Leza Ulamulanganya Nywebo

MARIYA mukaintu Munakristo uutandila kumyaka iili 50 yakuzyalwa, mmuntu wakapenga kapati mubuumi bwakwe. Ibumambi bwamulumaakwe bwakapa kuti balekane ikkumi lyamyaka eli lyainda. Kuzwaawo, Mariya walikupengana kusola kuyumuna mukuli wakwe wabuzyali alikke kubana bone. Pele ucili alikke, alimwi zimwi ziindi inga kulendelelwa kwakwe kubaanga kulamuzunda buya. Mariya inga uleezeezya ategwa, ‘sena eci caamba kuti Leza tandilanganyi nobaba bana bangu aba batakwe wisi?’

Naa mulaa nomwakaindide mubuyumuyumu buli boobu naa pe, ncobeni muleetezegwa ambuli mbwalimvwa Mariya. Toonse kuli notwiinda muziimo zikatazya, eelyo tulakonzya kuti inga tuleezeezya kuti naa ndilili Jehova nayootola ntaamu kutugwasya akuti naa mbubuti mbwayootucitila. Zimwi ezi inga nzintu ziletwa akaambo kakuzumanana kutobela milawo ya Leza. (Matayo 10:16-18; Incito 5:29) Zimwi inga ziletwa akuba bantu batalondokede ibakkede munyika iilelwa aa Saatani. (1 Joni 5:19, Ci) Mwaapostolo Paulo wakalemba ategwa: “Zilenge zyoonse zilatongela akumyongwa antoomwe.”—Ba-Roma 8:22.

Nokuba boobo, masunko ngomujana taa ambi kuti Jehova wamufwutatila nokuba kwaamba kuti tabikkili maanu kukupona kwenu pe. Ino inga mwaba buti masimpe akaambo aka? Ncinzi citondezya kuti Leza ulamulanganya?

Cikozyanyo Cansiku

Ibbaibbele lilacisalazya kutondezya kuti Jehova ibantu ulabalanganya umwi aumwi kumugama. Amuyeeye Davida. Jehova wakali kumulanganya ooyu mwana mweembezi kumugama, mane kamujana kuba “muntu mbuli [buyanda] moyo wakwe.” (1 Samuele 13:14) Kumbele Davida naakali mwami ulela, Jehova wakaamba kuti: “ndakali ayebo koonse nkuwakali kuya.”—2 Samuele 7:9.

Sena eci caamba kuti Davida wakalaa buumi “bukwabilidwe,” ibutakwe buyumuyumu buli boonse? Peepe, Davida wakaswaana masunko mapati katana akatalikide kulela. Kwamyaka iili mbwiibede katana kuba mwami, wakali kuyandaulwa a Mwami Saulo mujayi sikazumanana. Muciindi eci mubuumi bwakwe, Davida wakalemba ategwa: “Ndilede akati kabalavu, . . . bana babantu. Meno aabo masumo amivwi.”—Intembauzyo 57:4.

Naba boobu mubuyumuyumu, Davida wakali kusyoma kuti Jehova ulamulanganya. Mumupailo kuli Jehova wakati: “Ulibwene kuzingwa kwangu.” Ee, kuli Davida cakali mbuli kuti Jehova wakali kulanga akulemba penzi eli lyoonse. Mpoona Davida wakayungizya ulaamba: “Bika misozi yangu munsazi yako. Sa tiilembedwe mubbuku lyako?”a (Intembauzyo 56:8) Kwiinda mucikozyanyo eci, Davida wakatondezya kusyoma kwakwe kuti Jehova taakazi buyo penzi lyakwe, wakalizi mane ambulyakamupenzyede kumoyo.

