Ibulemu Bupati bwa Ŋanda ya Jehova
“Njoozuzya iŋanda eyi bulemu, mbwaamba Jehova wamakamu.”—HAGAI 2:7.
1. Ino muuya uusalala uswaangene buti alusyomo amilimo?
UMWI wa Bakamboni ba Jehova naakali kukambauka kuŋandaa ŋanda wakaswaanganya mukaintu umwi wacikombelo ca Pentekoste walo wakaamba kuti, ‘Swebo tulijisi muuya uusalala pele ndinywe muucita mulimo.’ Cabusongo wakapanduludwa kuti muntu uujisi muuya uusalala mbuli mbukweelede uuyookulwaizigwa kucita mulimo wa Leza. Jakobo 2:17 yaamba kuti: “Lusyomo lutajisi milimo mbululi lulike, lulifwide buyo.” Kwiinda mulugwasyo lwamuuya wa Jehova, Bakamboni bakwe babaa lusyomo lwini-lwini alimwi ‘wazuzya ŋanda yakwe abulemu’ kwiinda mukubabelesya milimo iiluleme—wakusaanguna kauli ‘wakukambauka Makani Mabotu aa Bwami munyika yoonse kuti abe citondezyo kumisyobo yoonse.’ Imulimo oyu waakucitwa akukkomanisya Jehova “mamanino azoosika.”—Matayo 24:14.
2. (a) Nzilongezyo nzi ziyoojanwa kuti twabeleka canguzu mumulimo wa Jehova? (b) Nkaambo nzi ncotunga twakkomanina ‘kumuka’ kulikoonse kulibonya?
2 Kuzwa kumajwi aaya aa Jesu tukonzya kubona kuti imulimo wesu sunu weelede kugama akukambaukila bamwi “bulemu bwa-Leza uuli acoolwe” ngotwakapegwa kuti twaaiisye. (1 Timoteo 1:11) Twabikkila maanu cakukkomana kumulimo wa Jehova imamanino ayooboneka kusika kufwambaana. Kuli Habakuku 2:2, 3, tubala majwi aa Jehova ategwa: “Lemba eci cilengano, cimvwike kabotu acilembelo, kuti umwi aumwi acibale cakucijaana. Nkaambo cilengano cilijisi ciindi caco cibikidwe. Cileza bukunkulika, nkabela kumamanino tacikooyoobeja pe. Na camuka, kocilindila, nkaambo ncobeni cilaza, tacikooyoocedelelwa pe.” Inzya “cilengano” ciyoocitika kufumbwa “na camuka.” Mbwaanga tuli mumwaka wa 83 wabulelo bwa Bwami bwa Jesu bamwi balakonzya kulimvwa kuti cilimukide kale lino. Nokuba boobo sena tatweelede kulimvwa kukkomana ikuti mamanino taana sika? Mukati kamyaka eeyi yamuma 1990 ikukambauka makani mabotu kwazumizigwa eco cilakonzya kubonwa ku Eastern Europe, kumasena amwi aamu Afulika amumasi ambi. Oku ‘kumuka’ kupa ciindi cakuti “mbelele” zinji ziyobololwe kuzwa mumasena aaya aazwaa kujalulwa lino.—Johane 10:16.
3. Nkaambo nzi kuteelela kwesu kupya kujatikizya “izyalani elino” ncokweelede kutuyumya-yumya kubinda mumulimo wa Leza?
3 Imusinsimi ulaamba, “tacikooyoocedelelwa pe.” Jesu wakati izyalani eeli liliko lino libyaabi talikooyoomana mane “zintu ezi zyoonse zizoobe.” (Matayo 24:34) Sena ikuteelela kwesu kupya kujatikizya makani aya kwaambilizya kuti mulimo wesu wakukambauka taubindide?a Izintu zizizilwe zitondezya kuti tabusi obo pe! Izyalani ndyotupona limwi litintimene buya mububi alimwi abusofwaazi buteelanizigwi pe azyoonse zyakacitika mazuba amunsi. (Amweenzyanisye Incito 2:40.) Tweelede kujatisya mulimo wesu. (2 Timoteo 4:2) Ibusinsimi boonse bwaamba ciindi camapenzi mapati butondezya kuti ayooboola cakufwambaana, ndilyona-ndilyona, cakutayeeyelwa—mbuli mubbi. (1 Ba-Tesalonika 5:1-4; Ciyubunuzyo 3:3; 16:15) “Mbubonya obo anywebo amulibambe, nkaambo kuciindi ncimutezi nciconya ncazoosika Mwana a-Muntu.” (Matayo 24:44) Izyalani lyabantu aba batali banaleza mbolyasika afwaafwi akunyonyoonwa, masimpe inga tatuyandi kusowa bulangizi bwesu bubotu bwabuumi butamani kwiinda mukupilukila ku “kwaalabana mubutimba” bwakunyonyooka kwanyika!—2 Petro 2:22; 3:10; Luka 21:32-36.
