbele tubala kuti: “Swebo tulatondezya luyando, nkaambo walo nguwakasaanguna kutuyanda.”—1 Johane 4:19.

² Amuyeeye nzila zyoonse Jehova mwaakatondezya luyando lwakwe kulindiswe. Wakatupa nyika mbotu kuti katukkala mpawo alimwi azintu zimbi zyoonse nzyotuyandika kutegwa katukkomana mubuumi. (Matayo 5:43-48; Ciyubunuzyo 4:11) Jehova wapa kuti swebo tucikonzye kwiiya kujatikizya nguwe kutegwa tube acilongwe cibotu anguwe. Ciindi notubala Bbaibbele, tuswiilila Jehova. Alimwi ciindi notupaila, ulatuswiilila. (Intembauzyo 65:2) Ulatusololela alimwi akutuyumya amuuya wakwe uusalala uulaanguzu kapati. (Luka 11:13) Mane buya wakatuma Mwanaakwe anyika ngwayandisya kutegwa atwaangunune kucibi akulufwu.—Amubale Johane 3:16; Baroma 5:8.

3. Mbuti mbotukonzya kuzumanana kuba acilongwe cibotu a Jehova?

³ Amuyeeye asyoonto kujatikizya umwi wabalongwe banu ngomuyandisya, walo iwali kumugwasya muziindi zyalukkomano alimwi azyakuusa. Kuyandika kubeleka canguzu kutegwa cilongwe eeco cizumanane kuyuma. Oobu mbocibede acalo cilongwe cesu a Jehova, Mulongwe wesu iwiinda boonse. Cilongwe cesu anguwe tacikonzyi kumana. Aboobo Bbaibbele litwaambila kuti: ‘Amuzumanane kukkala muluyando lwa Leza.’ (Juda 21) Mbuti mbotukonzya kucita boobo? Bbaibbele liingula kuti: “Kuyanda Leza caamba kuti katubamba milawo yakwe; alimwi buya milawo yakwe tiiminyi.”—1 Johane 5:3.

‘NCOCAAMBA KUYANDA LEZA’

4, 5. (a) Ino “kuyanda Leza” caamba nzi? (b) Mbuti luyando lwanu kuli Jehova mbolwakatalika kukomena?

⁴ Ino ncinzi ncolipandulula Bbaibbele nolyaamba kuti “kuyanda Leza”? Eeci tacaambi luyando lwa Leza kulindiswe, pele caamba luyando lwesu kulinguwe. Sena mulayeeya ciindi nomwakatalika kumuyanda Jehova?

⁵ Amuyeeye mbomwakalimvwa ciindi cakusaanguna nomwakaiya kuti Jehova uyanda kuti mukapone kukabe kutamani munyika yakwe mpya. Mwakaiya kujatikizya zyoonse nzyaakacita kutegwa eeci cikonzyeke, alimwi mwakayeeya kujatikizya cipego cibotu Jehova ncaakatupa toonse naakatuma Mwanaakwe anyika. (Matayo 20:28; Johane 8:29; Baroma 5:12, 18) Ciindi nomwakazumanana kwiiya kujatikizya Jehova mbwamuyanda, andinywe mwakatalika kumuyanda.—Amubale 1 Johane 4:9, 10.

6. Ino kuyanda muntu umwi kubikkilizya nzi? Ino luyando ndomujisi kuli Leza lwamupa kucita nzi?

⁶ Pele kulimvwa kuti mulamuyanda Leza, akali buyo matalikilo. Mucikozyanyo, ikuti katumuyanda muntu umwi, tacigoleli buyo akumwaambila bbala lyakuti, “Ndilakuyanda.” Luyando lutupa kuyanda kucita zintu muntu nzyakonzya kukkomanina. Munzila njiyonya eeyi, luyando lwanu kuli Jehova lwakamupa kuti muyande kupona munzila iikonzya kumukkomanisya Leza. Mbolwakali kuyaabukomena luyando oolo, cakutadooneka mwakaaba buumi bwanu kulinguwe akubbapatizyigwa. Kwiinda mukulyaaba kuli Jehova, mwakasyomezya kuti munoomubelekela lyoonse. (Amubale Baroma 14:7, 8.) Mbuti mbomukonzya kucizuzikizya cisyomezyo eeco?

“KATUBAMBA MILAWO YAKWE”

7. Ikuti katumuyanda Jehova, ncinzi ncotuyoocita? Ino milawo nzi imwi njaakatupa Leza?

⁷ Akaambo kakuti tulamuyanda Jehova, tweelede ‘kubamba milawo yakwe.’ Mu Bbaibbele tulaiya mbuli Jehova mbwayanda kuti katupona. Mucikozyanyo, utwaambila kuti cililubide kukolwa, kubba, kubeja, koonana amuntu ngotutakwetene limwi, kukomba muntu uuli woonse naa cintu cili coonse kutali nguwe.—1 Bakorinto 5:11; 6:18; 10:14; Baefeso 4:28; Bakolose 3:9.