Kuya kumamanino aabuumi bwakwe, Davida wakakonzya kulemba zintu nzyaakalibonena mwini ategwa: “Jehova nguubamba intaamu zyamuntu, ulatabilila oyo uuenda munzila iimubotezya. Nekuba kuti watezeleka, takooyoowa, nkaambo Jehova ulamujatilila kujanza lyakwe.” (Intembauzyo 37:23, 24) Anywebo mulakonzya kusyoma kuti nomuba mumasunko aatamani ayaayo aazumanana, Jehova ulibwene, alimwi kuliyumya kwenu ulakulemeka. Paulo wakalemba kuti: “Nkaambo Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe, mbomwakabelekela basalala, asunu mucibabelekela.”—Ba-Hebrayo 6:10.

Kwiinda mukubelesya muuya uusalala Jehova ulakonzya kutola ntaamu kumugwasya kwiinda mukumuyumya kuti mucikonzye kufwumbwa nomubikkilwa cilebyo munzila yenu. “Mapenzi aamululami manji loko,” mbwaakalemba Davida, “pele Jehova ulamuvuna kuli oonse buyo.” (Intembauzyo 34:19) Ncobeni, Ibbaibbele lilatwaambila kuti meso aa Jehova “alalanga-langa moonse munyika, kuti aliyumye kukugwasya abo balulama mumyoyo kumeso aakwe.”—2 Makani 16:9.

Jehova Wamuswenya Kulinguwe

Azimbi zitondezyo zyakuti Jehova ulalanganya bantu zilakonzya kujanwa mumajwi aa Jesu. “Takukwe muntu uukonzya kuza kulindime Taata uwakandituma atamukwela,” mbwaakaamba. (Johane 6:44) Ee, Jehova ulabagwasya bantu umwi aumwi kuti batambule mpindu yacipaizyo ca Kristo. Ibuti obo? Ikapati nkwiinda mumulimo wakukambauka Bwami. Mmasimpe, ooyu mulimo ulaba “citondezyo kumisyobo yoonse,” pesi bantu ulabasikila umwi aumwi kumugama. Nkukonya kwalo kuti muli mukuswiilila akutobela mulumbe wamakani mabotu ncitondezyo cakuti Jehova ulamulanganya nywebo kumugama.—Matayo 24:14.

Kwiinda mukubelesya muuya uusalala Jehova ulabaswenya bantu ku Mwanaakwe alimwi akubulangizi bwabuumi butamani. Eeci cipa kuti aumwi akonzye kuteelela akutobela kasimpe kazyakumuuya nokuba kuti tulaa mpotugolela alimwi tatulondokede. Ikwaamba ncobeni, muntu takonzi kuteelela makanze aa Leza kakutakwe lugwasyo lwamuuya uusalala. (1 Ba-Korinto 2:11, 12) Mbuli bwakalemba Paulo kubana Tesalonika, “teensi boonse abali alusyomo pe.” (2 Ba-Tesalonika 3:2) Jehova muuya wakwe uusalala uupa buyo kulibaabo batondezya kuti balayanda kuti abaswenye kulinguwe.

Jehova ulabaswenya bantu kulinguwe nkaambo ulabayanda aumwi kumugama alimwi uyanda kuti bakajane lufwutuko. Ma! Cakomena citondezyo cakuti Jehova ulatulanganya. Jesu wakati: “Usowanu uuli kujulu tayandi kuti afwidilile naba umwi akati kabaniini aba.” (Matayo 18:14) Ee, kumeso aa Leza muntu amuntu ulilibedelede aumwi munzila yakwe mwini. Ncencico Paulo ncaakaambila kuti: “Nkaambo uzooabila boonse mbuli milimo yabo.” (Ba-Roma 2:6) Awalo mwaapostolo Petro wakati: “Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.”—Incito 10:34, 35.

Maleele aa Jesu

Maleele aakacitwa a Mwanaakwe Jesu alatondezya munzila yeetezya kuti Leza ulabacebuka bantu. Ooku kuponya kwakacitwa muluzyalo lupati. (Marko 1:40, 41) Mbokunga Jesu “takonzya kucita cintu mwini, pele ncabona icicita Wisi,” inkumbu zyakwe zilatondezya kabotu-kabotu kuti Jehova ulabayeeyela babelesi bakwe aumwi kumugama.—Johane 5:19.

