Lyoonse Kamubikka Mikuli Yenu Mumaanzaa Jehova
IBANJI sunu balimvwa kuminwa amikuli. Kuyuma kwabukkale, mapenzi aamumukwasyi aakatazya, kutapona kabotu, macise akupenga kuzwa mukudyaamininwa abulelo bwalunya, alimwi amulongo wamapenzi ambi zyoonse zilalengelela mbuli ziyo munsingo zyabo. Kunze lyabuyumuyumu obu bwaanze, bamwi balalemenwa akulimvwa kwakuti tabakwe ambobabede akuti mbantu bakakilidwe akaambo kakutalondoka kwabo. Banji cilabapa akuyeeya kucilekela limwi. Ino nywebo inga mwacikonzya buti ciindi mikuli niibanga tiicikonzeki?
Cimwi ciindi Mwami Davida wa Israyeli wakalimvwa kwaatila limwi. Mbuli bwaamba Intembauzyo 55, ikulibilika kwakamuzinga akaambo kabuyumuyumu alimwi alusulo lwabasinkondonyina. Wakali kumucisa moyo alimwi wakali kuyoowa. Wakali kwiide kutongela mubuumba bwakwe. (Intembauzyo 55:2, 5, 17) Pesi napenga boobo, wakajana nzila yakuti acikonzye. Munzila ili buti? Wakalanga kuli Leza kuti ulamugwasyilizya. Ilulayo ndwaakapa baabo banga banoolimvwide mbubonya lwakali lwakuti: “Bika makani aako oonse mumaanza aa-Jehova.”—Intembauzyo 55:22.
Ino wakali kwaamba nzi naakati “bika makani aako oonse mumaanza aa-Jehova”? Sena caamba buyo kusikila Jehova mukupaila akwaamba mbotulibilikide? Naa inga twacita cimwi cintu swebo lwesu ikugwasya kuubya-ubya zintu? Ino kuti twalimvwa kutaelela kusikila Jehova? Tulakonzya kuziba ncaakali kwaamba Davida kwiinda mukulanga zimwi ziluulwa kujatikizya nguwe izyeelede kuti wakali kuziibaluka ciindi naakali kulemba majwi aya.
Kamucita Zintu Munguzu zya Jehova
Sa mulayeeya Goliati mbwaakali kuyoosya myoyo yabalombwana bana Israyeli ibakali kunkondo? Eeyi nkalakata yamulombwana, iyakali kwiinda a 2.7 m kulampa yakali kubayoosya cini-cini. (1 Samuele 17:4-11, 24) Pesi walo Davida takwe naakayoowa pe. Nkaambo nzi? Nkaambo taakasola kulwana Goliati munguzu zyakwe mwini pe. Kuzwa ciindi naakananikwa kuzooba mwami wa Israyeli, wakazumizya muuya wa Leza kuti kuumusololela akumuyumya mumicito yakwe yoonse. (1 Samuele 16:13) Aboobo wakaambila Goliati kuti: “Mebo ndeza kulinduwe muzina lya-Jehova wamakamu makamu, Leza wabasinkondo ba-Israyeli ngosampaula. Mubuzuba obuno Jehova ulakwaaba mumaanza aangu.” (1 Samuele 17:45, 46) Davida wakali haazibwene kukuwaala mabwe akwizo, pesi tulakonzya kusyoma kuti muuya uusalala wa Jehova wakalyeendelezya akuliyungizizya nguzu ibbwe ndyaakawaala kuli Goliati.—1 Samuele 17:48-51.
Davida wakalikonzya penzi pati kapati akuzunda kwiinda mukubaa lusyomo lwakuti Leza ulamugwasilizya alimwi akumuyumya. Wakali watangana cilongwe cibotu a Leza icalusyomo. Cakutadooneka eci cakayumizigwa anzila Jehova njaakamuvwunide kuciindi camusule. (1 Samuele 17:34-37) Mbuli Davida, mulakonzya kuzumanana kubaa cilongwe cimugeme a Jehova akubaa lusyomo luzwide lwakuti ulakonzya alimwi ulilisungwide kumuyumya akumubamba muziimo zyoonse.—Intembauzyo 34:7, 8.
