Cinunuzyo ca Kristo—Nenzila Mwafwutwida Bantu Leza

“Obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.”—JOHANE 3:16.

1, 2. Amupandulule mapenzi aacitikila musyobo wabantu woonse.

AMWEEZEEZYE kuti muciswa bulwazi bukonzya kumujaya ccita kuti mwaandulwa. Ino inga mwalimvwa buti kuti naa imali aayelede kubbadelwa kuti mwaandulwe tamwaakonzyi? Alimwi ino mbuti kuti naa mali aamukwasyi wanu woonse abalongwe banu kwaabikka antoomwe taakonzyi kukkwana kubbadela? Ikusikilwa penzi libikka buumi muntenda lili boobu cilatyompya cini-cini!

² Eci citondezya bukkale bwacitika kujatikizya bantu. Ibazyali besu bakusaanguna, ba Adamu a Eva bakalengwa kabalondokede. (Deuteronomo 32:4) Bakajisi bulangizi bwakupona kukabe kutamani alimwi akuzwidilila mumakanze aa Leza aakuti: “Amuzyalisye, muvule, muzuzye nyika akwiibombya.” (Matalikilo 1:28) Pele, ba Adamu a Eva bakazangila Mulengi wabo. (Matalikilo 3:1-6) Ikutamvwa kwabo kwakaleta cinyonyoono ikutali kuli ba Adamu a Eva balikke pele akubana babo batakaninga zyalwa. Mwaalumi uusyomeka Jobu kumbele wakazikwaamba kuti: “Nguni uukonzya kuleta cintu cilondokede, cilondokede kuzwa mucintu cisofweede? Taakwe naba omwe pe.”—Jobo 14:4, BT.

3. Ino lufwu lwabayambukila buti bantu boonse?

³ Aboobo cinyonyoono cili mbuli bulwazi bwayambukila umwi aumwi wandiswe, nkaambo kayi Bbaibbele lyaamba kuti “boonse babisya.” Iciimo eci cibikka buumi muntenda. Ncobeni, “cakuvola cazibi ndufu.” (Ba-Roma 3:23; 6:23) Kwiina wandiswe uunga waciloboka eci pe. Bantunsi boonse balabisya, aboobo boonse balafwa. Mbwaanga tuli bana ba Adamu, twakazyalwa katulijisi penzi eli pati. (Intembauzyo 51:5) Paulo wakalemba kuti: “Cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse ba[ka]bisya.” (Ba-Roma 5:12) Pele eci tacaambi kuti tunyina bulangizi bwalufwutuko.

Ikugusya Cinyonyoono Alufwu

4. Nkaambo nzi bantunsi ncobatakonzyi kugusya kuciswa alufwu ilwabo beni?

⁴ Ncinzi cinga cayandika kutegwa cinyonyoono alimwi aceeco ciletwaancico nkokuti ilufwu kuti zigusigwe? Icakutadooneka kuyandika cintu calo icitakonzyi kupegwaa muntunsi uuli woonse. Sintembauzyo wakalila ulaamba: “Cinunuzyo cabuumi ciladula kapati. Muntu ncanga wabbadela kutegwa kapona kukabe kutamani akuti atakasiki kucuumbwe tacikonzyi kukkwana pe.” (Intembauzyo 49:8, 9, Today’s English Version) Ee, tulakonzya kubulansya buumi bwesu kwamyaka misyoonto kwiinda mukulya zyakulya zibotu abusilisi buli kabotu, pele kwiina wandiswe naba omwe uukonzya kusilika ciimo cesu cacinyonyoono ncotwakakona. Kwiina wandiswe uukonzya kumanizya mapenzi aaboola akaambo kakucembaala akuboozya mubili wesu kuba uulondokede mbuli mbwaakakanzide Leza kumatalikilo. Aboobo Paulo tanaakali kuciindizya buya pe naakalemba kuti akaambo kacibi ca Adamu, zilenge zyoonse “zyakasampauzigwa” naa mbubwena mbuli Bbaibbele lya The Jerusalem Bible mbolyaamba kuti, “zyakabikkwa muciimo cakuti zikakilwe kuzwidilila mumakanze aazyo.” (Ba-Roma 8:20) Pele, mucoolwe Mulengi kwiina naatulekelezya buyo pe. Wapa cipego citikacigusizye limwi cibi alufwu aciindi comwe. Munzila nzi?

