Ikuyandisisya Miswaangano ya Bunakristo
“Katunga katuyeeyana, k[a]tubusyanya-busyana mukuyandana akucita milimo mibotu. Tutanoonga katuleka kulibunga-bunga.”—BA-HEBRAYO 10:24, 25.
1, 2. (a) Nkaambo nzi ncocili coolwe ikujanika kumiswaangano ya Banakristo beni-beni? (b) Ino muunzila nzi Jesu mwajanika kumiswaangano yabasikumutobela?
NCOOLWE kaka kujanika kumuswaangano wa Bunakristo, kube bantu basyoonto balela kukkumi naa zyuulu-zyuulu zyabakombi ba Jehova nkaambo Jesu wakati: “Nkubabede bantu bobile nanka botatwe babungene muzina lyangu, nkukonya oko nkumbede ambebo akati kabo”! (Matayo 18:20) Masimpe, naakaamba cisyomezyo eco, Jesu wakali kubandika makani aajatikizya kubeteka alo aakali kuyandika kweendelezyegwa kabotu abaabo basololela mumbungano. (Matayo 18:15-19) Pele sena majwi aa Jesu alakonzya kubeleka akumiswaangano yoonse ya Bunakristo yalo iijulwa akujalwa amupailo muzina lyakwe? Inzya. Amuyeeye kuti Jesu naakatuma basikumutobela kuti bacite mulimo wakugwasya bantu kuba basikwiiya, wakasyomezya kuti: “Amulange, ndaba anywe mazuba oonse nikuba kusikila kumamanino aaciindi.”—Matayo 28:20.
2 Kunyina kudooneka pe kuti Mutwe wambungano ya Bunakristo, Mwami Jesu Kristo ulakuyandisya kuswaangana koonse kwabasikumutobela basyomeka. Kunze lyaboobo, tulakonzya kusyoma kuti nkwali akati kabo kwiinda mumuuya uusalala wa Leza. (Incito 2:33; Ciyubunuzyo 5:6) Awalo Jehova Leza ulakuyanda kuswaangana kwesu antoomwe. Icintu cipati ncotuswaanganina boobu nkuti tumutembaule Leza “akati kambungano.” (Intembauzyo 26:12) Ikujanika kwesu kumiswaangano yambungano mbumboni bwakuti tulamuyanda.
3. Ntwaambo nzi tupati ncotweelede kuyandila miswaangano ya Bunakristo?
3 Nkotuli atumbi twaambo tubotu ncotukonzya kukuyandila kuswaangana kwa Bunakristo. Katanazwa anyika, Jesu Kristo wakasala basikwiiya bakwe bananike kuti babeleke kabali “muzike musyomesi uucenjede” mukupa cakulya cakumuuya aciindi ceelede kuli basiŋanda basyomeka. (Matayo 24:45) Inzila iibeleka kapati yakusanina kwakumuuya kuli boobu nkwiinda mumiswaangano yambungano antoomwe amiswaangano misyoonto amipati. Imwami Jesu Kristo ulamusololela oyu muzike uusyomeka kuti ape makani aayandika kumiswaangano iili boobu kuli baabo boonse bayanda kufwutuka mamanino aabweende obu bubyaabi akubaa buumi munyika ya Leza mpya yabululami.
4. Ncilengwa nzi cibyaabi caambidwe mu Bbaibbele, alimwi ncinzi cinga catugwasya kucitantamuka?
4 Aboobo, kunyina Munakristo uuyanda kubaa cilengwa cibyaabi ncaakabona mwaapostolo Paulo walo wakalemba kuti: “Katunga katuyeeyana, k[a]tubusyanya-busyana mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, anu kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.” (Ba-Hebrayo 10:24, 25) Ikuzinzibala kuyeeya coolwe ampindu zyakujanika kumiswaangano ya Bunakristo kuyootugwasya kujanika kumiswaangano iili boobu cakusyomeka alimwi camoyo omwe.
