Atulujatisye Lusyomo Lwesu Lubotu Kapati!
“Nywebo nomuli alusyomo luyandisi mbuli lwesu.”—2 PETRO 1:1.
1. Ncinzi Jesu ncaakaamba mukucenjezya bamaapostolo bakwe, pele ino Petro wakalikankaizya buti?
IMANGOLEZYA Jesu katana kufwa, wakaamba kuti boonse bamaapostolo bakwe bakali kuyoomumwaika akumusiya. Umwi wabo, Petro, wakalikankaizya kati: “Nikuba kuti bakalebwe boonse kulinduwe, mebo nsikooyoolebwa pe.” (Matayo 26:33) Pele Jesu wakalizyi kuti ciyoocitika ncimbi. Nkakaambo kaako ncaakaambila Petro aciindi ncimunya ciya kuti: “Pele ndakukombela kuti lusyomo lwako lutamani. Awo wasanduka, ubayumye bakwanu.”—Luka 22:32.
2. Nokuba kuti Petro wakalisinizizye, micito nzi yakatondezya kuti lusyomo lwakwe tiilwakasimide?
2 Petro iwakasinizizye kapati kulusyomo lwakwe, wakamutama naa kumukaka Jesu masiku aabuzuba obo mbubwena. Ziindi zyotatwe wakakazya nokuba kwaamba buyo kuti wakalimuzyi Kristo! (Matayo 26:69-75) Ciindi ‘naakasanduka,’ majwi aa Simalelaakwe akuti, “ubayumye bakwanu,” kutegwa wakaamvwisya ncaakali kwaamba, akali kwiile kuboola mumizeezo yakwe. Kuzwa ciindi eco buumi bwa Petro boonse bwakajatikizigwa kapati kululayo olo, mbuli mbokutondezedwe mumagwalo obilo ngaakalemba, alo aabambidwe kusikila sunu mu Bbaibbele.
Petro Ncaakaalembela Magwalo Aakwe
3. Nkaambo nzi Petro ncaakalembela lugwalo lwakwe lutaanzi?
3 Kakwiindide myaka iitandila ku 30 kuzwa ciindi Jesu naakafwa, Petro wakalemba lugwalo lwakwe lutaanzi, kalembela banyina ku Ponto, Galatiya, Kapadokiya, Asiya alimwi aku Bituniya, masena sunu aajanika kunyika akumbo kwacisi ca Turkey. (1 Petro 1:1) Iba Juda, bamwi babo cakutadooneka ibakaba Banakristo aa Pentecoste mu 33 C.E., bakali bamwi babaabo mbaakalembela Petro. (Incito 2:1, 7-9) Ibunji bwabaabo bakali kupenzegwa citaambiki kuli basikupenzya bakali bantu buyo Bamasi. (1 Petro 1:6, 7; 2:12, 19, 20; 3:13-17; 4:12-14) Eelyo Petro wakabalembela bakwesu aba kutegwa abakulwaizye. Waakanzide kubagwasya kulijanina “eco nceluleta lusyomo lw[abo], nkokuti lufutuko lwamyuuya ya[bo].” Aboobo, mululayo lwakwe ndwaakapa ciindi naakali kuyumuka, wakalailila boobu: “Amulwane [a Diabolosi], mube bayumu mulusyomo.”—1 Petro 1:9; 5:8-10.
4. Nkaambo nzi Petro ncaakalembela lugwalo lwakwe lwabili?
4 Mukuya mazuba, Petro wakabalembela lugwalo lwabili Banakristo aba. (2 Petro 3:1) Nkaambo nzi? Nkaambo intenda iyiinda aali yakusaanguna yakali kulangilwa. Ibantu bataluleme bakatalika kusumpula kutalilemeka kwabo akati kabasyomi akutalika kucenga bamwi! (2 Petro 2:1-3) Kunze lyaboobo, Petro wakacenjezya zyakubuka kwabasabuzi naa basimalabali. Mulugwalo lwakwe lutaanzi wakalembede kuti “mamanino aazintu zyoonse ali afwaafwi,” pele lino bamwi bakali kuukazya muzeezo ooyo calunyansyo. (1 Petro 4:7; 2 Petro 3:3, 4) Nkooko atululange-lange lugwalo lwa Petro lwabili tubone mbuli mbolwakabayumya-yumya bakwesu kuzumanana cakutazungaana mulusyomo. Muciiyo cino citaanzi, tuyakulanga-langa makani aali kuli 2 Petro caandaano 1.
