Nobazyali, ino Cikozyanyo Canu Ciyiisya nzi?
“Amube basikwiiya ba-Leza mbuli bana bayandwi, alimwi amweende cakuyandana.”—BA-EFESO 5:1, 2.
1. Ino Jehova wakabapa malailile aamusyobo nzi banabukwetene bakusaanguna?
JEHOVA Ngosikutalisya bubambe bwamukwasyi. Imukwasyi umwi aumwi nkouli akaambo kanguwe nkaambo ngowakatalisya mukwasyi mutaanzi alimwi wakapa nguzu zyakuti banabukwetene bakusaanguna bakonzye kuzyalana. (Ba-Efeso 3:14, 15) Wakapa ba Adamu a Eva imalailile aajatikizya mikuli yabo alimwi wakabapa coolwe cakuti babelesye maanu aabo mukweendelezya mikuli eyi. (Matalikilo 1:28-30; 2:15-22) Ba Adamu a Eva nobakabisya, ibukkale bwamikwasyi bwakaba bwamapenzi. Nokuba boobo, caluyando Jehova wakapa malailile aakali kuyoogwasya balanda bakwe ikulyeendelezya mubukkale buli boobo.
2. (a) Muunzila nzi Jehova mwakulwaizya lulayo lulembedwe antoomwe amalailile aakulwiidwa buyo? (b) Mmubuzyo nzi ngobeelede kulibuzya bazyali?
2 Mbwaanga Mmwiiyi wesu Mupati, Jehova tanaayiila buyo aakupa malailile aalembedwe kujatikizya nzyotweelede kucita azeezyo nzyotuteelede kucita. Muciindi cansiku wakabikkilizya malailile aalembedwe antoomwe amalailile aakulwiidwa kwiinda mubapaizi alimwi abasinisimi alimwi akwiinda muli basilutwe bamikwasyi. Mbaani mbali mukubelesya ikupa njiisyo ezyo zyakulwiidwa kuciindi cesu? Mbaalu Banakristo alimwi abazyali. Ikuti kamuli bazyali, sena mulaucita mulimo wanu wakuyiisya mukwasyi wanu munzila nzyayanda Jehova?—Tusimpi 6:20-23.
3. Ncinzi ncobanga bayiya basilutwe bamikwasyi kuli Jehova kujatikizya kuyiisya ikugwasya?
3 Ino malailile aali boobo ayelede kupegwa buti mumukwasyi? Jehova ulatupa cikozyanyo cibotu. Ulaamba kabotu-kabotu zintu zibotu azibi alimwi ulaziinduluka-induluka. (Kulonga 20:4, 5; Deuteronomo 4:23, 24; 5:8, 9; 6:14, 15; Joshua 24:19, 20) Ulabuzya mibuzyo iipa kuti muntu ayeeye cakuzinzibala. (Jobu 38:4, 8, 31) Kwiinda mukubelesya zikozyanyo alimwi azintu zini-zini zyakacitikila bantu, ulaijatikizya mizeezo yesu alimwi imyoyo yesu ulaibumba. (Matalikilo 15:5; Daniele 3:1-29) Nobazyali, iciindi nomuyiisya bana benu sena mulasoleka ikwiiya cikozyanyo eco?
4. Ncinzi ncotwiiya kuli Jehova kujatikizya ikupa lulayo, alimwi ino nkaambo nzi lulayo ncoluyandika kapati?
4 Jehova ulakakatila kuzintu ziluleme, pele ulaziteelela zintu zicitwa akaambo kakutalondoka. Aboobo katana basubula bantunsi batalondokede, ulabayiisya alimwi ulainduluka kucenjezya akubaibalusya. (Matalikilo 19:15, 16; Jeremiya 7:23-26) Ikuti naa wasubula, ulacita obo cansaizi, taciindizyi pe. (Intembauzyo 103:10, 11; Isaya 28:26-29) Ikuti naa obo mbotubeendelezya bana besu, citondezya kuti tulimuzyi Jehova alimwi ciyoobaubila-ubila abalo ikumuzyiba.—Jeremiya 22:16; 1 Johane 4:8.