Imiswaangano Iikulwaizya
5. (a) Ino kwaambaula kwesu kweelede kubajatikizya buti bamwi kumiswaangano? (b) Nkaambo nzi ncotuteelede kumuka ikubatamba kuti bajanike kumiswangano abo bayanda kwiiya?
5 Mbwaanga Banakristo balaupailila muuya uusalala wa Jehova ikuti ubeleke kumiswaangano ya Bunakristo, simuswaangano omwe-omwe weelede kusolekesya kulilemeka kweendelanaa muuya ‘akutapenzya Muuya Uusalala wa-Leza.’ (Ba-Efeso 4:30) Ciindi mwaapostolo Paulo naakalemba majwi aayo aamuuya, wakali kubandika makani aajatikizya kubelesya ŋambilo zili kabotu. Lyoonse nzyotwaamba zyeelede kuba zyeezyo zikonzya “kuyaka, kuti boonse baswiilila bagwasigwe.” (Ba-Efeso 4:29) Eci cilayandika ikapati kumwiswaangano ya Bunakristo. Mulugwalo lwakwe kubana Korinto, Paulo wakakankaizya mbuli mboiyandika kuyaka, kuyiisya alimwi akukulwaizya miswaangano. (1 Ba-Korinto 14:5, 12, 19, 26, 31) Boonse bajanika balagwasigwa kumiswaangano iili boobu kubikkilizya abapya balo bakonzya kwaamba kuti: “Ncobeni Leza mpali akati kanu.” (1 Ba-Korinto 14:25) Aboobo tatweelede kumuka pe ikutamba bapya kuti baswaangane andiswe nkaambo kucita boobo kuyoobinzyaanya kuyaambele kwabo munzila yakumuuya.
6. Ntwaambo nzi tumwi itugwasya kuti miswaangano kaikulwaizya?
6 Abo boonse bapegwa makani, ibabuzigwa-buzigwa naa ibapa zitondezyo kumiswaangano ya Bunakristo beelede kuba masimpe kuti majwi aabo alakulwaizya alimwi aleendelana azilembedwe mu Jwi lya Leza, Ibbaibbele. Kunze lyakwaamba majwi aali kabotu, tweelede kutondezya kuti mizeezo yesu ileendelanaa ziimo zyaluyando zya Leza a Kristo. Ikuti naa boonse balaa zibeela mupulogilamu yamuswaangano babikkila maanu kuti batondezye ‘micelo yamuuya wa Leza’ mbuli lukondo, busicamba alimwi alusyomo, boonse bajanika masimpe balakulwaizigwa.—Ba-Galatiya 5:22, 23.
7. Ino abo boonse bajanika inga batola buti lubazu mukucita kuti miswaangano kaikulwaizya?
7 Nokuba kuti balakonzya kabali basyoonto buyo balaa zibeela mupulogilamu kumiswaangano yambungano, boonse bajanika balakonzya kutola lubazu mukucita kuti muswaangano ube yooyo uukulwaizya. Ikanjikanji kuli ziindi baswiilizi nobanga baingula mibuzyo. Ezi nziindi zyakwaambilizya lusyomo lwesu kubuleya. (Ba-Roma 10:9) Kunyina nozyeelede kubelesyegwa mbuli ziindi zyakusumpula mizeezo yesu tobeni, ikulisumpula akaambo kakuzwidilila kwesu naa kutongooka musyomima. Sena eco inga tacipenzyi muuya wa Leza? Ikwiimpana abasyomima kulakonzya kulangwa kabotu kumbali amuuya waluyando. Ibbaibbele lyaamba kuti: “Amuusilane buuya, mukabe batete moyo, akuba aluzyalo lwakulekelelana milandu, mbubonya mbuli Leza mbwaakalekelela ndinywe muli-Kristo.” (Ba-Efeso 4:32) Elo ncibotu kaka coolwe ncoitupa miswaangano ya Bunakristo icakutobela lulayo olu lubotu! Aboobo, ibanji balasika kufwambaana kumiswaangano akwiima-ima yamana. Alimwi eci cilabagwasya abapya balo bayandisya kulimvwa kuti batambulwaa maanza obile. Aboobo Banakristo boonse balyaabide balaa mulimo wakucita ikutegwa miswaangano kaikulwaizya kwiinda ‘mukuyeeyana, kubusyanya-busyanya mukuyandana akucita milimo mibotu.’
