Nguni Uuyendelezya Kuyeeya Kwanu?
“KWIINA pe weelede kundaambila cakuyeeya! Alimwi kwiina muntu weelede kundaambila cakucita!” Ikukanana boobo cakusinizya kanjikanji kwaamba kuti mulalisyoma kapati nobeni alimwi akusyoma kuyeeya kwanu. Sena mbomulimvwa obo? Masimpe, kwiina muntu umbi weelede kumusalila zintu zyakucita. Pele sena ncamaanu ikufwambaana kuyumbila ambali imakani aalibonya kuti inga lwaba lulayo lugwasya? Sena kwiina buya muntu umbi uunga wamugwasya kusala camaanu? Sena mucini-cini mulisinizizye kuti kwiina muntu uuli mukweendelezya kuyeeya kwanu, ambweni kamutazyi akuzyiba?
Mucikozyanyo, kaitanalwanwa inkondo yanyika yabili, mubelesi wa Hitler umwi iwakali kwaambilizya makanze aakwe, wazina lya Joseph Goebbels, wakatalika kweendelezya cibeela cacisi ca Germany ceendelezya zipekupeku. Nkaambo nzi? Nkaambo wakazyiba kuti eci cakali kunooba cibelesyo cizwidilila kapati “kukuyunga busyomi bwabantu akuyeeya kwabo.” (Propaganda and the German Cinema 1933-1945) Ambweni mulizi mbwaakaibelesya nzila eyi cakutyompya kubikkilizya anzila zimbi kuti ayunge bantu buyo—ibantu bali kabotu, banyina kaambo—kuti batobele busongo bwa Nazi cakutazyiba.
Ikasimpe nkakuti mbomuyeeya alimwi ambomucita zintu, lyoonse kweendelezyegwaa mbobalimvwa alimwi ambobalanga zintu aabo mbomuswiilila. Aino, eci taceelede kuba cintu cibyaabi. Ikuti aba kabali bantu ibabikkila maanu kubukkale bwanu—mbuli bamayi, balongwe naa bazyali—nkokuti muyoogwasigwa kapati kululayo amalailile aabo. Pele ikuti kabali baabo babikkila buyo maanu kuzintu zyabo alimwi kabali baabo ibasweesedwe naa kupilinganisigwa mukuyeeya kwabo, “[i]baamba majwi aabuyo aakweena,” mbubwena mbuli mwaapostolo Paulo mbwaakabapandulula, amucenjele!—Tito 1:10; Deuteronomo 13:6-8.
Aboobo, mutalilekelezyi akuyeeya kuti kwiina muntu uunga wamuyunga. (Amweezyanisye 1 Ba-Korinto 10:12.) Ambweni cili mukucitika kale—lyoonse-lyoonse kwiinda mbomunga mwazuminizya—ambweni kamutazyi akuzyiba. Amulange cikozyanyo cuuba-uba cijatikizya cintu ncomusala kuyooula nomuunka kumusika naa kucintoolo. Sena ooyo inga mmuzeezo wanu buya kumugama, ngomuliyeeyela nobeni? Naa sena kuli bantu bambi kanjikanji batalibonyi ibeendelezya kusala kwanu? Simubweza twaambo wazina lya Eric Clark uyeeya kuti nkobali. Waamba kuti: “Mbozivwulila zintu zyaambilizigwa, aswebo inga tatucikubikkili maanu kapati kwaambilizya oko, pele masimpe ngakuti tulajatikizigwa kapati.” Alimwi uluula kuti ibantu nobabuzigwa mbokwazwidilila kwaambilizya zintu, “ibanji balazumina kuti kulibelekede kapati, pele kutali kulimbabo.” Bantu lyoonse balimvwa kuti ibanabunji bayungwa, pele balo tabayungidwe pe. “Lwabo beni bayeeya kuti tabajatikizidwe pe.”—The Want Makers.
Sena Mwasyanikizigwa Mucikombole ca Saatani?
Naa kwaambilizya kulamuyunga buzubaa buzuba ambweni inga takukonzyi kuleta zintu zibyaabi. Pele kuli kuyunga kumbi ikujisi ntenda kapati. Ibbaibbele lyaamba kuti Saatani nguhaazibwene mukuyunga bantu. (Ciyubunuzyo 12:9) Ibusongo bwakwe bulikonzyenye akuyeeya kwamuntu umwi wiiminina nkamu yaambilizya iwakati kuli nzila zyobile zyakukulwaizya basikuula—“kwiinda mukubacenga naa kwiinda mukubasalila ncobeelede kucita.” Ikuti naa basikusambala bamwaya zyuuzigwa alimwi abasikwaambilizya kabakonzya kubelesya nzila zyabucenjezu zili boobu kuyunga kuyeeya kwanu, takulikomeneni kuyunga nkwanga wacita Saatani kabelesya nzila nzyoonya zyabucenjezu mbwaanga nguhaazibwene!—Johane 8:44.
