LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • w97 3/1 map. 19-24
  • Sena Mulilibambilide Kusikilwa Buzuba Bwa Jehova?

Kunyina vidiyo aawa mpomwasala.

Vidiyo yakaka kulila.

  • Sena Mulilibambilide Kusikilwa Buzuba Bwa Jehova?
  • Ngazi Yamulindizi 1997
  • Tutwe Twamakani
  • Makani Aakozyenye
  • Bakali Kulangila Zintu Zipati
  • Buzuba bwa Jehova Akubako kwa Jesu
  • Bakalilibambide
  • “Amulangile”
  • Kweenda Munzila Iisalala Ncokuyandika
  • Lino Ikucenjela Kulayandika Kapati Kwiinda Lyoonse
    Ngazi Yamulindizi—2004
  • Icakapa Kuti Leza Amufwide Luzyalo Nowa Ncitondezyo Kuli Ndiswe
    Ngazi Yamulindizi—2008
  • ‘Wakafwutulwa Antoomwe Abamwi Ibali Ciloba’
    Ngazi Yamulindizi—2013
  • Tunooyenda Muzina Lya Jehova Leza Wesu
    Ngazi Yamulindizi—2005
Amubone Azimwi
Ngazi Yamulindizi 1997
w97 3/1 map. 19-24

Sena Mulilibambilide Kusikilwa Buzuba Bwa Jehova?

“Buzuba bupati bwa-Jehova buli kufwaafwi, ncobeni buli kufwaafwi, bulafwambaana loko kusika.”—ZEFANIYA 1:14.

1. Mbuti Magwalo mbwaapandulula buzuba bwa Jehova?

“BUZUBA bwa-Jehova obo bupati buyoosya” bulaafwi kusikila bweende obu bwazintu ibubyaabi. Imagwalo buzuba obu bwa Jehova abupandulula kuti mbwankondo, mudima, bukali, manyongwe, macise, kulibilika, akusaalwa. Nokuba boobo kuyooba bafwutuka, nkaambo “umwi umwi uukomba muzina lya-Jehova uyoofutulwa.” (Joeli 2:30-32; Amosi 5:18-20) Ee, Leza uyoonyonyoona basinkondonyina akufwutula bantu bakwe.

2. Nkaambo nzi ncotweelede kulimvwa kubinda kujatikizya buzuba bwa Jehova?

2 Basinsimi ba Leza bakatondezya kuti bulibindide buzuba bwa Jehova. Mucikozyanyo Zefaniya wakalemba kuti: “Buzuba bupati bwa-Jehova buli kufwaafwi, ncobeni buli kufwaafwi, bulafwambaana loko kusika.” (Zefaniya 1:14) Sunu mane ciimo eco caindila buya kubinda nkaambo Silutwe Wabasikalumamba wa Leza, Imwami Jesu Kristo ulaafwi ‘kulisakila panga lyakwe akasolo akuyabutantide kukugwasya lusinizyo abululami, abubombe.’ (Intembauzyo 45:3, 4) Sena mulilibambilide kusikilwa buzuba obo?

