Ciibalusyo Amucisekelele Cakweelela
KWAKALI kumangolezya mubuzuba bwa Nisani 14, mu 33 C.E., Jesu naakacitalisya Ciibalusyo.a Wakali wazwaa kutobela ciyanza ca Pasika abaapostolo bakwe bali 12, elyo tulakonzya kuba masimpe kuti bwakali buzuba nzi bwamwezi. Amane kuzwisya sikumutama, Judase, Jesu “wakabweza mukamu, walumba, wakomona, wabaabila, wati, Amutambule. Ngooyu mubili wangu. Alimwi wakabweza cinywido, walumba, wabaabila, elyo bakanywa boonse. Mpoonya wakabaambila kuti, Mboobu bulowa bwangu bwamulongo mupya, mbubatikilwa banji.”—Marko 14:22-24.
Jesu wakalailila basiciiya bakwe kuti kabaibaluka lufwu lwakwe nkaambo kancolwaamba. (Luka 22:19; 1 Ba-Korinto 11:23-26) Icakwe cakali ncecipaizyo celikke cakali kukonzya kunununa muntu kuzwa mukusinganizigwa kwacibi ncazyedwe aco alimwi alufwu. (Ba-Roma 5:12; 6:23) Mukamu alimwi awaini nzyaakabelesya zyakali zitondezyo ziiminina mubili wakwe uulondokede alimwi abulowa bwakwe. Mbutubuzi buzuba bwamwezi bwini-bwini, tulakonzya kucisekelela ciyanza eci mubuzuba bweendelene mwakaa mwaka, mbubonya bwakali kucitwa Pasika yaci Juda. Pesi eci tweelede kucicita cakweelela. Nkaambo nzi?
Mwaapostolo Paulo wakaamba kuti aabo batola lubazu mukulya zitondezyo zyamukamu awaini “[ba]nooyootondezya lufu lwa-Mwami mane do akasike.” (1 Ba-Korinto 11:26) Aboobo kusekelela oku kwakali kunoozoogeme alufwu lwa Jesu abupanduluzi bwandulo kubantu. Cakeelede kunooba ciindi cakusinizya, iciindi cakwiibaluka bubotu bwa Leza alimwi aakumulumba nkotweelede kulumba Jehova a Mwanaakwe. (Ba-Roma 5:8; Tito 2:14; 1 Johane 4:9, 10) Aboobo Paulo wakacenjezya kuti: “Nkaambo kaako, umwi aumwi uulya mukamu oyu, nikuba kunywa mucinywido eci, cakutaelela, ulijisi mulandu kumubili akubulowa bwa-Mwami.”—1 Ba-Korinto 11:27.
Cakweelela—Mubuti?
Cilalibonya kuti Leza inga takoobotelwa kuti ciindi eco twacisofwaazya kwiinda mukucita micito iitalomenye naa mukubweza ziyanza zyabuhedeni. (Jakobo 1:27; 4:3, 4) Eeci citugwisizya limwi tumpiyompiyo twaciindi ca Isita. Mukutobela malailile aa Jesu aakuti ‘tucite boobu kuti tukamuyeeye,’ tuyanda kuti Ciibalusyo tucisekelele mbweena mbwaakacitalisya. (Luka 22:19; 1 Ba-Korinto 11:24, 25) Eeci caamba kuti kwiina kutubikkilizya tumpiyompiyo itwakayungizigwa azikombelo zya Kristendomu mukusekelela. New Catholic Encyclopedia ilakazumina kaambo kakuti “Imisa yasunu ilaindana loko aciyanza cuubauba icakali kutobela Kristo a Baapostolo Bakwe.” Alimwi kwiinda mukusekelela Misa ziindi zinji, mane nobuba buzubaa buzuba, Kristendomu yaleya kuzwa kumakanze aa Jesu akucicita kuba cintu buyo.
Paulo wakalembela Banakristo bana Korinto zyakutola lubazu cakweelela nkaambo kapenzi limwi lyakatalikide mumbungano kujatikizya Mulalilo wa Mwami. Bamwi teebakali kuulemeka pe. Bakali kunga nkuletelezya cilalilo cabo beni akuzoocilida kumuswaangano kuutanatalika naa kuutalikide. Kanjikanji bakali kwiindilizya kunywa. Eeci cakali kubapa kufwa ŋonzi akubaa kazilukwa. Kwiinda mukutapakamana kumizeezo akumuuya, cakali kubapa kuti “[ba]tatweluki [“tatelaiki,” Ci] Mubili wa-Mwami,” icakabapa “mulandu kumubili akubulowa bwa-Mwami.” Aciindi mpoona awo, aabo batakalide bakafwide nzala, elyo abalo bakageme kuyeeya zyabo. Inga kwategwa kwiina akati kabo iwakalibambide kutola lubazu mukulya zitondezyo munzila yakulumba akuteelela kabotu kuti ncintu cipati cicitika—ikuti oku kwakali kusekelela kwakwiibaluka lufwu lwa Mwami. Eeci cakapa kuti babetekwe, nkaambo bakali kulitondezya kutacilemeka, mane nokuba kucisampula buya.—1 Ba-Korinto 11:27-34.