5. Mbuti Mulawo wakapegwa bana Israyeli mboutondezya kubikkila maanu kapati kubululami?

⁵ Jehova “ulayandisisya bululami akubotya.” (Intembauzyo 33:5) Mulawo ngwaakapa bana Israyeli utondezya kuti ulabikkila maanu kapati kuti zintu zyoonse kazilangwa munzila yomwe alimwi mubululami bwakutasalulula. Mucikozyanyo, mumilawo njoonya eyi tubala kuti ‘buumi bweelede kuliigwaa buumi.’ Atwaambe kuti, ikuti muna Israyeli wajaya muntu umwi, ibuumi bwakwe mwini mbobwakeelede kulungwa kuli boobo mbwaakanyonyoona. (Kulonga 21:23; Myeelwe 35:21) Aboobo ceeleko cabululami bwa Leza cakali kunooyelanisigwa.—Amweezyanisye Kulonga 21:30.

6. (a) Muunzila nzi Adamu mwanga waambwa kuti mmujayi? (b) Mbuumi nzi Adamu mbwaakasowa alimwi ncituuzyo nzi cakali kuyandika kutegwa ceelanye ceeleko cabululami?

⁶ Adamu naakabisya, wakaba mujayi. Munzila nzi? Mukuti wakali kuyootabukizya ciimo cakwe cacibi—aboobo lufwu lwakali kuzyoosikila bana bakwe boonse. Imibili yesu ili mukunyonyooka ono, bucebuce tuyabuswena kucuumbwe nkaambo kakutamvwa kwa Adamu. (Intembauzyo 90:10) Pele kuli cintu cimwi ciinda kubija ncocijisi cibi ca Adamu. Amuyeeye kuti Adamu abana bakwe ncobakasweekelwa tiibwakali buumi buyo bwamyaka iili 70 naa 80. Wakasweekelwa buumi bulondokede ncobeni—ibuumi butamani. Aboobo ikuti ‘buumi bweelede kuliigwaa buumi,’ mbuumi nzi ibwakeelede kupegwa kutegwa bweelanye bululami mumakani aaya? Ncamaanu kwaamba kuti, bwakeelede kuba buumi bulondokede—ibuumi mbubwena mbuli bwa Adamu, ibwakali kukonzya kuzyala bantunsi balondokede. Ikuti buumi buli boobo bwatuulwa kabuli cituuzyo, ibuumi bwamuntu ibulondokede tiibwakali kuyooelanya buyo ceeleko cabululami pele bwakali kuyoocitya akuti kukonzyeke ikucigusizya limwi cinyonyoono alimwi aceeco ciletwaancinco, nkokuti ilufwu.

Ikumanizya Mulungo Wacinyonyoono

7. Amupandulule ncolyaamba bbala lyakuti “cinunuzyo.”

⁷ Imuulo uuyandika kutegwa tufwutuke kucinyonyoono waambwa kuti ‘ncinunuzyo’ mu Bbaibbele. (Intembauzyo 49:7) Mu Cingisi ibbala elyo lilakonzya kwaamba mali ngabanda kuti apegwe sikubba bantu kutegwa apilusye muntu oyo ngwaabba. (Eci cicitika mumasi aambi.) Aino, icinunuzyo Jehova ncaapa tacijatikizyi kubba muntu uuli woonse cakaangila. Imuzeezo wakulunga walo tuucinci pe. Atwaambe kuti, ibbala lya Cihebrayo lisandulwidwe kuti “cinunuzyo” mucini-cini lyaamba “kuvwumbilila.” Ikutegwa cibi civwumbililwe, icinunuzyo ceelede kweelana kabotu-kabotu acintu ncoceelede kuboozya—ibuumi bwa Adamu bwabuntunsi bulondokede.

8. (a) Amwiipandulule injiisyo yakunununa. (b) Ino injiisyo yakunununa itujatikizya buti swebo tobasizibi?