Imakani Aali Mucaandaano 1 Ncaakalembelwa
5. Mbuti Petro mbwagwasya basikubala bakwe kutegwa ciindi akanana kabalibambilide?
5 Petro taakabuka aakwaamba makani aajatikizya mapenzi mapati pe. Muciindi caboobo, wakalibambila mbwanga ulaakanana kabotu mapenzi aaya kwiinda mukuyungizya kumvwisya kwabasikubala bakwe kuzintu nzyobakatambula ciindi nobakaba Banakristo. Wakabayeezya zisyomezyo zibotu kapati zya Leza alimwi akusyomeka kwabunsinsimi bwa Bbaibbele. Wakacita boobu kwiinda mukubalwiida makani aakusanduka, icilengaano ncaakalibonena lwakwe mwini ca Kristo munguzu zya Bwami.—Matayo 17:1-8; 2 Petro 1:3, 4, 11, 16-21.
6, 7. (a) Nciiyo nzi ncotunga twaiya kumajwi mataanzi aalugwalo lwa Petro? (b) Notupa lulayo, ncinzi ncotweelede kuzuminizya cinga cilagwasya zimwi ziindi na twacaamba?
6 Sena kuli ciiyo ncotunga twaiya kumajwi aakujula aa Petro? Sena lulayo inga talwiindilili kutambulika kuti twasaanguna kulibikka mubusena bwabasikulaigwa kujatikizya basikwaambilwa bulangizi bupati bwa Bwami mbotujisi mbuli mbabo? Ino mbuti kubelesya ciiyo cazintu zyakacitikila sikuluula? Kulangilwa kuti kumbele aamazuba kuzwa ciindi Jesu naakafwa, Petro kanjikanji wakali kuluula ncaakabona cilengaano ciya ca Kristo mubulemu bwa Bwami.—Matayo 17:9.
7 Amuyeeye alimwi kuti kakunyina akudooneka, iciindi Petro naakalemba lugwalo lwakwe lwabili, Makani Mabotu aakalembwaa Matayo alimwi alugwalo lwamwaapostolo Paulo kuba Galatiya zyakalimwaisidwe kale mumasena manji. Eelyo, kulubizya nkwaakacita Petro akaambo kakutalondoka alimwi azyalusyomo lwakwe kutegwa zyakalizyizilwe kabotu akati kabanyina. (Matayo 16:21-23; Ba-Galatiya 2:11-14) Pele ezi taaku nozyakamulesya kwaamba zyakeelede kucitwa. Ncobeni lugwalo lwakwe kutegwa lwakayandwa kapati kuli baabo bakali kuyanda kwaanguluka kukukompama kwabo. Aboobo ciindi notugwasya bali mumapenzi, sena inga tacikoobota alimwi akubeleka kapati kulyaambilila kuti andiswe tulalubizya akaambo kakutalondoka?—Ba-Roma 3:23; Ba-Galatiya 6:1.