4. Mbukkale buli buti bwapa kuti kuyandike maunda-maunda aa ‘zilyo aciindi ceelede’ alimwi ncinzi cacitwa kumakani aya?
4 Ikuzuzikizya businsimi bwa Jesu, mu 1914 kwakaba “masaangunino aamapenzi” ciindi bantu nobakasika “[ku]mamanino aaciindi.” Ibuumba, manyongwe alimwi amilandu zyavula kusikila sunu. (Matayo 24:3-8, 12) Aciindi mpoonya Jehova watuma kabunga kabananike basyomesi alimwi bacenjede ikupa ‘zilyo zyakumuuya kuciindi ceelede’ kuli basiŋanda ba Simalelaabo Kristo. (Matayo 24:45-47) Ikuzwa kucuuno cakwe cabwami kujulu, oyu Mwami wabu Mesiya lino weendelezya progilamu yakusanina kwakumuuya kubotu nyika yoonse mbwiizulwa.
Maunda-maunda aa “Zilyo”
5. Ino cibeela cipati ca “zilyo” cilanganizigwa buti?
5 Amuyeeye bubambe bwa “zilyo.” (Luka 12:42) Icintu cakusaanguna amulongo wazyakulya zya Munakristo ndi Jwi lya Leza, Bbaibbele. Ikutegwa tuyiisye Bbaibbele cabusungu, ikusaanguna kuyandika busanduluzi buuba-uba kubala alimwi buluzi. Mukuya kwamyaka, eeci cazuzikizigwa bucebuce ikapati kutalikila mu 1950 ciindi New World Translation of the Christian Greek Scriptures noyakamwaigwa mu Cingisi. Kusika mu 1961 Bbaibbele lyoonse mbolizulwa lya New World Translation lyakabako alimwi teekwakainda ciindi lyakazwa amumisyobo imwi mipati-pati. Ima volume otatwe aakamwaigwa mumwaka wamulimo wa 1996 akapa kuti mweelwe woonse usike ku 27, akati kangawo aali 14 kaali ma Bbaibbele amaniinizidwe kulembwa. Ikutegwa cikonzyeke kucita mulimo oyu uujatikizya Bbaibbele eli antoomwe amabbuku aagwasya kuteelela Bbaibbele, Banakristo balyaabide basika ku 1,174 lino mbabelesi baciindi coonse ibasandulula mumasi aali 77.
6. Ino ba Sosaiti bakonzya buti kupa mabbuku agwasilizya Bbaibbele aya ayandika?
6 Ikugwasilizya mulimo uucita nkamu eeyi yabasanduluzi imitabi iisimba ya Watch Tower Society iisika ku 24 yalikumwaya maunda-maunda aamabbuku. Nkakaambo kaako kulazumanana kuyungizigwa mincini yakusimbya iifwambaana kapati mumitabi mipati-pati. Ikumwaya mamagazini aa Ngazi Yamulindizi alimwi a Awake! kuyaambele mwezi amwezi kusikila kumweelwe wantoomwe wamakkopi aali 943,892,500 icaamba kuti wayungizigwa a 13.4 pasenti kuzwa mwakali. Imweelwe wama Bbaibbele alimwi amabbuku aavumbidwe aapangwa mu United States, Brazil, Finland, Germany, Italy, Japan, Korea alimwi a Mexico mwalo, ayungizigwa a 40 pasenti kuzwa mu 1995 kusika kumakkopi aali 76,760,098 mu 1996. Imitabi imwi ayalo yatola lubazu mukuyungizigwa oku koonse kwakupanga mabbuku.
