Ikulindila ‘Cakudunama’

“Ludunamino lwazilenge lulalangila luyubununo lwabana ba-Leza.”—BA-ROMA 8:19.

1. Nkukozyanya nzi kuliko akati kabukkale bwa Banakristo basunu aboobo bwa Banakristo bamumwaanda wamyaka wakusaanguna?

IBUKKALE bwa Banakristo beni-beni sunu bulakozyanya abwa Banakristo bamumwaanda wamyaka wakusaanguna. Ibusinsimi bwakabagwasya babelesi ba Jehova bakuciindi eco ikuziba ciindi Mesiya nakeelede kulibonya. (Daniele 9:24-26) Ibusinsimi mbubonya bwakasinsima lunyonyooko lwa Jerusalemu pele bwakanyina makani aakali kupa kuti Banakristo babuzibile limwi buzuba nowakali kunga wanyonyoonwa munzi oyo. (Daniele 9:26b, 27) Mbubwenya buyo, ibusinsimi bwakapa kuti Basikwiiya Bbaibbele bamumwaanda wamyaka wa 19 kabalangila. Ikwiinda mukuswaanganya “myaka iili musanu aibili” yaambidwe kubbuku lya Daniele 4:25 alimwi ‘aziindi zya Bamasi’ bakeezeezya kuti Kristo wakali kuyootambula nguzu zyamu Bwami mu 1914. (Luka 21:24; Ezekiele 21:25-27) Nokuba kuti bbuku lya Daniele lilijisi businsimi bunji, kunyina nobuba bomwe ibupa kuti basikwiiya Bbaibbele basunu bakonzye kubalila ciindi cini-cini nobuyoonyonyoonwa bweende boonse bwa Saatani. (Daniele 2:31-44; 8:23-25; 11:36, 44, 45) Nokuba boobo, eci ciyoocitika lino-lino akaambo kakuti tukkede “kumamanino aaciindi.”—Daniele 12:4.a

Ikucenjela Kuciindi Cakubako kwa Kristo

2, 3. (a) Nzintu nzi zijatikizidwe mukusinizya kuti tukkede mumazuba aakubako kwa Kristo mubwami? (b) Ncinzi citondezya kuti Banakristo bakeelede kucenjela kuciindi cakubako kwa Jesu Kristo?

² Masimpe, ibusinsimi bwakapa kuti Banakristo batalike kulangila katanapegwa nguzu Kristo mu Bwami mu 1914. Pele “citondezyo” ncaakapa Kristo cakubako kwakwe alimwi acamamanino aabweende bwazintu cakali kwaamba zintu ziyoocitika. Alimwi bunji bwazyo zyakali kuyoobonwa kaliko kale mubwami. Izintu zili boobu—nkondo, inzala, mizuzumo, kutalulama, kupenzyegwa kwa Banakristo alimwi abukambausi bwanyika yoonse bwamakani mabotu aa Bwami—ziyooba lusinizyo lwini-lwini lwakuti lino tukkede muciindi cakubako kwa Kristo mubwami.—Matayo 24:3-14; Luka 21:10, 11.

³ Pele ikaambo kapati mumajwi aa Jesu aakulaya basikwiiya bakwe kakali kakuti: “Amucenjele, kamulindila . . . amulangile.” (Marko 13:33, 37; Luka 21:36) Ikuti twacibala kabotu-kabotu cibalo camalailile aya kujatikizya kucenjela, citondezya kuti Kristo tanaakali kwaamba kucenjelela citondezyo camatalikilo aakubako kwakwe. Pele wakali kwaambila basikwiiya bakwe beni-beni kuti kabacenjede kuciindi cakubako kwakwe. Nkaambo nzi Banakristo beni-beni ncobakeelede kuzumanana kucenjelela?

4. Ino citondezyo cakapa Jesu cakali kuyoogwasya nzi?

⁴ Jesu wakaamba businsimi bwakwe bupati mukwiingula mubuzyo wakuti: “Ino makani aya azooba lili? [aajatikizya zintu iziyoosololela kukunyonyoonwa kwabweende bwazintu bwaba Juda] alimwi ncinzi cizooba citondezyo cakuboola kwako acamamanino aaciindi?” (Matayo 24:3) Icitondezyo cakasinsimwa tiicakali kuyoogwasya buyo kuziba kubako kwa Kristo pele cakali kuyoogwasya akuziba zintu ziyooletelezya mamanino aabweende bubyaabi bwazintu buliko lino.