Amucite Mbuli Mbomukonzya Ikumana Penzi
Nokuba boobo eci tacaambi kuti kwiina nokuyooba ziindi zyamacise mapati, kulibilika, alimwi nokuba kuyoowa, mbuli mbwiitondezya kabotu-kabotu Intembauzyo 55. Nokwakainda myaka iili mbwiibede kuzwa ciindi naakatondezya boobu lusyomo muli Jehova, Davida wakainda mukuyoowa kapati akaambo kabasinkondonyina. Wakaleka kuyandwa a Mwami Saulo aboobo wakayandika kuti atije alivwune. Amusole buyo kweezeezya mbweelede kuti Davida wakanyongana kumoyo, imibuzyo yakaboola kumizeezo yakwe iyakuzuzikizigwa kwamakanze aa Jehova. Kakuli wakananikidwe kuzooba mwami mu Israyeli kumbele, lino ngooyu wakali simutuntuli munkanda iweelede kulifwutula, kavwimwa mbuli munyama wamusyokwe. Naakasola kuyuba mumunzi wa Gati imwakali kuzwa Goliati, wakazyibwa. Ncinzi lino cakacitika? Malembe aamba kuti “wakali kuyoowa loko.”—1 Samuele 21:10-12.
Pesi taakalekela buyoofwu akulibilika kapati kuti zimulesye kulangila lugwasyo kuli Jehova. Kweendelana a Intembauzyo 34 (yalo yakalembwa mukuluula ceeci), Davida wakaamba kuti: “Ndakayandaula Jehova, nkabela wakandivwiila, wandivuna kukuyoowa kwangu koonse. Oyu uupengede wakakwiila, lino Jehova wakaswiilila, wamuvuna mumapenzi aakwe oonse.”—Intembauzyo 34:4, 6.
Aneeno Jehova wakamugwasyilizya. Nokuba boobo Davida tanaakaide kukkala kalindila Jehova kuti amuvwune. Wakaziba kuti uyandika kucita coonse ncakonzya muciimo eco kuti azwe mubuyumuyumu obo. Wakazumina kuti ulavwunwa kujanza lya Jehova, pesi wakatola ntaamu, walicengeezya kusondoka icakuti mwami wa Gati tanaakamujaya pe. (1 Samuele 21:14–22:1) Aswebo tuyandika kuti tucite coonse ncotukonzya kuti twiikonzye mikuli yesu, kwiinda kwiide kulindilila Jehova kuti atuvwune.—Jakobo 1:5, 6; 2:26.
Mutaliyungizizyi Mikuli
Davida wakaiya acimbi ciiyo icakamucisa loko kumbele mubuumi bwakwe. Ino nciiyo nzi eco? Ncakuti zimwi ziindi tulaliyungizizya mikuli tobeni. Kuzwa lyakazundwa ba Filisti, izintu zyakamululila Davida ciindi naakasala kuti alonzye bbokesi lyacizuminano kulipilusya ku Jerusalemu. Makani aazyakacitika aluulwa kuti: “Mpawo Davida wakanyamuka abantu boonse mbaakali abo kuya ku-Baale-Juda kuyooleta kuzwa oko ibbokesi lya-Leza, . . . Nkabela bakabika ibbokesi lya-Leza aŋola impya . . . abalo Uza a-Ahio bana ba-Abinadabu bakali kweenzya iŋola impya.”—2 Samuele 6:2, 3.
Ikubelesya ŋola kweenzya Bbokesi elyo kwakali kutyola milawo yoonse Jehova njaakabikkide kujatikizya ndilyo. Kwakalaambidwe kabotu-kabotu kuti ibaciinga cizumizidwe kuyumuna, ba Levi ba Kohati mbabakeelede kuliyumuna amakuko abo, kababelesya miziyo iisyomekedwe muncoko izyakajisi a Bbokesi. (Kulonga 25:13, 14; Myeelwe 4:15, 19; 7:7-9) Ikutaaluka malailile aya kwakaleta manyongwe. Iciindi ŋombe zyakali kukwela ŋola nozyakatiliwisye, Uza, walo uulangilwa kuti wakali mu Levi pele katali mupaizi pe, wakatambika maanza kuti alitabilile Bbokesi, eelyo wakaumwa a Jehova akaambo kakubula bulemu.—2 Samuele 6:6, 7.
