Ncinzi Ncayanda Jehova Kulindiswe Sunu?

“Ijwi mukumbi [lyakati], Ngooyu mwanaangu uuyandwa ngwinkondelwa, amuswiilile nguwe.”—MATAYO 17:5.

1. Ndilili Mulawo nowakazuzikizya mulimo wawo?

JEHOVA wakapa musyobo wa Israyeli Mulawo azibeela zyawo zinji. Kujatikizya mbabo, imwaapostolo Paulo wakalemba kuti: “Ezi zintu nzyaanze, nzyamubili, nzyakujatilila buyo mane kuciindi cakuyoobamba.” (Ba-Hebrayo 9:10) Imulawo nowakasololela basyeede akati kabana Israyeli kuti batambule Jesu kuti ngo Mesiya naa Kristo, wakazuzikizya mulimo wawo. Aboobo Paulo wakati: “Kristo nguumanya Mulao.”—Ba-Roma 10:4; Ba-Galatiya 3:19-25; 4:4, 5.

2. Mbaani ibakali kweendelezyegwaa Mulawo, alimwi ndilili nobakaanguluka kulinguwo?

² Sena eci caamba kuti Mulawo tuucibeleki kulindiswe sunu? Atwaambe kuti, ibanamunji tiibakali kweendelezyegwaa Mulawo, mbubwenya sintembauzyo mbwaakapandulula kuti: “[Jehova] ulakananina Jakobo ijwi lyakwe, aba-Israyeli imbeta zyakwe amilazyo yakwe. Taakwe cisi cimbi ncaakacitila obo pe. Tabezi imbeta zyakwe.” (Intembauzyo 147:19, 20) Leza naakabikka cizuminano cipya kwiinda mucituuzyo ca Jesu, nociba cisi ca Israyeli tiicakacili kuyandika kutobela Mulawo pe. (Ba-Galatiya 3:13; Ba-Efeso 2:15; Ba-Kolose 2:13, 14, 16) Ikuti naa Mulawo tuucibeleki, ino ncinzi Jehova ncayanda kuli baabo ibayanda kumubelekela sunu?

Ncayanda Jehova

3, 4. (a) Ncinzi Jehova ncayanda kulindiswe sunu? (b) Nkaambo nzi ncotweelede kutobela mumikondo ya Jesu?

³ Mumwaka wamamanino wamulimo wa Jesu, baapostolo bakwe ba Petro, Jakobo alimwi a Johane bakamusindikila kucilundu cilamfwu, kulangilwa kuti akali ansonje eeni aa Cilundu ca Herimoni. Ooko bakalibonena cilengaano cabusinsimi ca Jesu kali mubulemu bupati alimwi bakamvwa ijwi lya Leza ilwakwe kalyaamba kuti: “Ngooyu mwanaangu uuyandwa ngwinkondelwa, amuswiilile nguwe.” (Matayo 17:1-5) Eeco Jehova ncayanda kulindiswe—ikuswiilila Mwanaakwe akutobela cikozyanyo cakwe anjiisyo zyakwe. (Matayo 16:24) Aboobo, imwaapostolo Petro wakalemba kuti: “Kristo alakwe wakamucisilwa, wakamusiila cibonesyo, kuti mukatobele mumikondo yakwe.”—1 Petro 2:21.

⁴ Nkaambo nzi ncotweelede kutobela mumikondo ya Jesu? Nkaambo kakuti twamwiiya walo, calo eeci caamba kuti twayiya Jehova Leza. Jesu wakali muzyi kapati Wisi, mbwaanga wakakkala anguwe kwamyaka iitabaliki kujulu katanaboola anyika. (Tusimpi 8:22-31; Johane 8:23; 17:5; Ba-Kolose 1:15-17) Naakali anyika, cakusyomeka Jesu wakatondezya mbwabede Wisi. Wakapandulula kuti: “Ndaamba aya mbuli mbwandiisya Taata.” Atwaambe kuti, Jesu wakamwiiya kapati Jehova cakuti wakali kukonzya kwaamba kuti: “Oyo uwandibona, wamubona awalo Taata.”—Johane 8:28; 14:9.