Bakali Kulangila Zintu Zipati

3. Mbulangizi nzi bamwi Banakristo bana Tesalonika mbubakajisi, alimwi ntwaambo nzi tobile ntobakalubide?

3 Ibanji bali kutyompwa akaambo kamakani aabuzuba bwa Jehova. Bamwi Banakristo ku Tesalonika bakaamba kuti, “Buzuba bwa Mwami bwasika.” (2 Batesalonika 2:2, Ci) Pele kuli twaambo tobile tupati ncobwatakaningasika. Kaamba kamwi katootu twaambo, mwaapostolo Paulo wakaamba kuti: “Nobanoozoocili mukwaamba kuti, Kwatontola, kwaliiba, elyo muciindi eco nciconya lunyonyooko luzoofwambaana kubasikila.” (1 Ba-Tesalonika 5:1-6) Kuciindi cino ca “kumamanino aaciindi” swebo lwesu tulakulindila kuzuzikizigwa kwamajwi aayo. (Daniele 12:4) Ibana Tesalonika abalo bakalibulizizye abumboni bumbi bwakusika kwabuzuba bwa Jehova, nkaambo Paulo wakabaambila kuti: “Tabukooyoosika cita lukasaangune kuba luleyo.” (2 Ba-Tesalonika 2:3) Ciindi Paulo naakalemba majwi ayo (kutandila ku 51 C.E.), olo “luleyo” kuzwa ku Bunakristo bwini-bwini teelwakaninga maninina kucitika. Sunu tulabubona kabuzulide mu Kristendomu. Nokuba kuti bulangizi bwabo teebwakazuzikizigwa, aabo bananike bana Tesalonika basyomeka, ibakazumanana kubelekela Leza cakusyomeka kusikila kulufwu, limwi bakazoobutambula bulumbu bwabo bwakujulu. (Ciyubunuzyo 2:10) Aswebo tuyoolumbulwa kuti twazumamana kusyomeka mbotulindila buzuba bwa Jehova.

4. (a) Ino buzuba bwa Jehova buswaangene aanzi ku 2 Ba-Tesalonika 2:1, 2? (b) Ino abo bategwa bama Fwala Bacikombelo bakajisi mizeezo nzi kujatikizya kupiluka kwa Kristo atwaambo tumwi tuswaangene akaaka?

4 Ibbaibbele obu “buzuba bwa-Mwami [“Jehova,” NW]” libuswaanganya “aakuboola [“kubako,” NW] kwa-Mwami wesu Jesu Kristo.” (2 Ba-Tesalonika 2:1, 2) Aabo bategwa bama Fwala ba Cikombelo bakajisi mizeezo yiindene-indene kujatikizya kupiluka kwa Kristo, kubako kwakwe, alimwi a Bulelo bwakwe bwa Cuulu Camyaka. (Ciyubunuzyo 20:4) Mumwaanda wabili wamyaka C.E., Papeyo muna Herapoli wakalaa bulangizi bwabutebuzi bubotu kapati anyika mu Bulelo bwa Cuulu Camyaka ibwa Kristo. Justin Martyr walo kubako kwa Jesu wakazumanana kukwaamba alimwi wakali kulangila kuyakululwa kwa Jerusalemu kuti ube ngomunzi mupati wa Bwami Bwakwe. Irenæus muna Lyons wakali kuyiisya kuti bwaakumana kunyonyoonwa Bulelo bwa Roma, Jesu uzoolibonya ameso, akaange Saatani, akulela mu Jerusalemu yaansi ano.

5. Ino bamwi basikwiiya zya Bbaibbele balikwaamba nzi kujatikizya “Kuboola Kwabili” kwa Kristo alimwi a Bulelo bwa Cuulu Camyaka?

5 Sikwiiya zyaciindi Philip Schaff wakabona kuti “imuzeezo uudumide kapati” mukati kaciindi kautanasika Muswaangano wa Nicaea mu 325 C.E., “ndusyomo lwakuti Kristo unoolaa bulelo bulibonya ameso ansi antoomwe abasaante babusidwe kwacuulu camyaka, nokutanacitika kubusigwa kwabanamaleya alimwi alubeta.” A Dictionary of the Bible, iyakalondolwa a James Hastings yakaamba kuti: “Tertullian, Irenæus, alimwi a Hippolytus bacilangila Kuboola [kwa Jesu Kristo] kumbi ikubindide; pele balo bama Fwala bana Alesandreya bakatuletela muzeezo mupya. . . . Mbwaakatondezya Augustine kuti Cuulu Camyaka ciliswaangene ankondo ya Cikombelo, Ikuboola Kwabili kwatolwa kulaale kumazubaa kumbele.”

