Ikukomba Leza Mubwini
Ikutegwa bukombi bukkomanisye kuli Leza, bweelede kuti kabuyeemi abwini. (Johane 4:23) Ibbaibbele lyaamba bakombi beni-beni kuti bali ‘mumbungano ya-Leza muumi, ngomusemu, alimwi ncecisiko calusinizyo.’ (1 Timoteo 3:15) Abo bali mumbungano ya Leza tabasyomi buyo mubwini bwa Jwi lya Leza pele balapona kweendelana andilyo alimwi akuliiminina ikulizibya koonse-koonse anyika.—Matayo 24:14; Ba-Roma 10:9-15.
BAKAMBONI BA JEHOVA balizibidwe akaambo kamulimo wabo wakuyiisya Bbaibbele walo uucitwa lino mumanyika aayinda ku 200. Balaliiya Bbaibbele akuyiisya kuti mbobwini kakunyina akulyuubya-ubyaa busongo bwabantu. Sena mulizizibide ziyiisyo zyabo zizwa mu Bbaibbele? Ibanji balalengaana kubaswiilila Bakamboni ba Jehova akaambo katwaambo tubyaabi ntobamvwa kujatikizya mbabo. Pele bantu babombemyoyo balatambwa kuti balisalile beni naa nzyobakambauka Bakamboni nzyamasimpe naa pe. Ikusala kuli boobu takweelede kuti kakuyeeme antwiintwi pe. Ibanji balivwuntauzila kujatikizya ziyiisyo zya Bakamboni ba Jehova bagwasigwa kapati.
Ikuziba Bwini Kumanya Buyoofwu
Mucikozyanyo, amulange cakacitika kuli Eugenia. Wakakomenena muŋanda ya Bukatolika. Bausyi bakali bamwi babasikweendelezya kuswaya kwapaapa ku Mexico mu 1979. Naakali kuswaya beenzinyina, Eugenia wakabandika a Bakamboni ba Jehova. Kwiinda mulugwasyo lwabo, wakatalika kulanga-langa ncolyaamba Bbaibbele. Ulayeeya ategwa: “Kukusaanguna ndakatalika kulimvwa kuyoowa. Ndakabujana bwini! Pele eci cakali kwaamba kuti zyoonse nzyondakali kusyoma musyule tiizyakaluzi. Imukwasyi wangu, balongwe bangu, ibantu mbindakali kuyanda—boonse nzibakali kusyoma tiizyakaluzi. Ndakalibilika. Ndakali kulibuzya lyoonse ikuti naa bamukwasyi wangu bayoolimvwa buti kucintu cipya ncondakazyiba. Mukuya kwaciindi alimwi kwiinda mulugwasyo lwa Jehova, ndakali kuya bucizibila eci cakandicitikila. Ibuzuba bumwi ndakayeeya kuti ndaambile mulongwe wamukwasyi wesu, professor mulwiiyo lwa Bbaibbele. Ndakamwaambila mbuli mbundakali kuyandisya kujana bwini. Mpoonya wakaamba kuti, ‘Ikuti koyanda kuziba bwini, koyandaula Bakamboni ba Jehova.’”
Mbubwenya mbwaakali kuyeeyela Eugenia, ibamukwasyi wakwe bakamutanda aŋanda. Nokuba boobo, Bakamboni bakazumanana kumupa lugwasyo munzila yakumuuya. Ulaamba: “Ndakayumayumizigwa ikwiiminina bwini. Ndakaziba kuti cakali cintu ciyandika kuyumina. Ikutambula nkubakanditambula Bakamboni ba Jehova kwakandikonda kapati. Ndakalimvwa kuti ndilayandwa mukati mumbungano ya Bunakristo. Ikuswenenena kumbunga ya Leza kwakandigwasya kapati kuzunda buyoofwu bwakwiiminina bwini endikke.”
Amulange acimbi cikozyanyo. Sabrina wakakomenaa cilengwa cakubaa mibandi yamukwasyi lyoonse kujatikizya Bbaibbele. Atwaambe kuti bakabaa ‘bukombi bwamukwasyi.’ Wakabaa cilengwa cakuyanzanaa basicikombelo bazikombelo zyaandeene-andeene ikutegwa ayubunune bulubizi bwabo. Umwi wa Bakamboni ba Jehova naakamwaambila kuti ayiye Bbaibbele anguwe, tanaakasowa ciindi wakazumina kakanzide kukazya busyomi bwabo. Ulayeeya ategwa: “Nindakayiya kwaciindi ciinda kumwaka omwe, ndakalibilika kuti inga kandiya kusowa ‘bwini bwangu.’ Cakali kunduubaubila ikuyubununa bubeji bwazikombelo zinji zindakayanzana anzizyo pele lino zintu zyakacinca.”