5. Ino Jesu wakatondezya buti kuti nokuba kuti nkwali munzila yakumuuya ‘uciyakuboola’?

⁵ Jesu wakatondezya kuti kuciindi ‘cakubako’ kwakwe (mu Cigiliki, pa·rou·siʹa) uyooboola munguzu abulemu. Ikujatikizya ‘kuboola’ kuli boobu (ikwaambwaa jwi lya Cigiliki lyakuti erʹkho·mai), wakati: “Lino kuyooboneka citondezyo ca-Mwana a-Muntu kujulu, mpawo misyobo yoonse yaansi iyoolila, nkabela bayoobona Mwana a-Muntu uuboola amayoba aakujulu anguzu abulemu bupati. . . . Lino amuliiye cikozyano camukuyu. Mutabi nuucili mutete akusyuuka indelema, mulizi kuti mainza ali afwiifwi. Mbubonya obo anywebo nimuyoobona zintu ezi zyoonse, amukazibe kuti [Kristo] uli afwiifwi nikuba kumilyango. . . . Nkaambo kaako amulangile, nkaambo tamuzi buzuba mbwazoosika mwami wanu. . . . Amulibambe, nkaambo kuciindi ncimutezi nciconya ncazoosika Mwana a-Muntu.”—Matayo 24:30, 32, 33, 42, 44.

Ino Uboolela nzi Jesu Kristo?

6. Ino kunyonyoonwa kwa “BABULONI MUPATI” kuyoocitika buti?

⁶ Nokuba kuti waliko ikuzwa mu 1914 kali Mwami, Jesu Kristo weelede kubeteka bweende alimwi abantu katanacita lubeta kuli baabo mbajana kuti mbabi. (Amweezyanisye 2 Ba-Korinto 5:10.) Lino-lino, Jehova uyoocibikka mumizeezo yabeendelezi bazisi kuti banyonyoone “BABULONI MUPATI,” ibwami bwanyika bwabukombi bwakubeja. (Ciyubunuzyo 17:4, 5, 16, 17) Imwaapostolo Paulo wakagama buya kwaamba kuti Jesu Kristo uyoonyonyoona “muntu mubi”—basololi bacikombelo basiluleyo ba Kristendomu, icibeela cisumpukide ca “BABULONI MUPATI.” Paulo wakalemba kuti: “Uyooyubunuka muntu mubi, mwana walunyonyooko. Elyo nayooyubununwa sikusotoka milao, ngwayoonyonyoona Mwami Jesu a-Muuya wamulomo wakwe, akumulobya akulibonya kwakuboola kwakwe.”—2 Ba-Tesalonika 2:3, 8.

7. Imwanaa muntu aakusika mubulemu bwakwe, mbubetesi nzi mbwayoocita?

⁷ Lino-lino Kristo uyoobeteka bantu bamasi akaambo kanzila njibalanganya banabakwabo bacili anyika. Tubala kuti: “Lino Mwana a-Muntu naazooboola mubulemu bwakwe antoomwe abaangelo bakwe, uzookala acuuno cabulemu bwakwe, nkabela misyobo yoonse izoobunganisigwa kubusyu bwakwe. Mpawo uzoobaandaanya mbuli mweembeli mbwaandaanya imbelele ampongo. Lino imbelele uzoozibika kululyo lwakwe, impongo uzoozibika kucimwensi cakwe. . . . Mwami uzoobavwiila [mbelele] kuti, Ncobeni ndamwaambila kuti, mbuli mbumwakacitila obo umwi naba muniini akati kabakwesu aba, mwakacitila ndime mbubonya. . . . Aba [mpongo] bayoonjila mumapenzi aatamani, pele balulami bayoonjila mubuumi butamani.”—Matayo 25:31-46.

