Amulibambe Kabotu Kunjiisyo Nzyomuyiisya

“Ulibambe kabotu lwako anjiisyo nzyoiisya. Koujisi utaleki pe, nkaambo wacita oobo, inga ulalifutula omwini, abaabo bakuswiilila.”—1 TIMOTI 4:16, Ci.

1, 2. Nkaambo nzi bamayi basungu ncobayandika kapati sunu?

“KAMUYA mukabaiisye bantu bamisyobo yoonse, . . . amubaiisye kuti bajatisye makani oonse ngendakamulailila.” (Matayo 28:19, 20) Akaambo kamalailile aa Jesu Kristo aya, Banakristo boonse beelede kusoleka kuba bamayi. Bamayi basungu balayandika kuti bagwasye babombe myoyo kujana luzibo lwa Leza ciindi nocitanamana. (Ba-Roma 13:11) Imwaapostolo Paulo wakakulwaizya kuti: ‘Kambauka Makani lyoonse. Koajatisya muciindi ceelede aciteelede.’ (2 Timoteo 4:2) Eci cilayandika mukuyiisya kwamukati akunze kwambungano. Ee, imulimo wakukambauka nzinji nzyoubikkilizya kunze lyakwaambilizya buyo mulumbe wa Leza. Ikuyiisya kubotu kulayandika ikutegwa basiluyandisisyo babe basikwiiya.

² Tukkede “[ku]ziindi zikataazya.” (2 Timoteo 3:1) Bantu basweeka aakaambo kamakani aabuhaabusongo alimwi anjiisyo zyakubeja. Ibanji “balisizidwe mumiyeeyo yabo” alimwi “baba zitiliba.” (Ba-Efeso 4:18, 19) Bamwi balapenga amizeezo. Inzya, ncobeni bantu ‘balikatede akumwaika mbuli imbelele zitakwe mweembezi.’ (Matayo 9:36) Nokuba boobo, kwiinda mukuyiisya amoyo mubombe, tulakonzya kugwasya babombe myoyo ikucinca nkobeelede.

Bamayi Mumbungano

3. (a) Ncinzi ncoubikkilizya mulimo wa Jesu wakuyiisya? (b) Mbaani ibajisi mukuli mupati wakuyiisya mumbungano?

³ Kwiinda mububambe bwaciiyo ca Bbaibbele caaŋanda, ituulunzuma twabantu bali mukuyiisigwa. Pele bamana kubbapatizigwa, ibapya inga baciyandika lugwasyo lumbi ikutegwa ‘bazyate akubombomana muluyandisyo.’ (Ba-Efeso 3:17) Mbotucitila mulimo Jesu ngwaakapa uulembedwe kuli Matayo 28:19, 20 akugamika bantu bapya kumbunga ya Jehova, balagwasigwa kwiinda mukuyiisigwa mumbungano mwini. Kweelana abwaamba bbuku lya Ba-Efeso 4:11-13, kuli baalumi ibabikkidwe kuti babeleke kabali “beembeli nanka baiyi, kuti basitikizye bazumini, akoonda milimo ya-Leza, akuyaka mubili wa-Kristo.” Zimwi ziindi, ikuyiisya nkobacita amoyo mubombe kujatikizya ‘kubazula, kubacenjezya, kubayumya-yumya akubayiisya amoyo uubombede.’ (1 Timoti 4:2) Imulimo wabamayi wakali kuyandika kapati cakuti, Paulo naakalembela bana Korinto, wakalemba bamayi mbwaakamanina buyo kulemba baapostolo abasinsimi mumulongo.—1 Ba-Korinto 12:28.

