Ino Mbuti Jesu Mbwakonzya Kucinca Buumi Bwanu?
JESU KRISTO wakali Mwiiyi Mupati wakali kukkala ku Palestini myaka iitandila ku 2,000 yainda. Ibwana bwakwe tabuzizilwe kapati. Pesi cilizizilwe kapati kwaamba kuti naakali amyaka iitandila ku 30, wakatalika mulimo ‘wakulungulula bwini.’ (Johane 18:37; Luka 3:21-23) Basikwiiya bone ibakalemba makani aabuumi bwakwe baamba buumi bwakwe mumyaka yotatwe acisela camwaka yakatobela.
Naakali kucita mulimo wakwe Jesu Kristo, wakapa basikwiiya bakwe mulawo walo uukonzya kumana mapenzi aamunyika yoonse. Ino oyu wakali mulawo nzi? Jesu wakati: “Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya.” (Johane 13:34) Ee iluyando ndolukonzya kumana mapenzi manji-manji aamuntu. Iciindi cimwi naakabuzyigwa Jesu kujatikizya mulazyo mupati wakavwiila kuti: “Yanda Leza Jehova wako amoyo wako woonse, amoya wako woonse, amumiyeeyo yako yoonse. Ngooyu mulazyo mutaanzi mupati. Awabili ulikozyene awalo, ngooyu, Yanda mweenzinyoko mbuli mboliyanda omwini.”—Matayo 22:37-40.
Jesu wakatutondezya kwiinda mukwaambaula amumicito mbotweelede kuyanda Leza alimwi abantuma. Atulange-lange zikozyanyo zisyoonto akubona ncotunga twayiya kulinzizyo.
Iziyiisyo Zyakwe
Mumakani aakwe amwi aazizilwe kapati, Jesu Kristo wakaambila basikwiiya bakwe kuti: “Taakwe muntu uukonzya kumanina bami bobile milimo, nkaambo ulasula umwi, ulayanda umwi, na ulakakatila umwi, ulasampaula umwi. Tamukonzyi kubelekela Leza antoomwe alubono.” (Matayo 6:24) Sena ciiyo ca Jesu cakuti tumubikke ambele Leza mubukkale bwesu cicibeleka asunu ciindi ibantu banji nobasyoma mumali kuti ngaakonzya kumana mapenzi oonse? Masimpe, tuyandika kubaa mali kutegwa tucikonzye kupona. (Mukambausi 7:12) Pesi ikuti naa “Lubono” twalucita kuti lube mwami wesu, nkokuti “kuyandisya lubono” kuyootweendelezya mubuumi bwesu boonse. (1 Timoteo 6:9, 10) Ibanji ibawida mukooze aka basika nkobasweekelwa mukwasyi akunyonganya buumi bwabo kwiinda mumalwazi nokuba kufwa buya.
Kulubazu lumwi, ikusyoma muli Leza kuti ngo Mwami wesu cipa kuti buumi bwesu bube ampindu. Mbwali Mulengi, walo alikke nguujisi Kasensa kabuumi, aboobo ngotweelede kukomba. (Intembauzyo 36:9; Ciyubunuzyo 4:11) Abaya bayiya bube bwakwe alimwi akutondezya luyando kulinguwe balakulwaizigwa kubamba milazyo yakwe. (Mukambausi 12:13; 1 Johane 5:3) Kwiinda mukucita boobo tulaligwasya tobeni.—Isaya 48:17.
Mumakani aa Mulundu, Jesu alimwi wakayiisya basikwiiya bakwe mbobeelede kutondezya luyando kubantunyina. Wakati: “Zintu zyoonse zili buti nzimuyanda kuti bantu bamucitile, anywebo amubacitile nzizyonya.” (Matayo 7:12) Ibbala lyakuti “bantu” ndyaakabelesya Jesu awa lilabikkilizya abasinkondonyoko boonse. Mumakani aaya ngoonya, wakaamba kuti: “Amuyande basinkondonyoko, amubakombele bamupenzya.” (Matayo 5:43, 44) Sena luyando luli boobu inga talumani mapenzi manji ngotujisi sunu? Musololi waba Hindu Mohandas Gandhi mbwaakali kuyeeya oobo. Wakamvwugwa kaamba kuti: “Ciindi toonse [netuya] kutobela ziyiisyo zyakaambwa a Kristo mu Makani aaya aa Mulundu, tunooli katwaamanide mapenzi . . . aanyika yoonse mbwiizulwa.” Njiisyo zya Jesu zijatikizya luyando ikuti naa zyatobelwa, mapenzi ngajisi muntu oonse alakonzya kumana.