8, 9. Mbuti mbotukonzya kuzyiba ncayanda Jehova kuti tucite mubukkale bwiindene-indene ciindi nokunyina mulawo uugaminide mu Bbaibbele? Amupe cikozyanyo.

⁸ Pele kutegwa tumukkomanisye Jehova tacaambi buyo kuti tweelede kumvwida milawo yakwe. Tanaakatupa mulongo wamilawo minji yalo iikonzya kutobelwa mubukkale buli boonse. Aboobo, kunooli ziindi nokunoonyina mulawo uugaminide mu Bbaibbele uutwaambila ncotweelede kucita. Mbuti mbotukonzya kusala kabotu? (Baefeso 5:17) Mu Bbaibbele tujana njiisyo, nkokuti kasimpe katuyiisya mbwazibona zintu Jehova. Alimwi mbotuyaabulibala Bbaibbele, tuyoomuzyiba kabotu Jehova mbwabede. Tuyakwiiya kuyeeya mbwayeeya, kubikkilizya azintu nzyayanda alimwi anzyatayandi.—Amubale Intembauzyo 97:10; Tusimpi 6:16-19; amubone Bupanduluzi Buyungizyidwe 1.

⁹ Mucikozyanyo, mbuti mbotukonzya kusala nzyotweelede kweebelela aa TV naa nzyotweelede kulanga a Intaneti? Jehova tatwaambili cacigaminina ncotweelede kucita. Pele njiisyo nzyatupa ziyootugwasya kusala kabotu. Izyakulikondelezya zinji mazuba aano zizwide nkondo alimwi abwaamu. Mu Bbaibbele Jehova utwaambila kuti “muntu uuyanda nkondo ulimusulide” alimwi akuti “uyoobabeteka basibwaamu.” (Intembauzyo 11:5; Bahebrayo 13:4) Mbuti njiisyo eezyi mbozikonzya kutugwasya kusala kabotu? Mbotwazyibila buyo kuti Jehova ulacisulaika cintu cimwi naa kucibona kuti tacili kabotu, tweelede kucitantamuka.

10, 11. Nkaambo nzi ncotweelede kumumvwida Jehova?

¹⁰ Nkaambo nzi ncotweelede kumumvwida Jehova? Tulamumvwida kutali buyo akaambo kakuyoowa kusubulwa naa mapenzi aaboola akaambo kakutasala kabotu. (Bagalatiya 6:7) Tulamumvwida Jehova akaambo kakuti tulamuyanda. Mbubonya mbuli bana ibayanda kukkomanisya bausyi, tuyanda kumukkomanisya Taateesu wakujulu. Kunyina ciinda kubota kwiinda kuzyiba kuti Jehova ulatukkomanina!—Intembauzyo 5:12; Tusimpi 12:2; amubone Bupanduluzi Buyungizyidwe 2.

¹¹ Tulamumvwida Jehova kutali buyo ciindi nocili cuuba-uba naa akaambo kakubula cimbi cakucita. Alimwi tatusali milawo yakwe azyeelelo nzyotweelede kutobela alimwi anzyotuteelede kutobela. (Deuteronomo 12:32) Muciindi caboobo tulamumvwida muzintu zyoonse, mbubonya mbuli sintembauzyo iwakaamba kuti: “Ndilaikkomanina milawo yako, inzya, ndilaiyanda kapati.” (Intembauzyo 119:47; Baroma 6:17) Tuyanda kuba mbuli Nowa, iwakatondezya luyando lwakwe kuli Jehova kwiinda mukucita zyoonse Jehova nzyaakamulailila kuti acite. Ibbaibbele lyaamba kuti Nowa “wakacita mbubonya oobo.” (Matalikilo 6:22) Sena mulayanda kuti Jehova kaamba majwi aali boobo kujatikizya ndinywe?

12. Mbuti mbotukonzya kumukkomanisya Jehova?

¹² Ino Jehova ulimvwa buti ciindi notumumvwida? ‘Tukkomanisya moyo’ wakwe. (Tusimpi 11:20; 27:11) Kamuciyeeyela buyo eeco! Tulamukkomanisya Mulengi wabubumbo boonse ciindi notumumvwida. Pele tatusungilizyi kucita boobo. Muciindi caboobo, wakatupa lwaanguluko lwakulisalila. Eeci caamba kuti tulijisi lwaanguluko lwakusala kucita ciluzi naa citaluzi. Jehova uyanda kuti luyando ndotujisi kulinguwe kalutupa kusala kabotu kutegwa tucikonzye kuba abuumi bwiinda kubota.—Deuteronomo 30:15, 16, 19, 20; amubone Bupanduluzi Buyungizyidwe 3.

“MILAWO YAKWE TIIMINYI”

13, 14. Ino tuzyi buti kuti milawo ya Leza taikatazyi kapati kutobela? Amupe cikozyanyo.