4. Ino kucizyiba kuyiisya kutugwasya buti kutobela lulayo lwa Paulo ku Ba-Hebrayo 10:24, 25?

⁴ Mmasimpe, tabali Banakristo boonse ibabeleka kabali baalu naa balangizi. Nokuba boobo, boonse bakulwaizigwa kuyumizyanya “mukuyandana akucita milimo mibotu.” (Ba-Hebrayo 10:24, 25) Ikucita ceeci ciindi camiswaangano kujatikizya kulibambila kabotu, akuvwiila kamwaamba twaambo tuyaka alimwi itukulwaizya. Basikumwaya ba Bwami ibasimide abalo balakonzya ‘kukulwaizya bamwi kucita milimo mibotu’ kwiinda mukulwiida bapya twaambo tumwi twaluzibo ndobajisi alimwi azimwi zyakabacitikila nobabelekaa mbabo mumulimo wamumuunda. Amiswaangano ili boobo alimwi amuziindi zyakwiizya, imalailile aagwasya alakonzya kupegwa. Mucikozyanyo, bamakaintu ibasimide bakulwaizigwa kuba “bafundisi babululami.”—Tito 2:3.

Kuzuminisya

5, 6. (a) Ino Bunakristo bwini-bwini bwiindene buti abwakubeja? (b) Mbuti baalu mbobagwasya bapya kulisalila camaanu?

⁵ Aboobo Bunakristo bwini-bwini buliimpene kapati azikombelo zyakubeja, zyalo izinji iziyandisisya kweendelezya kuyeeya kwabasicikombelo bazyo. Jesu naakali anyika, basololi bacikombelo bakasola kweendelezya bukkale bwabantu boonse kwiinda muziyanza zyakulipungila izidyaaminina. (Luka 11:46) Kanjikanji basololi ba Kristendomu abalo balacita obo.

⁶ Pele ibukombi bwakasimpe ‘mmulimo muyandisi’ ngotucita kweelanaa “bukombe bw[esu] bwakumoyo.” (Ba-Roma 12:1) Babelesi ba Jehova ‘balazuminisya.’ (2 Timoteo 3:14) Zimwi ziindi, aabo basololela inga bayandika kupa malailile anzila zimwi ikutegwa zintu zyeende kabotu mumbungano. Pele muciindi cakuyanda kuti kababasalila zyakucita Banakristonyina, ibaalu babayiisya “kusala cibotu ecibi.” (Ba-Heberayo 5:14) Eci baalu balacicita ikapati kwiinda mukugwasya mbungano ‘amajwi aabuzumino aalwiisyo lubotu.’—1 Timoteo 4:6.

Ikulibamba Kunjiisyo Nzyomuyiisya

7, 8. (a) Ino bantu ibatasumpukide bakonzya buti kubeleka kabali bamayi? (b) Ncinzi citondezya kuti muntu amuntu weelede kusolekesya kutegwa abe mwiiyi uuzwidilila?

⁷ Atupilukile kumulimo ngotupedwe wakuyiisya. Sena kuyandika kuti katuli bahaazibwene mumilimo imwi, katuyiide naa kucizyiba kabotu kucita zintu zimwi kutegwa tutole lubazu mumulimo oyu? Peepe. Icibeela cipati camulimo oyu wakuyiisya wanyika yoonse cili mukucitwaa bantu buyo ibatasumpukide. (1 Ba-Korinto 1:26-29) Paulo wakapandulula kuti: “Cintu eci ciyandisi [mulimo] tulicijisi munongo zyabulongo [mibili iitalondokede], kukutondezya kuti ezi inguzu zigambya zilazwa kuli-Leza, tazizwi kulindiswe tubeni pe.” (2 Ba-Korinto 4:7) Ikuzwidilila kupati kwacitwa mumulimo wakukambauka Bwami nyika yoonse mbwiizulwa mbumboni bwanguzu zyamuuya wa Jehova!

⁸ Nokuba boobo, umwi aumwi uyandika kusolekesya kutegwa abe “simulimo uutakwe cintu cimuusya insoni, uupandulula makani aalusinizyo mbukweelede.” (2 Timoteo 2:15) Paulo wakakulwaizya Timoteo kuti: “Ulibambe kabotu lwako anjiisyo nzyoiisya. Koujisi utaleki pe, nkaambo wacita oobo, inga ulalifutula omwini, abaabo bakuswiilila.” (1 Timoti 4:16, Ci) Ino mbuti umwi mbwanga walibamba kunjiisyo nzyaiisya, mumbungano naa kunze kwambungano? Sena kucita boobo kuyandika kupeta nzila zimwi zyakuyiisya?