Ikwaanzya Kuyumya-Yumya
8. Kulangilwa kuti Petro wakalibelesya muciimo nzi ibbala lyakuti “lusyomo”?
8 Ono amukulange kwaanzya kwa Petro. Mpoona-mpoona waamba makani aa lusyomo, basikubala lugwalo lwakwe kabaamba kuba bantu “[bala]alusyomo luyandisi mbuli lwesu.” (2 Petro 1:1) Awa ŋambilo yakuti “lusyomo luyandisi” kulangilwa kuti ipandulula “lusinizyo luyumu” lutakwe mbolucitwa alimwi ipandulula ikuvwula kwazintu Banakisto nzyobasyoma naa injiisyo, zyalo mu Magwalo ziindi zimwi moziitwa kuti “bwini” naa lusinizyo. (Ba-Galatiya 5:7; 2 Petro 2:2; 2 Johane 1) Ibbala lyakuti “lusyomo” kanjikanji ndyolibelesegwa muciimo eci muciindi calusinizyo lujatikizya zintu zinji zikonzya kucitwaa muntu neciba buyo cintu cimbi.—Incito 6:7; 2 Ba-Korinto 13:5; Ba-Galatiya 6:10; Ba-Efeso 4:5; Juda 3.
9. Nkaambo nzi ncokulangilwa kuti kwaanzya kwa Petro kwakabakulwaizya kapati bantu Bamasi?
9 Kwaanzya kwa Petro kweelede kuti kwaabakondelezya kapati basikubala Bamasi. Iba Juda tiibaali kumvwana a Bamasi, mane bakali kubasampula, alimwi lusalululo lwakazumanana akati ka Bamasi aba Juda ibakasandukide kuba Banakristo. (Luka 10:29-37; Johane 4:9; Incito 10:28) Pele Petro, imu Juda kukuzyalwa alimwi mwaapostolo wa Jesu Kristo, wakaamba kuti basikubala bakwe—iba Juda alimwi a Bamasi—bakajisi lusyomo lomwe alimwi akubaa zyoolwe zyeelene azyakwe.
10. Nziiyo nzi nzyotunga twaiya kukwaanzya kwa Petro?
10 Amweezeezye ziiyo zibotu nzyotwiiya sunu mukwaanzya kwa Petro. Leza tasalululi bantu pe; kwiina ciimo cabantu, imusyobo naa cisi ncaleleka kwiinda zimwi. (Incito 10:34, 35; 11:1, 17; 15:3-9) Mbubwena mbuli Jesu lwakwe mbwaakayiisya, Ibanakristo boonse mbanyina alimwi kwiina wandiswe weelede kulisumpula. Kunze lyaboobo, kwaanzya kwa Petro alimwi kutondezya kasimpe kakuti ncobeni tuli babunyina bamunyika yoonse mbwiizulwa, ibajisi lusyomo “luyandisi mbuli” lwakajisi Petro abamaapostolo beenzinyina.—Matayo 23:8; 1 Petro 5:9.
Iluzibo Azisyomezyo zya Leza
11. Kuzwa buyo akwaanzya kwakwe, nzintu nzi ziyandika kapati Petro nzyaambisya?
11 Mbwakazwaa kwaanzya buyo, Petro wakalemba kuti: “Amuvuzizigwe luzyalo aluumuno.” Ino luzyalo aluumuno inga zyavwuzigwa buti kulindiswe? “Mukumuzibisya Leza a-Jesu Mwami wesu,” mbwaingula Petro obu. Mpoona alimwi waamba kuti: “Inguzu zyakwe, mbuzili zyabu-Leza, zilitupede zintu zyoonse zyabuumi azyankombelo.” Pele ino mbuti mbotuzitambula zintu ezi ziyandika kapati? “Mukumuzibisya walo uwakatwiita kubulemu bwakwe mwini akuziyanza zyakwe zibotu.” Aboobo Petro kwaziindi zyobile waambisya kuti luzibo lwini-lwini lwa Leza a Mwanaakwe lulayandika kapati.—2 Petro 1:2, 3; Johane 17:3.
12. (a) Nkaambo nzi Petro ncatondezya kuti luzibo lwini-lwini lulayandika kapati? (b) Kutegwa tukakone zisyomezyo zya Leza, ncinzi lutaanzi ncotweelede kuti katucitide?