Amuyeeye makani aamaleele Jesu ngaakacita aalembedwe kuli Marko 7:31-37. Aawa Jesu wakaponya muntu wakali sicuulutwi alimwi wakali syaataambi. “Wakamugwisya mumakamu aabantu, wamutola kumbali,” mbolyaamba Ibbaibbele. “Wakaululala kujulu, walisinsimukila, wamwaambila kuti, Effatha, nkukuti, Sinkuka.”

Nkaambo nzi Jesu ncaakamugwisya mumakamu aabantu muntu oyu? Kulalangilwa kuti sicuulutwi uutakonzi akwaambaula inga ulafwa nsoni kuti keebelelwa abantu. Jesu wakabona muntu oyu mbwaatakaliibide eelyo ncencico ncakasala kumuponya kumbali. Ulaamba umwi sikwiiya zya Bbaibbele ategwa, “Makani aayo alatondezya kabotu-kabotu kuti Jesu muntu oyu taakali kumubona kuba buyo sikusilikwa; kulinguwe oyu wakali muntu. Ooyo mwaalumi wakali kuyandika lugwasyo lwaalubazu nkaambo wakajisi penzi lilibedelede, eelyo mulweetelelo lwakwe Jesu wakamweendelezya munzila yatakali kunga ilamuusya nsoni alimwi inzila njaakali kunga ulateelela.”

Makani aaya atondezya kuti Jesu wakali kubalanganya bantu umwi aumwi kumugama. Mulakonzya kusyoma kuti anywebo ulamucebuka mbubonya buyo. Mmasimpe, lufwu lwakwe lwacipaizyo cakali citondezyo caluyando kunyika yoonse yabantu balaa bufwutule. Pesi nywebo mulakonzya kucigamika alindinywe lwenu, mbuli bwakacita Paulo, walo iwakalemba kuti: “Mwana a-Leza, . . . wakandiyanda akulyaaba nkaambo kangu.” (Ba-Galatiya 2:20) Alimwi mbokunga Jesu wakaamba kuti ‘oyo uwakamubona, wakamubona awalo Wisi,’ nkokuti tulakonzya kusyoma kuti Jehova umwi aumwi mubelesi wakwe ulamucebuka munzila yomwe.—Johane 14:9.

Jehova Ulaba Sikupa Bulumbu

Kujana luzibo lwa Leza kujatikizya kuziba mbazu imwi aimwi yabube bwakwe mbuli mbobutondezedwe mu Bbaibbele. Ndilyonya zina lyakuti Jehova lipandulula kuti “Upa Kuti Kube,” icaamba kuti Jehova ulakonzya kuba kufwumbwa ncasala kutegwa acite kuyanda kwakwe. Kuzwa kaindi, walicita kuba muziimo zyaandeene-andeene, kubikkilizya azya Mubetesi, Mweembezi, Uuswiilila zikombyo, Mwami, Taata, Jehova wamakamu, Mwiiyi Mupati, Mulengi, alimwi Munununi.b

Kutegwa tuciteelele kabotu ncolyaamba zina lya Leza, tweelede alimwi tumuzibe Jehova muciimo ca Sikupa Bulumbu. Paulo wakalemba ategwa: “Kuti kakwiina lusyomo tacikonzeki kukonda Leza, nkaambo woonse muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.”—Ba-Hebrayo 11:6.

Jehova wasyomezya buumi butamani anyika yaparadaiso kulibaabo sunu ibasala kumubelekela amoyo woonse. Takuli kuliyanda pe kulangila kuzuzikizigwa kwamakanze akwe mapati, alimwi takuli kulipeekezya ikuliyeeyela kupona abuumi obo. Musa “wakali kucilangila bulumbu ibwakacili kuza.” (Ba-Hebrayo 11:26) Mbubonya Paulo awalo wakali kukulindilila loko kuzuzikizigwa kwazisyomezyo zya Leza ku Banakristo bananike basyomeka. Wakalemba ategwa: “Nja bubindaanina kumagolelo, kuti nkajane bulumbu bwakujulu mbwatwiitila Leza muli-Kristo Jesu.”—Ba-Filipi 3:14.