9. Ncinzi ciyandika kapati kwiinda zintu nzyotukonzya kucita zyakuzyalwaazyo?

⁹ Jesu wakatondezya inzila zyakuyiisya zigambya nzyaakabelesya mu Mulumbe wakwe uudumide waa Cilundu. Naakamanizya kukanana, “makamu aabantu akakankamana kukwiisya kwakwe.” (Matayo 7:28) Aino kwiina wandiswe uunga wayiisya kabotu mbuli bwakayiisya Jesu. Pele tatuyandiki kuba bantu bacizyi kabotu kukanana kutegwa tube bamayi bacizyi kuyiisya. Kayi kweelana a Jobu 12:7, ‘ibanyama’ alimwi ‘abayuni’ balaiisya cakaumuumu! Kunze lya zintu nzyotukonzya kucita nzyotwakalengwaazyo icintu ciyandika kapati nkulanga-langa ‘musyobo wabantu ngotubede’—ibube mbotujisi alimwi aziyanza zyakumuuya nzyotwabaazyo zyalo basikwiiya Bbaibbele nzyobanga baiya.—2 Petro 3:11; Luka 6:40.

Basikwiiya ba Jwi lya Leza

10. Mbuti Jesu mbwaakaba citondezyo cibotu cakuba sikwiiya wa Jwi lya Leza?

¹⁰ Imwiiyi uucizyi kuyiisya kasimpe kamu Magwalo weelede kuba sikwiiya wa Jwi lya Leza. (Ba-Roma 2:21) Mumakani aaya Jesu Kristo wakatondezya cikozyanyo cibotu kapati. Mumulimo wakwe, Jesu wakatondezya naa kwaamba mizeezo yakali kweendelanaa zibalo zisika kucisela camabbuku aa Magwalo aa Cihebrayo.a Iluzibo ndwaakajisi lwa Jwi lya Leza lwakalibonya naakali aamyaka yakuzyalwa iili 12, naakajanwa “ulikede akati kabaiyi, ulabaswiilila akubabuzya.” (Luka 2:46) Naakakomena, cakali cilengwa ca Jesu ikuunka kucikombelo, kwalo Jwi lya Leza nkolyakali kubalwa.—Luka 4:16.

11. Nziyanza nzi zibotu zyakubala nzyayelede kubaazyo mwiiyi?

¹¹ Sena muli basikubala ba Jwi lya Leza basungu? Ikulibala cabusungu, nenzila mbomunga ‘mwamvwa kuyoowa Jehova, ambomunga mwajana luzibo lwa Leza.’ (Tusimpi 2:4, 5) Aboobo amube aaziyanza zibotu zyakubala. Amusole kubala cibeela ca Jwi lya Leza abuzuba. (Intembauzyo 1:2) Acibe cilengwa canu kubala magazini imwi aimwi ya Ngazi Yamulindizi alimwi a Awake! mboyatambwidwa buyo. Amubikkile maanu kapati nomuli kumiswaangano yambungano. Amwiiye mbokuvwuntauzigwa kabotu-kabotu. Kwiinda mukwiiya ‘kuzitobela akuzizibisisya zintu zyoonse,’ mulakonzya kweeleba kwaamba cakwiindizya alimwi akulubizya nomuyiisya.—Luka 1:3, Ci.

Luyando Abulemu Kuli Baabo Ibayiisigwa

12. Ino Jesu wakali kubalanga buti basikwiiya bakwe?

¹² Abumbi bube buyandika nkubalanga munzila yeelede aabo mbomuyiisya. Ba Farisi bakabanyansya aabo ibakali kuswiilila Jesu. Bakati: “Nkamu eyi iitezi mulao iloombwezegwa.” (Johane 7:49) Pele Jesu wakali kubayanda kapati alimwi wakabalemeka basikwiiya bakwe. Wakati: “Nsicimwaambi limbi kuti muli bazike, nkaambo muzike tezi ncacita simalelaakwe, anu ndamwaamba kuti muli beenzuma, nkaambo zintu zyoonse nzendakamvwa kuli-Taata, ndamuzibya nzizyo.” (Johane 15:15) Eci cakatondezya mbuli mbobeelede kuucita mulimo wabo wakuyiisya basikwiiya ba Jesu.