Buzuba bwa Jehova Akubako kwa Jesu

6. Nkaambo nzi cotuteelede kuyeeya kuti buzuba bwa Jehova bucili kule-kule loko?

6 Mizeezo iilubide yali kuleta kutyompwa, pele tutayeeyi kuti buzuba bwa Jehova bucili kule loko. Ikubako kwa Jesu ikutalibonyi aameso, kwalo nkobuswaangene limwi mu Magwalo, kwalo kulitalikide kale. Ngazi Yamulindizi alimwi amabbuku eendelana anjiyo aa Bakamboni ba Jehova kanjikanji ali kupa bumboni bwamu Magwalo ibwakuti kubako kwa Kristo kwakatalika mu 1914.a Aboobo ino walo Jesu wakaamba nzi kujatikizya kubako kwakwe?

7. (a) Nimbazu nzi zimwi zyacitondezyo cakubako kwa Jesu alimwi amamanino aabweende obu bwazintu? (b) Mbuti mbotunga twaakufwutulwa?

7 Ikubako kwa Jesu wakaba ngomutwe wamibandi katana buyo kufwa. Bamane kumumvwa kasinsima zyakunyonyoonwa kwa Jerusalemu mutempele, ibaapostolo ba Petro, Jakobo, Johane, alimwi a Andreya bakamubuzya kuti: “Ino makani aya azooba lili? alimwi ncinzi cizooba citondezyo cakuboola kwako acamamanino aaciindi?” (Matayo 24:1-3; Marko 13:3, 4) Mukwiingula Jesu wakasinsima zya nkondo, nzala, mizuzumo yanyika, alimwi ambazu zimbi zya “citondezyo” cakubako kwakwe alimwi amamanino aabweende obu bwazintu. Alimwi wakaamba kuti: “Oyo uuliyumya kusikila kumamanino uzoofutuka.” (Matayo 24:13) Tuyoofwutuka kuti twaliyumya cakusyomeka kusikila kumamanino aabuumi bwesu bwalino nokuba kumamanino aabweende oobu bwazintu.

8. Kaatanasika mamanino aabweende bwazintu bwaci Juda, ncinzi cakeelede kumanizigwa, alimwi ncinzi cilimukucitwa kumakani aya sunu?

8 Naatanasika mamanino, imbazu imwi mpati yakubako kwa Jesu yakali kuzoozuzikizigwa. Kujatikizya njiyo wakati: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:14) Nobatakaninganyonyoona Jerusalemu ba Roma akumana bweende bwazintu bwaci Juda mu 70 C.E., Paulo wakali kukonzya kwaamba kuti makani mabotu “akakambaukilwa bantu boonse baansi ano.” (Ba-Kolose 1:23) Pele sunu kuli mulimo wakukambauka uuinda kule-kule awo uucitwa a Bakamboni ba Jehova “munyika yoonse.” Mumyaka misyoonto eyi yainda, Leza wajula nzila yakuti kupegwe bumboni bupati mu Eastern Europe. Mbokuli zisimbyo alimwi azibelesyo zimbi nyika yoonse mbwiizulwa, imbunga ya Jehova ililibambilide kuyungizya mulimo, nomuba “mumbazu zitanagumwa.” (Ba-Roma 15:22, 23, NW) Sena moyo wenu ulamutontekezya kuti musike mpomugolela mukupa bukamboni naatanasika mamanino? Ikuti kakuli boobo Leza ulamuyumya kuti mube alubazu lugwasya mumulimo uuza kumbele.—Ba-Filipi 4:13; 2 Timoteo 4:17.