7. Ino mulumbe wa Isaya 54:2 ubindeene kapati buti lino?
7 Ikuyungizigwa kunji kwakonzyeka muma 1990 kwiinda mukuleka kukasya mulimo wa Bakamboni ba Jehova mu Eastern Europe amu Afulika. Inzala yacakulya cakumuuya ninji kapati mumasena aya. Aboobo ikwiitwa kuciyaambele cakubinda: “Komezya kuntu nkuukede, amasani aatente lyacikalilo cako andandamikwe. Utayoowi kulampya intambo zyako akuyumya inkankamino zyako.”—Isaya 54:2.
8. Nkupa nzi kwabwaabi ikugwasyilizya kulanganya makani aamali?
8 Aboobo calikuyandika ikuyungizya masena aamitabi minji ya Sosaiti iili 104. Akaambo kakuyuma kwabuumi mumasena aakubelekela manji aakajulwa ono, imali manji aabelesyegwa mukuyungizya oku ajanwa kumali aakusanga aamulimo wanyika yoonse mbwiizulwa kuzwa kumasi aasumpukide. Cikkomanisya ncakuti imbungano abantu buyo bacitoobo camoyo woonse kweelana amuuya uuli ku Kulonga 35:21: “Nkabela muntu umwi aumwi, na moyo wakwe wakamubusya, alimwi miyeeyo yakwe yakamuzuminizya, wakeza kuletela Jehova cipaizyo cakubelesya milimo.” Tulumba boonse balikutola lubazu mukupa oku kwabwaabi.—2 Ba-Korinto 9:11.
9. Ino bbuku lya Ba-Roma 10:13, 18 lizuzikizigwa buti sunu?
9 Mukati ka 1996 imabbuku aaba Watch Tower Society masimpe akalemeka zina lya Jehova amakanze akwe kusika kumagolelo aanyika. Cili buyo mbuli bwakasinsima mwaapostolo Paulo. Kaindulula businsimi bwa Joeli alimwi a Intembauzyo ya 19 wakalemba kuti: “Umwi aumwi uulilila izina lya-Mwami ulafutuka. Pele ndabuzya kuti, Sa tabana kumvwa? Balimvwide. Ijwi lyabo lyamwaika munyika yoonse, Makani aabo asika nikuba kumagolelo aansi.” (Ba-Roma 10:13, 18) Aboobo kwiinda mukulemeka zina lya Jehova libotu, ibantu bakwe babeleka mulimo mupati ikuzuzya bulemu muŋanda yakukombela. Ino kwalo oku kwaambilizya kwazwidilila kapati buti mukati kamwaka wa 1996? Amulange-lange ccaati iitobela amapeeji 28 kusika ku 31.
Ikutebula Nyika Yoonse Mbwiizulwa
10. Nzintu nzi zikkomanisya nzimwabona kujatikizya milimo yabantu ba Jehova mbuli mbuyakosaulwa-kosaulwa muccaati iili amapeeji 28 kusika ku 31?
10 Kunyina naakabede aanguzu boobu majwi aa Jesu aajanwa ku Luka 10:2: “Kutebula nceo, pele basimilimo mbace, nkaako amukombelele Mwami wakutebula, kuti atume basimilimo mukutebula kwakwe.” Sena mwatola lubazu mukwiita oko? Mamiliyoni aabantu nyika yoonse bacita obo. Eco cazibwa kwiinda mumweelwe waatala mupya wa 5,413,769 wabasikumwaya ba Bwami bakapa malipooti aamulimo mukati ka 1996. Kunze lyaboobo ibakwesu abacizi bapya bali 366,579 bakabbapatizigwa. Elo tulaziyanda eezi “zintu ziyandisi zyazisi zyoonse” zyalo zitola lubazu ‘mukuzuzya bulemu muŋanda ya Jehova yakukombela’!—Hagai 2:7.
