Bakacita Kuyanda kwa Jehova
Ikumvwa Majwi aa Jesu Aakumamanino
KUMANGOLEZYA aa Nisani 14, mu 33 C.E., Jesu Kristo abaapostolo bakwe bali 11 ibasyomeka bakakkala kutebule muŋanda yamujulu mu Jerusalemu. Kazi kuti lufwu lwakalaafwi, wakabaambila kuti: “kuli ciindi ciniini ncendi anywebo.” (Johane 13:33) Atwaambe kuti Judase Iskariote wakali kale munzila ikuyoomvwana abaalumi babi ibakali kuyanda kuti Jesu ajaigwe.
Kwiina wakainda ali Jesu muŋanda eyo ikulimvwa kuti ciindi cilimanide. Wakalizi kabotu-kabotu kuti wakalaafwi kupenga. Alimwi Jesu wakalizi kuti baapostolo bakwe balamulekelezya busiku mbubonya obo. (Matayo 26:31; Zekariya 13:7) Mbokunga eeci ncecakali ciindi camamanino ncaakali kunga ulabelesya kwaambaula abaapostolo katanafwa Jesu, tulakonzya kusyoma kuti majwi aakwe aakulaya wakaagamika kuzintu zipati kwiinda.
“Amukacite Obo Kuti Mukandiyeeye”
Abaapostolo bakwe basyomeka Jesu wakaanza ciyanza cipya mubusena bwa Pasika yaci Juda. Mwaapostolo Paulo wakaciita kuti “Mulalilo wa-Mwami.” (1 Ba-Korinto 11:20) Wakabweza mukamu Jesu amane wakapa mupailo. Amane wakuukomauna mukamu akupa baapostolo bakwe. “Amubweze, mulye, nkaambo ngooyu mubili wangu. Alimwi wakabweza kanywido, walumba, wabaabila, waamba wati, Amunywide mulinkako nyoonse, nkaambo mboobu bulowa bwangu bwamulongo butililwa bantu banji kuti balekelelwe milandu yabo.” (Matayo 26:26-28).
Ino eci ciyanza cakali kwaamba nzi? Mbuli bwakatondezya Jesu, mukamu wakali kwiiminina mubili wakwe uutakwe zibi. (Ba-Hebrayo 7:26; 1 Petro 2:22, 24) Waini wakali kwiiminina bulowa bwa Jesu butikide, bwalo bwakali kuzoopa kuti kukonzeke kulekelelwa kwazibi. Alimwi bulowa bwakwe bwacipaizyo bwakali kuzoosinizya cizuminano cipya akati ka Jehova Leza abantunsi bali 144,000, ibayoolela a Jesu kujulu. (Ba-Hebrayo 9:14; 12:22-24; Ciyubunuzyo 14:1) Kwiinda mukutamba basikwiiya bwakwe kuti babe alubazu mucilyo eci, Jesu wakatondezya kuti bayoolela limwi mu Bwami bwakujulu.
Ikwaamba zyacilyo eci caciibalusyo, Jesu wakalailila kuti: “Amukacite obo kuti mukandiyeeye.” (Luka 22:19) Ee, Mulalilo wa Mwami cakali kuzooba ciyanza camwakaa mwaka, mbweena bwakali Pasika. Kakuli Pasika yalo yakali kwiibalusya kufwutulwa kwabana Israyeli kuzwa mubuzike ku Egepita, walo Mulalilo wa Mwami wakali kunoozoogeme akufwutula ikwiinda loko awo—ikwabantu balaabununune kubuzike bwacibi alufwu. (1 Ba-Korinto 5:7; Ba-Efeso 1:7) Kuyungizya awo, aabo batola lubazu mukulya mukamu wabwiiminizi alimwi awaini bakali kunoozooibalusigwa lubazu ndobanoojisi kumbele mukuba bami abapaizi mu Bwami bwa Leza bwakujulu.—Ciyubunuzyo 20:6.
Lufwu lwa Jesu Kristo ncobeni ncecintu cipati icatakaninga citikide kubantu kuzwa kaindi. Aabo baciteelela Jesu ncaakacita balamvwa mulawo wakwe uujatikizya Mulalilo wa Mwami iwakuti: “Amukacite obo kuti mukandiyeeye.” Bakamboni ba Jehova balalwiibaluka lufwu lwa Jesu mwakaa mwaka mubuzuba bweelene a Nisani 14. Mu 1996 oobu buzuba bunooli mu April 2, lyaakumana kubbila zuba. Mwatambwa camaanza obile kuti mukajanike ku Ŋanda ya Bwami iili kubusena oko nkomukkala.
“Ndamupa Mulao Mupya”
Kunze lyakwaanza Mulalilo wa Mwami, Jesu wakalaa lulayo lwamamanino kubaapostolo bakwe. Nokuba kuti bakaliyiisidwe kabotu, aaba bamaalumi bakacilaa zinji zyakwiiya. Teebakamaninizya kuteelela makanze aa Leza aajatikizya Jesu, aajatikizya mbabo, naaba aajatikizya zyakumbele. Pesi Jesu taakasola kusalazya twaambo otu aciindaawa. (Johane 14:26; 16:12, 13) Muciindi caboobo, wakaamba cintu cimwi cipati loko. Wakati: “Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya.” Amane Jesu wakayungizya ulaamba: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”—Johane 13:34, 35.
Muunzila nzi oyu muwakali “mulao mupya”? Mbobuya, Imulawo wa Musa wakalailila kuti: “Yanda mweenzinyoko mbubonya mboliyanda omwini.” (Levitiko 19:18) Pesi, Jesu wakayanda basikumutobela kuti batondezye luyando lwakuliimya lwalo lwakali kuzoosika akukupa buumi bwakwe muntu mukufwida Banakristonyina. Aneeno oyu ‘mulawo waluyando’ wakali kuzoobeleka amuziimo zitakatazide loko. Muziimo zyoonse sikutobela Jesu Kristo wakali kunoozootola ntaamu mwini ikutondezya luyando kwiinda mukugwasya bamwi munzila yakumuuya amunzila zimbi.—Ba-Galatiya 6:10.
Busiku bwamamanino mubuumi bwa Jesu bwaansi, luyando lwakapa kuti Jesu apailile basiciiya bakwe kuli Jehova Leza. Cibeela camupailo wakwe cakali cakuti: “Nsicinoolimo limbi munyika, pele aba bacili munyika, mebo ndiza kulinduwe. Taata Oosalala, babambe muzina lyako abo mboondipede, kuti babe bamwi, mbuli mbotubede aswebo.” (Johane 17:11) Ncintu ceelede kubona kuti munkombelezyo eyi kuli Wisi, Jesu wakapailila lukamantano lwaluyando kuli basikumutobela. (Johane 17:20-23) Bakali kuyandika kuti ‘bayandane, mbubonya mbwaakabayanda.’—Johane 15:12.
Baapostolo basyomeka bakaamvwa majwi aa Jesu aakumamanino. Aswebo tweelede kutobela milawo yakwe. “[Mu]mazuba aakumamanino,” aaya aakatazya, luyando alukamantano akati kabakombi beni-beni nzintu zipati loko kwiinda ambuzitaningabede. (2 Timoteo 3:1) Ncobeni, Banakristo beni-beni baliimvwa milawo ya Jesu kwiinda mukutondezyanya luyando lwabunyina. Eeci cilabikkilizya akumvwa mulawo wakusekelela Mulalilo wa Mwami.