Bakacita Kuyanda kwa Jehova

Ikujanina Izaka Mukaintu

IMUDAALA wakakkede kucikala wakali katede kapati. Walo abantu bakwe antoomwe ankamele zyabo bakeenda kuzwa ku Beereseba kuya kunyika lyaku Mesopotamiya—imusinzo ulampa makilomita aayinda ku 800.a Mbwaanga lino bakasika nkobakali kuya, oyu silweendo wakapumuna kuti ayeeye mulimo wakwe muyumu. Ino mwaalumi oyu wakali ni, alimwi ncinzi ncaakabwezela lweendo luyumu boobu?

Imwaalumi wakali mubelesi wa Abrahamu “mupati wabasiŋanda bakwe.” (Matalikilo 24:2) Nokuba kuti taambidwe mucibalo kuboneka kuti wakali Eliezere walo aciindi cimwi Abrahamu ngwaakati ‘muzike wamuŋanda yakwe’ alimwi ngwakali kwaamba kuti ‘nguuyoomulida zina.’ (Matalikilo 15:2, 3) Aino awo akali aciindi Abrahamu a Sara nobatakajisi mwana. Lino mwanaabo Izaka wakalaa myaka iili 40 alimwi nokuba kuti Eliezere taakacili kubalwa kuti ngomupati muŋanda ya Abrahamu wakacili mubelesi wakwe. Elyo wakateelela ciindi Abrahamu naakalomba kucitilwa cintu ciyumu. Ino cakali cinzi?

Imulimo Muyumu

Mumazubaa Abrahamu lukwato teelwakali kujatikizya buyo mukwasyi pele lwakali kujatikizya mukowa woonse naa luzubo loonse. Aboobo cakali cilengwa ibazyali kusalila bana babo wakukwata naa wakumukwata. Nokuba boobo ciindi Abrahamu naakali kuyandauda mwanaakwe Izaka mukaintu, wakazingwa. Inzila zitali zyabunaleza izyakajisi bana Kanana banyenzi zyakapa kuti kukwata umwi wabo citayeeyelwi buya akuyeeyelwa pe. (Deuteronomo 18:9-12) Alimwi nokuba kuti cakali cilengwa kuti musankwa akwatile mukati mumukowa wakwe mweena ibasazinyinaa Abrahamu bakali kukkala kulamfu kulubazu lwakunyikaa ku Mesopotamiya. Taakali kukonzya kuleka Izaka kuya kukkala oko nkaambo Jehova wakasyomezya Abrahamu kuti: “Njoopa lunyungu lwako nyika eyi,” nyika ya Kanana. (Matalikilo 24:7) Aboobo Abrahamu wakati kuli Eliezere: “Uleelede kuya kucisi cangu akuluzubo lwangu, ukajanine mwanaangu Izaka mukazi nkukonya oko.”—Matalikilo 24:4.

Nolwakamana lweendo olu lulamfwu, Eliezere wakalyookezya kucikala kayeeya mulimo wakwe. Wakaziba kuti ino-ino bamakaintu balaboola kuzyooteka maanzi kucikala aakubelesya masiku. Elyo wakalomba Jehova kuti: “Ndaambila musimbi kuti, Wence sendeka inongo yako, nywe—alimwi oyo musimbi ulaamba kuti, Nywa, nkabela njootekela inkamele zyako azyalo—abe ngonguwe ngosalilide mulanda wako Izaka. Mbuboobo mbunjooziba kuti wacitila simalelaangu luzyalo.”—Matalikilo 24:14.

Naakacili kupaila, kwakasika nakalindu uuyebeka wazina lya Rabeka. Eliezere wakati kuli nguwe: “Wence undinywisye twaanzi munongo yako.” Rabeka wakacita obo mpoonya wakati: “Ndatekela inkamele zyako azyalo, mane zimane kunywa zyoonse.” Oku kwakali kulyaaba kwini-kwini nkaambo nkamele ilaa nyota ilakonzya kunywa malita aasika ku 95 aamaanzi mumaminiti aali kkumi buyo! Kufwumbwa naa nkamele zya Eliezere zyakalaa nyota boobo naa pe, Rabeka wakalizi kuti mulimo ngwaakazumina kucita wakali muyumu. Masimpe, “wakafwambaana kutulida nongo yakwe mucinywido, wazuzaanina kucikala kukuteka alimwi. Nkabela wakatekela inkamele zyoonse.”—Matalikilo 24:15-20.

Naakabona kweendelezya kwa Jehova, Eliezere wakapa Rabeka kasita kangolida kamumpemu alimwi ankaya zyobile zyalo zikonzya kuulwa mali aasika ku $1,400 sunu. Ciindi Rabeka naakamwaambila kuti wakali muzyukulu wa Nahori muzyalwenyina Abrahamu, Eliezere wakalumba kwiinda mumupailo kuli Leza. Wakati: “Jehova wandeenzya munzila, wandisisya kuŋanda yamunyina simalelaangu.” (Matalikilo 24:22-27) Eliezere watolwa kumukwasyi wa Rabeka. Muciindi Rabeka wakaba mukaintu wa Izaka alimwi wakabaa coolwe cakuba mukulukulu wa Mesiya, Jesu.

Nzyotwiiya Swebo

Jehova wakaleleka kusoleka kwa Eliezere ikujana mukaintu wa Izaka uyoowa Leza. Nokuba boobo amuyeeye kuti lukwato lwa Izaka lwakali swaangene kapati amakanze aa Leza aakuleta lunyungu kwiinda muli Abrahamu. Elyo eci cibalo taceelede kutupa kuyeeya kuti muntu uli woonse uupailila wakukwatana limwi uyoopegwa kwiinda mumaleele. Pele kuti naa twakakatila kunjiisyo zya Jehova uyootupa nguzu zya kuliyumya mubuyumuyumu boonse bujanika muciimo cili coonse mubuumi—ilukwato, kutakwata naa kutakwatwa.—1 Ba-Korinto 7:8, 9, 28; amweezyanisye Ba-Filipi 4:11-13.

Eliezere wakeelede kusolekesya ikuti acite zintu munzila ya Jehova. Aswebo tulakonzya kujana kuti kweendelana azyeelelo zya Jehova talili lyoonse nocili cuuba-uba pe. Mucikonzyanyo, inga kwaba buyumuyumu ikujana mulimo uutasinkilili mulimo wa teokrasi, mukaako uuyoowa Leza, balongwe batuyaka, zyakulikondelezya zitasofweede. (Matayo 6:33; 1 Ba-Korinto 7:39; 15:33; Ba-Efeso 4:17-19) Pele Jehova ulakonzya kugwasya baabo bakaka kutyola njiisyo zya Bbaibbele. Ibbaibbele lilasyomezya kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.”—Tusimpi 3:5, 6.

Bupanduluzi buyungizidwe