11. Nkaambo nzi toonse ncotujisi kaambo kakukondwa kapati?
11 Imalipooti aakuyungizigwa mumasena aamulimo aakajalulwa ono alakondelezya. Sena kuli bamwi akati kesu ibalaa munyono akaambo kabaabo bakkomana akuvula kuli boobu? Muciindi caboobo tulakondwa ambabo. Izisi zyoonse zyakali kutalika asyoonto-syoonto. Imusinsimi wakali kupona kuciindi ca Hagai, Zekariya wakalemba zyabaabo “ibakasampaula buzuba bwamakani maniini.” (Zekariya 4:10) Tulikkomene kapati kuti mumasi imulimo wabukamboni mouzwidilide kuli mamiliyoni aabasikumwaya ba Bwami alimwi lubazu lwakubeleka lulabelekwa kanjikanji noiba nsondo ansondo mumadolopo mapati. Sena kuli kaambo kakujokela munsi kakuli Jehova lino wapa coolwe calufutuko kumasena atakaangulukide? Peepe! Jesu wakati, “muunda ninyika.” (Matayo 13:38) Ibumboni bwini-bwini bweelede kuzumanana kupegwa mbubwena mbubakapa bumboni bwini-bwini basiciiya bakusaanguna kumamanino aabweende bwazintu bwama Juda.—Incito 2:40; 10:42; 20:24; 28:23.
Ikuya Kumbele Lyoonse
12. Ncinzi citukulwaizya ‘kululama mukweenda’? (Amubone akabbokesi kakuti, “Kutebula ‘Kuzwa Kumagolelo aanyika.’”)
12 Inzya tweelede kweendelaamwi, ‘kululama mukweenda’ ankalaki ya Jehova yeendelezyegwa abangeli. (Ezekiele 1:12) Tuyeeya majwi a Petro aakuti: “Jehova taamusya ngaakasyomezya kale, mbobayeeya bamwi kuti wamuka, pe, pele ucimukazikila moyo, nkaambo tayandi kuti bantu bafwidilile, ulayanda kuti boonse bajane ciindi cakweempwa.” (2 Petro 3:9) Ibusungu bwa bakwesu bali mumanyika macete abutukulwaizye. Ikumuka kuli koonse kunga kwalibonya kwa Amagedoni kupa ciindi kumyaanda yazyuulu zili mumanyika aaya antoomwe amumabazu aamwi aakabelekelwa kale kuti ziyobololwe. Mutalicengi pe: “Buzuba bupati bwa Jehova buli kufwaafwi, ncobeni buli kufwaafwi, bulafwambaana loko kusika.” (Zefaniya 1:14) Aswebo tweelede kubinda mukupa bumboni bwini-bwini bwamamanino!
13, 14. (a) Ncinzi cikonzya kwaambwa kujatikizya kumwaya kwamabbuku mu 1996? (b) Nkulibambila nzi kwaalubazu nkozikonzya kucita mbungano mwaka amwaka alimwi mulibambilide buti nywebo kutola lubazu?
13 Nokuba kuti takutondezyedwe muccaati yamulimo, kumwaya ma Bbaibbele, mabbuku alimwi amamagazini kwayungizigwa amweelwe uugambya mukati kamwaka wainda. Mucikonzyanyo, ikumwaya kwamamagazini nyika yoonse mbwiizulwa kwakatondezya kuti kwayungizigwa 19-pasenti, imweelwe woonse wamakkopi aakamwaigwa usika ku 543,667,923. Imamagazini eesu alakonzya kubelesyegwa kukambauka mumasena aandeene-andeene—mumigwagwa, mumapaaki, mukkwelelwa mabbaasi, mumabazu aamakwebo. Malipooti atondezya kuti mumasena amwi aakambaukilwa Bwami ciindi aciindi ibantu bayiide balakukkomanina kubota kwa mamagazini esu elyo balazumina ziiyo zya Bbaibbele.
14 Imwaka amwaka mumwezi wa April, imbungano kanjikanji zilalibambila mulimo wamamagazini waalubazu, ikwaambilizya buzuba boonse ŋanda aŋanda amumasena aabuleya. Sena mbungano yanu iyootola lubazu mumulimo oyu mumwezi wa April 1997? Mwabambilwa mamagazini mabotu mu April aa Ngazi Yamulindizi alimwi a Awake! alimwi ikumwailwa aciindi ncicona nyika yoonse mbwiizulwa masimpe kweelede kuyoomukulwaizya! Kunsumbu yaku Cyprus imbungano izibelesya kaambyo kakuti “boonse bakonzyeka mubasisizye mulumbe wa Bwami,” zyakatobelanya mwezi amwezi kuubikka amulongo mulimo wamamagazini elyo asika kumweelwe waatala mupya wa 275,359 aakamwaigwa mumwaka akuyungizigwa kwa 54-pasenti.