5. Ncinzi ncobanga baiya bazyali kuli Jehova ikujatikizya kuteelela?
5 Mbwali Taata wakujulu siluyando, Jehova ulateelela. Kwiina naile kupa buyo milawo. Utukulwaizya kuti tumwaambile zyoonse zili kumyoyo yesu. (Intembauzyo 62:8) Alimwi ikuti nzyotumwaambila kazitali zibotu loko, kwiina natusinsa cakupozya kuzwa kujulu. Ulatuyiisya cakukkazika moyo. Aboobo luleelela kaka ilulayo lwamwaapostolo Paulo lwakuti: “Amube basikwiiya ba-Leza mbuli bana bayandwi”! (Ba-Efeso 4:31—5:1) Taciliboteli kaka cikozyanyo ncapa Jehova kubazyali mbobayabusola kuyiisya bana babo! Ncikozyanyo icinjila mumizeezo yesu alimwi icitukulwaizya kweenda munzila njayanda.
Ikukulwaizya Ikuyumizigwaa Cikozyanyo Canu
6. Mbuti ciimo alimwi acikozyanyo cabazyali mbozibakulwaizya bana babo?
6 Kunze lyanjiisyo zyakumulomo buyo, icikozyanyo cilakonzya kubakulwaizya kapati bana basyoonto. Ibazyali nobayanda nobatayandi, ibana babo baya kubaiya. Cilakonzya kubakonda bazyali, pele zimwi ziindi cilakonzya kubagambya kapati nobamvwa bana babo kabaamba zintu balo beni nzyobaamba. Ibukkale bwabazyali alimwi aciimo cabo nozitondezya kuti balaziyandisisya zintu zyakumuuya, ibana balakulwaizigwa kapati munzila mbotu.—Tusimpi 20:7.
7. Ino ncikozyanyo cili buti cabuzyali Jefita ncaakapa kumwanaakwe musimbi alimwi ncinzi cakacitika akaambo kaceeco?
7 Mu Bbaibbele, kulitondezyedwe kabotu-kabotu icikozyanyo cabazyali mbocibajatikizya bana. Jefita iwakabelesyegwaa Jehova kusololela bana Israyeli kukuzunda ba Amoni, wakali muzyali. Ibwiinguzi bwakwe kumwami waba Amoni butondezya kuti Jefita wakali kwaabala lyoonse imakani aajatikizya mbwaakali kubeendelezya bana Israyeli, Jehova. Wakali kukonzya kwaazubulula makani aayo kabotu-kabotu alimwi wakatondezya lusyomo luyumu muli Jehova. Cakutadooneka, icikozyanyo cakwe cakagwasya mwanaakwe musimbi ikubaa lusyomo alimwi amuuya wakulyaaba zyalo nzyaakatondezya naakazumina mulimo wakulyaaba kuli Jehova kali nabutema mubuumi bwakwe boonse.—Babetesi 11:14-27, 34-40; amweezyanisye Joshua 1:8.
8. (a) Nciimo nzi cibotu ncobakatondezya bazyali ba Samuele? (b) Ino eco cakamugwasya buti Samuele?
8 Samuele wakali cikozyanyo cibotu kacili mwana alimwi wakali kusyomeka kuli Leza kali musinsimi mubuumi bwakwe boonse. Sena muyanda kuti bana banu bakabe mbuli nguwe? Amulange-lange cikozyanyo icakatondezyegwaa bazyali ba Samuele, ba Elikana a Hana. Nokuba kuti ibukkale bwabo mumukwasyi tiibwakalondokede, lyoonse bakali kuunka ku Silo kuyookomba, kubusena ikwakali tente lyakukombela lisalala. (1 Samuele 1:3-8, 21) Amubikkile maanu kukulisungula kukanana nkwaakacita Hana mumupailo. (1 Samulele 1:9-13) Amubone mbobakalimvwa boonse bobile kujatikizya kuzuzikizya cisyomezyo cili coonse icicitwa kuli Leza. (1 Samuele 1:22-28) Icakutadooneka icikozyanyo cabo cibotu cakamugwasya Samuele ikubaa bube ibwakapa kuti atobele nzila iiluzi—neciba ciindi ibantu bakamweengelede balo bakali kulyaamba kuti mbakombi ba Jehova nobatakali kutobela nzila zya Leza. Mukuya kwaciindi, Jehova wakapa Samuele imukuli kuti abe musinsimi wakwe.—1 Samuele 2:11, 12; 3:1-21.