12 “Baiyi babeji” Petro mbacenjezya mu caandaano 2 babelesya “majwi aalukukubiko” kutegwa bacenge Banakristo. Munzila eyi aba balasoleka kuti baongelezye Banakristo kujokela mukutalilemeka mobakanununwa. Izintu zicitikila baabo boonse ibanga bakavwunwa kale kwiinda ‘mukuzibisya Mwami Mufutuli Jesu Kristo’ pele alimwi ibabweedela kulucengo luli boobo nzibyaabi kapati, nzyalunyonyooko. (2 Petro 2:1-3, 20) Kalibambilide kukanana makani aa penzi eli kumbele, Petro kacili kumatalikilo buya kwalugwalo lwakwe wakaambisya luzibo lwini-lwini ncoluyandika kapati mukubamba ciimo cibotu cizumizidwe a Leza. Petro wakalizyi kuti Leza ‘wakatupa zisyomezyo ziyandisi zipati loko, kuti mulinzizyo mube acaabilo cabu-Leza.’ Pele kutegwa tukazikone zisyomezyo ezi, zyalo zili ncecibeela cipati ayeeme lusyomo lwesu, lutaanzi tweelede “kuvunwa kubusofwaazi bwaansi ano buzwa kuzisusi zibi,” Petro mbwaamba obu.—2 Petro 1:4.
13. Nkuunzi inkamu zyoonse zyobile Banakristo bananike alimwi a “mbelele zimwi” nkobasinizizye kujatisya?
13 Ino muzilanga buti zisyomezyo zya Leza? Sena muzibona mbuli bananike Banakristo basyeede mbobazibona? Mumwaka wa 1991, Frederick Franz, iwakali mweendelezi wa Watch Tower Bible and Tract Society, iwakacita mulimo walyoonse kwamyaka iyiinda ku 75, mukufwiinsya wakaamba boobu kujatikizya mbobalimvwa aabo bajisi bulangizi bwakweendelezyaa Kristo: “Tulajatisya mane kusikila ciindi cino, alimwi tuyakuzumanana kujatisya kusikila mane Leza akazizuzikizye ‘zisyomezyo zyakwe zibotu alimwi zipati kapati.’” Mukwesu Franz wakazumanana kubaa lusinizyo mucisyomezyo ca Leza cabubuke bwakuya kujulu, alimwi wakalujatisya lusyomo kusikila buzuba mbwaakafwa kalaa myaka iili 99. (1 Ba-Korinto 15:42-44; Ba-Filipi 3:13, 14; 2 Timoteo 2:10-12) Alimwi mbubwena buyo, imamiliyoni aabantu balimukulujatisya lusyomo, kabagaminide acisyomezyo ca Leza caparadaiso anyika mwalo bantu mobaya kukkala calukkomano kukabe kutamani. Sena muli akati kabaaba?—Luka 23:43; 2 Petro 3:13; Ciyubunuzyo 21:3, 4.
Mbotulimvwa Kuzisyomezyo zya Leza
14. Nkaambo nzi Petro ncasaanguna bubotu amulongo wabube bweelede kuyungizigwa kulusyomo?
14 Sena tulamulumba Leza kuzisyomezyo zyakwe nzyaasyomezya? Ikuti naa mboobo, Petro waamba kuti tuleelede kukutondezya. “Nkaambo kaako” (akaambo kakuti Leza watupa zisyomezyo zibotu kapati), tweelede kusolekesya kuba basungu mulusyomo. Tatukonzyi kuzyulila kwiinda mukuba buyo alusyomo naa kwiinda mukubaa luzibo lwamu Bbaibbele. Eci tacikkwene pe! Ndiza mumazubaa Petro bamwi mumbungano bakali kuvwula kukanana makani aajatikizya lusyomo pele bakazikujaninwa mukutalilemeka. Bakeelede kuba bantu balilemeka lyoonse, aboobo Petro wakakulwaizya kuti: “Kulusyomo lwanu [a]muyungizizye bubotu.”—2 Petro 1:5; Jakobo 2:14-17.