Davida mbwaakali ngomwami kuli mbwaakajatikizigwa mumulandu oyu. Ncaakacita awa cilatondezya kuti nobaba baabo balaa cilongwe cibotu a Jehova balakonzya muziindi-zimwi ikwaatambula bubyaabi masunko. Icakusaanguna Davida wakanyema. Amane wakayoowa. (2 Samuele 6:8, 9) Icilongwe cakwe calusyomo muli Jehova cakasunkwa loko. Mpaawa lino wakabaanga wakakilwa kubikka mukuli wakwe mumaanza a Jehova, naatakatobela malailile akwe. Sena eco cilakonzya kuba akulindiswe zimwi ziindi? Sena kuli notutamikizya Jehova mapenzi asika akaambo kakutaaluka malailile aakwe?—Tusimpi 19:3.
Ikukonzya Kuyumuna Mukuli Wamulandu
Amane cakumbele, Davida wakazooliletela mukuli wamulandu uutalikomeneni kwiinda mukutaaluka zyeelelo zya Jehova ziluleme. Aciindi eco Davida wakali wuutula mukuli ngwapedwe iwakusololela bantu bakwe mulumamba. Wakasyaala mu Jerusalemu ciindi nobakaya kukulwana. Eeci cakaleta manyongwe mapati.—2 Samuele 11:1.
Mwami Davida wakabona Bateseba weebeka ulasamba. Wakamucitila bwaamu aboobo wakamita. (2 Samuele 11:2-5) Nkwasola kuvwumbilila kutalilemeka kwakwe, wakapilusya mulumi wa Bateseba, Uriya ku Jerusalemu kuzwa kunkondo. Uriya wakakaka kuya koona amukaintu wakwe aciindi Israyeli niyakajisi bubi kunkondo. (2 Samuele 11:6-11) Davida limwi wakasika nkwabelesya nzila mbi yabumpelenge kusola kuvwumbilila cibi cakwe. Wakalailila basikalumambanyina Uriya kuti bakamusiye mubusena bwankondo butakwabilidwe kutegwa akajaigwe. Icinyonyoono cipati citaambiki!—2 Samuele 11:12-17.
Aino muciindi cakamweenzya cibi cakwe Davida, wakayubununwa. (2 Samuele 12:7-12) Amusole buyo kuyeeya mbubwakamulemena buumba amulandu Davida ciindi naakazoobona kukomena kwaceeco ncaakacita akaambo kabwaamu bwakwe. Kwakali kunoomuzunda buya kutyompokelwa, ikapati akaambo kakuti ubaanga wakali muntu ulaamoyo musyoonto uulyeetezya. Ulakonzya kuti mane wakalimvwa kuti mmuntu uutakwe ambwabede pe!
Nokuba boobo, Davida wakafwambaana kukuzumina kulubizya kwakwe, kalyaamba kuli Natani kuti: “Ndabisya kuli-Jehova.” (2 Samuele 12:13) Intembauzyo 51 ilatwaambila mbuli mbwaakalimvwide alimwi ambuli mbwaakakombelezya Jehova Leza kuti amusalazye akumulekelela. Wakapaila ategwa: “Undisanzyisye kumilandu yangu, akundisalazya kuzibi zyangu. Nkaambo ndaziba milandu yangu, azibi zyangu zili kumeso aangu lyoonse.” (Intembauzyo 51:2, 3) Akaambo kakuti wakeempwa ncobeni, wakakonzya kuyaka cilongwe ciyumu ntaa, wakayanzana alimwi a Jehova. Davida taakagama kulisenda akulyuubya-ubya. Wakabikka mukuli wakwe mumaanza a Jehova kwiinda mukuuzumina cakulibombya imulandu wakwe, ikutondezya kweempwa kwini-kwini, kukombela kulekelelwa a Jehova cakusinizya. Wakapilusyilwa luyando lwa Leza.—Intembauzyo 51:7-12, 15-19.
Ikukonzya Kulwana Buzangi
Eeci citusisya kuliceeco cakapa kuti Davida alembe Intembauzyo 55. Cakali mupenzezye loko kumoyo. Wakalemba kuti: “Moyo wangu ulaciswa loko mukati kangu; buyoofu bwalufu bwandisikila.” (Intembauzyo 55:4) Ncinzi cakamuletela macise ayo? Abisalomu, imwanaakwe Davida, wakasolede kumwaatula abwami Davida. (2 Samuele 15:1-6) Oobu buzangi bwamwanaakwe wakulizyalila bwakali kulema kale bwelikke, pele bwakaindila buya akaambo kakuti sikulaya wa Davida wiinda kusyomwa, imwaalumi uutegwa Ahitofeli, awalo wakanjilila kukuzangila Davida. Ngonguwe Ahitofeli ngwapandulula Davida ku Intembauzyo 55:12-14. Akaambo kabuzangi mbubonya oobo, Davida wakayandika kuti atije kuzwa mu Jerusalemu. (2 Samuel 15:13, 14) Ma! Cileelede kuti cakamucisa cini-cini eeco.