8. Ino ikuboola kwa Kristo kuzyoocita lubeta kubantu batali banaleza ukupandulula buti Paulo?

⁸ Mbuli mbukwatondezyegwa mucikozyanyo cambelele ampongo, Jesu uyoocita lubeta lwamamanino kuli boonse batali banaleza. Paulo wakasyomezya basyominyina bakali kupenga kuti “[bayoo]lyookezya, antoomwe aswebo, kuciindi cakuyubunuka kwa-Mwami Jesu kuzwa kujulu. Uyooyubunuka antoomwe abaangelo bakwe basinguzu, abbalabala lyamulilo, nkabela uyoobwedezya muliyano kulibaabo abatamuzi Leza akutaswiilila Makani Mabotu aa-Mwami wesu Jesu. Aba bayoobetekelwa lunyonyooko lutamani kuzwa kubusyu bwa-Mwami akubulemu bwanguzu zyakwe, kuciindi ncazoosika kuzoolemekwa kubasalali bakwe.” (2 Ba-Tesalonika 1:7-10) Akaambo kazintu zyoonse ezi ziboola kumbele, sena inga tatubi alusyomo akucenjelela kuboola kwa Kristo?

Ikulindila Kuyubununwa kwa Kristo Cakudunama

9, 10. Nkaambo nzi ncobacilindila kuyubununwa kwa Jesu Kristo abo bananike bacili anyika?

⁹ “Kuyubunuka kwa-Mwami Jesu kuzwa kujulu” takukabi buyo kwakunyonyoona babi, kuyoobikkilizya akulumbula baluleme. Ibasyeede akati kabanabakwabo Kristo bananike ibacili anyika balalangilwa kupenga katanayubununwa Kristo, pele balakondwa akaambo kabulangizi bwabo bwakujulu. Imwaapostolo Petro wakalemba boobu ku Banakristo bananike: “Nkaambo mwaba bapenzinyina Kristo, aboobo muleelede kukondwa, kuti mukakondwe akusekelela kuciindi eco acalo ncibuyooyubununwa bulemu bwakwe.”—1 Petro 4:13.

¹⁰ Ibananike balikanzide kuzumanana kusyomeka kusikila ciindi Kristo ‘nayoobayobolola’ kutegwa “kusukusigwa” kwalusyomo lwabo ‘kukabaletele lutembaulo abulemu alulemeko kuciindi cakuyubununwa kwa-Jesu Kristo.’ (2 Ba-Tesalonika 2:1; 1 Petro 1:7) Ikujatikizya Banakristo bazyedwe amuuya bali boobu, kulakonzya kwaambwa kuti: “Lwasimpizigwa lusinizyo lwamakani aa-Kristo aakakambaukwa akati kanu. Nkaambo kaako taakwe caabilo ncimukonzya kubula ciindi ncimucilindila kuyubununwa kwa-Mwami wesu Jesu Kristo.”—1 Ba-Korinto 1:6, 7.

11. Mulimo nzi ngobacita Banakristo bananike nobacilindila kuyubununwa kwa Jesu Kristo?

¹¹ Ibananike basyeede balimvwa mbuli Paulo walo wakalemba kuti: “Ndayeeya kuti mapenzi aaciindi ecino taakwe makani kumeso aabulemu mbutuzooyubunwidwa.” (Ba-Roma 8:18) Ilusyomo lwabo taluyandiki kugwasilizigwaa kubalila kwaciindi. Bajisi bubi mumulimo wa Jehova aboobo bapa cikozyanyo cibotu kubabelesinyina ‘bambelele zimwi.’ (Johane 10:16) Aba bambelele zimwi balizi kuti mamanino aabweende obu bwazintu ali afwaafwi alimwi batobela malailile aa Petro aakuti: “Amulyaangaange muzibuno zyakuyeeya kwanu, mukabe bapakamani, amukalulangilisye olo luzyalo ndomuyooletelwa kukuyubununwa kwa-Jesu Kristo.”—1 Petro 1:13.

“Ludunamino lwazilenge lulalangila”

12, 13. Ino bantu ‘bakasampauzigwa’ buti, alimwi ncinzi ncobalombozya bambelele zimwi?

¹² Sena abalo bambelele zimwi kuli cintu cimwi ncobakonzya kudunamina kulangila? Inzya nkocili. Naakamana kwaamba zyabulangizi bubotu bwabaabo ibaba “bana” ba Jehova bazyedwe amuuya alimwi “baswaana bakwe antoomwe a-Kristo” mu Bwami bwakujulu, Paulo wakaamba kuti: “Ludunamino lwazilenge lulalangila luyubununo lwabana ba-Leza. Nkaambo zilenge zyakasampauzigwa, enko kubukanze bwazyo zini pele kubukanze bwayooyo iwakazisampauzya, ikuti kali abulangizi bwakuti azyalo zilenge zini zikalubulwe kubuzike bwabubozi, bube abulubulo bulemu bwabana ba-Leza.”—Ba-Roma 8:14-21; 2 Timoteo 2:10-12.