15. (a) Nkaambo nzi lusyomo ncoluli kumbele kwabubotu mumulongo wabube bweelede kuyungizigwa kulusyomo? (b) Mbube nzi bumbi bunga bulatugwasya kujatisya kulusyomo?
15 Mbwaakamanina kwaamba bubotu, Petro wakabikka mulongo wabube bumbi buli cisambomwi bweelede kujanwa naa kuyungizigwa kulusyomo lwesu. Cimwi acimwi cazintu eezi cilayandika kuti katuyanda kuti “[t]ukakatile mulusyomo.” (1 Ba-Korinto 16:13) Akaambo kakuti bazangi bakali ‘kwaasandaula Magwalo’ alimwi akwaamba ‘njiisyo zyabubeji,’ Petro wayungizya luzibo mumulongo kuba cintu ciyandika kapati, kaamba kuti: “Kububotu bwanu [amuyungizye] luzibo.” Mpoona wazumanana kati: “Kuluzibo lwanu [amuyungizye] lulyeendelezyo, akululyeendelezyo lwanu lukakatilo, akulukakatilo lwanu kulemeka Leza, akukulemeka Leza luyandano lwabunyina, akuluyandano lwabunyina moyo waluzyalo.”—2 Petro 1:5-7; 2:12, 13; 3:16.
16. Ncinzi cinga cacitika kuti naa bube Petro mbwaakabikka mumulongo bwayungizigwa kulusyomo, pele ino ncinzi cinga cilacitika kuti naa tiibwacitwa boobo?
16 Ncinzi ciyakucitika kuti naa zintu eezi zili ciloba zyayungizigwa kulusyomo lwesu? “Naa eezi kamuzijisi cakuvula tamukabi batolo banyina mpindu mukuzibya zya Mwami wesu Jesu Kilisito.” (2 Pita 1:8, Ci) Alimwi Petro kunze lyakwaamba boobu, wakati: “Pele uutajisi makani aya moofu, ngusibbayibayi, mbwaakaluba kusanzigwa kwazibi zyakwe zyakalekale.” (2 Petro 1:9) Amubone kuti Petro awa wacinca kuzwa mukubelesya mabala aakuti “lwanu” alimwi a “lwesu” wabelesya “uutajisi makani aya moofu,” “ngu” sibbayibayi, alimwi a “zyakwe.” Nokuba kuti bamwi cakuusisya nsoni mboofwu, balaluba, mbaasizibi, Petro awa taambi kuti kufwumbwa uubala magwalo aaya uli akati kabaaba.—2 Petro 2:2.
Kubayumya-Yumya Ibanyina
17. Kulangilwa kuti ncinzi cakapa kuti Petro akombelezye cakuyandisisya kuti zicitwe “zintu eezi”?
17 Ndiza kwiinda mukuziba kuti bapya ikapati balakonzya kubukaa kucengwa, Petro wakabakulwaizya camuluzyalo kati: “Nobakwesu, amusungwaale kusimpizya lusinizyo lwakwiitwa kwanu alwakusalwa kwanu, nkaambo na mwacita aya makani, tamukooyoolebwa limbi.” (2 Petro 1:10; 2:18) Banakristo bananike ibayungizya kulusyomo lwabo zintu ezi zili ciloba bayakutambula bulumbu bupati, mbubwena mbuli Petro mbwaamba kuti: “Muyoofonkwedwa bunjilo bwakunjila mu-Bwami butamani bwa-Mwami Mufutuli wesu Jesu Kristo.” (2 Petro 1:11) Ibankamu ya “mbelele zimwi” bayakutambula cikono citamani mubweendelezi bwamunyika bwa Bwami bwa Leza.—Johane 10:16; Matayo 25:33, 34.