Nokuba boobo taakalekela lweetelelo lwakwe abuumba kuti buubye lusyomo lwakwe muli Jehova. Wakakomba kuli Jehova kuti atyompekezye makanze aabazangi abo. (2 Samuele 15:30, 31) Alimwi tulabona kuti Davida takwe naakaide kukkala kulindila Jehova kuti abe nguumucitila zyoonse. Mbokwakajanika buyo ciindi, wakacita eco ncaakali kukonzya ikulwana buzangi oobo ibwakageme nguwe. Wakatuma sikumulaya umbi, Husai, kuti apiluke ku Jerusalemu akalicengeezye kunjilila mubuzangi, nokuba kuti cini ncaakaunkila nkuyoobutyompokezya. (2 Samuel 15:32-34) Mulugwasyo lwa Jehova, muzeezo oyu wakabeleka. Husai wakabasowela ciindi bazangi kutegwa Davida akonzye kuyobolola nkamu yakwe akulibambila kulikwabilila.—2 Samuele 17:14.
Uleelede kuti mubuumi bwakwe boonse Davida wakalumba cini-cini kubambwa a Jehova alimwi ambwaakamukkazikila moyo akulisungula kumulekelela! (Intembauzyo 34:18, 19; 51:17) Nzenzizyo ezi nzyaakainda Davida nzyatukulwaizizya calusyomo kuti muziindi notuli mumapenzi katulangila lugwasyo kuli Jehova, ‘akubikka mikuli yesu kuli Jehova.’—Amweezyanye a 1 Petro 5:6, 7.
Amuyake Akubamba Cilongwe Ciyumu, Calusyomo a Jehova
Mbuti mbotunga twatangana cilongwe a Jehova mbuli ncaakatangene a Davida, icilongwe cakamugwasya muziindi zyamasunko amapenzi mapati? Tulaciyaka cilongwe cili boobo kwiinda mukuba basungu kukwiiya Jwi lya Leza, Ibbaibbele. Tulamulekela kuti atuyiisye milawo yakwe, injiisyo zyakwe alimwi abube bwakwe. (Intembauzyo 19:7-11) Mbotuyeeyesya Jwi lya Leza, tulaswena kulinguwe akwiiya kumusyoma cakumaninina. (Intembauzyo 143:1-5) Tulaciyumya cilongwe cesu anguwe kwiinda mukusangana abakombima kutegwa tuyungizye kuyiisigwa anguwe Jehova. (Intembauzyo 122:1-4) Tulaciyumya cilongwe cesu a Jehova kwiinda mukupaila camoyo omwe.—Intembauzyo 55:1.
Masimpe Davida, mbuli ndiswe wakalaa ziindi naakali kutyompwa, iziindi cilongwe cakwe a Jehova nicakali kuuba-uba kwiinda mbucakeelede kuba. Kudyaamininwa kulakonzya “[kutu]sondosya.” (Mukambausi 7:7) Pesi Jehova ulabona citucitikila, eelyo ulizi cili mumoyo wesu. (Mukambausi 4:1; 5:8) Tuyandika kuti tubeleke canguzu kutegwa tuyumye cilongwe cesu a Jehova. Mpoona kufwumbwa mikuli njotuyandika kuyumuna, inga twaibikka ali Jehova kuti atulemunune kulemenwa oko antela atupe nguzu zyakucikonzya kwiinda muciimo ncotubede eco. (Ba-Filipi 4:6, 7, 13) Caamba kuti katuzumanana kuba munsi a Jehova. Iciindi Davida naakali kucita obo wakali kumaninina kuliiba.
Aboobo kufwumbwa ciimo ncomubede, Davida waamba kuti, lyoonse amubikke mikuli yenu mumaaza aa Jehova. Mpoona ayootucitikila masimpe aacisyomezyo cakuti: “Lino ulakutabilila; lyoonse takooyoozuminina baluleme kuwida mumapenzi.”—Intembauzyo 55:22.