⁸ Eci cileendelana anjiisyo iili mu Mulawo wa Musa—injiisyo yakunununa. Ikuti muna Israyeli wacetaala akulyuulisya mubuzike kumuntu uutali muna Israyeli, musazinyina wakali kukonzya kumunununa kwiinda mukubbadela mali aakeelene amali aaulwa muzike. (Levitiko 25:47-49) Ibbaibbele lyaamba kuti mbotuli bantunsi batalondokede tuli ‘bazike kucibi.’ (Ba-Roma 6:6; 7:14, 25) Ncinzi cinga cayandika kutegwa tunununwe? Mbubwena mbotwabona kale, ikusweekelwa kwabuumi bwabuntunsi bulondokede inga kwayandika kubbadelwa buumi bwabuntunsi bulondokede—kwiina cimbi ciinda naa kulela waawa.

9. Mbuti Jehova mbwaapa cipego cakumanizya cibi?

⁹ Aino, swebo tobantunsi tulazyalwa katutalondokede. Kwiina akati kesu uyelene a Adamu; kwiina wandiswe uukonzya kubbadela mali aacinunuzyo aayelede kweelana abululami. Mbubwena mbokwaambwa kumatalikilo, cili buyo mbuli kuti tujisi bulwazi bubikkide buumi bwesu muntenda, elyo tatujisi mali aakubbadela kutegwa tukaandulwe akupona kubulwazi obo. Muciimo cili boobo, sena inga tatulumbi ikuti muntu umwi watwiiminina akutubbadelela mali aayo? Eeci ncencico Jehova ncaacita mubulondo! Wapa cipego cakutufwutula kuzwa kucibi, aciindi comwe luzutu. Inzya, ulilisungwide kutupa eeco ncotutakonzyi kujana lwesu tolikke. Munzila nzi? Paulo wakalemba kuti: “Caabilo ca-Leza mbuumi butamani bwamuli-Kristo Jesu Mwami wesu.” (Ba-Roma 6:23) Kaamba Jesu, Johane wakamupandulula kuti “M[m]wanaambelele wa-Leza, uugwisya cibi cenyika.” (Johane 1:29) Atubone mbuli Jehova mbwaakabelesya Mwanaakwe uuyandwa kulunga cinunuzyo.

‘Icinunuzyo Ceelene’

10. Ino businsimi bujatikizya “lunyungu” bwakazikubagama buti ba Josefa a Mariya?

¹⁰ Mbokwakacitikila buyo kuzanga kwamu Edeni, Jehova wakaambilizya makanze aakwe aamwana naa “lunyungu,” ilwakali kuzyoonununa bantu kucibi. (Matalikilo 3:15) Kwiinda muziyubunuzyo zya Leza zitobelana, Jehova wakazyibya zyalani lyamukwasyi molwakali kuzoozwa lunyungu olu. Mukuya kwaciindi, iziyubunuzyo ezi zyakagaminina aali Josefa a Mariya, ibakatangene kukwatana ku Palestaini. Muciloto, Josefa wakaambilwa kuti Mariya wakalimisi kwiinda mumuuya uusalala. Imungelo wakati: “Uzootumbuka mwana mulombe ngozooulika izina lya-Jesu, nkaambo nguwe uuzoofutula bantu bakwe kuzwa kuzibi zyabo.”—Matayo 1:20, 21.

11. (a) Ino Jehova wakacita bubambe buli buti kutegwa Mwanaakwe azikuzyalwe kali muntunsi uulondokede? (b) Nkaambo nzi Jesu ncaakali kukonzya kupa ‘cinunuzyo ceelene’?

¹¹ Oku tiikwakali kumita kwabuyo-buyo, nkaambo Jesu wakali kupona kale kujulu katanaba muntunsi. (Tusimpi 8:22-31; Ba-Kolose 1:15) Ibuumi bwakwe bwakalonzegwa munguzu zya Jehova zyamaleele kuya mwida lya Mariya, calo cakacitya kuti kukonzeke kuti Mwanaa Leza oyu uuyandwa azyalwe kali muntunsi. (Johane 1:1-3, 14; Ba-Filipi 2:6, 7) Jehova wakazyeendelezya zintu cakuti Jesu wakazyalwa katasofwaazidwe acibi ca Adamu. Mukwiimpana, Jesu wakazyalwa kalondokede. Aboobo, wakali cijisi Adamu ncaakalobesezye—ibuumi bwabuntunsi ibulondokede. Kumamanino, wakajanika muntu wakali kukonzya kulunga ciyandika akaambo kacibi! Alimwi eco ncencico ncaakacita Jesu mu Nisani 14, 33 C.E. Mubuzuba obo bupati, Jesu wakalisungula kuti ajaigwe abasikumukazya, aboobo wakapa ‘icinunuzyo ceelene.’—1 Timoteo 2:6.