5. Mmulawo nzi uuendelezya Banakristo, alimwi ndilili mulawo oyo nowakatalika kubeleka?

⁵ Ncinzi cijatikizidwe mukuswiilila Jesu alimwi amukumwiiya? Sena caamba kweendelezyegwaa Mulawo? Paulo wakalemba kuti: “Nintali kunsi ku-Mulao ndemwini.” Awa wakali kwaamba “bbuku lya-Mulongo wakalekale,” cizuminano ca Mulawo ncaakatangene aluzubo lwa Israyeli, Leza. Paulo wakazumina kuti wakali “kunsi ku-Mulao wa-Kristo.” (1 Ba-Korinto 9:20, 21; 2 Ba-Korinto 3:14) Cizuminano ca Mulawo cakaindi nocakamana, “mulongo mupya” wakatalika kubeleka kaujisi “mulao wa-Kristo” walo balanda ba Jehova boonse sunu ngobeelede kutobela.—Luka 22:20; Ba-Galatiya 6:2; Ba-Hebrayo 8:7-13.

6. Ino “mulao wa-Kristo” inga wapandululwa buti, alimwi ino tuutobela buti?

⁶ Jehova tanaakayanda kuti “mulao wa-Kristo” ulembwe mbuli mulawo, ikuulemba mutubeela-beela mbuli bwakalembedwe cizuminano ca Mulawo cakaindi. Oyu mulawo mupya wabasikutobela Kristo tuujisi mulongo mulamfwu waamba zintu zyeelede kucitwa aziteelede. Pele mu Jwi lyakwe, Jehova wakayobola zibalo zyone zibotu kapati izijatikizya buumi anjiisyo zya Mwanaakwe. Kunze lyaboobo, Leza wakapa muuya wakwe kuli basikutobela Jesu bamwi bakusaanguna kutegwa bape malailile aalembedwe aajatikizya kulilemeka kwamuntu, makani aamumbungano, kulilemeka mumukwasyi amakani aambi. (1 Ba-Korinto 6:18; 14:26-35; Ba-Efeso 5:21-33; Ba-Hebrayo 10:24, 25) Notweendelezya maumi eesu kucikozyanyo anjiisyo zya Jesu Kristo alimwi akutobela lulayo lwabalembi ba Bbaibbele bamumwaanda wamyaka wakusaanguna ibakasololelwaa muuya, tuli mukutobela “mulao wa-Kristo.” Eci Jehova ncayanda kuti bacite babelesi bakwe sunu.

Iluyando Mboluyandika

7. Ino Jesu wakacikankaizya buti cintu ciyandika kapati mumulawo wakwe aciindi capobwe lya Pasika lyamamanino kali abaapostolo bakwe?

⁷ Nokuba kuti luyando lwakali kuyandika mubweendelezi bwa Mulawo, asunu ngomusemu wamulawo wa Kristo. Ikaambo aka kakakankaizigwa a Jesu naakaswaangana abaapostolo bakwe kuti basekelele pobwe lya Pasika lyamu 33 C.E. Kweelana akufwiinsya makani nkwaakacita mwaapostolo Johane kujatikizya cakacitika imasiku ayo, imajwi aa Jesu aakaambwa camoyo woonse akajatikizya makani aaluyando ziindi zili 28. Kubaapostolo bakwe eci cakakankaizya cintu cipati naa ciyandika kapati camulawo wakwe. Cakukankaizya Johane wakatalisya makani aakwe aazintu ziyandika kapati zyakali kunoocitika imangolezya ayo kwiinda mukwaamba kuti: “Jesu mbwaali kuzi kuti ciindi cakwe casika kuti azwe munyika eyi aye kuli-Wisi, mbwaakali kubayanda bana bakwe abali munyika ino, wakabayanda mane kusikila kumamanino.”—Johane 13:1.

8. (a) Ncinzi cakatondezya kuti ikuzwangana akati kabaapostolo kwakazumanana? (b) Ino Jesu wakabayiisya buti baapostolo bakwe kujatikizya kulicesya?