13. Ino Paulo wakalimvwa buti kujatikizya baabo mbaakayiisya?

¹³ Mucikozyanyo, Paulo kwiina naakali kuyanzanaa bantu mbaakali kuyiisya kakunyina kubasangaalizya. Bana Korinto wakabaambila kuti: “Cilakonzeka kuti mube abamayi banji-banji mubuumi bwanu bwa Bukilisito, pele kutali bamauso banji pe. Kayi ndakaba uso muli Kilisito Jesu kwiindila mukumukambaukila Makani Mabotu.” (1 Bakolinti 4:15, Ci) Zimwi ziindi Paulo mane wakali kulila naakali kulaya baabo mbaakali kuyiisya! (Incito 20:31) Alimwi wakali kukkazika moyo kapati alimwi wakali siluzyalo. Aboobo wakali kukonzya kwaambila bana Tesalonika kuti: “Twakaba batete myoyo akati kanu, mbuli uunyonsya mbwabukata bana bakwe mwini.”—1 Ba-Tesalonika 2:7.

14. Nkaambo nzi kubikkila maanu kubukkale bwabantu mbotuyiisya Bbaibbele ncokuyandika kapati? Amupe cikozyanyo.

¹⁴ Sena mulamwiiya Jesu alimwi a Paulo? Luyando lwini-lwini kujatikizya basikwiiya lulakonzya kuvwumbilila kulela kuli koonse nkotunga katujisi mukucita zintu zimwi. Sena bantu mbotuyiisya Bbaibbele balazyiba kuti tulababikkila maanu kapati? Sena tulajana ciindi cakubazyiba kabotu? Imukaintu umwi Munakristo naakakatazyigwa kugwasya sikwiiya umwi kuyaambele munzila yakumuuya, calubomba wakabuzya kuti: “Sena kuli ncoyeeya icikulibilisya?” Imukaintu oyo sikwiiya wakatalika kukanana zyoonse zyakali kumoyo, wakaluula zintu zinjaanji zyakali kumulibilisya. Imubandi ooyo waluyando ngowakacita kuti mukaintu oyo asanduke mubukkale. Mumakani aali boobo twaambo twamu Magwalo alimwi amajwi aakuumbulizya akukulwaizya aleelela. (Ba-Roma 15:4) Pele ikucenjezya nkwakuti: Sikwiiya Bbaibbele ulakonzya kaya kumbele muluzibo cakufwambaana pele inga kacijisi nzila zimwi zitali zya Bunakristo nzyayelede kuleka kucita. Aboobo inga tacikooba camaanu ikuzyibilana loko amuntu oyo. Kweelede kutobela migaano yeelede ya Bunakristo.—1 Ba-Korinto 15:33.

15. Ino inga twatondezya buti bulemu kuli baabo mbotuyiisya Bbaibbele?

¹⁵ Ikulemeka bantu mbotuyiisya kubikkilizya kuti tuteendelezyi bukkale bwabo. (1 Ba-Tesalonika 4:11) Mucikozyanyo, tulakonzya katwiiyaa mukaintu uukkalaa mwaalumi ngobatakwetene limwi. Ambweni balijisi abana. Mbwaanga wazyiba luzibo lwini-lwini lwa Leza, imukaintu inga wayanda kutobela zyeelelo zya Jehova. (Ba-Hebrayo 13:4) Sena weelede kukwatwa kumwaalumi oyo naa kwaandaana anguwe? Ambweni inga twalimvwa kuti ikukwatwa kumwaalumi uunyina luyandisisyo naa uujisi buyo luzibo lusyoonto muzintu zyakumuuya inga kwasinkila kuyaambele kwamukaintu. Kulubazu lumwi, tulakonzya kubikkila maanu kubukkale bwabana bakwe akuyeeya kuti inga cainda kubota kukwatwa buyo kulinguwe. Mumakani aaya oonse, nkubula bulemu alimwi nkubula luyando ikunjila mubukkale bwasikwiiya akusola kusinikizya mizeezo yesu mumakani aali boobu. Kayi walo nguuyoocitikilwa zintu zili zyoonse zyakusala ooko. Aboobo, sena inga tacikooinda kubota na ikuyiisya sikwiiya uuli boobo kubelesya “miyeeyo” yakwe akulisalila mwini ncayelede kucita?—Ba-Hebrayo 5:14.