Ikulibilika kwa Sabrina kwakapa kuti alekezye ciiyo cakwe ca Bbaibbele a Bakamboni ba Jehova. Pele wakalimvwa kusweeka munzila yakumuuya. Wakayeeya kuti atalike alimwi kwiiya elyo wakabuzumina obu bwini bupya. Sabrina wakayaambele mane kusika aciimo cakuyanda kwaambila bamwi zintu nzyaakali kwiiya. Mane wakalomba kuti abasindikile Bakamboni mumulimo wabo waŋanda aŋanda. Sabrina upandulula kuti: “Kanditanazumizigwa kuti kandikambauka a Bakamboni ba Jehova ndakabuzigwa kuti: ‘Sena uyanda ncobeni kuti ube umwi wa Bakamboni ba Jehova?’ Ndakaingula kuti, ‘Peepe!’ Ndakayoowa alimwi.” Limwi naakazumanana kujanika kumiswaangano yoonse alimwi akulangilila bantu ba Leza ambuli mbubakali kutobela njiisyo zya Bbaibbele, Sabrina wakaziba kuti obu bwakali bwini ncobeni. Wakabbapatizigwa elyo lino mukambausi waciindi coonse.
Nkaambo nzi Ncobaandeene?
Muntu umwi ulakonzya kubuzya kuti, ‘Nkaambo nzi ziyiisyo zya Bakamboni ba Jehova ncozyaandeene azyazikombelo zimwi?’ Ikulanga-langa cakukosaula-kosaula nzyobasyoma Bakamboni kuyoomugwasya kubona kuti Mbanakristo basinizizye, basikwiiya Bbaibbele baluleme. Tumukulwaizya kuti mulange muma Bbaibbele anu izibalo zyabusyomi bwabo bwantalisyo bwatondezyegwaa atalaawa mukukosaula-kosaula.
Ikwiinda mukutobelesya nzyobasyoma Bakamboni ba Jehova alimwi ambuli mbobatobela iziyiisigwa mu Bbaibbele, muyoolongezyegwa alwaanguluko ilupegwaa bwini. (Johane 17:17) Tamweelede kubuyoowa bwini. Amuyeeye cisyomezyo ca Jesu: “Muyooziba bwini, abwalo bwini buyoomunununa.”—Johane 8:32.
[Kabbokesi kali apeeji 6]
IBUSYOMI BUMWI BWANTALISYO BWA BAKAMBONI BA JEHOVA
Jehova ngo Leza singuzuzyoonse. Izina lyakwe lini-lini lilalibonya ziindi ziinda ku 7,000 mumalembe aakusaanguna aa Bbaibbele.—Intembauzyo 83:18.
◯ Jesu Kristo Mwanaa Leza walo wakaboola anyika kuzyooaba buumi bwakwe kubantu. (Johane 3:16, 17) Bakamboni ba Jehova batobela ziyiisyo zya Jesu Kristo mbubwenya mbuzilembedwe mu Makani Mabotu.
◯ Izina lyakuti Bakamboni ba Jehova lijanwa kubbuku lya Isaya 43:10, lyalo lyaamba kuti: “Ndinywe bakamboni bangu, mbwaamba Jehova.”
◯ Ibwami mbobapailila bantu mumupailo wa “Taateesu” nimfwulumende yakujulu yalo iiyoozwisya kupenga koonse lino-lino alimwi amacise munyika akusiila busena Paradaiso iisyomezegwaa Bbaibbele.—Isaya 9:6, 7; Daniele 2:44; Matayo 6:9, 10; Ciyubunuzyo 21:3, 4.
◯ Muntu woonse uucita kuyanda kwa Leza ulaacoolwe cakubaa zilongezyo zya Bwami kusikila kutamani.—Johane 17:3; 1 Johane 2:17.
◯ Ibanakristo beelede kubambulula bukkale bwabo kweelanaa mbulyaamba Bbaibbele. Beelede kusolekesya kusyomeka, ikubaa bukkale busalala alimwi akutondezya luyando kuli basimukobonyina.—Matayo 22:39; Johane 13:35; 1 Ba-Korinto 6:9, 10.
[Cifwanikiso icili apeeji 5]
Bakamboni ba Jehova balabuzibya bwini bwa Bbaibbele kubantu bali mumanyika aainda ku 200