9. Nkaambo nzi Jesu nkaakaamba, mbuli mbokulembedwe ku Matayo 24:36?

9 Imulimo wakukambauka Bwami iwakasinsimwa alimwi ambazu zimbi zyacitondezyo cakubako kwa Jesu zili mukuzuzikizigwa lino. Aboobo mamanino aabwende obu bwazintu alaafwi. Mmasimpe Jesu wakaamba kuti: “Taakwe muntu naba umwi uuzi buzuba obo nanka ciindi, nibaba baangelo bakujulu naba Mwana, pele Taata luzutu nguuzi.” (Matayo 24:4-14, 36) Pesi businsimi bwa Jesu bulakonzya kutugwasya kuba bantu balibambide kusikilwa “buzuba obo nanka ciindi.”

Bakalilibambide

10. Ino tuzi buti kuti kulakonzeka ikuzumanana kulangila munzila yakumuuya?

10 Kutegwa tufwutuke mubuzuba bwa Jehova bupati, tuleelede kulangila munzila yakumuuya akukakatila kubukombi bwakasimpe. (1 Ba-Korinto 16:13) Tulizi kuti kuliyumya kuli boobo kulakonzeka, nkaambo imukwasyi umwi wabanaleza wakacita obo akufwutuka Zambangulwe lyakanyonyoona bantu babi mumwaka wa 2370 B.C.E. Kakozyanisya ciindi eco akubako kwakwe, Jesu wakati: “Nkabela kuboola kwa-Mwana a-Muntu kuyooba mbuli kumazuba aa-Nowa. Nkaambo kumazuba ayo maanzi naatakalina kupaya bakali kulya akunywa, bakali kukwata akukwatizigwa, kusikila kubuzuba obo mbwaakanjila mubwaato Nowa, nkabela teebakezi mane kupaya kwamaanzi kwakasika akubatola. Mbubonya obo mbukuzooba kuboola kwa-Mwana a-Muntu.”—Matayo 24:37-39.

11. Mbukkale nzi Nowa mbwaakatobela nokuba kuti bulwani bwakaliko kuciindi cakwe?

11 Mbuli ndiswe, Nowa alimwi amukwasyi wakwe bakali kukkala munyika yabulwani. “Bana ba-Leza” bangelo batamvwi bakalisamikide mibili yanyama akukwata bamakaintu mbobakazyala limwi Babbabbani badumide—basikakomokomo ibatadoonekwi buya kuti bakakuvwuzya kulwana. (Matalikilo 6:1, 2, 4; 1 Petro 3:19, 20) Nokuba boobo, “Nowa wakali kweenda a-Leza.” Walo “katajisi kampenda, akati kabasaanyina”—antela izyalani libyaabi lyakuciindi cakwe. (Matalikilo 6:9-11) Kwiinda mukuyaama ali Leza kwiinda mukupaila, tulakonzya aswebo kucita mbubonya munyika eeyi yabulwani alimwi mbyaabi mbotulindila buzuba bwa Jehova.

12. (a) Kunze lyakuyaka bwato, mulimo nzi umbi Nowa ngwaakacita? (b) Mbuti bantu mbubakakutambula kukambauka kwa Nowa, aboobo ninzi cakabacitikila?

12 Nowa ulizizilwe kuti wakali sikuyaka bwato bwakufwutuzya buumi kuzwa ku Zambangulwe. Alimwi wakali “mukambausi wabululami,” pele bantu bamazubaayo “teebakezi” pe kuti mulumbe wakwe upedwe aa Leza. Bakali kulya akunywa, bakali kukwatana, kubaa mikwasyi akuzumanana muzintu zyabuumi bwalyoonse kusikila limwi Zambangulwe nolyakasika akubatola. (2 Petro 2:5; Matalikilo 6:14) Teebakali kuyanda pe kuswiilila zyakwaambaula kuluzi alimwi akulilemeka, mbubonya aleeli zyalani libyaabi ilili sunu mbolisinka matwi kuli zeezyo nzyobaamba Bakamboni ba Jehova kuti “basandukile kuli-Leza,” basyome muli Kristo, balulame, alimwi bazibe “alubeteko uluza.” (Incito 20:20, 21; 24:24, 25) Kunyina malembe aaliwo aajatikizya mweelwe wabantu bakakkede anyika ciindi Nowa naakali kwaambilizya mulumbe wa Leza. Pesi aka kaambo kalisinizidwe ikakuti mweelwe wabantu anyika wakacesyegwa cini-cini mu 2370 B.C.E.! Izambangulwe lyakabalobya ibabi, lyakasiya buyo baabo bakalibambilide kusikilwa mucito wa Leza oyo—Nowa abali ciloba bambi bamukwasyi wakwe.—Matalikilo 7:19-23; 2 Petro 3:5, 6.