⁸ Jesu wakali kubayanda baapostolo bakwe nokuba kuti kwiina naakazwidilila pe naakasoleka kubagwasya kulwana penzi ndyobakajisi lyakulombozya bweendelezi azyuuno zyabulemu. Kakucisyeede myeezi iili mbwiibede kuti basike mu Jerusalemu, ‘bakakazyanya kuti naa nguni wakali mupati wabo.’ Alimwi kabalaafwi kunjila mumunzi kupobwe lya Pasika, imazwanga aajatikizya zyuuno akabuka alimwi. (Marko 9:33-37; 10:35-45) Icakatondezya kuti ipenzi eli lyakazumanana ncintu cakacitika mbobakanjilila-njilila buyo baapostolo muŋanda yamujulu kuti balye Pasika wabo wamamanino caantoomwe. Aciindi eco kunyina wakalisungula kucita cilengwa cakusamausya beenzu icakusanzya matende aabamwi. Ikutegwa abayiisye ciiyo kujatikizya kulicesya, Jesu lwakwe wakaasanzya matende aabo.—Johane 13:2-15; 1 Timoteo 5:9, 10.

9. Ino Jesu wakazyeendelezya buti izyakacitika nolyakamana pobwe lya Pasika lyamamanino?

⁹ Nokuba kuti bakayiisigwa ciiyo eco, nolyakainda pobwe lya Pasika alimwi Jesu naakatalisya Ciibalusyo calufwu lwakwe lwakali afwaafwi, amubone cakacitika alimwi. Cibalo ca Makani Mabotu ngaakalemba Luka caamba kuti: “Kwakaba kuzumanana akati kabo kwakuti, Ino nguuli akati kesu uuyeeyegwa kuti ngomupati?” Muciindi cakunyema akubabwentela baapostolo, Jesu wakabalaya caluzyalo kujatikizya mbobakeelede kwiimpana abeendelezi banyika ibalwanina zyuuno. (Luka 22:24-27) Mpoonya wakaamba kaambo kanga kaambwa kuti ndibbwe lili kumutwe wacooko mumulawo wa Kristo naakati: “Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya.”—Johane 13:34.

10. Mmulawo nzi ngwaakapa basikwiiya bakwe Jesu, alimwi ino wakali kujatikizya nzi?

¹⁰ Imasiku ngoonaayo Jesu wakatondezya mpolweelede kusika luyando lwa Bunakristo. Wakati: “Ngooyu mulao wangu kuti muyandane, mbubonya mbwendamuyanda. Taakwe uuli aluyando ulwiinda olu, kuti muntu atulile beenzinyina buumi bwakwe.” (Johane 15:12, 13) Sena awa Jesu wakali kwaamba kuti basikumutobela beelede kulisungula kufwida basyominyina ikuti kwayandika kucita boobo? Oobo mbwaakateelela Johane walo wakalibonena ameso aciindi eco, nkaambo kumbele wakazyoolemba kuti: “Lino luyando lwa-Leza tulalubona boobu, nkaambo [Jesu Kristo] wakatutulila buumi bwakwe, nkabela aswebo tuleelede kutula buumi bwesu nkaambo kabeenzuma.”—1 Johane 3:16.

11. (a) Ino mulawo wa Kristo tuuzuzikizya buti? (b) Ino Jesu wakapa cikozyanyo nzi?

¹¹ Aboobo tatuzuzikizyi mulawo wa Kristo kwiinda mukwiide kuyiisya bamwi kujatikizya nguwe. Ibukkale bwesu abwalo bweelede kuba mbuli bwa Jesu. Ncobeni, Jesu wakabelesya majwi mabotu aasalidwe kabotu mumibandi yakwe. Pele wakali kuyiisya akwiinda mucikozyanyo. Nokuba kuti Jesu wakali cilenge camuuya canguzu kujulu, wakalisungula kubeleka zyakali kuyanda Wisi anyika alimwi akutondezya mbotweelede kupona. Wakali muntu uulicesya, imubombe moyo alimwi siluzyalo, aabo ibakayumwide mikuli iiminya alimwi ibakadyaaminidwe wakabagwasya. (Matayo 11:28-30; 20:28; Ba-Filipi 2:5-8; 1 Johane 3:8) Alimwi Jesu wakakulwaizya basikumutobela kuti bayandane mbubwenya mbwaakabayanda walo.