Amulibambile Kabotu
8. (a) Nkulitakata nzi nkobacita bamwi kutegwa bajanike kumiswaangano? (b) Ncikozyanyo nzi Jehova ncapa cabweembezi?
8 Nokuba kuti cilakonzya kacili cuuba-uba kuli bamwi ikujanika kumiswaangano ya Bunakristo, nciyumu kapati kuli bamwi. Mucikozyanyo, imutumbu Munakristo uubeleka mulimo wakumubili kutegwa agwasye kujana zintu ziyandika mukwasyi wakwe kanjikanji ulaboola kumunzi kakatede kuzwa kumilimo. Mpoonya uyandika kujika cakulya akugwasya bana kulibambila kuya kumiswaangano. Ibanakristo bamwi balakonzya kabeenda misinzo milamfwu kuya kumiswaangano naa balakonzya kabataciti obo akaambo kakuciswa naa kucembaala. Masimpe, Jehova Leza ulabuteelela buyumuyumu bwasimuswaangano uusyomeka omwe-omwe mbubwenya mweembezi siluyando mbwateelela ziyandika kumbelele yomwe-yomwe iili mubutanga bwakwe. Ibbaibbele lilaamba: “[Jehova] ulalela butanga bwakwe mbuli mweembeli. Ulabunganya twana akuboko kwakwe, ulatukumbatila akaango kakwe, azyalo zinyonsya ulazyeenzya kabotu.”—Isaya 40:11.
9, 10. Mbuti mbotunga twagwasigwa kapati kumiswaangano?
9 Aabo bayandika kulyaaba kwini-kwini kutegwa kabajanika lyoonse kumiswaangano balakonzya kabajisi buyo ciindi cisyoonto cakulibambila makani aayooyiigwa. Ikweendelaamwi amulongo wakubala Bbaibbele wansondo ansondo kupa kuti kujanika kwesu ku Cikolo Camulimo Wateokrasi kakugwasya kapati. Mbubwenya buyo akwalo kulibambila miswaangano imbi mbuli Ciiyo ca Ngazi Yamulindizi alimwi a Ciiyo Cabbuku Cambungano kupa kuti tugwasigwe kapati. Abo balaa mikuli yamukwasyi iibamanina ciindi balakonzya kabalibambilide kapati kutola lubazu mumibandi eyi iiyandika ya Bbaibbele kwiinda mukubala makani aali muciiyo ciindi kaciciliko alimwi akulanga-langa magwalo aamu Bbaibbele amwi aambidwe buyo.
10 Bamwi ibalaa bukkale bubapa ciindi cipati cakulyookezya balakozya kubaa ciindi cakulibambila miswaangano. Mucikozyanyo, balakonzya kuvwuntauzya kujatikizya magwalo aambidwe buyo pele aatazubuludwe. Aboobo boonse balakonzya kulibambila kutegwa bagwasigwe kapati amiswaangano akubaa lubazu mukukulwaizya mbungano kwiinda mumakani aabo alimwi abwiinguzi. Ikwiinda mukulibambila kabotu, ibaalu abakutausi bayoopa zikozyanyo zibotu kwiinda mukupa bwiinguzi bufwaafwi alimwi bugaminina. Akaambo kakulemeka zipego zya Jehova, abo bajanika kumiswaangano bayooitantamuka micito yoonse iikonzya kunyonganya ciindi camiswaangano.—1 Petro 5:3.