Impindu Yabuumi Bwabuntunsi Bulondokede

12. (a) Amupandulule kwiimpana kupati kuli akati kalufwu lwa Jesu alimwi alufwu lwa Adamu. (b) Ino Jesu waba buti ‘Taata Uuteeli’ kubantunsi bamvwa?

¹² Kuli kwiimpana akati kalufwu lwa Jesu aloolo lwa Adamu—ikwiimpana ikutondezya mpindu yacinunuzyo. Lufwu lwa Adamu lwakaleelede, nkaambo acaali wakayanda kutamvwida Mulengi wakwe. (Matalikilo 2:16, 17) Mukwiimpana, lufwu lwa Jesu munzila zyoonse tiilwakeelede pe, mbwaanga “teewakacita zibi, pe.” (1 Petro 2:22) Aboobo Jesu naakafwa, wakajisi cintu cimwi cakajisi mpindu kapati calo sikubisya Adamu ncaatakajisi ciindi naakafwa—inguzu zyakulondola buumi bwabantunsi. Aboobo, lufwu lwa Jesu lwakajisi mpindu yacituuzyo. Naakapilukila kujulu kali muntu wamuuya, wakaakupa muulo wacituuzyo cakwe kuli Jehova. (Ba-Hebrayo 9:24) Kwiinda mukucita boobo, Jesu wakaula bantu basizibi alimwi wakaba ngo Wisi wabo mupya, iwakanjila mubusena bwa Adamu. (1 Ba-Korinto 15:45) Aboobo cakweelela, Jesu wiitwa kuti ngu ‘Taata Uuteeli.’ (Isaya 9:6) Amuyeeye ncocaamba eci! Adamu, muzyali sizibi wakamwaya lufwu kuluzubo lwakwe loonse. Jesu, Taata uulondokede ubelesya mpindu yacituuzyo cakwe kuti ape buumi butamani kubantunsi ibamvwa.

13. (a) Amupe cikozyanyo citondezya mbwaakacibbadelela cikwelete Jesu icakaletwaa Adamu. (b) Nkaambo nzi cituuzyo ca Jesu ncocitamanizyi cibi cabazyali besu bakusaanguna?

¹³ Pele ino mbuti lufwu lwamuntu omwe buyo mbolunga lwamanizya zibi zyabantu banji? (Matayo 20:28) Mucibalo cimwi myaka iili mbwiibede yainda twakapa citondezyo cacinunuzyo munzila eyi: “Amweezeezye fakitali iijisi babelesi babalilwa kumyaanda iili mbwiibede. Mweendelezi wafakitali eyo uutasyomeki wabba mali oonse aamakwebo aayo; ifakitali eyo yajalwa. Imyaanda-myaanda yabantu ono babula mulimo alimwi tabakonzyi kubbadelela zikwelete zyabo. Beenzinyina bamulukwatano, ibana alimwi abasikubakweletesya boonse bapenga akaambo kabumpelenge bwamuntu ulya omwe buyo! Mpoonya kwasika sikubukulusya muvwubi kapati iwabbadela cikwelete cakkampani eyo akujula fakitali eyo alimwi. Ikumanizigwa kwacikwelete eco comwe kwabakkazika moyo ibabelesi, imikwasyi yabo alimwi abasikukweletesya mali. Pele sena mweendelezi wamulimo wakusaanguna inga wabaajanza na mubuvwubi bwakkampani mpya? Peepe, uli muntolongo elyo mulimo wamanina limwi kulinguwe! Mbubwena buyo, ikubbadelwa kwacikwelete comwe ca Adamu kwaleta zilongezyo kutuulunzuma twabana bakwe—pele kutali kuli Adamu.”

14, 15. Nkaambo nzi ba Adamu a Eva ncobanga bategwa mbaasikubisyaa caali, alimwi mbuti ciimo cesu mbociindene acabo?