Imulumbe wa Hagai Wamamanino
15. (a) Nkaambo nzi Jehova ncaakatumina aimbi milumbe kwiinda muli Hagai? (b) Nciiyo nzi ncotunga twaiya kuzwa kumulumbe wa Hagai watatu?
15 Nokwakainda mazuba aali 63 kuzwa ciindi naakatola mulumbe wabili, Jehova wakatuma Hagai kuyakwaambilizya mulumbe watatu walo ngotweelede kubikka kumizeezo sunu. Hagai wakaambaula mbuli kuti nceciindi bama Juda nobakali kubikka ntalisyo yantempele yalo njobakabikkide kale myaka iili 17 kayiindide. Jehova wakacibona kuti ncibotu kusalazya alimwi. Ibapaizi abantu bakali lengeeni aboobo bakali sofweede mumeso aa Jehova. Sena inga kacili kuti bamwi bantu ba Jehova bajoka munsi sunu cakuti mane balisanganizya munzila zyanyika zitakwe citondwa alimwi zyakuyandisya zintu zyakumubili? Cilayandika kufwambaana kuti toonse tuyeeye makani “kuzwa kubuzuba obuno akumazuba aaciza” ikuletela zina lya Jehova bulemu akusyoma cisyomezyo cakwe cakuti: “Pele kuzwa kubuzuba obuno njoomupa coolwe.”—Hagai 2:10-19; Ba-Hebrayo 6:11, 12.
16. ‘Nkuzuungana’ nzi kulaafwaafwi alimwi ncinzi ciyoocitika?
16 Ibuzuba mbubonya obo Ijwi lya “Jehova wamakamu” lyakaboola kuli Hagai ciindi cane alimwi camamanino. Wakazibya zyakajatikizidwe mumakani Aakwe ‘aakuzungaanya ijulu anyika’ naakati: “Njoonyonyoona inguzu zyamami aamisyobo yabantu, njoolobya inkalaki abasikutanta nzizyo, azyalo imbizi abasikuzitanta bayoojayigwa umwi aumwi apanga lyamweenzinyina.” (Hagai 2:6, 21, 22) ‘Ikuzungaanya’ kuyoosika kumamanino ciindi Jehova aakwiisalazila limwi nyika lya Amagedoni. Aciindi eco “zintu ziyandisi zyazisi zyoonse” zinooli zyanjila kale akubamba nkamu yabantu bamunyika mpya. Elo tulaa twaambo kaka twakukondwa akutembaula Jehova!—Hagai 2:7; Ciyubunuzyo 19:6, 7; 21:1-4.
17. Ino Jesu wabikkwa buti kuba “inweenwe”?
17 Ikumanizya businsimi bwakwe, Hagai wakalemba kuti: “Pele mubuzuba obo, mbwaamba Jehova wamakamu, njookubweza O Zerubabeli . . . , kuti ube mbubonya mbuli inweenwe yangu, nkaambo ndikusalide, mbwaamba Jehova wamakamu.” (Hagai 2:23) Kristo Jesu lino ngo Mwami wabu Mesiya alimwi Mupaizi Mupati uuyiminina iwa Jehova, ikuzibikka antoomwe julu amaopesi alo Mweendelezi Zerubabeli alimwi a Mupaizi Mupati Joshua ngobakali kubelekela kaandeene mu Jerusalemu yaanyika. Mbubwena mbuli inweenwe kujanza lya Jehova lyalulyo, Jesu ngowazuzikizya jwi lyakuti “Ee” kali cibelesyo ca Jehova icipa kuti zicitike ncobeni “zisyomezyo zya-Leza” zinji. (2 Ba-Korinto 1:20; Ba-Efeso 3:10, 11; Ciyubunuzyo 19:10) Imulumbe wabusinsimi boonse bwa Bbaibbele bugama kucipo ncaakapa Jehova ca Kristo mbuli Mwami alimwi mupaizi Mununuzi.—Johane 18:37; 1 Petro 1:18, 19.