12. Nkaambo nzi ncocinga caambwa kuti mulawo wa Kristo kunyina nouubya-ubya kuyanda Jehova?

¹² Ino luyando ndotujisi kuli Jehova—imulazyo mupati wa Mulawo—lujisi busena nzi mumulawo wa Kristo? (Matayo 22:37, 38; Ba-Galatiya 6:2) Sena mbwabili? Peepe! Ikuyanda Jehova akuyanda Banakristoma ziliswaangene kapati. Kunyina muntu uunga ulayanda Jehova cini-cini kakunyina kumuyanda imunyina awalo, nkaambo mwaapostolo Johane wakati: “Na muntu wati, Ndamuyanda Leza, nekubaboobo ulasula mweenzinyina, oyo mubeji. Nkaambo oyo uutayandi mweenzinyina ngwabwene takonzyi kuyanda Leza ngwatanabwene.”—1 Johane 4:20; amweezyanisye 1 Johane 3:17, 18.

13. Ncinzi cakacitika akaambo kakutobela mulazyo mupya wa Jesu nkobakatobela basikwiiya?

¹³ Jesu naakapa basikwiiya bakwe mulazyo mupya wakuti bayandane mbubwenya walo mbwaakabayanda, wakatondezya impindu yakali kuyoojanwa. Wakati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Johane 13:35) Kweelana a Tertullian iwakapona kakwiindide myaka iyiinda ku 100 Jesu kafwide kale, wakati iluyando lwabunyina lwa Banakristo bakusaanguna mbolwakabede obo. Tertullian wakazubulula mbobakali kwaamba bantu ibatakali Banakristo kujatikizya basikutobela Kristo kuti: ‘Amubone mbobayandana ambobalisungwide nokuba kufwida beenzinyina.’ Tulakonzya kulibuzya kuti, ‘Sena luyando luli boobo ndilalutondezya ku Banakristoma cakuti ndilalibonya kuti ndili umwi wabasikwiiya ba Jesu?’

Mbotulusinizya Luyando Lwesu

14, 15. Ncinzi cinga cacitya kuti kube buyumuyumu kutobela mulawo wa Kristo, pele ino ncinzi cinga catugwasya kucita boobo?

¹⁴ Cilayandika kapati kuti balanda ba Jehova batondezye luyando mbuli lwa Kristo. Pele sena cilamuyumina ikuyanda Banakristonyoko ibajisi tumpenda twakuliyanda? Mbuli mbotwabona kale, nobaba baapostolo bakakazyanya akusoleka kusumpula zintu nzyobakali kuyanda beni. (Matayo 20:20-24) Abalo bana Galatiya bakakazyanya muli cabo. Paulo naakamanizya kwaamba kuti iluyando lwakuyanda basimukoboma lwakazuzikizya mulawo, wakacenjezya kuti: “Pele na mulalumana akulyana, amucenjele kuti mutanyonyoonani.” Naakamana kwiimpanya milimo yanyama kumicelo yamuuya wa Leza, Paulo wakayungizya malailile aakuti: “Tutabi basikambotwembotwe, tutakalazyanyi, tutabi abbivwe umwi amweenzinyina.” Mpoonya mwaapostolo wakakulwaizya kuti: “Amunyampuzyanye mikuli, aboobo mulalondola mulao wa-Kristo.”—Ba-Galatiya 5:14—6:2.

¹⁵ Jehova nayanda kuti tutobele mulawo wa Kristo, sena waciindizya muzintu nzyayanda kulindiswe? Nokuba kuti inga caba cintu ciyumu kweetelela bantu ibatutukana akutupenzya mumizeezo, tuleelede ‘kuba basikwiiya ba-Leza mbuli bana bayandwi, alimwi akweenda cakuyandana.’ (Ba-Efeso 5:1, 2) Tweelede kuzumanana kulanga cikozyanyo ca Leza, mbwaanga “ulatondezya luyandisyo lwakwe kulindiswe boobo, nkaambo nitwakacili basizibi Kristo wakatufwida.” (Ba-Roma 5:8) Kwiinda mukuliyeeyela kugwasya bamwi kubikkilizyaa baabo ibatupenzya, tulakonzya kukkomana nkaambo kakuzyiba kuti tuli mukwiiya Leza akuti tutobela mulawo wa Kristo.