¹⁴ Eci cililuleme. Amuyeeye kuti, Adamu a Eva bakabisya acaali. Bakalisalila buya kutamvwida Leza. Mukwiimpana, swebo tulazyalwa katujisi cibi. Tatukonzyi kulisalila. Nokuba kuti twasoleka buti, kwiina cakumaninina notunga twakweeleba kubisya. (1 Johane 1:8) Zimwi ziindi tulakonzya kulimvwa mbuli Paulo iwakalemba kuti: “Ciindi ncinjanda kucita kabotu, nceciindi nciconya ncetuli aco cibi. Nkaambo ndakondelwa Mulao wa-Leza mukati kamoyo wangu, pele ndabona mulao umbi muzizo zyangu, uulwisya mulao wamoyo wangu, nkabela ndaba mwaange wamulao wazibi uuli muzizo zyangu. Maawe! ndi muntu uusampaukide ncobeni!”—Ba-Roma 7:21-24.

¹⁵ Pele, akaambo kacinunuzyo, tulijisi bulangizi! Jesu ngolunyungu mwalo mbubwena Leza mbwaakasyomezya, “zisi zyoonse zyaansi moziyoojana coolwe.” (Matalikilo 22:18; Ba-Roma 8:20) Cituuzyo ca Jesu cijula mulyango kuzyoolwe zitaliboteli kuli baabo ibasyoma mulinguwe. Atuzilange-lange zimwi zyazeezi.

Ikugwasigwaa Cinunuzyo ca Kristo

16. Nokuba kuti tuli muciimo eci cacibi, nzintu nzi nzyotukonzya kukkomanaazyo ono akaambo kacinunuzyo ca Jesu?

¹⁶ Sikulemba Bbaibbele Jakobo ulazumina kuti “toonse tulalubya muziyanza zinji.” (Jakobo 3:2) Pele akaambo kacinunuzyo ca Kristo, ikulubizya kwesu kulakonzya kulekelelwa. Johane wakalemba kuti: “Na muntu [w]abisya, tulijisi sikutwaambilila kuli-Taata, ngu-Jesu Kristo mululami. Walo ngomulungo wazibi zyesu.” (1 Johane 2:1, 2) Aino, tatweelede kunoocita cibi acaali. (Juda 4; amweezyanisye 1 Ba-Korinto 9:27.) Pele naa twalubizya, tulakonzya kumwaambila Jehova camoyo woonse, katusyomede kuti “ulafwamba kujatila.” (Intembauzyo 86:5; 130:3, 4; Isaya 1:18; 55:7; Incito 3:19) Aboobo cinunuzyo citugwasya kuti tubelekele Leza katujisi manjezeezya aasalala alimwi cicitya kuti twaanguluke kumusikila mumupailo kwiinda muzina lya Jesu Kristo.—Johane 14:13, 14; Ba-Hebrayo 9:14.

17. Akaambo kacinunuzyo, nzilongezyo nzi zyakumbele izikonzyeka?

¹⁷ Cinunuzyo ca Kristo cijula mulyango wakuti makanze aa Leza azuzikizigwe—aakuti bantunsi ibamvwa bakakkale kukabe kutamani mu Paradaiso aanyika. (Intembauzyo 37:29) Paulo wakalemba kuti: “Zisyomezyo zya-Leza zyoonse zili buti, ijwi lya-Ee lyakuzizuzya mulili mulinguwe [Jesu].” (2 Ba-Korinto 1:20) Masimpe, lufwu “lwakaba abwami.” (Ba-Roma 5:17) Icinunuzyo mpaayeeme cinga cakulwaizya Leza kumunyonyweeda limwi oyu “sinkondonyina musyaalizi.” (1 Ba-Korinto 15:26; Ciyubunuzyo 21:4) Cinunuzyo ca Jesu cilakonzya kubagwasya abaabo ibafwide. Jesu wakati: “Ciindi ciyoosika ncobati kamvwe ijwi lyakwe [Jesu] boonse abali muzyuumbwe, bayoozwa mpoonya.”—Johane 5:28, 29; 1 Ba-Korinto 15:20-22.

18. Ncintu nzi cibyaabi kapati icaletwaa cibi kubantunsi, alimwi mbuti eci mbociyoomanisyigwa munyika ya Leza impya?

¹⁸ Amweezeezye mbokunookkomanisya kapati kubaa buumi bwakaanzidwe kuti katuli aambubo—ibuumi bwakubula zilibilisyo mbuli zeezyo izitupenzya cini-cini mazubaano! Cibi catwaandaanya ikutali buyo kuli Leza pele alimwi akumizeezo, moyo alimwi amubili wesu tobeni. Pele, Bbaibbele lisyomezya kuti munyika ya Leza impya, “takukooyooba naba omwe akati kabantu banyika uuamba kuti, Ndaciswa.” Inzya, imalwazi aakumubili aamumizeezo taacinoobapenzyi bantu pe. Nkaambo nzi? Isaya wiingula kuti: “Bantu boonse bakede mulinjiyo bayoolekelelwa milandu yabo.”—Isaya 33:24.