¹³ Ikwiinda mucibi ca Adamu, iluzubo lwakwe loonse ‘lwakasampauzigwa’ akuzyalilwa mubuzike bwacibi alufwu. Baalilwa kulyaangulula kuzwa kubuzike buli boobu. (Intembauzyo 49:7; Ba-Roma 5:12, 21) Ibambelele zimwi balalombozya kaka ‘kulubulwa kuzwa kubuzike bwabubozi’! Pele kacitanacitika eco, izintu zimwi zyeelede kucitika kweelanaa ziindi amazuba aa Jehova.

14. Ncinzi ciyoojatikizigwa ‘mukuyubununwa kwabana ba Leza,’ alimwi eci ciyoopa buti kuti bantu ‘balubulwe kuzwa kubuzike bwabubozi’?

¹⁴ Ibasyeede akati ‘kabana ba Leza’ bananike beelede kusaanguna ‘kuyubununwa.’ Eno eci ciyoojatikizya nzi? Kuciindi ca Leza ceelede, ciyoolibonya kumbelele zimwi kuti ibananike ‘bagwalwa’ akulemekwa kuti balele a Kristo. (Ciyubunuzyo 7:2-4) Abalo “bana ba-Leza” babusidwe ‘bayooyubununwa’ baakugwasya Kristo ikunyonyoona bweende bubyaabi bwazintu bwa Saatani. (Ciyubunuzyo 2:26, 27; 19:14, 15) Mpoonya, mu Myaka iili Cuulu ya Bulelo bwa Kristo ‘bayooyubununwa’ alimwi kabali nenzila yabupaizi yakupeda lugwasyo lwacinunuzyo ca Jesu kubantu. Eci ciyoopa kuti bantu ‘bakalubulwe kuzwa kubuzike kububozi’ mpoonya akunjila ‘mubulubulo bulemu bwabana ba-Leza.’ (Ba-Roma 8:21; Ciyubunuzyo 20:5; 22:1, 2) Akaambo kabulangizi buli boobu, sena cilagambya kuti bambelele zimwi ‘balangila luyubununo lwabana ba-Leza’ ‘aludunamino’?—Ba-Roma 8:19.

Ikukkazika Moyo kwa Jehova Nkokuleta Lufwutuko

15. Ncinzi ncotuteelede kuluba kujatikizya ciindi ncabikkide Jehova cakucitika kwazintu?

¹⁵ Jehova Nguuyinda Kubamba ciindi. Ikupima kwakwe kwaciindi ciyoocitika zintu kunoolondokede. Izintu zilakonzya kazitacitiki mbuli mbutuzilangila swebo. Nokuba boobo tulakonzya kusyoma cini-cini kuti izisyomezyo zya Leza zyoonse ziyoozuzikizigwa. (Joshua 23:14) Ulakonzya kulekela zintu kuti zizumanane kwiinda mbobazilangila banji. Pele atuziteelelesye nzila zyakwe akulombozya busongo bwakwe. Paulo wakalemba kuti: “Ha! muli bulondo buteeli mubusongo bwa-Leza amuluzibo lwakwe! Ncobeni imbeta zyakwe tazilangiki, aziyanza zyakwe tazitobeleki! Nkaambo nguni uubwene miyeeyo ya-Mwami? Na nguni wakaba mukanzenyina?”—Ba-Roma 11:33, 34.

16. Mbaani balangilwa kuyoogwasigwaa kukkazika moyo kwa Jehova?

¹⁶ Petro wakalemba kuti: “Nomuyandwa, mbumulangila zintu ezi, [ikunyonyoonwa kwa “julu” lyakale alimwi “anyika” alimwi akuboola “[kwa]julu ipya” alimwi “anyika mpya” abusena bwanzinzyo Leza nkwaakasyomezya] amusungwaale kujanwa mulikede muluumuno, mutakwe kabala, mutakwe kampenda mumeso aa-Leza. Amuyeeye kuti kukazika moyo kwa-Mwami nkokuleta lufutuko.” Akaambo kakukkazika moyo kwa Jehova, izyuulu zili mbozibede zyabantu abambi balapegwa coolwe cakufwutulwa ‘mubuzuba bwa Jehova’ bwalo ibuyoosika aciindi mpobutalangilwi mbuli “mbwasika mubbi.” (2 Petro 3:9-15) Alimwi kukkazika moyo kwakwe kupa kuti umwi aumwi wesu ‘asungwaale kubelekela lufwutuko lwesu cakuyoowa acakuzyangama.’ (Ba-Filipi 2:12) Jesu wakaamba kuti tweelede ‘kulilangisisya’ ‘akulinda’ ikuti katuyanda kuti tuzumizigwe akuzwidilila “kwiima kumbele lya-Mwana a-Muntu” kuciindi aakuboola kuzyoobeteka.—Luka 21:34-36; Matayo 25:31-33.