11. Nkaambo nzi ncokuyandikila kulyeendelezya kutegwa tulibambile miswaangano?
11 Imicito imwi alimwi akulikondelezya izitayandiki kubukkale bwesu bwakumuuya zilakonzya kutusowela buyo ciindi. Ikuti kakuli boobo tweelede kulilanga-langa ‘akutafwubaala,’ kujatikizya mbotucibelesya ciindi cesu. (Ba-Efeso 5:17) Makanzeesu ayelede kuba ‘aakujatisya ciindi’ kuzintu zitayandiki kapati kutegwa tutole ciindi cipati mukubala Bbaibbele alimwi akulibambila miswaangaano antoomwe amulimo wa Bwami. (Ba-Efeso 5:16) Icakutadooneka, eci tacili cuuba-uba pe, ciyandika kulyeendelezya. Ibakubusi babikkila maanu kumakani aya balibikkila ntalisyo mbotu yakuyaambele. Paulo wakalembela mweenzinyina musyoonto Timoteo ategwa: “Sungwaala kuzintu ezi [malailile aa Paulo kuli Timoteo], ulitakate kulinzizyo amoyo wako woonse, kuti bantu boonse babone mboya bukomena mumilimo yako.” (1 Timoteo 4:15)
Izikozyanyo Kuzwa mu Jwi lya Leza
12. Ncikozyanyo nzi cibotu calo cakapegwaa mukwasyi wa Samuele?
12 Amulange cikozyanyo cibotu cakatondezyegwaa mukwasyi wa Samuele walo wakali kutola lubazu lyoonse mububambe bwakuswaangana abakombinyina nolyakali ku Silo itempele lya Leza. Ibaalumi balo mbobakali kuyandika kuunka kumapobwe aamwakaa mwaka. Pele Elikana, usyi Samuele wakali kubwezelezyaa mukwasyi wakwe “kutanta kuzwa kumunzi wakwe mazuba oonse kuya kukukomba akupaila Jehova wamakamu makamu ku-Silo.” (1 Samuele 1:3-5) Imunzi wa Samuele Ramatayimu, mu-Zofi, ulangilwa kuti wakali kunkomwe kucisi ca Rentisi sunu munselelo aa “cilundu ca-Efraimu.” (1 Samuele 1:1) Aboobo lweendo lwakuya ku Silo lwakali lwamakkilomita aali 30, ilweendo lulemya kapati mumazubaayo. Obu mbubakali kucita bamukwasyi wa Elikana “mazuba oonse kuciindi nc[ob]akali kutanta kuya kuŋanda ya-Jehova.”—1 Samuele 1:7.
13. Ncikozyanyo nzi cakapegwaa bama Juda basyomeka kuciindi Jesu naakali anyika?
13 Awalo Jesu wakakomenena mumukwasyi mupati. Mwakaa mwaka mukwasyi wakali kweenda kuzwa ku Nazareta ikulampa makkilomita aali 100 kugama kumusanza ikuyakujanika kupobwe lya Kwiindilila ku Jerusalemu. Kuli nzila zyobile nzyobakonzya kuti nzyobakabelesya. Imugwagwa wakali kugaminina wakali kujatikizya kuselemuka kwiinda Mukkuti lya Megido mpoonya alimwi kutanta mamita aatandila ku 600 kwiinda mucisi caba Samariya akuya ku Jerusalemu. Imugwagwa umwi wakali kwiindwa-indwa nguyooyo ngwaakabelesya Jesu mulweendo lwakwe lwamamanino kuya ku Jerusalemu mu 33 C.E. Oyu wakali kujatikizya kweenda kwiinda Mukkuti lya Jordano akuya aansi kulwizi lupati limwi wakaakusika “kucisi ca Judaya akucisi cakutala lya-Jordano.” (Marko 10:1) Ikuzwaa busena obu “kuya ku-Jerusalemu” musinzo uulampa makkilomita aali 30 kubikkilizya akutanta mamita aainda ku 1,100. (Marko 10:32) Makamu aabasipobwe basyomeka bakali kulweenda lweendo olu ciindi aciindi kuzwa ku Galilaya kuya ku Jerusalemu. (Luka 2:44) Ncikozyanyo cibotu kaka eci kubabelesi ba Jehova ibali mumanyika aasumpukide sunu, balo ibunji bwabo ibatakatazigwi kuya kumiswaangano ya Bunakristo akaambo kazyeendelo zyasunu!