Cinunuzyo—Inzila Yakutondezya Luyando

19. Mbuti umwi aumwi wandiswe mbwaelede kulimvwa kujatikizya cinunuzyo ca Kristo?

¹⁹ Luyando ndolwakakulwaizya Jehova kuti atume Mwanaakwe uuyandwa. (Ba-Roma 5:8; 1 Johane 4:9) Alimwi luyando ndulonya ndolwakakulwaizya Jesu ‘kumvwida bantu boonse lufwu.’ (Ba-Hebrayo 2:9; Johane 15:13) Cileelela kuti Paulo wakalemba kuti: “Kuyanda Kristo nkokutusinikizya . . . Wakabafwida boonse kuti abo bapona bataciliponen[i] beni pele baponene oyo iwakabafwida akubuka.” (2 Ba-Korinto 5:14, 15) Ikuti naa tulalumba kujatikizya ncaakatucitila Jesu, tuyooswiilila. Kayi atwaambe kuti, cinunuzyo cicitya kuti tukonzye kuvwunwa kulufwu! Masimpe kwiina notunga twayanda kusampaula cituuzyo ca Jesu kwiinda mumicito yesu.—Ba-Hebrayo 10:29.

20. Ninzila nzi zimwi motutobela “ijwi” lya Jesu?

²⁰ Ino mbuti mbotunga twatondezya kulumba camoyo woonse kujatikizya cinunuzyo? Kakusyeede buyo ciindi cisyoonto kuti aangwe, Jesu wakati: “Na muntu ulandiyanda unoobamba ijwi lyangu.” (Johane 14:23) “Ijwi” lya Jesu libikkilizya malailile aakwe aakuti tube bankutwe kutola lubazu mukuzuzikizya mulimo ngwaakati: “Kamuya mukabaiisye bantu bamisyobo yoonse, akubabapatizya.” (Matayo 28:19) Alimwi ikumvwida Jesu ciyandika kuti tutondezye luyando kubakwesu bakumuuya.—Johane 13:34, 35.

21. Nkaambo nzi ncotweelede kuyoojanika kukusekelela Ciibalusyo mu April 1?

²¹ Inzila yomwe akati kanzila zibotu kapati mbotunga twatondezya kulumba kwesu kujatikizya cinunuzyo nkwiinda mukujanika aa Ciibalusyo calufwu lwa Kristo, calo kono iciyoocitwa mu April 1.a Acalo eci ncimwi ca “ijwi” lya Jesu, nkaambo iciindi naakacitalisya, Jesu wakalailila basikumutobela kuti: “Amukacite obo kuti mukandiyeeye.” (Luka 22:19) Kwiinda mukujanika kukusekelela ooku kupati kapati alimwi akwiinda mukuteelelesya kuli zyoonse Kristo nzyaakalailila, tuyootondezya lusyomo lwesu luyumu lwakuti cinunuzyo ca Jesu nenzila mwafwutwida bantu Leza. Masimpe, “takukwe lufutuko kuluumbi naba omwe pe.”—Incito 4:12.

Bupanduluzi buyungizidwe

Sena Mulayeeya?

◻ Nkaambo nzi bantunsi ncobatakonzyi kumanizya ciimo cabo cabusizibi kwiinda muzituuzyo?

◻ Munzila nzi Jesu mmwali ‘cinunuzyo ceelene’?

◻ Mbuti Jesu mbwaakabelesya nguzu zyakwe zyakulondola buumi bwabantunsi kububotu bwesu?

◻ Nzilongezyo nzi zijanwaa bantu akaambo kacinunuzyo ca Kristo?

[Cifwanikiso icili apeeji 9]

Alikke muntu uulondokede—iweelene a Adamu—ngowakali kukonzya kweelanisya ceeleko cabululami

[Cifwanikiso icili apeeji 10]

Mbwaanga Jesu wakalijisi nguzu zyakulondola buumi bwabuntunsi, lufwu lwakwe lwakali aampindu yacituuzyo