16. Mbuti baalu mbobanga batondezya luyando abulemu kubutanga bwa Leza?

¹⁶ Cilayandika kapati kuti baalu mumbungano beendelezye butanga caluyando acabulemu. Kalembela Filimona, Paulo wakati: “Ndakonzya kukulailila cabukozu kucita cintu ciluzi [muli Kristo], nekubaboobo wence ndakukombelela buyo caluyando.” (Filimona 8, 9) Zimwi ziindi, izintu zityompya zilakonzya kucitika mumbungano. Mane kusinizya kulakonzya kuyandika. Paulo wakakulwaizya Tito ulaamba “ubatapatile canguzu [basikulubizya], kuti bakale kabotu mulusyomo.” (Tito 1:13) Nokuba boobo, balangizi beelede kucenjela kapati ikutakanana calunya kumbungano. Paulo wakalemba kuti: “Muna-Mwami teelede kulwana pe, uleelede kuba mutete-moyo kubantu boonse, uulibambilide kufundisya, akubosya moyo.”—2 Timoteo 2:24; Intembauzyo 141:3.

17. Nkulubizya nzi Musa nkwaakacita, alimwi ncinzi baalu ncobanga baiya kulincico?

¹⁷ Lyoonse balangizi beelede kunooliyeezya kuti beendelezya “butanga bwa-Leza.” (1 Petro 5:2) Nokuba kuti Musa wakali mubombe moyo, kwaciindi cisyoonto wakacisowela ambali ciimo eci. Bana Israyeli “bakakalazya moyo wakwe, lino wakaamba majwi aabubi.” (Intembauzyo 106:33) Leza wakabijilwa kapati akaambo kakuti butanga bwakwe tiibwakeendelezyegwa kabotu, nokuba kuti bakalibisizye. (Myeelwe 20:2-12) Nobayanaa buyumuyumu buli boobu sunu, baalu beelede kusoleka kuyiisya alimwi akulailila cabusongo aluyando. Ibakwesu balafwambaana kutobela nobeendelezyegwa munzila iiluzi alimwi mbuli bantu ibayandika lugwasyo, ikutali mbuli bantu ibatacikonzyeki kugwasya. Baalu beelede kuzilanga munzila iiluzi zintu mbuli mbwaakacita Paulo naakaamba kuti: “Tulasyoma ndinywe mu-Mwami, tulasyoma kuti mulacita akunooya bucita nzotwamulailila.”—2 Ba-Tesalonika 3:4.

Kubikkila Maanu Kuzintu Nzyobayandika

18, 19. (a) Mbuti mbotweelede kweendelezya ziyandika basikwiiya Bbaibbele ibalezya muzintu zimwi? (b) Mbuti mbotunga twagwasya basikwiiya ibajisi penzi mumakani amwi?

¹⁸ Imwiiyi mubotu ulalisungula kucinca-cinca kweelana azintu nzyobakonzya kucita basikwiiya bakwe alimwi azeezyo nzyobaalilwa. (Amweezyanisye Johane 16:12.) Mucikozyanyo ca Jesu camatelenta, mwami wakapa mikuli kuli “umwi aumwi . . . mbuli inguzu zyakwe.” (Matayo 25:15) Tulakonzya kutobela cilengwa cikozyenye aceeco notucitya ziiyo zya Bbaibbele. Ncilengwa buya ikuyandisisya kumanizya bbuku libandika makani aamu Bbaibbele muciindi cisyoonto buyo. Pele tweelede kuzyiba kuti, tabali boonse ibacizyi kabotu kubala naa ibakonzya kumvwisya twaambo tupya cakufwambaana. Aboobo, kuyandika bupampu kuti tuzyibe notweelede kuzumanana kuzwa kukaambo kamwi kuya kuli kambi muciiyo kuti naa ibantu mbotuyiisya bajisi penzi kutobelezya kabotu akaambo kakuti tulimukufwambaana. Iciyandika kapati kwiinda kumanizya buyo cibalo cakufwambaana nkugwasya basikwiiya ikumvwisya ncobali mukwiiya.—Matayo 13:51.