14, 15. (a) Ncikozyanyo nzi ncaakapa Ana? (b) Ncinzi ncotukozya kwiiya kuzwa kucikozyanyo cibotu citondezyegwaa bapya bamwi kumiswaangano?
14 Icikozyanyo cimbi nciceeco camukamufwu wamyaka iili 84 wazina lya Ana. Ibbaibbele lyaamba kuti “taakali kuzwa muntempele.” (Luka 2:37) Kunze lyaboobo, Ana wakali kutondezya luyando kuli bambi. Ncinzi ncaakacita naakabona mwana muvwanda Jesu akuziba kuti ngo Mesiya uusyomezyedwe? Wakalumbaizya Leza “waamba aanguwe [mwana] kulimbabo boonse abakali kulangila kunununwa kwa-Jerusalemu.” (Luka 2:38) Nciimo cibotu kaka eci, icikozyanyo cibotu ku Banakristo sunu!
15 Inzya, ikujanika akutola lubazu kumiswaangano kweelede kutukkomanisya cakuti mbubwenya mbuli Ana, tatweelede kulombozya kulovwa. Ibunji bwabapya mbobalimvwa obo kujatikizya miswaangano. Mbubazwa mumudima akuboola kumumuni mubotu wa Leza, bayanda kwiiya zyoonse nzyobakonzya alimwi banji balatondezya busungu kumiswaangano ya Bunakristo. Pele abo bakkala kaindi mukasimpe beelede kucenjela kuti ‘bataleki luyando ndobakajisi kusaanguna.’ (Ciyubunuzyo 2:4) Ikuciswa amapenzi aambi muntu ngatakonzyi kweendelezya alakonzya kupa kuti muntu katajaniki-janiki kumiswaangano. Pele tatweelede kulekela zintu zyakumubili, ikulikondelezya naa kubula luyandisisyo kuti zitupe kuti tutalibambili, tulengaane naa katutajaniki-janiki kumiswaangano.—Luka 8:14.
Icikozyanyo Ciinda Kubota
16, 17. (a) Ino Jesu wakalaa ciimo nzi kujatikizya miswaangano yakumuuya? (b) Ncilengwa nzi cibotu iceelede kutobelwaa Banakristo boonse?
16 Jesu wakapa cikozyanyo ciinda kubota cakutondezya luyandisisyo lwamiswaangano yakumuuya. Kacili mwana musyoonto wamyaka iili 12, wakatondezya kuti ulaiyanda ŋanda ya Leza ku Jerusalemu. Ibazyali bakwe wakabazimina pele bakazyoomujana kabandika Jwi lya Leza abamayi mutempele. Kaingula kupengana kwabazyali bakwe, Jesu wakabuzya cabulemu ategwa: “Sena tamuzi kuti ndileelede kuba muŋanda ya-Taata?” (Luka 2:49) Icakulibombya, Jesu wakajokela ku Nazareta abazyali bakwe. Okuya wakazumanana kutondezya luyandisisyo kumiswaangano yabukombi kwiinda mukujanika lyoonse kucikombelo. Aboobo naakatalika mulimo wakwe, Ibbaibbele liluula kuti: “Wakasika ku-Nazareta nkwaakalelwa, mubuzuba bwa-Sabata wakanjila mucikombelo mbuli mbwaakazibide, wanyamuka kuti abale.” Jesu naakamana kubala akupandulula bbuku lya Isaya 61:1, 2, ibaswiilizi “ba[ka]gambwa kumajwi aaluzyalo aazwa kumulomo wakwe.”—Luka 4:16, 22.
17 Imiswaangano ya Bunakristo sunu itobela nzila njiyonya eyi. Imuswaangano wajulwaa lwiimbo lwakutembaula alimwi amupailo, itupango kuzwa mu Bbaibbele (naa tupango tuzubuludwe muciiyo ca Bbaibbele) tulabalwa akupandululwa. Ibanakristo beni-beni baleelede kwiiya cilengwa cibotu ca Jesu Kristo. Ikusika waawo mpocikonzyeka, balakkomana kujanika lyoonse kumiswaangano ya Bunakristo.