Imwaapostolo Paulo wakalicizyi eci. Wakayoowa kuti bamwi akati ka Banakristonyina inga baleka kupakamana elyo inga bayungwa a Saatani. Elyo wakalemba kuti: “Ndayoowa kuti mbuli inzoka mbuyakalengawidwa Eva kubupyungi bwayo, inga myoyo yanu ilibisizidwe akuleka lukakatilo abusalazi kuli-Kristo.” (2 Ba-Korinto 11:3) Ikucenjezya oko amukubikkile maanu kapati. Buyo-buyo mulakonzya kuba mbuli bantu aabo ibasyoma kuti kwaambilizya akusalila bantu nzyobeelede kucita kulabeleka—“pele kutali kulimbabo.” Ikaambo kakuti kweena kwa Saatani kulabeleka kalibonya kabotu-kabotu mubukkale bwesu boonse kwiinda mulunya, busofwaazi alimwi akuupa-upa ameso ikudumide akati kabantu bamazubaano.
Aboobo, Paulo wakakombelezya Banakristonyina “[k]utakozyanizigw[a] aziyanza zyaciindi ecino.” (Ba-Roma 12:2) Sikusandulula Bbaibbele umwi wakaamba boobu majwi aaya aa Paulo: “Mutalekeli nyika kumusinikizizya mucikombole cayo.” (Ba-Roma 12:2, Phillips) Saatani uyoosolekesya kumusinikizizya mucikombole cakwe, mbubwena mbuli mubumbi wansiku mbwaakali kusinikizya bulongo mucikombole cijalwidwe kutegwa kudintwe bweengeengo mbwayanda kuti bukalibonye aabulongo. Saatani ulizijisi kale izibelesyo izijatikizya twaambo twacisi, makwebo, bukombi alimwi akulikondelezya kuti zicite mulimo oyo. Ino kumwaikizyenye buti kuyunga kwakwe? Kulimwaikide kapati mbubwena mbuli mbokwaamwaikide kuciindi camwaapostolo Johane. Johane wakati: ‘Inyika yoonse ikkede muzibi.’ (1 Johane 5:19; amubone alimwi 2 Ba-Korinto 4:4.) Ikuti naa mucidooneka kuti naa Saatani inga wakonzya kweena bantu akunyonganya kuyeeya kwabo, amuyeeye mbwaakazwidilila kucita boobo kumusyobo wabantu woonse mbouzulwa, ibana Israyeli, ibantu bakalyaabide kuli Leza. (1 Ba-Korinto 10:6-12) Sena icakabacitikila cilakonzya kumucitikila anywebo? Cilakonzya kucitika kuti naa mwalekelezya mizeezo yanu kuti yeenwe a Saatani.
Amucizyibe Cili Mukucitika
Atwaambe kuti, inguzu ziyunga boobo ziyooendelezya kuyeeya kwanu lilikke nomwazizumizya. Mubbuku lyakwe litegwa The Hidden Persuaders, Vance Packard wakati: “Tucijisi nguzu zinji zyakulikwabilila kuli basikuyunga [batalibonyi]: tulakonzya kusala kutayungwa. Muziimo zinabunji tucikonzya kulisalila, alimwi tatukonzyi kuyungwa kapati kuti katuzizyi zili mukucitika.” Eci cilabeleka mukumwaya makani aakubeja alimwi aalweeno.
Aino, ikutegwa muzyibe “cili mukucitika,” mweelede kucenjela akutobela zintu zigwasya. Imizeezo iili kabotu, mbubonya buyo mbuli mubili mubotu, yeelede kubambwa kabotu kutegwa ibeleke kabotu. (Tusimpi 5:1, 2) Ikutazyiba zintu kulakonzya kunyonyoona mbubonya buyo mbuli kuzyiba makani aataluzi. Aboobo nokuba kuti cilayandika kukwabilila miyeeyo yanu kuzintu zibyaabi abusyaabusongo, amusole kutacimwa akutanyansya lulayo loonse naa makani ngomwaambilwa.—1 Johane 4:1.
Ikuzulwa kutwaambo tusalede taceelene akuyungwaa mizeezo mibyaabi iitaluleme. Imwaapostolo Paulo wakacenjezya mulombwana Timoteo kuti lyoonse kapakamana kujatikizya “bantu babi abasikulibeja [bakali kunoobija akubijila limwi] banooena akweenwa.” Pele Paulo wakayungizya kuti: “Eno yebo kojatisya makani ngowakaiya azintu nzozuminisya, nkaambo ulibezi abo abakakwiisya ngao.” (2 Timoteo 3:13, 14) Mbwaanga kufwumbwa nzyomubikka mumizeezo yanu ziyoomuyunga munzila imwi, icintu cipati ‘nkuzyiba aabo ibamuyiisya zintu ezyo,’ ikusinizya kuti mbantu babikkila maanu kubukkale bwanu, ikutali bwabo.