¹³ Ino mbuti kuti katuyeeya kuti milawo ya Jehova ilakatazya kapati kutobela naa kuti taitupi lwaanguluko? Cakusalazya Bbaibbele lyaamba kuti: “Milawo yakwe tiiminyi.” (1 Johane 5:3) Ibbala lya Chigiriki ilyakasandululwa kuti ‘kuminya’ lyaamba “kulema.” Mumagwalo aamwi, ibbala eeli lilibelesyedwe kwaamba milawo miyumu kapati naa bantu ibasola kweendelezya bamwi alimwi akubapenzya. (Matayo 23:4; Milimo 20:29, 30) Aboobo milawo ya Jehova ‘tailemi,’ eeci caamba kuti taili miyumu kulindiswe kutobela. Lyoonse taciindizyi muzintu nzyatwaambila kuti tucite.

¹⁴ Mucikozyanyo, amweezyeezye kuti mugwasya mulongwe wanu kulongela kubusena bumwi. Walongela zintu zyakwe zyoonse muzibbokesi. Zimwi nzyuuba-uba kunyamuna, pele zimwi zilemu cakuti kuyandika bantu bobilo kuzinyamuna. Ikuti mulongwe wanu kamubikkila maano, sena inga wamwaambila kuti munyamune cibbokesi cilema kapati nyolikke? Peepe! Nkaambo nzi? Akaambo kakuti tayandi kuti mulicise. Mbubwenya mbuli mulongwe ooyu, Jehova kunyina nayootwaambila kucita cintu cikatazya kapati. (Deuteronomo 30:11-14) Jehova ulituzyi kabotu mbotubede. “Ulizyi kabotu mbotupangidwe, ulaibaluka kuti tuli bulongo buyo.”—Intembauzyo 103:14.

15. Nkaambo nzi ncotukonzya kusinizya kuti milawo ya Jehova yakabambilwa kuti kaitugwasya?

¹⁵ Musa wakaambila cisi ca Israyeli kuti milawo ya Jehova yakabambilwa kuti ‘zintu kazibeendela kabotu lyoonse’ alimwi akuti kumvwida kwabo kwakali kuyoobagwasya kuti ‘bazumanane kupona.’ (Deuteronomo 5:28-33; 6:24) Mbocibede amazuba aano. Kufwumbwa Jehova ncatwaambila kuti tucite, ciyoopa kuti bukkale bwesu bubote. (Amubale Isaya 48:17.) Taateesu Jehova, lyoonse ulizyi zintu zikonzya kutugwasya. (Baroma 11:33) Bbaibbele litwaambila kuti: “Leza nduyando.” (1 Johane 4:8) Eeci caamba kuti cintu cili coonse Jehova ncaamba akucita, ulacicita akaambo kaluyando.

16. Ino tuzyi buti kuti tulakonzya kumvwida nokuba kuti tatulondokede alimwi akuti tupona munyika mbyaabi?

¹⁶ Talili lyoonse nocili cuuba-uba kumumvwida Leza. Tupona munyika mbyaabi iyeendelezyegwa a Diabolosi. Ulasola kuyunga bantu kutegwa bacite zintu zibyaabi. (1 Johane 5:19) Alimwi tulwana mizeezo iitali kabotu, mbwaanga ilakonzya kupa kuti tutamumvwidi Leza. (Baroma 7:21-25) Pele luyando ndotujisi kuli Jehova lutupa nguzu zyakucita ciluzi. Ulabona kusolekesya kwesu nkotucita kutegwa tumumvwide, alimwi ulatugwasya kwiinda mukutupa muuya wakwe uusalala uulaanguzu. (1 Samuele 15:22, 23; Milimo 5:32) Muuya uusalala ulatugwasya kuba abube bupa kuti cituubile kumumvwida.—Bagalatiya 5:22, 23.

17, 18. (a) Ino tulaiya nzi mubbuku eeli? (b) Ino tuyoolanga-langa nzi mucibalo citobela?

¹⁷ Mubbuku eeli, tulaiya mbotukonzya kupona munzila iimukkomanisya Jehova. Tulaiya mbotukonzya kuzibelesya njiisyo zyakwe alimwi azyeelelo zyakulilemeka mubuumi bwesu. Amuyeeye kuti Jehova tatusungilizyi kumumvwida. Kuti twasala kumumvwida, buumi bwesu bulabota alimwi tuyoojana bubotu kumbele. Ciinda zyoonse, kumvwida kuyootondezya mbotumuyanda Leza.—Amubone Bupanduluzi Buyungizyidwe 4.

¹⁸ Kutegwa atugwasye kuzyiba ciluzi acitaluzi, Jehova watupa manjezyeezya toonse. Kuti naa twaayiisya manjezyeezya eesu, alakonzya kutugwasya ‘kubamba milawo yakwe.’ Aboobo, ino manjezyeezya eesu ninzi, alimwi ino inga twaayiisya buti? Atubone.