¹⁹ Ncimwi buyo abasikwiiya ibajisi penzi kujatikizya makani amwi, mbuli Leza Wabutatu naa imazuba aakulyookezya aatobelwaa zikombelo. Nokuba kuti talili lyoonse nokuyandika kwaamba makani aabuvwuntauzyi bumwi bwa Bbaibbele notwiiya, muziindi tulakonzya kucita obo ikuti naa eci inga cagwasya. Tweelede kubelesya bupampu kutegwa tutasinkili kuyaambele kwasikwiiya.

Amube Basungu!

20. Mbuti Paulo mbwaakaba cikozyanyo cibotu mukutondezya busungu alusinizyo mukuyiisya kwakwe?

²⁰ Paulo waamba kuti: “Myoyo yanu [a]ipye.” (Ba-Roma 12:11) Ee, cibe ciindi notucitya ciiyo ca Bbaibbele caaŋanda naa notujisi makani amwi aakubandika kumuswaangano wambungano, atucite obo cabusungu. Paulo wakaambila bana Tesalonika kuti: “Makani Mabotu ngitukambauka naakasika kulindinywe, teeakasika amajwi alike pe, akeza anguzu a-Muuya Uusalala akulamwa kunji kwamumoyo.” (1 Ba-Tesalonika 1:5) Aboobo Paulo abeenzinyina bakaamba ncobakali kuyanda “kaciteensi Makani aa-Leza luzutu pele amyoyo [yabo beni].”—1 Ba-Tesalonika 2:8.

21. Mbuti mbotunga twazumanana kuba basungu kujatikizya mikuli yesu yakuyiisya?

²¹ Ibusungu bwini-bwini buzwa kulusyomo lwini-lwini lwakuti basikwiiya Bbaibbele besu beelede kumvwa nzyotweelede kubaambila. Tutaboni mukuli wakuyiisya uuli woonse kuba cilengwa buyo. Mumakani aaya imulembi Ezara cakutadooneka wakalibamba kabotu kunjiisyo nzyaakayiisya. “Wakapangika moyo wakwe kukuyandaula mulao wa-Jehova, akuucita, akukwiisya ba-Israyeli milazyo ambeta.” (Ezara 7:10) Mbotweelede kucita aswebo mbubonya obo kwiinda mukulibambila kabotu-kabotu alimwi akuyeeyesya mbwaayandika makani aayo. Atupaile kuli Jehova kuti atuvuzizye lusyomo alusinizyo. (Luka 17:5) Ibusungu bwesu bulakonzya kugwasya basikwiiya Bbaibbele ikubaa luyandisisyo lwini-lwini lwakasimpe. Aino, ikulibamba kabotu kunjiisyo nzyotuyiisya kulakonzya kubikkilizya kubelesya nzila zimwi zyakuyiisya. Icibalo cesu citobela cilazibandika zimwi zyazeezi.

Bupanduluzi buyungizidwe

Sena Mulayeeya?

◻ Nkaambo nzi bamayi bacizyi kuyiisya Banakristo ncobayandika sunu?

◻ Nziyanza nzi zibotu zyakubala nzyotukonzya kubaazyo?

◻ Nkaambo nzi luyando abulemu kuli baabo mbotuyiisya ncoziyandika kapati?

◻ Mbuti mbotunga twalanganya zintu nzyobayandika bantu aabo mbotuyiisya Bbaibbele?

◻ Nkaambo nzi busungu alimwi alusinizyo ncoziyandika kapati notuyiisya bamwi?

[Cifwanikiso icili apeeji 8]

Bamayi babotu mbaasikwiiya ba Jwi lya Leza

[Cifwanikiso icili apeeji 11]

Amubikkile maanu mubukkale bwabasikwiiya Bbaibbele