Milimo Yakwe
Jesu taakayiisya buyo luzibo lwini-lwini kujatikizya mbolweelede kutondezegwa luyando, elyo wakali kucita anzyaakali kuyiisya. Mucikozyanyo, wakabikka ziyanda bamwi ambele, izyakwe zyakaboola munsi. Buzuba bumwi Jesu abasikwiiya bakwe bakajisi bubi kugwasya bantu cakuti teebakajisi aciindi cakuti balye cakulya. Jesu wakabona kuti basikwiiya bakwe bakali kuyandika kulyookezya asyoonto, aboobo wakabatola kubusena bwakumbali kutakwe bantu. Pele nobakasika kubusena ooko, bakajana makamu-makamu aabantu alabalindila. Nomwakali ndinywe, ino nomwakacita buti kubona makamu aabantu bayanda kuti bagwasigwe kakuli nywebo muyanda kuti mulyookezye asyoonto? Jesu “wakabafwida luzyalo” “nkabela wakatalika kuba[y]iisya makani manji.” (Marko 6:34) Luyando ndwaakajisi Jesu kuli bamwi lyoonse lwakali kumupa kuti abagwasye
Jesu wakabacitila zintu zinji bantu kunze lyakubayiisya. Wakacita zintu zyakubagwasya. Mucikonzyanyo, cimwi ciindi wakasanina bantu bainda ku 5,000 ibakali kuswiilila makani aakwe kusikila kumazuba kwini-kwini. Kuzwawaawo alimwi wakaakusanina nkamu imbi mpati—kwaciindi eci bakali kwiinda ku 4,000—ibakali kuswiilila makani aakwe kwamazuba otatwe, elyo bakamaninwa cakulya. Aciindi cakusaanguna wakabelesya mikamu iili musanu atuswi tobile alimwi icabili wakabelesya mikamu iili ciloba kubikkilizya atuswi tuce. (Matayo 14:14-22; 15:32-38) Mmaleele? Ee, wakali sikucita maleele.
Jesu alimwi wakaponya abantu banji bacisidwe. Wakaponya boofwu, ibalemene, abasicinsenda abasinke matwi. Amubone kuti wakababusya abafwide! (Luka 7:22; Johane 11:30-45) Aciindi cimwi sicinsenda umwi wakamukumbila kati: “Kuti koyanda, ulakonzya kundisalazya.” Ino wakacita buti Jesu? “Mpawo wakamufwida luzyalo, watambika ijanza lyakwe, wamwaampa, wamwaambila kuti, Ndazumina, kosalazigwa.” (Marko 1:40, 41) Kwiinda mumaleele aya Jesu wakatondezya luyando lwakwe kubalwazi.
Sena cilamuyumina kusyoma maleele ngaakacita Jesu? Bamwi tabasyomi. Ncomweelede kuziba ncakuti Jesu wakacita maleele akwe kubuleya. Nobaba basikumukazya ibakali kumuyandawida mulandu ciindi aciindi taakwe nobakakazya kuti wakali sikucita maleele. (Johane 9:1-34) Kunze lyaboobo, imaleele akwe akali amulimo. Akagwasya bantu kuti bamuzibe kuti Ngonguwe wakatumwa a Leza.—Johane 6:14.
Jesu taakali kulisumpula mwini kwiinda mukucita maleele. Pele wakalemeka Leza, ikwakali Kuzwa nguzu nzyaakajisi. Ku Kapernauma cimwi ciindi wakali muŋanda yakazwide bantu. Muntu uuyuminide mubili wakayanda kuti aponesegwe pesi wakakakilwa kunjila mukati. Aboobo beenzinyina bakamulengelezya abulo kwiinda aciluli. Naakabona lusyomo lwabo, Jesu wakamuponya muntu wakayuminide mubili. Mpoonya bantu ‘bakatembaula Leza’ kabati: “Tatuna kabwene kali bobuya.” (Marko 2:1-4, 11, 12) Maleele aa Jesu akapa kuti Jehova Leza wakwe atembaulwe alimwi akagwasya babaya bapengede.
Ikuponya balwazi kwiinda mumaleele teecakali ncecintu mumulimo wa Jesu. Umwi wakalemba zyamakani abuumi bwa Jesu wakapandulula kuti: “Ezi zyakalembwa kuti mukasyome kuti Jesu ngu-Kristo, Mwana a-Leza, akuti kukusyoma mukabe abuumi muzina lyakwe.” (Johane 20:31) Ee, Jesu wakaboola aansi kutegwa bantu basyoma bakabe abuumi.
Cipaizyo Cakwe
Inga mwabuzya kuti ‘sena Jesu wakaboola aansi?’ ‘Ino wakazwida kuli?’ Jesu lwakwe wakati: “Ndaseluka kuzwa kujulu, takuli kucita ncenjanda ndemwini, pele nkucita luyando lwayooyo uwakandituma.” (Johane 6:38) Wakaliko kale kali Mwana a Leza simuzyalwa alikke katanaba muntunsi. Ino makanze Ayooyo wakamutuma aansi akali abuti? Umwi wabalembi ba Makani Mabotu Johane waamba kuti “Leza mbwaakayandisya nyika, wakapa Mwaanakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Ino eeci cakakonzyeka buti?