13. Ino mmalailile nzi ngaakasyoma Nowa aalubeta lwa Leza, alimwi mbuti mbwaakeendelana angayo mumicito yakwe?

13 Leza taakamuzibisizya limwi Nowa ibwini-bwini buzuba alimwi aciindi Zambangulwe nolyakali kuzoocitika. Pesi ciindi Nowa naakali aamyaka yakuzyalwa iili 480, Jehova wakalailila kuti: “Muuya wangu tuukooyookazyanya lyoonse amuntu pe, nkaambo ninyama buyo. Mazuba aakwe ayooba myaka iili mwanda amakumi obile.” (Matalikilo 6:3) Nowa wakaasyoma cakumaninizya aaya malailile aalubeta lwa Leza. Naakamana kusisya myaka yakuzyalwa iili 500, “wakazyala Semu a-Hamu a-Jafeti,” alimwi kweelana aziyanza zyamazubaayo kulalangilwa kuti kwakali kwiinda myaka iili 50 kusikila ku 60 nobaya bana bakwate. Ciindi Nowa naakaambilwa kuti ayake bwato bwakufwutukila Zambangulwe, aabo bana bakwe abakaintu babo kuboneka kuti bakamugwasya mumulimo wakwe oyo. Ikuyaka kwabwato kulalangilwa kuti kwakeendelaamwi amulimo wa Nowa wakuba “mukambausi wabululami,” icintu calo cakamujatya bubi kwamyaka iili 40 naa 50 kalitanasika Zambangulwe. (Matalikilo 5:32; 6:13-22) Yoonse eyo myaka, walo alimwi amukwasyi wakwe bakabeleka mulusyomo. Aswebo atutondezye lusyomo mbotukambaukila makani mabotu akulindila buzuba bwa Jehova.—Ba-Hebrayo 11:7.

14. Ncinzi limwi Jehova ncaakazoomwaambila Nowa, alimwi nkaambo nzi?

14 Nobwakali kutandila kumamanino kuyakwa bwato, Nowa ulakonzya kuti wakali kuyeeya kuti Zambangulwe lyaswena, nokuba kuti taakazi cini-cini ciindi nolyakali kuza. Limwi Jehova wakazoomwaambila ategwa: “Kwasyaala mazuba aali musanu aabili buyo, lino njoowisya imvula ansi mazuba aali makumi one, isikati amasiku.” (Matalikilo 7:4) Eeco cakapa Nowa amukwasyi wakwe ciindi cizulide buyo kuti banjizye banyama boonse bamisyobo-misyobo mubwato akunjila balo lwabo nolitanatalika Zambangulwe. Tatuyandiki kubuziba buya buzuba alimwi aciindi cakutalika kwalunyonyooko lwabweende bwazintu oobu; ikufwutuka kwabanyama tuuli mukuli uutumidwe ndiswe pe, alimwi bantu balangila kufwutuka bali kale mukunjila mubwato bwacikozyanyo, iparadaiso yakumuuya yabantu ba Leza.

“Amulangile”

15. (a) Mumajwi enu nobeni, mbuti mbomunga mwapandulula majwi aa Jesu aajanika kuli Matayo 24:40-44? (b) Ino kutaziba ciindi cini-cini cakuboola kwa Jesu kukuliya nkoto ya Leza kutujatikizya buti?