9. (a) Mbukkale nzi bwamumukwasyi ibwakapa kuti Timoteo agwasigwe? (b) Ino Timoteo wakazyooba muntu uuli buti kumbele?
9 Sena mulayanda kuti mwanaanu musankwa akabe mbuli Timoteo walo iwakayanzanaa mwaapostolo Paulo kacili mukubusi? Bausyi Timoteo tiibakali bakombi pe, pele banyina alimwi abanyinakulu bakatondezya cikozyanyo cibotu cakuyandisisya zintu zyakumuuya. Cakutadooneka eci cakagwasya kubamba ntalisyo mbotu mubuumi bwa Timoteo bwa Bunakristo. Twaambilwa kuti, banyina ba Eunike alimwi abanyinakulu ba Loisi bakajisi “lusyomo . . . lwinilwini.” Ibukkale bwabo bwa Bunakristo tiibwakali bwakuupaupa ameso; bakali kuzitobela ncobeni zyoonse nzyobakali kusyoma alimwi bakaziyiisya kumwanike Timoteo kuti kacita mbubonya. Timoteo wakatondezya kuti wakali muntu uukonzya kusyomwa alimwi wakali kubulanganya ncobeni bukkale bwabamwi.—2 Timoteo 1:5; Ba-Filipi 2:20-22.
10. (a) Nzikozyanyo nzi izitali zyamumukwasyi izinga zyanyonganya bana besu? (b) Ino tweelede kulimvwa buti nozilibonya zintu zibyaabi ezi muŋambawido naa muciimo cabana besu?
10 Izikozyanyo izibajatikizya bana besu tazijanwi buyo mumukwasyi. Kuli bana basicikolonyina, bamaiyi ibajisi mulimo wakubumba mizeezo yabana basyoonto, kuli bantu ibalimvwa kuti muntu woonse weelede kutobela zilengwa zyamukowa naa zyamucilawo cimwi, kuli basikuzwidilila muzisobano ibasyomwa kapati koonse-koonse alimwi kuli nkume-kume zyabantu ibalaa bukkale ibuvwula kwaambwa muli sikapepele. Alimwi tuulunzuma twabana balibonena kubija kwankondo. Sena ceelede kutugambya ikuti naa zintu zili boobu zyalibonya muŋabawido naa ciimo cabana besu? Ino tulimvwa buti nozyalibonya? Sena ikusinsa naa kubwenta inga kwalimanizya penzi? Muciindi cakubukaa kubweza ntaamu kujatikizya bana besu, sena inga tacikooinda kubota kulibuzya kuti, ‘Sena kuli nzila imwi mbotu njabelesya Jehova ikutweendelezya iinga yagwasya ikuzyiba mbolinga lyamanizyigwa kabotu ipenzi elyo?’—Amweezyanisye Ba-Roma 2:4.
11. Ino ciimo cabana inga cajatikizigwa buti ciindi bazyali babo nobalubizya?
11 Ee, ibazyali batalondokede talili lyoonse nobanooendelezya zintu munzila iiluzi. Banoolubizya muli zimwi. Ibana nobaazyiba makani aya, sena eci inga cacesya bulemu mbobajisi kubazyali babo? Cilakonzya kucitika, ikapati ikuti naa bazyali batalika kuubya-ubya kulubizya kwabo kwiinda mukweendelezya mukwasyi cabukali. Pele cilakonzya kwiimpana kapati icinga cacitika ikuti naa bazyali kabali bantu ibalibombya alimwi ibakuzumina kulubizya kwabo. Mukucita boobo balakonzya kupa cikozyanyo cibotu kapati kubana babo ibayandika kwiiya kucita boobo.—Jakobo 4:6.