Atulindile Cakukkazika Moyo

17. Majwi nzi aakaamba mwaapostolo Paulo ngotweelede kutobela?

¹⁷ Paulo wakakulwaizya banabakwabo bakumuuya ikutagamika meso abo “[a]zintu zibonwa pele zintu zitabonwa.” (2 Ba-Korinto 4:16-18) Kunyina ncaakali kuyanda kuti kacibasinkilila kukubona bulumbu bwakujulu mbubakabikkilidwe. Tube Banakristo bananike naa tuli bambelele zimwi, katubuyeeyede bulangizi mbotujisi akutatyompwa. ‘Katulindila cakukkazika moyo’ akusinizya kuti “endiswe tuyoopiluka cifuteesule akufwa pe, ndiswe baabo abajisi kusyoma kuyoofutusya [buumi bwesu, NW].”—Ba-Roma 8:25; Ba-Hebrayo 10:39.

18. Nkaambo nzi ncotweelede kusungwaala kusiya ziindi amazuba mumaanza aa Jehova?

¹⁸ Icalusyomo tulakonzya kwaasiya mumaanza aa Jehova makani aajatikizya ziindi amazuba. Ikuzuzikizigwa kwazisyomezyo zyakwe ‘takukoyoocedelelwa’ ikweelana abubambe bwakwe bwaciindi. (Habakuku 2:3) Calino malailile aa Paulo kuli Timoteo atwaabikkile maanu kapati. Wakati: “Ndakulailila kunembo lya-Leza alya-Kristo Jesu uuyoobeteka baumi abakafwa, akukupompa kwakwe akubwami bwakwe, kuti ukambauke Makani lyoonse. Koajatisya muciindi ceelede aciteelede. . . . Kosungwaalila milimo yabukambausi, kokondezesya mulimo ngowakapegwa.”—2 Timoteo 4:1-5.

19. Nciindi cakucita mulimo nzi ncobacijisi bantu ba Jehova, alimwi nkaambo nzi?

¹⁹ Imaumi ali muntenda—eesu tobeni alimwi aabasimukoboma. Paulo wakalemba kuti: “Kolibonena omwini akufundisya kwako, Koujisi azintu ezi, utaleki pe, nkaambo wanoocita bobuya, inga ulalifutula omwini, abalo bakumvwa ulabafutula.” (1 Timoteo 4:16) Iciindi caceya kapati kubweende bubyaabi obu bwazintu. Notucizilangila caludunamino izintu ezyo zili kumbele lyesu, atuzibe kuti cicili ciindi ca Jehova amazuba aakuti bantu bakwe bakambauke makani mabotu aa Bwami. Oyo mulimo weelede kucitwa mbuli mbwauyanda. Mbubwenya mbuli Jesu mbwaakaamba, “elyo mamanino azoosika.”—Matayo 24:14.

Bupanduluzi buyungizidwe

Ikwiindulula

◻ Ino bukkale bwesu bukozyenye buti abwa Banakristo bamumwaanda wamyaka wakusaanguna kujatikizya kubalila kwaciindi?

◻ Nkaambo nzi Banakristo ncobeelede ‘kulangila’ nomuba muciindi cakubako kwa Kristo?

◻ Nkaambo nzi bantu ncobalangila ‘luyubununo lwabana ba-Leza’?

◻ Nkaambo nzi ncotweelede kusiya ziindi amazuba mumaanzaa Jehova?

[Cifwanikiso icili apeeji 15]

Ibanakristo beelede kulinda lyoonse ikulangila kuboola kwa Kristo

[Cifwanikiso icili apeeji 16]

Ibananike basyeede bajisi bubi mumulimo wa Jehova, ilusyomo lwabo taluyeeme akubalila kwaciindi