Kutelaika Kulayandika
Bamwi bakatola lubazu mukulya zitondezyo zya Ciibalusyo nokuba kuti kumbele bakazooziba kuti tabeelede pe. Aabo beelede ncobeni kutola lubazu mukulya zitondezyo zyaku Ciibalusyo basalidwe buya a Leza alimwi balaa bumboni bwakaambo ako ibwamuuya wa Leza. (Ba-Roma 8:15-17; 2 Ba-Korinto 1:21, 22) Takuli kusala kwabo beni naa kweezeezya kwabo ikubapa kweelela. Leza uluubikkide kale mweelwe wabaabo bayoolela limwi a Kristo kujulu kuti ngu 144,000, imweelwe musyoonto kuweezyanya awabaabo boonse bayoogwasigwa acinunuzyo ca Kristo. (Ciyubunuzyo 14:1, 3) Kusala kwakatalika kuciindi ca Jesu, aboobo kweelede kuti sunu mbasyoonto buyo basikutola lubazu. Alimwi mbobayaabufwa bamwi, imweelwe wabo weelede kuuyaabuceya.
Nkaambo nzi muntu ncanga ulatola lubazu mukulya zitondezyo kateelede? Cilakonzya kuba aakaambo kanzyaakali kusyoma mubukombi bwakwe bwamusule—ikuti boonse basyomi baya kujulu. Antela kulakonzya kuba kulipeekezya akuliyanda—ikulimvwa kubainda kweelela bambi—alimwi amambonwa. Ambweni nkaambo kambwalimvwide kumoyo akaambo kamapenzi aataambiki naa manyongwe alo aapa kuti muntu oyo katacibuyandi buumi bwaansi. Alimwi cilakonzya kuba aakaambo kakuyanzana cilongwe amuntu uusalidwe kuya kujulu. Toonse tweelede kuyeeya kuti uusala mwini-mwini ngu Leza, ikutali ndiswe pe. (Baloma 9:16, Ci) Aboobo kuti muntu amana “kulilingula,” wajana kuti taali kweelede kunootola lubazu mukulya zitondezyo, lino weelede kulikasya.—1 Ba-Korinto 11:28.
Ibulangizi Leza mbwabikkilide bunji bwa bantu mbwabuumi butamani muparadaiso anyika. Eeco ncilongezyo cipati loko cakulindila, alimwi ncintu cinga catuubila kulombozya. (Matalikilo 1:28; Intembauzyo 37:9, 11) Mpaanyika ibasyomeka mpobayooswaangana alimwi abayandwa babo babusyigwa alimwi mpobayooswaana balulami baciindi, mbuli ba Abrahamu, Sara, Musa, Rahabu, Davida, alimwi a Johane Mubbapatizi—boonse balo ibakafwa Jesu katana kwiijula nzila yakusika kubuumi bwakujulu.—Matayo 11:11; amweezyanye a 1 Ba-Korinto 15:20-23.
Aabo ibalaa bulangizi bwaanyika baluusekelela Mulalilo wa Mwami cakweelela kwiinda mukujanika kulinguwo akuteelela cabulemu, nokuba kuti tabatoli lubazu mukulya mukamu akunywa waini. Abalo balagwasyigwa acipaizyo ca Kristo, calo cibapa kukonzya kubaa ciimo cibotu kuli Leza. (Ciyubunuzyo 7:14, 15) Nobaswiilila makani aapegwa, kulumba kwabo kuzintu zyabuleza kulayumizigwa, alimwi kulombozya kwabo kulakomena ikwakuzumanana mulukamantano abantu ba Leza boonse.
Kono, muli Bwabili, mu April 2, kalibbide kale zuba, Iciibalusyo ciyoosekelelwa mumbungano zyoonse zya Bakamboni ba Jehova iziinda ku 78,000 nyika yoonse mbwiizulwa. Sena munooliko andinywe?
Bupanduluzi buyungizidwe
a Buzuba muci Juda bwakali kutalika kumangolezya. Akkalenda yesu, oobo buzuba bwa Nisani 14 bwakatalika kumangolezya aabuzuba Bwane, mu March 31, kuyoosika kumabbililo aazuba kumangolezya muli Bwasanu, mu April 1. Iciibalusyo cakaanzwa kumangolezya muli Bwane, mpoona lufwu lwa Jesu lwakazoocitika kumazuba muli Bwasanu kabuli mbubonya mbuzuba muci Juda. Wakabusigwa mubuzuba bwatatu, mafwumofwumo mu Nsondo.
[Cifwanikiso icili apeeji 8]
Bakamboni ba Jehova balacisekelela Ciibalusyo ciindi comwe mwakaa mwaka