Izikozyanyo Zyasunu
18, 19. Nzikozyanyo nzi zibotu nzyobapa ibakwesu ibali mumanyika aatasumpukide kapati kujatikizya miswaangano yambungano, miswaangano misyoonto amipati?
18 Muzisi zimwi zyamunyika izitasumpukide kapati ibakwesu banji abacizi balapa citondezyo cibotu kumakani aakuyanda miswaangano ya Bunakristo. Mu Mozambique imulangizi wacooko wazina lya Orlando, amukaintu wakwe Amélia cakali kubatolela mawoola aali 45 kweenda musinzo uutandila kumakkilomita aali 90 mumulundu mulamfwu kutegwa akagwasye kumuswaangano. Mpoonya bakali kujokela alimwi musinzo nguwenya kuya kumuswaangano umbi. Orlando wakaluula cakulicesya ategwa: “Twakalimvwa kuti kunyinaa ncotwakacita pe twalyeelanyaa bakwesu mbotwakaswaangana limwi baku Mbungano ya Bawa. Ikutegwa bajanike kumuswaangano akupilukila kumaandaabo cakali kujatikizya lweendo lwamazuba aali cisambomwi lwalo lulampa makkilomita aali 400 amaulu alimwi akati kabo kwakali mukwesu wamyaka iili 60!”
19 Ino mbuti kumakani aakuyanda miswaangano yambungano yansondo ansondo? Imucizi wazina lya Kashwashwa Njamba uli mumyaka yakwe yakuma 70 alimwi ulikompeme. Ukkala mukanzi kasyoonto kaitwa kuti Kaisososi ikulampa makkilomita aali 5 kuzwa ku Ŋanda ya Bwami ku Rundu mu Namibia. Ikutegwa ajanike kumiswaangano, uleenda lweendo lwakuunka akupiluka mumasaka ilulampa makkilomita aali 10. Bamwi balaumwa akubbidwa mumugwagwa nguwenya oyu pele Kashwashwa ulajanika lyoonse kumiswaangano. Ibunji bwamiswaangano icitwa mumilaka njatateeleli pe. Ino ono ugwasigwa buti kumiswaangano eyi? Kashwashwa ulaamba: “Kwiinda mukutobela magwalo, ndilasola kutobelezya icibandikwa mumakani.” Pele tacizyi kubala, ino ono waatobelezya buti magwalo? Ulaingula ategwa: “Ndilaswiililisya kumagwalo ngendakapeta.” Alimwi myaka yoonse eyi wapeta magwalo manji. Ikutegwa ayaambele kumakani aakubelesya Bbaibbele, ulaunka kucikolo camunzenge iceendelezyegwaa mbungano. Ulaamba: “Ndilayanda kujanika kumiswaangano. Lyoonse inga kuli zintu zipya zyakwiiya. Ndilayanda kuswaangana abakwesu abacizi. Nokuba kuti tandikonzyi kwaambaula ambabo boonse, balaboola kuzyoondaazya lyoonse. Alimwi iciinda kubota ncakuti ndilizyi kuti kwiinda mukujanika kumiswaangano, ndikkomanisya Jehova.”
20. Nkaambo nzi ncotuteelede kuleka kulibunga-bunga kwesu kwa Bunakristo?
20 Ituulunzuma tuli mbotubede twabakombi ba Jehova nyika yoonse mbwiizulwa tulatondezya luyandisisyo kumiswaangano ya Bunakristo mbubwenya mbuli Kashwashwa. Mboiyabuswena kukunyonyoonwa nyika ya Saatani, tatukonzyi kuleka kulibunga-bunga antoomwe. Pele atuzumanane kulangila munzila yakumuuya akutondezya luyandisisyo lwini-lwini kumiswaangano yambungano, miswaangano mipati amisyoonto. Eco tacikakkomanisyi Jehova buyo pe, pele ciyootugwasya kapati twanootola lubazu mukuyiisigwaa Leza kwalo kusololela kubuumi butamani.—Tusimpi 27:11; Isaya 48:17, 18; Marko 13:35-37.