18. Nkaambo nzi Petro ncazumenene kunikuba ‘yeezya lyoonse’ ibanyina?
18 Petro uliyandide kapati kuti bulumbu bupati obo babutambule ibanyina. “Nkaako,” mbwaakalemba, “nsikooleka kumuyeezya makani aya lyoonse, nomwaaziba kale, alimwi mulijisi mulusinizyo ndumuli alo.” (2 Petro 1:12) Petro wakabelesya bbala lya Cigiliki lyakuti ste·riʹzo, awa ilyapandululwa kuti “mulijisi mulusinizyo” pele lyakaambwa kuba “kuyumya” kululayo Jesu ndwaakapa Petro kumatalikilo lwakuti: “Ubayumye bakwanu.” (Luka 22:32) Kubelesegwa kwabbala eli kulakonzya kutondezya kuti Petro wakaibalukwa lulayo lubotu ndwaakatambula kuzwa kuli Simalelaakwe. Ono Petro wakaamba kuti: “Ndayeeya kuti ncibotu kumuyeezya obo nencili mucilao ecino [mumubili wabuntunsi], nkaambo ndizi kuti, kaba kaindi buyo, eci cilao cangu cileelede kumwaigwa.”—2 Petro 1:13, 14.
19. Ndugwasyo nzi ndotuyandika sunu?
19 Nokuba kuti Petro caluse waamba kuti basikubala lugwalo bakwe ‘balijisi mulusinizyo,’ ulizyi kuti lusyomo lwabo lulakonzya kuloba mbuli bwaato. (1 Timoteo 1:19) Mbwaanga ulizyi kuti kusyeede buyo ciindi cisyoonto kuti afwe, wakabayumya-yumya ibanyina kwiinda mukwaamba zintu nzyobakali kunga banikweezeezya kumazubaa kumbele kuti zibayumye munzila yakumuuya. (2 Petro 1:15; 3:12, 13) Aswebo sunu mbubwena buyo, tuyandika kuyeezegwa lyoonse kutegwa tukakatile kulusyomo. Tacikwe makani naa ndiswe bani nobuba bulamfwu bwaciindi ncotwakkala mukasimpe, taakwe notunga twasowela ambali kubala Bbaibbele kusitikide, ciiyo cesu tobeni alimwi akujanika amiswaangano yambungano. Bamwi balalilekela kukulovwa kwabo, kabatamizya kuti inga balikatede kapati taaku nobanga bacikonzya kujanika akuti miswaangano iile kwiinduluka zintu nzyobazyi kale nokuba kutayendelezegwa mbuli mbobayanda, pele Petro wakalizyi mbwanga umwi aumwi wandiswe ulalusowa lusyomo kuti naa twaindilizya kulisyoma.—Marko 14:66-72; 1 Ba-Korinto 10:12; Ba-Hebrayo 10:25.
Intalisyo ya Lusyomo Lwesu Injumu
20, 21. Mbuti cilengaano mbocakayumya-yumya lusyomo lwa Petro alwabaabo babala magwalo aakwe, kubikkilizya andiswe sunu?
20 Sena lusyomo lwesu luyeeme buyo atwaano twabuyo twakupunga? “Nkaambo nitwakamuzibya makani aanguzu zya-Jesu Kristo akuboola kwakwe, teetwakali kutobela zyamankwangwaalizya zicitwa akusongwaalasongwaala kwabantu, pe, nkaambo twakabona bupati bwakwe mumeso esu tubeni,” mbwavwiila Petro obo cakusinizya. Petro, Jakobo alimwi a Johane bakali antoomwe a Jesu nobakabona cilengaano cakwe munguzu zya Bwami. Petro upandulula boobu: “Twakabona naakatambula kuli-Leza Wisi lulemeko abulemu, nkabela wakasikilwa eli ijwi lizwa kubulemu bupati lyakuti, Ngooyu Mwanaangu uuyandwa ngwenkondelwa. Eli ijwi twakalimvwa, lyakazwa kujulu notwakali awe kucilundu cisalala.”—2 Petro 1:16-18.