Ibbaibbele lilatwaambila mbuli lufwu mbolwakaba cintu citakwe ambocicitwa amuntu. Ibantu bakusaanguna bobile Leza wakabapa bulangizi bwakupona kukabe kutamani. Pele bakasala kuzangila Mulengi wabo. (Matalikilo 3:1-19) Eeyi ntaamu yakabwezegwa cakaba ncecinyonyoono cakusaanguna kumuntu, aboobo ibana ba Adamu a Eva bakakona cisubulo citayandiki calufwu. (Ba-Roma 5:12) Kutegwa bantu babe abuumi bwini-bwini, cibi alimwi alufwu zyeelede kugwisigwa.
Taakwe naba omwe wasayaansi ukonzya kugwisya lufwu kwiinda mukubambulula akucinca bubambe bwaluzyalo. Pesi walo Mulengi wamuntu ulizi nzila yakucitya kuti bantunsi ibamvwa balondoke kutegwa bakakkale kukabe kutamani. Eeyi nzila mu Bbaibbele yiitwa kuti cinunuzyo. Ibantu bobile bakusaanguna bakalisambala beni antoomwe abana babo mubuzike bwacibi alimwi alufwu. Bakacincana buumi bulondokede bwabantu bamvwida Leza abuumi butayendelezegwi a Leza kutegwa kabalisalila beni cibi acibotu. Ikutegwa buumi bwabuntunsi bulondokede bupilusigwe, kwakayandika kubbaddela cintu ceelene kumpindu abuumi bwabuntunsi bulondokede bwalo mbobakasowa bazyali besu bakusaanguna. Akaambo kakuti bakakona buumi butalondokede, bantunsi teebakeelela ikupa cintu eco.—Intembauzyo 49:7.
Aboobo Jehova Leza wakabweza ntaamu kuti atugwasye. Wakalonzya buumi bulondokede bwa Mwanaakwe simuzyalwa alikke akubutola mwida lyanakalindu ooyo wakazikuzyala Jesu. Makumi-makumi amyaka aainda, mulakonzya mwakali kukakazya kaambo aka kakuzyala kwanakalindu oku. Pesi sunu ibasayaansi bacikonzya kupanga zinyama kwiinda mukubweza luzyalo kuzwa kucinyama cimwi akubikka mucinyama cimbi. Aboobo nguni uunga wadooneka kuti Mulengi ulijisi nguzu zyalo ziinda zyeezyo nzyobajisi bantunsi zyakupanga zinyama?
Mbwaanga lino buumi bwabuntunsi bulondokede bwakabako icintu cakuuzya bantu kuzwa kucibi alufwu cakajanika. Pele ooyu mwana muvwanda Jesu iwakazyalilwa aansi ano wakali kuyandika kuti akomene akuba “musilisi” uukonzya kupa “musamu” uponya malwazi abantunsi. Wakacita obo kwiinda mukupona ibuumi bulondokede, buumi butakwe cinyonyoono. Jesu taakabona buyo mapenzi ngobakalaawo bantunsi balaacinyonyoono, pele wakainda amumapenzi ngotujisi tobantu. Eci cakapa kuti abe musilisi ulaalweetelelo lunji kapati. (Ba-Hebrayo 4:15) Maleele ngaakacita aakuponya balwazi ciindi naakali abuumi anyika, akatondezya kuti ulayanda kuponya balwazi alimwi ulijisi anguzu zyakucita boobo.—Matayo 4:23.
Naakabeleka mulimo wakwe kwamyaka yotatwe acisela, Jesu wakajaigwa abasikumukazya. Wakatondezya kuti muntu uulondokede ulakonzya kuzumanana kumvwida Mulengi nomuba mumasunko mapati. (1 Petro 2:22) Ibuumi bwakwe bulondokede ncecakaba ncecinunuzyo cakununuzya bantunsi kuzwa kucinyonyoono alimwi alufwu. Jesu Kristo wakati: “Taakwe uuli aluyando ulwiinda olu, kuti muntu atulile beenzinyina buumi bwakwe.” (Johane 15:13) Mubuzuba bwatatu kuzwa naakafwa, Jesu wakabusigwa mubuumi bwamuuya alimwi nokwakainda mvwiki zisyoonto wakatanta kuya kujulu kwakulunga cinunuzyo kuli Jehova Leza. (1 Ba-Korinto 15:3, 4; Ba-Hebrayo 9:11-14) Kwiinda mukucita boobo, Jesu wakabelesya mpindu yacipaizyo cakwe cacinunuzyo kugwasya baabo bamutobela.
Sena inga mwayanda kugwasigwa munzila eyi iiponya malwazi aakumuuya, akumoyo alimwi aakumubili? Kutegwa mugwasigwe muyandika kubaa lusyomo muli Jesu Kristo. Ino nomutalibooleli nywebo nobeni ku Musilisi? Inga mwacita obo kwiinda mukwiiya zya Jesu Kristo alubazu ndwajisi lwakunununa bantunsi basyomeka. Bakamboni ba Jehova balilyaabide kumugwasya.
[Cifwanikiso icili apeeji 5]
Jesu ulayanda kuponya balwazi alimwi ulijisi nguzu zyakucita boobo
[Cifwanikiso icili apeeji 7]
Ino mbuti mbolumujatikizya lufwu lwa Jesu?