16. Ino luyando ndotujisi kuli Leza a Kristo tulutondezya buti?

¹⁶ Tweelede kuyeeya kuti tulalutondezya luyando lwesu kwiinda muzintu nzyotucita, ikutali buyo muzintu nzyotwaamba. Naba Jesu cimwi ciindi cakamuyumina kucita ncaakali kuyanda Leza nkaambo kazintu izyakajatikizidwe. Jesu wakapaila kuti: “Taata, kuti wayanda, gwisya cinywido eci kulindime.” Pele cakufwambaana wakayungizya ategwa: “Nokubaboobo akucitwe kuyanda kwako, kutabi kwangu.” (Luka 22:42) Naavwula buti mapenzi Jesu ngaakapenga, wakacita kuyanda kwa Leza. (Ba-Hebrayo 5:7, 8) Ikumvwa ncitondezyo caluyando lwesu alimwi kutondezya kuti inzila ya Leza twiibona kuti njenzila iyiinda kubota. Ibbaibbele lyaamba kuti: “Oku nkokuyanda Leza, kuti twabamba milazyo yakwe.” (1 Johane 5:3) Alimwi Jesu wakaambila baapostolo bakwe kuti: “Mwanoondiyanda, kamubamba milao yangu.”—Johane 14:15.

17. Mmulawo nzi uulibedelede ngwaakapa basikumutobela Jesu, alimwi ino tuzyi buti kuti ulabeleka akulindiswe sunu?

¹⁷ Kunze lyakulailila basikumutobela bakwe kuti kabayandana, mulawo nzi uulibedelede Kristo ngwaakabapa? Wakabalailila kuti bacite mulimo wakukambauka ngwaakabayiisizye. Petro wakati: “Wakatulailila kuti tukambaukile bantu, tulungulule.” (Incito 10:42) Cakutainda mumbali Jesu wakalailila kuti: “Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.” (Matayo 28:19, 20; Incito 1:8) Jesu wakatondezya kuti imalailile aali boobo akali kuzyoobeleka akuli basikumutobela bakwe sunu “kumamanino aaciindi,” nkaambo wakati: “Nkabela aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Daniele 12:4; Matayo 24:14) Ee, nkuyanda kwa Leza kuti tukambauke. Pele bamwi balakonzya kuyeeya kuti kuyanda nkwayanda Leza kuti tucite mulimo oyu nkuciindizya muzintu nzyayanda kulindiswe. Pele sena nkuciindizya ncobeni?

Ncoulibonya Mbuli Kuti Muyumu

18. Ncinzi ncotweelede kunooyeeya notupenga akaambo kakucita zintu Jehova nzyayanda kuti tucite?

¹⁸ Mbuli mbotwabona, Jehova wali kuyanda kuti bantu batobele zintu nzyayanda iziindene-indene mubukkale boonse. Alimwi mbubwenya mbuzyaandeene zintu nzyaali kuyanda kuti bacite, ayalo misyobo yamasukusyo iibacitikila iliindene-indene. Mwanaa Leza muyandwi wakacitikilwa masukusyo aainda kukatazya, mane limwi wakajaigwa munzila yalunya kapati nkaambo kakucita cintu Leza ncaakali kuyanda kuti cicitwe. Pele notupenga akaambo kakucita ceeco Jehova ncayanda kuti tucite, tweelede kuyeeya kuti tali nguwe pe uucitya masukusyo. (Johane 15:18-20; Jakobo 1:13-15) Ikuzanga kwa Saatani kwakaleta cinyonyoono, kupenga alufwu alimwi ngonguwe iwaleta bukkale kanjikanji bwacitya kuti cibe cintu ciyumu kucita zintu Jehova nzyayanda kuti babelesi bakwe bacite.—Jobu 1:6-19; 2:1-8.