21 Iciindi Petro, Jakobo alimwi a Johane nobakabona cilengaano eco, Bwami kutegwa tiibakacili kubudooneka pe, bwakasinizigwa kulimbabo! “Mbubonya obo,” Petro ulaamba, “mbutwakasimpikizigwa lusinizyo lwamajwi aabasinsimi. Ayo majwi mulabotya na mwateya matwi kulingao.” Inzya, basikubala lugwalo lwa Petro kubikkilizya andiswe sunu, bajisi kaambo kapati kakuteelelesya businsimi bujatikizya Bwami bwa Leza. Munzila nzi motweelede kuteya matwi? Petro wiingula kuti: “Nkaambo ali mbuli ilampi limunika mumudima, mane kusikila kubucedo kumazwido aantanda mumyoyo yanu.”—2 Petro 1:19; Daniele 7:13, 14; Isaya 9:6, 7.
22. (a) Nkuumakani nzi myoyo yesu nkwiiyelede kutupakamanya? (b) Mbuti mbotuteya matwi na kumvwisya majwi aabusinsimi?
22 Myoyo yesu inga kayuumbaalidwe kuti kakunyina kumvwisisisya kwamajwi aabusinsimi. Pele kwiinda mukuteya matwi naa kwaamvwisya, Banakristo mumoyo balazumanana kuyeeya kusikila kubucedo kwabuzuba ciindi “intanda,” Jesu Kristo, nayakulitondezya mubulemu bwa Bwami. (Ciyubunuzyo 22:16) Munzila nzi motutondezya kuti tulamvwisya kumakani abusinsimi sunu? Nkwiinda muciiyo ca Bbaibbele, mukulibambila akutola lubazu mumiswaangano, alimwi akwiinda muku ‘sungwaala kuzintu ezi, kulitakata kunzizyo amyoyo yesu yoonse.’ (1 Timoteo 4:15) Ikuti naa tuyanda kuti majwi aabusinsimi atubede ilampi limunika “mumudima” (myoyo yesu), tweelede kwaazumizya cakutasaya kutweendelezya—ee ikweendelezya zikumbuzyo zyesu, imizeezo yesu, iziyandisi zyesu alimwi ambaakani zyesu. Tweelede kuba basikwiiya zyamu Bbaibbele, nkaambo mboobu Petro mbwacimanizya caandaano 1: “Masinsime aamagwalo taakoopandululwa kumuntu omwe, nkaambo teensi luyando lwamuntu lwakaleta businsimi kalekale, pe, pele bantu ba-Leza bakaamba mbobakasungulwa Muuya wa-Leza.”—2 Petro 1:20, 21.
23. Caandaano citaanzi ca 2 Petro cabagwasya kuti bacite nzi basikubala magwalo aya?
23 Mumajwi aakwe aamu caandaano camatalikilo mulugwalo lwabili, Petro wakatukulwaizya kapati kutegwa tujatisye kulusyomo lwesu lubotu kapati. Ono twalibambila kulanga-langa makani imapati aatobela. Icibalo citobela cilakanana zili mucaandaano 2 ca 2 Petro, oko kwalo mwaapostolo nkwakanana zyabuyumuyumu bwakanjide mukati kambungano kumakani aakuyungwa kutalilemeka.
Sena Mulayeeya?
◻ Nkaambo nzi Petro ncaambisya kuyandika kwaluzibo lwini-lwini?
◻ Inga kaba nkaambo nzi bubotu ncobwasaanguna kubandwa mumulongo wabube bweelede kuyungizigwa kulusyomo?
◻ Nkaambo nzi Petro ncazumenene kupa ibanyina makani aakubayeezya?
◻ Nintalisyo nzi injumu Petro njapa kulusyomo lwesu?
[Cifwanikiso icili apeeji 16]
Ikulubizya kwa Petro tiikwakamucitya kuti aleke kusyoma pe