Mibuzyo Yakwiindulula
◻ Nkaambo nzi ncocili coolwe ikujanika kumiswaangano ya Bunakristo?
◻ Ino abo boonse bajanika kumiswaangano inga batola buti lubazu mukucita kuti miswaangano kaikulwaizya?
◻ Ncikozyanyo nzi cibotu ncaakapa Jesu Kristo?
◻ Nciiyo nzi cikonzya kuyiigwa kuzwa kubakwesu bali mumanyika aatasumpukide kapati?
[Kabbokesi kali apeeji 31]
Balaiyandisisya Miswaangano Yansondo Ansondo
Ituulunzuma twabantu bakkala mumadolopo imuzwide bucete alimwi amilandu. Nokuba kuti kuli bukkale buli boobu, Banakristo bakasimpe akati kabo balatondezya kuti balaiyandisya miswaangano ya Bunakristo. Umwi mwaalu wamumbungano ya Gauteng mu Soweto ku South Africa, wakaluula kuti: “Mumbungano iijisi Bakamboni bali 60 alimwi abasikumwaya batabbapatizidwe, tulasika ku 70 naa 80 notujanika kumiswaangano alimwi zimwi ziindi tulainda awo. Nokuba kuti bakwesu tabeendi misinzo kuya kumiswaangano, ibukkale mucibeela eci camunzi wa Soweto bulakatazya. Umwi mukwesu wakayaswa cipeni kusyule naakali kweenda kuya kumiswaangano. Alimwi bacizi basika kubabili bakanyukaulwa nobakatibbidwe. Pele ezi tazibalesyi kuboola kumiswaangano. Mu Nsondo inga tulayiya kwiimba nyimbo kwaciindi cisyoonto twamana kujala muswaangano amupailo. Ibasika ku 95 pasenti balacaala akwiiya nyimbo zyoonse iziyoobelesyegwa kumiswaangano nsondo iitobela. Eci cilabagwasya bapya ikwiiya nyimbo akwiimba antoomwe andiswe.”
Ibakkala muminzi abalo balaazisinkilizyo zimbi mbuli kulampa kwamisinzo yalo njobeelede kweenda kutegwa bajanike kumiswaangano ziindi zyotatwe ansondo. Bamwi banabukwetene bayanda kwiiya bakkala kubusena bulampa makkilomita aali 15 kuzwa ku Ŋanda ya Bwami iili ku Lobatse mu Botswana. Mwaka oonse oyu wamana balikujanika kumiswaangano lyoonse abana babo bobile. Imwaalumi usuma mabbusu ikutegwa agwasye mukwasyi. Imukaintu uuzya tuntu tusyoonto-syoonto kutegwa ayungizye mali aamukwasyi akukonzya kubbadela mulweendo lwakuunka akupiluka kuzwa kumiswaangano.
Ino-ino awa mainza kumangolezya noyakamana miswaangano amulangizi wabbazu, oyu mukwasyi wakasiililwa ikukkwelelwa mabbaasi aciindi ca 21:00 hrs. Imabbaasi akafwaambaana kuleka kweenda akaambo kakuti kwakacede bubi buzuba obo. Imupulisa wakaima amootokala wakwe akubuzya ncobakali kucita. Naakamvwa penzi lyabo, wakabafwida luse akubatola kuŋanda yabo, imusinzo uulampa makkilomita aali 15. Oyu mukaintu walo uuli ngusikumwaya uutabbapatizidwe, wakaambila mulumaakwe kuti: “Amulange, ikuti naa twabikka miswaangano mubusena bwakusaanguna, Jehova ulagwasya lyoonse.” Lino awalo mulumi utondezya luyandisisyo lwakuba mukambausi wamakani mabotu.
[Cifwanikiso icili apeeji 32]
Bakamboni mbuli baaba baku Romania bakapa citondezyo cibotu caluyandisisyo lwamiswaangano ya Bunakristo