15 Kujatikizya kubako kwakwe, Jesu wakapandulula kuti: “Lino kuzooba bantu bobile [babeleka] mumuunda, umwi uzootolwa, umwi uzoosyaala. Kuzooba banakazi bobile baziya [busu bwamaila] aziyo, umwi uzootolwa, umwi uzoosyaala. Nkaambo kaako amulangile, nkaambo tamuzi buzuba mbwazoosika mwami wanu. Mulasinizya kuti mwiniŋanda naakaakuzi ciindi ncati sike mubbi, naakali kulindila, naatakazumina kuti iŋanda yakwe itululwe. Mbubonya obo anywebo amulibambe, nkaambo kuciindi ncimutezi nciconya ncazoosika Mwana a-Muntu.” (Matayo 24:40-44; Luka 17:34, 35) Ikutaziba cini-cini ciindi cakuboola kwa Jesu kuzooliya nkoto ya Leza kutupa kuti katupakamene alimwi kutupa kuti buzubaa buzuba tube aciindi cakusinizya kuti tulamubelekela Jehova cakuteenzegwa aamakanze aakuliyanda.

16. Ncinzi ciyoocitikila “[bay]oosyaala” alimwi abaabo “[bay]ootolwa”?

16 Ibantu ‘basyaala’ kulunyonyooko lwanyika eyi antoomwe ababi balabikkilizya aabo ibakazibisidwe pele ibakatolelezegwa abuumi bwakuliyanda. Atukabe akati kabaabo “[ibay]ootolwa,” aabo ibalipede cakumaninina kuli Jehova alimwi ibalumba zipo zyakwe zyakumuuya kwiinda mu “muzike musyomesi uucenjede.” (Matayo 24:45-47) Kusikila kwini-kwini kumamanino, atumubelekele Leza “[cal]uyandano luzwa mumoyo uusalala amukweezeezya kubotu amulusyomo lwinilwini.”—1 Timoteo 1:5.

Kweenda Munzila Iisalala Ncokuyandika

17. (a) Ncinzi cakasinsimwa kuli 2 Petro 3:10? (b) Nkweenda nzi kumwi kwakakulwaizigwa a 2 Petro 3:11?

17 Mwaapostolo Petro wakalemba kuti: “Buzuba bwa-Jehova bulasika mbubonya mbwasika mubbi. Kulimbubo ijulu liyooindilila acamuzunzumina mupati, tunyenyeezi tuyooyaka akubomboloka, ayalo nyika iyootentwa azicitwa kulinjiyo.” (2 Petro 3:10) Ijulu anyika yacikozyanyo tazikafwutuki pe kukupya kwabukali bwa Leza. Aboobo Petro ulayungizya akuti: “Lino zintu ezi mbuziti kamaninine obo, nywebo muleelede kuba bantu bali buti mukweenda munzila iisalala amukulemeka Leza?” (2 Petro 3:11) Mukweenda ooko alimwi akulilemeka oko kuli kujanika lyoonse kumiswaangano ya Bunakristo, kucitila bambi zibotu, alimwi akubaa lubazu lwini-lwini mukukambauka makani mabotu.—Matayo 24:14; Ba-Hebrayo 10:24, 25; 13:16.