Ncocikonzya Kuyiisya Cikozyanyo Cesu
12, 13. (a) Ncinzi bana ncobeelede kwiiya kujatikizya luyando, alimwi ino eci inga cayiisigwa buti munzila iigwasya kapati? (b) Nkaambo nzi ncociyandika kuti bana baiye kujatikizya luyando?
12 Kuli ziiyo zinji izigwasya izinga zyayiisigwa kabotu ciindi malailile aakulwiidwa naayendelaamwi acikozyanyo cibotu. Amulange eezi zisyoonto.
13 Ikutondezya luyando lwini-lwini: Iciiyo cimwi iciyandika kapati calo ceelede kuyumizigwaa cikozyanyo nimpindu yaluyando. “Tulayandana nkaambo Leza wakatuyanda kusaanguna.” (1 Joni 4:19, Ci) Kulinguwe nkokuzwa luyando alimwi ncecikozyanyo cipati. Oolu luyando lweendelezyegwaa mulawo ilwa a·gaʹpe lulaambwa mu Bbaibbele ziindi ziinda ku 100. Nceciimo icizyibya Banakristo beni-beni. (Johane 13:35) Iluyando luli boobo lweelede kutondezyegwa kuli Leza akuli Jesu Kristo alimwi ibantu beelede kulutondezya kuli umwi aumwi—nokuba kubantu ibatali balongwe besu. (Matayo 5:44, 45; 1 Johane 5:3) Luyando olu lweelede kuba mumyoyo yesu alimwi lweelede kutondezyegwa mubukkale bwesu katutana luyiisya kubana besu. Imicito ilaanguzu kwiinda majwi. Mumukwasyi, ibana beelede kutondezyegwa luyando abube bumbi bujatikizya kuyandana. Ikuti zintu ezi kazitako, ikukomena kwamwana takubi kabotu pe munzila yakumubili, mumizeezo alimwi amumoyo. Alimwi ibana beelede kubona mbolutondezyegwa luyando munzila mbotu ku Banakristonyina ibatali bamumukwasyi.—Ba-Roma 12:10; 1 Petro 3:8.
14. (a) Mbuti bana mbobanga bayiisigwa kucita mulimo mubotu uukkomanisya? (b) Mbuti mbocinga cacitwa eci mubukkale bwamukwasyi wanu?
14 Ikwiiya milimo: Kubeleka ncintu ciyandika kapati mubuumi. Ikutegwa muntu alimvwe kuti ulaampindu, weelede kwiiya kubeleka mulimo mubotu. (Mukambausi 2:24; 2 Ba-Tesalonika 3:10) Ikuti naa mwana wapegwa milimo yakucita yalo njaapegwa buyo malailile masyoonto kumane wabwentelwa akaambo kakuti tanaaicita kabotu, mwana oyo kwiina nanga waiya kubeleka mulimo mubotu. Pele ibana nobaiya kwiinda mukubelekaa bazyali babo alimwi kabalumbaizigwa muzintu nzyobacita kabotu, cakufwambaana balakonzya kwiiya kucita mulimo uukkomanisya. Ikuti naa cikozyanyo camuzyali caendelaamwi alunaanizyo, ibana tabakonzyi buyo kwiiya kucita mulimo pele bayooiya ambokulwanwa mapenzi, mbokuzumananwa mumulimo kusikila wamana alimwi ambokweendelezyegwa mibandi alimwi ambokusalwa zyakucita. Muciimo eci balakonzya kuyiisigwa kuzyiba kuti awalo Jehova ulabeleka, kuti ubeleka mulimo mubotu alimwi akuti Jesu ulamwiiya Wisi. (Matalikilo 1:31; Tusimpi 8:27-31; Johane 5:17) Ikuti naa mukwasyi ngwabasibulimi naa basimakwebo, bamwi banamukwasyi balakonzya kababelekela antoomwe. Ambweni imukaintu ulakonzya kuyiisya mwanaakwe musankwa naa musimbi kujika alimwi akulondola zintu bantu bazwaa kulya. Wisi uunga ubelekela kule amunzi ulakonzya kuyeeya kubaa milimo imwi abana bakwe amunzi. Cilagwasya kaka ibazyali nobatabikkili buyo maanu kukumanizyigwa kwamilimo mpoonya-mpoonya pele nobayeeya kugwasya bana babo kulibambila buumi kumbele!