19. Nkaambo nzi ncocili coolwe kucita zintu Leza nzyaatwaambila kuti tucite kwiinda mu Mwanaakwe?

¹⁹ Kwiinda mu Mwanaakwe, Jehova walailila kuti kuciindi ecino cakumamanino, babelesi bakwe beelede kwaambilizya nyika yoonse mbwiizulwa kuti cilikke ciyoomanizya kupenga koonse bantu nkobapenga mbweendelezi bwa Bwami. Eyi mfwulumende ya Leza iyoogwisya mapenzi oonse anyika—inkondo, milandu, bucete, kucembaala, kuciswa alimwi alufwu. Alimwi Bwami obu buyooleta nyika yaparadaiso yabulemu, mwalo mobayoobusigwa nobaba bafwide. (Matayo 6:9, 10; Luka 23:43; Incito 24:15; Ciyubunuzyo 21:3, 4) Taciliboteli kaka coolwe cakwaambilizya makani mabotu aazintu zili boobo! Aboobo cilasalala kuti kunyina buyumuyumu pe kujatikizya zintu Jehova nzyayanda kuti tuzicite. Tulakazyigwa, pele Saatani Diabolosi anyika yakwe mbabacitya zyoonse ezi.

20. Mbuti mbotunga twazwidilila mubuyumuyumu buli boonse ibuletwaa Diabolosi?

²⁰ Mbuti mbotunga twazwidilila mubuyumuyumu boonse ibuletwaa Saatani? Nkwiinda mukuyeeya majwi aaya lyoonse aakuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.” (Tusimpi 27:11) Jesu wakapa Jehova bwiinguzi kukusampaula kwa Saatani kwiinda mukusiya luliibo lwabuumi bwakujulu kuti azyoocite kuyanda kwa Wisi anyika. (Isaya 53:12; Ba-Hebrayo 10:7) Kali muntunsi, Jesu wakaliyumya mumasukusyo oonse ngaakaletelwa, mane alufwu acisamu cakupenzezya. Ikuti twamutobela mbwali Cikozyanyo cesu, aswebo tulakonzya kuliyumya mumapenzi alimwi akucita eco Jehova ncayanda kuti tucite.—Ba-Hebrayo 12:1-3.

21. Ino mulimvwa buti kujatikizya luyando ndwatondezya Jehova a Mwanaakwe?

²¹ Taluliboteli kaka luyando Leza a Mwanaakwe ndobatondezya kulindiswe! Akaambo kacituuzyo ca Jesu, ibantu bamvwa bajisi bulangizi bwakupona kukabe kutamani mu Paradaiso. Aboobo tutazumizyi cintu nociba comwe ikunyonganya bulangizi bwesu. Muciindi caboobo, umwi aumwi wandiswe abikkile maanu kuli ceeco Jesu ncaakacita kuti cikonzyeke, mbubwenya bwakacita Paulo iwakalemba kuti: “Mwana a-Leza, . . . wakandiyanda akulyaaba nkaambo kangu.” (Ba-Galatiya 2:20) Alimwi atutondezye kulumba kupati kuli Leza wesu siluyando, Jehova walo uutaciindizyi muzintu nzyayanda kuti tucite.

Inga Mwaingula Buti?

◻ Ncinzi ncayanda Jehova kulindiswe sunu?

◻ Kali abaapostolo bakwe imangolezya mubuzuba bwamamanino, mbuti Kristo mbwaakakankaizya mboluyandika luyando?

◻ Mbuti mbotunga twatondezya kuti tulamuyanda Leza?

◻ Nkaambo nzi ncocili coolwe ikucita zintu Jehova nzyatwaambila kuti tucite?

[Cifwanikiso icili apeeji 13]

Nciiyo nzi ncaakayiisya Jesu naakasanzya matende aabaapostolo bakwe?

[Cifwanikiso icili apeeji 15]

Notukazyigwa ikutola lubazu mukwaambilizya makani mabotu ncoolwe cikondelezya