18. Ino ‘kwaamba kwa Jehova wamakamu’ kwamamanino kuyoozuzikizigwa buti munzila iikatalusya?
18 Masimpe mumazuba eesu aasunu, ibulemu bupati bulakonzya kujanwa kutempele lya Jehova lyakumuuya limweka! Alimwi kwaakwiinda buyo kaindi kuzwa ciindi Jehova aakuzwisya bweende bwa Saatani, Hagai 2:9 iyooba akuzuzikizigwa kumbi kukkomanisya: “Kubusena obuno njoopa luumuno, mbwaamba Jehova wamakamu.” Ma! Ndoolu luumuno—iluumuno lwakoonse-koonse lutamani, luyooletwaa “nweenwe” ya Jehova, Kristo Jesu “Mwami waluumuno” walo uulembeledwe kuti: “Bwami bwakwe buyookomenesya, alwalo luumuno talukooyoomana, . . . Busungu bwa-Jehova wamakamu mbobuti cite aya makani oonse.” (Isaya 9:6, 7) Ikusikila kutamani bulemu bwaŋanda yakukombela ya Jehova buyoobonwa mukati kabulelo boonse bwabwami bwakwe bwakoonse koonse bwaluumuno. Atukkalilile muŋanda eyo!—Intembauzyo 27:4; 65:4; 84:10.
Bupanduluzi buyungizidwe
a Amubone zibalo ezi, “Opulumuka ku ‘Mbadwo Woipa’” alimwi a “Ntawi ya Kudikira” mu Ngazi Yamulindizi yamu Chichewa ya November 1, 1995.
Sena Mulakonzya Kupandulula?
◻ Ino ŋanda ya Jehova ‘yazula buti bulemu’ sunu?
◻ Nkaambo nzi ncokutanabede kubinda kuliboobu mukukambauka makani mabotu?
◻ Nkukulwaizya nzi kuliko kumakani aakubinda kwakukambauka kuli mu Lipooti Yamulimo Yamwaka ya 1996?
◻ Ino Kristo ubeleka buti kali “inweenwe” ya Jehova?
[Kabbokesi kali apeeji 26]
Kutebula “Kuzwa Kumagolelo Aanyika”
KULI Isaya 43:6, tubala malailile aa Jehova aakuti: “Utakasyi. Leta bana bangu kuzwa kule abana bangu basimbi kuzwa kumagolelo aanyika.” Olu lugwalo lujisi kuzuzikizigwa kwaalubazu sunu mu Eastern Europe. Mucikonzyanyo, cisi ca Moldova cakali ca Kkomyunizimu. Kuli minzi imwi mwakuti cisela camweelwe oonse wabantu omo Mbaakamboni lino. Misinzo yakweenda kutegwa bajane mbazu zyakukambaukila mmilamfwu, pele balasoleka! Bunji bwa basikumwaya mumbungano eezi mbana babazyali bakali bazangalisi kumatalikilo aakuma 1950 ku Siberia. Imikwasyi yabo lino njiili kumbele mumulimo wakutebula. Akati kabasikumwaya bali 12,565, ibali 1,917 bakabbapatizigwa mwaka oyu wamana. Kuli mbungano zili 43 aimwi kaijisi basikumwaya batandila ku 150 alimwi mabbazu ayungizigwa kuzwa kuli one kusika kulusele mumwaka wamulimo mupya.