Ndinywe nomusala. Mulakonzya kusala ‘kukozyanisigwa aziyanza zyaciindi ecino’ kwiinda mukuzumizya busyaabusongo bwanyika ino azyeelelo zyayo kweendelezya kuyeeya kwanu. (Ba-Roma 12:2) Pele inyika eyi kwiina noinga yamugwasya munzila iili yoonse. Aboobo mwaapostolo Paulo ucenjezya kuti: “Amucenjele kuti kutabi muntu naba omwe uumuyunga kukusongwaalasongwaala akukwaamba makani aatawo aazwa kutunsiyansiya twabantu.” (Ba-Kolose 2:8) Ikusinikizigwa mucikombole ca Saatani munzila eyi, naa ‘ikuyungwaa muntu,’ takukatazyi pe. Kuli mbuli busi bwatombwe bwazwa kumuntu uumbi. Mulakonzya kuyambukilwa kufwumbwa kuti mwayoya muya uusofweede.
Munzila imbi, mulakonzya kulikasya kuyoya “muuya” oyo. (Ba-Efeso 2:2) Amutobele lulayo lwa Paulo lwakuti: “Amusanduke kukucitululwa kwamyoyo yanu, kuti mukasimpikile makani ngaayanda Leza, makani mabotu aatambulika aalondokede.” (Ba-Roma 12:2) Eci ciyandika kusoleka kapati. (Tusimpi 2:1-5) Amuyeeye kuti, Jehova kwiina nasisa makani aali woonse kubantu. Ulaazibya makani oonse aayandika, pele ikutegwa mugwasyigwe kulingawo, mweelede kwaateelela akwaazumizya kweendelezya kuyeeya kwanu. (Isaya 30:20, 21; 1 Ba-Tesalonika 2:13) Mweelede kulisungula kunooyeeya kasimpe mumizeezo yanu ikajanika mu “magwalo aasalala,” Ijwi lya Leza lyakasololelwaa muuya nkokuti, Ibbaibbele.—2 Timoteo 3:15-17.
Amukutobele Kubumba Nkwacita Jehova
Ikumvwa cakulisungula nkomweelede kucita ikuti kamuyanda kugwasigwaa kubumba kwa Jehova kwakatondezyegwa kabotu Jehova naakaambila musinsimi Jeremiya kuti aswaye ŋanda yamubumbi. Jeremiya wakalibonena mubumbi mbwacinca mizeezo yakwe kujatikizya cakucita kucilongo comwe icilongo ncaakali kusola kubumba ‘nocakabija mujanza lyamubumbi.’ Mpoonya Jehova wakati: “Sa nsikonzyi kumucitila anywebo mbubonya mbuli oyu mubumbi mbwacita, O luzubo lwa-Israyeli? . . . Amubone! Mbubonya mbuli bulongo mbubuli mumaanza aamubumbi, anywebo muli mumaanza aangu, O luzubo lwa-Israyeli.” (Jeremiya 18:1-6) Sena eci caamba kuti ibantu bamu Israyeli bakali buyo mbuli zilwi zyabulongo bukandidwe bunyina ibuumi mumaanza aa Jehova kuti ababumbe mbuli mbwayanda kuba zilongo ziindene-indene?
Jehova kwiina nabelesya nguzu zyakwe kusinikizya bantu kucita zintu nzyobatayandi; naa kuti nguucitya kuti zintu zibije, mbuli mbokunga kwaambwa kujatikizya mubumbi muntunsi. (Deuteronomo 32:4) Ikunyongana kulaboola ciindi abo mbasola kubumba Jehova munzila iiluzi nobakaka busololi bwakwe. Ooku nkokwiimpana kupati kuliko alindinywe acilwi cabulongo bukandidwe cinyina buumi. Mulijisi nguzu zyakulisalila. Ikuti naa mwazibelesya, mulakonzya kusala kutobela kubumbwaa Jehova naa kukukaka acaali.
Alapa kuyeeya kaka makani aya! Ncibotu kapati kaka ikuteelela jwi lya Jehova muciindi cakusanka cabusicinguni kuti, “Kwiina muntu weelede kundaambila cakucita”! Toonse tuyandika busolozi bwa Jehova. (Johane 17:3) Amube mbuli sintembauzyo Davida iwakapaila kuti: “Kondizibya inzila zyako, O Jehova; kondiiyisya myeendelo yako.” (Intembauzyo 25:4) Amuyeeye ncaakaamba Mwami Solomoni naakati: ‘Imusongo uyooswiilila akuliyungizizya lwiiyo, asimaanu uyoolijanina lulayo.’ (Tusimpi 1:5) Sena mulaswiilila? Ikuti kamucita obo, nkokuti ‘maanu ayoomubamba, bupampu buyoomutabilila.’—Tusimpi 2:11.