18. Kuti katuli mukuyanzana anyika, ncinzi ncotweelede kucita?

18 Ooku “kweenda munzila iisalala amukulemeka Leza” swebo kutuyanzya “kuliyobola cakutaba akabala nikaba komwe kaansi.” (Jakobo 1:27) Pele ino kuti katuli tuyaabuyanzana anyika eyi? Ambweni tuli mukoongelezegwa kusika aciimo cantenda kubusyu bwa Leza kwiinda mukuyandaula zyakulikondelezya izisofweede naa kwiinda mukuswiilila nyimbo alimwi aziimbo zisumpula muuya wanyika uutali wabunaleza. (2 Ba-Korinto 6:14-18) Kuti kakuli boobo, atuyandaule lugwasyo lwa Leza kwiinda mukupaila kutegwa tutakalobeleli aanyika eyi pele tukaime cakutambulika kubusyu bwa Mwanaa muntu. (Luka 21:34-36; 1 Johane 2:15-17) Kuti katuli tulilyaabide kuli Leza, ncobeni tuyooyanda kusika mpotugolela mukuyaka akubamba cilongwe cibotu anguwe kutegwa tulibambile kusikilwa buzuba bupati bwa Jehova ibuyoosya.

19. Nkaambo nzi makamu-makamu aabaambilizi ba Bwami ncobalangila kwiinda mumamanino aabweende obu bubyaabi bwazintu?

19 Nowa munaleza alimwi amukwasyi wakwe bakainda mu Zambangulwe eelyo lyakanyonyoona nyika yansiku. Bantu baluleme bakafwutuka kumamanino aabweende bwazintu bwaci Juda mu 70 C.E. Mucikozyanyo, mwaapostolo Johane wakacili muumi mumulimo wa Leza kumyaka yakuma 96-98 C.E., iciindi calo naakalemba bbuku lya Ciyubunuzyo, bbuku lyakwe lya Makani Mabotu, alimwi amagwalo ambi otatwe aamunikilidwe aamuuya uusalala. Akati kazyuulu zyabantu bakazumina lusyomo lwakasimpe lya Pentekoste mu 33 C.E., kulalangilwa kuti banji bakainda mumamanino aabweende bwazintu bwaci Juda. (Incito 1:15; 2:41, 47; 4:4) Sunu makamu-makamu aabaambilizi ba Bwami balakonzya kulangila kwiinda mumamanino aabweende bwazintu ibuli sunu ibubyaabi.

20. Nkaambo nzi ncotweelede kuti katusungweede kukuba ‘bakambausi babululami’?

20 Katuyeeyede kufwutuka kuya munyika mpya iilaafwi, atusungwaale kukuba ‘bakambausi babululami.’ Elyo ncoolwe kaka ikubelekela Leza mumazuba aya aamamanino! Alimwi cilakonda kaka ikusololela bantu kuya ku “bwato” bwamazubaano, iparadaiso yakumuuya njobajisi bantu ba Leza! Aayo mamiliyoni aabantu ibalimo kale, abazumanane kusyomeka, kabalangila munzila yakumuuya, alimwi kabalibambide kusikilwa buzuba bupati bwa Jehova. Ino ncinzi ciyootugwasya toonse ikuzumanana kulangila?

Bupanduluzi buyungizidwe

a Amubone zyaandaano 10 alimwi a 11 mubbuku lya Luzibo Lutola Kubuumi Butamani, ilimwaigwa aba Watchtower Bible and Tract Society of New York, Inc.

Inga Mwaingula Buti?

◻ Ino bamwi bali kujisi bulangizi nzi kujatikizya buzuba bwa Jehova alimwi akubako kwa Kristo?

◻ Nkaambo nzi ncotunga twati Nowa amukwasyi wakwe bakali libambilide kusikilwa Zambangulwe?

◻ Ncinzi ciyoocitikila baabo ‘ibalangila’ alimwi abaabo ibatalangili?

◻ Nkaambo nzi kweenda munzila iisalala ncokuyandika, ikapati mbotuyaabuvwula afwaafwi abuzuba bupati bwa Jehova?

    Chitonga Publications (1991-2024)
    Log Out
    Log In
    • Chitonga
    • Amutumine Bamwi
    • Makani Ngomuyanda
    • Copyright © 2025 Watch Tower Bible and Tract Society of Pennsylvania
    • Nzyomweelede Kuzumina
    • Mulawo Uujatikizya Kubamba Maseseke
    • Privacy Settings
    • JW.ORG
    • Log In
    Amutumine Bamwi