15. Muunzila nzi mozinga zyayiisigwa ziiyo zijatikizya lusyomo? Amupe mukozyanyo.
15 Ikuzumanana kusyomeka ciindi camapenzi: Ilusyomo alwalo ncibeela ciyandika kapati mubuumi bwesu. Ilusyomo nolubandikwa muciiyo camukwasyi, ibana balakonzya kuyiisigwa mbolupandululwa. Alimwi balakonzya kubuziba ibumboni ibucitya kuti lusyomo lutalike kukomena mumyoyo yabo. Pele nobabona bazyali babo kabatondezya lusyomo luyumu mumasunko mapati, cilakonzya kujatikizya buumi bwabo boonse. Sikwiiya Bbaibbele umwi ku Panama wakakongwa kutandwa muŋanda kumulumaakwe ikuti wataleka kubelekela Jehova. Nokuba boobo, walo abana bakwe basyoonto bone wakali kweenda lyoonse musinzo wamakkilomita aali 16 kusikaa citisyini cabbaasi alimwi wakali kweenda abbaasi kwamakkilomita aambi aali 30 kuti asike ku Ŋanda ya Bwami yakali afwaafwi. Akaambo kakukulwaizigwa aacikozyanyo eco, ibantu ibasika ku 20 mumukwasyi wakwe baitobela nzila yakasimpe.
Ikuba Cikozyanyo Mukubala Bbaibbele Mazuba Oonse
16. Nkaambo nzi ikubala Bbaibbele abuzuba ikucitwaa mukwasyi ncokuyandika kapati?
16 Icilengwa comwe icigwasya kapati icinga cacitwaa mukwasyi uuli woonse—icilengwa iciyoogwasya bazyali alimwi iciyooba cikozyanyo cibotu cakuti bana babo batobele—ncilengwa cakubala Bbaibbele lyoonse. Naa cakonzyeka, amulibale Bbaibbele abuzuba. Takuli kukomena kwacibalo ncomubala ikuyandika kapati. Icilaampindu kapati nkubala kwalyoonse alimwi ambokucitwa kubala oko. Kubana, ikubala Bbaibbele kulakonzya kujatikizya akuswiilila mateepu aa Ibbuku Lyangu Lyamakani aa-Bbaibbele ikuti kaaliko mumwaambo wanu. Ikubala Jwi lya Leza abuzuba kutugwasya kubikka mizeezo ya Leza kumbele. Alimwi ikubala Bbaibbele oko nokucitwaa mukwasyi oonse ikutali amuntu omwe buyo, cilakonzya kugwasya mikwasyi yoonse mbwiibede ikweenda munzila nzyayanda Jehova. Icilengwa eci ncicakakulwaizigwa ku Miswaangano yakacitwa onoono ya “Kupona Munzila Njayanda Leza” mucisobano cakuti Nomikwasyi—Ikubala Bbaibbele Abuzuba Abube Mbobukkale Bwanu!—Intembauzyo 1:1-3.
17. Ino kubala Bbaibbele kwamukwasyi alimwi akupeta magwalo amwi aajisi twaambo tupati-pati inga zyagwasya buti kutobela lulayo luli ku Ba-Efeso 6:4?