Acimbi cikkomanisya, nkuyungizigwa kucitika mu Albania. Okuya Bakamboni basyomeka basyoonto buyo mbobakaliyumya mukutundulula kwini-kwini kwa mfulumende yalunya kumana kwamyaka iisika ku 50. Bunji bwabo bakajaigwa. Eci cituyeezya cisyomezyo ca Jesu cakuti: “Mutayoowi zintu ezyo nzimuti penzegwe. Amubone, Diabolosi ulawaala bamwi banu muntolongo, kuti mukasunkwe, . . . Kosyomeka mane do kusikila kulufu, lino njookupa musini wabuumi.” (Ciyubunuzyo 2:10; amubone akuli Johane 5:28, 29; 11:24, 25.) Ncinzi ncotubona lino mu Albania? Masimpe kuzuzukizigwa kukkomanisya kwa cisyomezyo ca Jehova cijanwa kuli Isaya 60:22 cakuti: “Kakamu kaniini kayooba cuulu”! Mu 1990 sikumwaya omwe buyo nguwakatuma lipooti yamulimo mu Albania. Nokuba boobo “basimilimo” banji kuzwa ku Italy akumanyika aambi bakamvwa kwiita kwa Jesu kwakuti: “Nkaambo kaako kamuya mukabaiisye bantu . . . . akubabapatizya.” (Matayo 28:19; Luka 10:2) Ikusika kuciindi ca Ciibalusyo calufu lwa Jesu mu 1996, basikumwaya bali 773 mbobakali basungu mumulimo, alimwi bakayobolola bantu bali 6,523 ku miswaangano yabo ya Ciibalusyo, kuwiinda ziindi ziinda kulusele mweelwe wabasikumwaya! Myeelwe iigambya yakalipootwa kuzwa kumabbazu aandeene-andeene. Nokuba kuti kwakanyina basikumwaya banyenzi, madolopo ategwa Kuksi alimwi a Divyake akalijisi bantu bali 192 alimwi a 230 mbubwenya mbwaatobelenye. Ku Kroja ikuli buyo sikumwaya omwe, kwakajanika bantu bali 212. Basikumwaya bali 30 ku Koriza bakabbadelelela busena bukkwana bantu bainda ku 300. Oyo mweelwe nowakakkwana muŋanda, bamwi bali 200 bakapilusigwa nkaambo kwakacinyina busena. Masimpe muunda uuyandika kutebula!
Ku Romania kuzwa lipooti eeyi: “Notwakali mumulimo wakuŋanda-aŋanda twakaswaanganya muntu wakaamba kuti wakali umwi wa Bakamboni ba Jehova alimwi wakali kukkala mukadolopo kasyoonto kwalo, kweelana aluzibo lwesu, kwakanyina Bakamboni. Wakatwaambila kuti kunze lyanguwe kwakali bantu bambi bali 15 balo kumana kwamyaka minji balikubaa miswaangano mu Cine alimwi amu Nsondo alimwi akuti bakatalika kukambauka kuŋanda-aŋanda. Ibuzuba bwakatobela twakaunka kudolopo elyo. Ibakali kutulindila mumaanda obile mbantu bali 15, bamaalumi, bamakaintu alimwi abana balo bakabweza mabbuku aali 20 alimwi amamagazini aali 20 mapya. Twakabatondezya mbokweendelezyegwa ziiyo zya Bbaibbele. Twakaimba antoomwe alimwi twaingula mibuzyo yabo yakali kuyandika kwiingulwa kufwambaana. Oyo uusololela munkamu eyi wakalyaambilila ategwa: ‘Mazuba masyoonto aainda, ndakapaila kuli Jehova kumwi misozi kayeenda kuti atutumine sikweembela elyo mupailo wangu waingulwa.’ Twakakkomana kapati mpoonya notwakali kuunka, mbuli mucaala wajana wisi wakati: ‘Twakomba mutakatulubi. Mukaboole kutubona alimwi!’ Twakacita obo, aboobo lino ziiyo zya Bbaibbele zili ciloba zileendelezyegwa mudolopo elyo. Mumasena manji aakubelekela mapya, mulimo ulatalika munzila mbotu kapati kwiinda mukubelesya mabbuku aajisi makani aa Bbaibbele alo aayandwa kapati alimwi eeci citondezya kuti mulimo uzwa kuli Leza.”
[Ccaati iili apeeji 28-31]
LIPOOTI YAMWAKWA WAMULIMO WA 1996 YA BAKAMBONI BA JEHOVA NYIKA YOONSE MBWIIZULWA
Amubone Bbaundi Volyumu
[Zifwanikiso izili apeeji 24, 25]
“Zintu ziyandisi zyazisi zyoonse” zilayobololwa mu Nsumbu zya Mulwizi (1), South America (2), Afulika (3), Asia (4), North America (5), aku Europe (6)