Muswaangano wa “Kupona Munzila Njayanda Leza” wa 1998-1999 Ulaafwaafwi!
MU ZAMBIA mwalo kuli miswaangano iili 52 iibambidwe kuzwa mu August kusikila mu September. Kulalangilwa kuti umwi wamiswaangano eyi yamazuba otatwe uyoobeda mumunzi ulaafwaafwi ankomukkala. Mumasena manji, eyi pulogilamu inootalika anyimbo buzubaa buzuba aciindi ca 9:30 a.m—kuzwa mubuzuba bwakusaanguna kusikila kuli bwamamanino.
Ipulogilamu yabuzuba Bwakusaanguna cifwumofwumo iyooamba malipooti kujatikizya kuyaambele kwabukambausi bwa Bwami mumasena aandeene-andeene munyika. Alimwi mutwe wamuswaangano uyookankaizigwaa makani aantalisyo aakuti, “Cinunuzyo ca Kristo Nenzila Mwafwutwida Bantu Leza.”
Kumazuba imakani aakusiilana aakuti “Nobazyali—Amubayiisye Nzila ya Leza Bana Banu” ayoopa nzila mbuli mbobanga bakulwaizigwa bana basyoonto kumuyanda alimwi akumubelekela Jehova. Ipulogilamu yakumazuba iyoomanaa makani aakuti “Sena Kuli Buumi Bumbi Lwainda Lufwu?”
Ipulogilamu yabuzuba Bwabili cifwumofwumo iyoobandika mulimo wa Bakamboni ba Jehova iwakugwasya bantu kuba basikwiiya mumakani aali muzibeela zyotatwe zitobelana, “Kugwasya Bantu Kujana Nzila Iitola Kubuumi,” “Mbocikatazya Kusikila Bantu,” alimwi aakuti “Ikuyiisya Basikwiiya Zyoonse Kristo Nzyaakalailila.” Kumamanino aapulogilamu yacifwumofwumo kuyooba coolwe cakuti basikwiiya bapya babbapatizigwe.
Makani aamatalikilo mubuzuba Bwabili kumazuba ngakuti, “Ikubeleka Kumwi Katulangila Buumi Butamani,” ayootukulwaizya kuyeeya twaambo ncotumubelekela Leza. Imakani aakuti “Ikulumba ‘Zipego Kubantu,’ Ibayiisya Nzila ya Leza” alimwi aakuti “Amubusamunune Buntu Bwakale Akusama Bupya” abandika kapango akapango kabbuku lya Ba-Efeso caandano ca 4. Mpoonya lulayo lubotu lwamu Magwalo luyoopegwa mumakani aakuti “Amubule Kabala Nikaba Komwe Kaansi” alimwi amumakani aazibeela zyotatwe aakusiilana “Nobakubusi—Amutobele Nzila ya Leza.” Ipulogilamu yakumazuba iyoomanaa makani aakuti “Mulengi—Mbwabede Alimwi Anzila Zyakwe.”
Ipulogilamu yabuzuba Bwatatu cifwumofwumo inoojisi zibeela zyotatwe zyamakani aakusiilana aayoobandika zyaandaano zyamamanino zyabbuku lyamu Bbaibbele lya Ezekiele antoomwe ambobubeleka businsimi bwazyo. Ikumanizya pulogilamu yacifwumofwumo kunooli cisobano caamba bana basankwa botatwe basyomeka ibana Hebrayo. Kumazuba imuswaangano unoojisi makani aakubuleya aakuti, “Inzila Ilikke Yakujana Buumi Butamani.”
Masimpe muyoogwasigwa kapati munzila yakumuuya kwiinda mukujanika mazuba oonse otatwe. Mulitambwidwe camaanza obile kucibeela cimwi acimwi, zyoonse iziyoocitwa kakunyina kubbadelesyegwa pe. Ikutegwa muzibe busena bwamuswaangano buli afwaafwi ankomukkala, amubuzye ku Ŋanda ya Bwami ya Bakamboni ba Jehova iili afwaafwi naa kulembela basikumwaya magazini eyi.