17 Ikubala Bbaibbele kucitwaa mukwasyi woonse kuleendelana amakani mwaapostolo Paulo ngaakalemba mulugwalo lwakwe lwakasololelwaa muuya naakalembela Banakristo ku Efeso aakuti: “Numawisi, mutanooluvukili bana banu, pele amubalele mulwiiyo lwa-Mwami [Jehova] amumilazyo yakwe.” (Ba-Efeso 6:4) Ino eco caamba nzi? Ijwi lyakuti “mulwiiyo” lyaamba “kubikka mizeezo mukati”; aboobo bamawisi Banakristo bali mukukulwaizigwa kubikka mizeezo ya Jehova Leza mubana babo—ikugwasya bana ikuzyiba mizeezo ya Leza. Ikukulwaizya bana kupeta magwalo amwi imuli twaambo tupati-pati kulakonzya kugwasya mumakani aaya. Imbaakani njakucitya miyeeyo ya Jehova kuti yeendelezye kuyeeya kwabana ikutegwa zyoonse nzyobayanda alimwi abukkale bwabo bucebuce kazitondezya zyeelelo zyabunaleza lyoonse, ibazyali nobali aabana babo anobatali ambabo. Ibbaibbele ngomusemu wakuyeeya kuli boobo.—Deuteronomo 6:6, 7.
18. Nomubala Bbaibbele, ncinzi cinga cayandika kutegwa (a) mulimvwe kabotu ncolyaamba? (b) mugwasigwe kululayo luli mulindilyo? (c) mutobele ncoliyubununa kujatikizya makanze aa Jehova? (d) mugwasigwe kuzintu nzyolyaamba kujatikizya ziimo amicito yabantu?
18 Ee, ikuti katuyanda kuti Bbaibbele litweendelezye mubukkale bwesu, tweelede kucimvwa ncolyaamba. Kubanamunji eci inga cayandika kuti babale zibalo zimwi kwaziindi zinji. Ikutegwa tuzimvwisye zibalo zimwi, inga twayandika kwaalanga-langa mabalaamwi mubbuku lipandulula mabala naa mu Insight on the Scriptures. Ikuti naa lugwalo lumwi lujisi lulayo naa mulawo, amutole ciindi kukanana ziimo zidumide mazubaano izicitya kuti lugwalo olo lweelele. Mpoonya mulakonzya kubuzya kuti, ‘Ino kutobela lulayo olu inga kwatugwasya buti?’ (Isaya 48:17, 18) Ikuti lugwalo kalwaamba cibeela cimwi camakanze aa Jehova, amubuzye kuti, ‘Ino maumi eesu ajatikizidwe buti aceeci?’ Ambweni mubala cibalo caamba ziimo amicito yabantu. Mbuyumuyumu nzi mbobakajisi mubuumi bwabo? Ino bakabweendelezya buti? Ino cikozyanyo cabo inga catugwasya buti? Lyoonse kamujana ciindi cakubandika mbocitujatikizya cibalo mubuumi bwesu mazubaano.—Ba-Roma 15:4; 1 Ba-Korinto 10:11.
19. Kwiinda mukuba basikumwiiya Leza, ncinzi ncotunoopa kubana besu?
19 Tailiboteli kaka inzila eyo yakusitikizya miyeeyo ya Leza mumizeezo amyoyo yesu! Aboobo tuyoogwasigwa kuba “basikwiiya ba-Leza mbuli bana bayandwi.” (Ba-Efeso 5:1) Alimwi tuyooba cikozyanyo cibotu ibana besu ncobeelede kutobela.
Sena Mulayeeya?
◻ Mbuti bazyali mbobanga bagwasigwa acikozyanyo ca Jehova?
◻ Nkaambo nzi lulayo lwakunaanizigwa lupegwa bana ncolweelede kweendelanaa cikozyanyo cibotu cabazyali?
◻ Nziiyo nzi zimwi iziyiisigwa kabotu kwiinda mucikozyanyo cabazyali?
◻ Ino kubala Bbaibbele kwamukwasyi inga kwatugwasya buti?
[Zifwanikiso izili apeeji 20]
Ibanji balalibala Ibbaibbele abuzuba caantoomwe mumukwasyi