2000—Sena Mmwaka Uulibedelede?
SENA kuli cintu cilibedelede kujatikizya mwaka wa 2000? Ibantu ibakkede mumanyika aabukuwa baubona kuti mmwaka wakusaanguna wacuulu catatu camyaka. Ikulibambila kunji kuli mukucitwa kwakuyoosekelela mwaka oyo. Inkoloko zipati zili mukupangwa kutegwa kazibala tuvwaluvwalu kusikila ciindi eco cuulu catatu camyaka caakutalika. Inkamu yabasikuzyana Mubuzuba bwa 31 December zili mukulibambila. Imasikkipa aasimbidwe zilembo izyaambilizya kumana kwamyaka iili cuulu ali mukusambalwa muzintoolo zyamuminzi azyamumadolopo.
Izikombelo zipati azisyoonto ziyoojatikizigwa mumapobwe aayootola mwaka woonse kaacitwa. Kumatalikilo aamwaka uuboola, Paapa Johane Paulo Wabili ulangilwa kuyoounka ku Israyeli kuyoosololela Bakatolika mupobwe litegwa “ndipobwe pati lya Cikombelo ca Bakatolika mumyaka iili cuulu.” Kweezyeezegwa kuti bamuzwamasi ibakombi alimwi abasikweenda buyo ibabalilwa kumweelwe waakati ka 2,500,000 a 6,000,000 balibambila kuyooswaya cisi ca Israyeli mwaka uboola.
Nkaambo nzi bantu banji boobo ncobakanza kuyooswaya cisi ca Israyeli? Kakananina paapa, imupati-pati waku Vatican wazina lya Roger Cardinal Etchegaray wakati: “Imwaka wa 2000 mmwaka wapobwe lyakusekelela Kristo abuumi bwakwe munyika ino. Aboobo cileelede kuti Paapa akaboole kuno.” Ino mwaka wa 2000 uswaangene buti a Kristo? Ibunji bwabantu bayeeya kuti imwaka wa 2000 ngomwaka uukkwanisya myaka iili 2,000 kuzwa ciindi Kristo naakazyalwa. Pele sena mbwini oobo? Tulabona naa mbombubo.
Imwaka wa 2000 ulainda kuyandika kuli basizikombelo bamwi. Basyoma kuti mumwaka nguwenya oyu uuboola, Jesu uyoopiluka ku Cilundu ca Elaioni akuti inkondo ya Harmagedoni iyaambwa kubbuku lya Ciyubunuzyo iyoolwanwa mumumpata wa Megido. (Ciyubunuzyo 16:14-16) Akaambo kazintu ezi nzyobalindila, imyaanda-myaanda yabantu baku United States bali mukusambala maanda abo alimwi abunji bwampasya zyabo elyo bali mukulongela ku Israyeli. Ikutegwa akagwasye baabo boonse ibatakonzyi kuzwa amaanda abo, imuvangeli umwi uudumide ku Amelika waambwa kuti wakasyomezya kuti uyookwaambilizya kupiluka kwa Jesu aatelevisyini!
Muzisi zyabukuwa, imakanze aakutalisya cuulu catatu camyaka ali mukuyaambele. Pele ibukkale bwabantu muzisi zimbi buli buyo mbuli lyoonse. Ibantu aba, nkokuti imweelwe mupati wabantu bamunyika tabasyomi kuti Jesu waku Nazareta ngowakali Mesiya. Alimwi tabakusyomi ikubala madeeti kubelesya B.C. alimwi a A.D.a Mucikozyanyo, iba Mozilemu banji babelesya kkalenda yabo beni, yalo iyaamba kuti mwaka uuboola unooli 1420 ikutali 2000. Ba Mozilemu babala myaka yabo kuzwaa deeti musinsimi Muhammad naakatija kuzwa ku Mecca kuya ku Medina. Atwaambe kuti, inyika yoonse mbwiizulwa ibantu babelesya misyobo iili 40 yamakkalenda.
Sena mwaka wa 2000 kulincowaamba kubana Banakristo? Sena buzuba bwa January 1, 2000 buyooba buzuba bulibedelede? Imibuzyo eyi iyooingulwa mucibalo citobela.
Bupanduluzi buyungizidwe
a Nokubelesyegwa B.C. alimwi a A.D. ikubala madeeti, izintu zyakacitika kacitanasika ciindi ibanji ncobati nceciindi Jesu naakazyalwa, alembwa kuti mmyaka ya “B.C.” (Before Christ, nkokuti katana Kristo); eezyo izyakacitika kuzwa ciindi eco madeeti alembwa kuti mmyaka ya “A.D.” (Anno Domini, nkokuti “mumwaka wa Mwami wesu.”) Pele basikwiiya bamwi balombozya kubelesya mabala aakuti “B.C.E.” (kacitana Ciindi Cesu) alimwi a “C.E.” (Ciindi Cesu.)