Anywebo inga mwabulangila bulumbu Jehova mbwasyomezya kulibaabo baliyumya. Kulindilila bulumbu obo ncibeela cini-cini caluzibo lwenu lwa Leza alimwi akuliyumya kwenu mumulimo wakwe. Aboobo inga kamuyeeyesya buzuba abuzuba izilongezyo zya Jehova nzyamuyobwede. Mariya uulya waambwa kumatalikilo wasoleka canguzu kucicita eci. Ulaamba ategwa, “Cakaba nceciindi cakusaanguna mubuumi bwangu ino-ino awa nindakazumina kuti cipaizyo ca Jesu cacinunuzyo cilandijatikizya andime. Ndiyaabutalika kulimvwa kuti Jehova ulandilanganya mebo lwangu. Ndali Munakristo kwamyaka yiinda ku 20, pesi ino awa nindatalika ncobeni kucisyoma eci.”

Kwiinda mukwiiya amukuyeeyesya zili mu Bbaibbele, Mariya alimwi amamiliyoni aabambi bayaabuziba kuti Jehova ulabalanganya bantu bakwe kutali buyo kuti ninkamu, pele aumwi ulamubona kuba muntu kumugama. Mwaapostolo Petro wakali kucisyoma kapati eci cakuti mane wakalemba kuti: “Makataazyo aanu oonse amwaasowele kumaanza aakwe [Leza], nkaambo nguumucebuka lyoonse.” (1 Petro 5:7) Ee, Leza ulamulanganya nywebo!

Bupanduluzi buyungizidwe

Kabbokesi kali apeeji 6]

Kubusigwa—Ncisinizyo Cakuti Leza Ulatulanganya

ICISINIZYO cini-cini cakuti muntu amuntu Leza ulamulanganya cilajanika mu Bbaibbele kuli Johane 5:28, 29 iyaamba kuti: “ciindi ciyoosika ncobati kamvwe ijwi lya[Jesu] boonse abali muzyuumbwe, bayoozwa mpoonya.”

Kujanika kuti ibbala lya Cigiliki lyakuti mne·meiʹon (cuumbwe caciibalusyo) ndelibelesegwa awa muciindi ca taʹphos (cuumbwe). Ibbala lyakuti taʹphos lipa buyo muzeezo wakuzikka. Kakuli lyalo lya mne·meiʹon lipa muzeezo wakuti ulya muntu wafwa ulaibalukwa mbwaakabede.

Mukaambo aka amuyeeye buyo ncayandika kucita Jehova Leza mukubusya bantu. Kutegwa abusye muntu ufwide, weelede kuti kamuzi cakumumaninizya ooyo—kubikkilizya atulengwa ntwaakazyalwa ato alimwi amizeezo yakwe kiizulide mbubonya. Oobu bwelikke mbwanga muntu wabusigwa kali ngonguwe ncobeni.

Aneeno eci tacikonzeki kubantu, pesi “zyoonse zilakonzeka kwa-Leza.” (Marko 10:27) Ulakonzya nokuba kusinizya zili mumoyo wamuntu. Nokuba kuti muntu walifwide kwamyaanda minji yamyaka, Leza takwe nanga wakakilwa kumwiibaluka; talubi pe. (Jobu 14:13-15) Aboobo naakabandauka ba Abrahamu, Izaka, alimwi a Jacobo, nokuba kuti kwakaindide myaanda yamyaka kabafwide, Jesu wakali kukonzya kwaamba kuti Jehova “tali Leza wabafu, pele ngwabaumi, nkaambo boonse balapona kulinguwe.”—Luka 20:38.

Aboobo ibasika kuzyuulu zyamamiliyoni ulabaibaluka Jehova Leza cakubamaninizya buya. Ma! Nceeci cisinizyo cini-cini cakuti Leza ulabalanganya bantu umwi aumwi kumugama!

[Cifwanikiso icili apeeji 7]

Jesu wakali kubalanganya aabo mbaakaponya